مسابقة الشعر العامى من 15 فبراير الى 28 فبراير 2013 . احدى مسابقات رابطة شعراء العامية المصرية

السلام عليكم ورحمة الله وبركاته

مسابقة الشعر العامى
من 15 فبراير 2013 حتى 28 فبراير
كل النصوص المشاركة تم وضعها بهذا الموضوع

وسنقوم بعمل احصائيات قريبا
وستعلن النتائج هنا بعد تقييم لجنة التحكيم
فتابعونا فى اول مشاركة هنا
_______________
نتمنى لكم جميعا التوفيق بالفوز
مع تحيات مجلس ادارة الرابطة
والشاعر محمد فتحى السيد

[center]
المتسابق رقم 1

انا روحى فدا الاوطان...!!
الصحفى : حاتم السمان
سوهاج - دار السلام - الجلايله
**********************
ياجرح انزف ولا يهمك
انا روحى فدا الاوطان

انا اللى صرخت بوم منك
انا الجانى وانا السجان

ما بين الجرح والتانى
حاجات يا ما وياما تبان

وطول ما الصدق جوانا
هيبقى حبنا عنوان

-- ياجرح انزف ولا يهمك
انا روحى فدا الاوطان

كتير ياما قسيت وقسيت
ودقت الظلم انا ألوان

وياما نمت انا بالجوع
ولا عرفولى يوم عنوان

ولسه الجوع بيكوينى
ولسه موش لاقيلى مكان

--ياجرح انزف ولا يهمك
انا روحى فدا الاوطان

ياجرح اصبر على ألمك
مصير الجرح يوم هيطيب

ومهما الظلم طال عهده
لابد لشمسه يوم وتغيب

انا مصرى ومن حقك
يامصر تكونى اغلى مكان

--ياجرح انزف ولا يهمك
انا روحى فدا الاوطان

خلاص الجرح بان سببه
خلاص شفت الدوا بعينى

امانه يامصر لو شفتى
وحش منهم تسامحينى

انا اللى يهد احلامك
دامش من جنسى او دينى

انا لو طلبو من أموت
فداكى الموت هيحيينى

امانه يامصر سامحينى
امانه عليك سامحينى
______________________
الصحفى حاتم السمان

[center]

المتسابق رقم 2

أنا مسافر
- شعر/عاصم السمان محمد
محافظة قنا
***********************
أنا مسافر
وخايف يوم يخونى الريح
وشايل حبى على ايدى
لطفل جريح
وفايت قلبى على بابك بيتألم
وواقف لأجل مايو دع
ويبكى والدموع نازلة على خدى
دموع غالية ...فراق يوجع
وقلبى يصيح على فراقك
كأنه ذبيح
أنا مسافر
وشايف فى السفر غربة
وساعة الغربة دى بيوم
ويومها سنين
أنا مسافر بادارى عذابى با البسمة
وقلبى حزين
أنا مسافر مهوش بيدي
زمن قاسى ..زمن خوان
أنا مسافر عشان خاطرك
عشان الطرحة والفستان
وغصب عنى راح اسيبك
وراح أودع وأنا عارف
سنين الغربة دى بتوجع
أنا مسافر
دعاك لى بالتساهيل
ماتبكيش
دانا خايف على عيونك
من المناديل
ماتنسيش
ليالى عشتها معاكى
أقول مواويل
هاتى ايدك على ايدى
بلاش ننسى كلام الليل
وأنا مسافر
وهبعتلك قليبى فوق جناح الطير
خلاص القطر هايصفر
أمانة يا قطر تستنى
باقيلى مع الحبيب كلمة
بسرعة هاقولها وها عجل
أتارى القطر مستعجل
حرمنى فى آخر اللحظات
ركبت القطر
واقليبى على فراقك بيتحسر
ودمعى على الحدود جارى
بحر بالحزن متكدر
على فراقك جفن عينى
ما يغمض لحظة ولا يقدر
يدارى الدمع ولا ينسى
كلام عنيك والبسمة
وأنا مسافر وغصب عنى
راح اسيبك.. وراح أودع
.........
الاسم / عاصم السمان محمد
المحافظة / قنــا
قصيدة خاصة بالمسابقة

[center]

المتسابق رقم 3
قصيدة ناصر
عطاء عبد الرحمن على

***********************
يا فارس المعركه
ياللي فطريقك للعدو الكاسر
وقت القتال إستقوا وإتجاسر
الموت على إديهم أهوَن من الرجعه
من غير فرس فوق الطريق خاسر
السيف بمقبض
والحديد له نـَصل
ما تفيدش أعزارك
بأصل وفـَصل
إنقذ حبيبتك
مـ الهلاك بالمَصل
وقول مدد يا سيدنا يا ناصر
مدد يا شيخ الأوليا الطاهرين
مدد يصحِّي الجُند لو ساهرين
مدد في ساعة الأزمه ما يضُرِّش
إقلع عبايتك على الطريق وإفرش
نورك هايسطع بعده ما نضلـِّش
نقطعلك المسافات فوق اللهب حافيين
إظهر يا ناصر في سما الميادين
وطنك بيصرخ وإحنا مش فاهمين
وطنك بيبكي .. نفكـَّره مـَغنى
صوت الرصاص بيـْوِش فـ دماغنا
وطموحنا ضيـَّعنا وجاب داغنا
إنفـُض عبايتك وإمسك لجام المُهر
شاور وفهمنا الوسخ مـ الطـُهر
وإعدل كفوف الحق والموازين
علمنا تاني نحب بعضينا
علمنا نكره بس أعادينا
ونعيشها بالحلوه وبالمُره
والعمر يفنى فـ مصر مش برَّه
تتلم تاني الأمه حوالينا
يا ناصر
لهذا اليوم بنهتدي بضيـَّك
بنشوف بعينك وإنت مش موجود
ما أحوج الأمَّه لبطل زيـَّك
يعدل بسيفـُه
وعـ الغلابه يجود
البطن صامت زمن
لكنها قادره
تطرحلنا ناصر جديد مولود
________________________
عطاء عبدالرحمن على

المتسابق رقم 4

محمد المسيري
أرجو الاشتراك في المسابقه
الاسم /محمد احمد المسيري
السن ثلاثون عاما المحافظة الغربية
القصيدة وشم العلم
******************
الحلم ملفوف بالكفن
في تابوت ومرفوع ع الكتوف
مرسومه دمعة دفنته
والخلق مصفوفة صفوف
قالو عليه انه اتقتل
علشان بطل
لكني لامح نظرته قبل الفراق
قالت كلام بره الكتاب
قالت لغة مافهمها الا اللي حلم
وحلمه تايه في الضباب
واشم علم
مستني ايه من اللي اتظلم
مستكتر الاهة عليه
ضاعت ملامح سكته
لما فقد صورة عينيه
مستني ايه
حامل تابوت
والضحكة قبل الفجر موت
والفجر مستعصي عليه
انه يسكن في السكوت
علشان كده
رافض يكون بالشكل ده
قرر ينام له الف عام
يمكن يكون جوه الزحام اصل المرض
لما الغرض يقتل نفوس
والحلم يقلب ميت كابوس
يبقي الكفن حلال عليه
واللي بايعين القضيه مشتاقين للحلم ليه
عل القلوب واشمين كفن
والسواد وقت الحداد
ده اصله نابع من القلوب
لا يوم شافوه ولا سلمو علي اللي راح
ده كان غريب عن موطنه لما سادو عل البراح
هو قال كل الكلام
فمتحلموش اني اصدق كدبكم
وأكدب الحلم اللي كان
شايفه متواري بتراب
حبة تراب من كدبكم حبة تراب من جهلكم
وحبة تراب من عضم طاهر قبلكم
ضحي بحياته
واللي حصل
انه انكسر بعد مماته
لما رأي سر خلوده
جاره مرمي في مقبرة
مدفون معاه وشم العلم
بقلم الشاعر/ محمد المسيري

*******************

المتسابق رقم 5

الإسم/كمال نور الدين الحمراني
محافظة/قنـــــــــــــــــــــــــــــــــــا
خاص بالمسابقـــــــــــــــــــــــــــه
........... ( كنت كارهك )
كنت كارهك..كنت هربان من ملامحك
ما انتي باعته لي رحمــــــــــــــــــــــك
كان صايبني في مقتلي..وتكتفــــــــي
وتغلغلي ..اسأل ما كنت تعللـــــــــــي
لمابقيتي تعلعلي.كنت الدوا وانا العليل
المبتلـــــــــــــــــــــــــــــــــــــــــــــــــــي
عارف بربه.........شيخ ولي لما لقانـي
مبتلي..قالي انت لازم تعتمــــــــــــــــر
ترجع وقلبك فيه شفاالرب قادرمقتـــدر
لبيت كلام سيدي الولــــــــــــــــــــــــي
رحت المدينه ف وقتها زرت النبـــــــــي
صليت في روضه المصطفــــــــــــــــــي
حسيت بقلبي انه صفاوالغمـــــــــــــــه
بدأت تنجلي..وحرمت من أبيار علـــــي
صليت في بيت الفوق علــــــــــــــــــي
طوفت وسعيت وهناك دعيت ع المفتري
هو اللي اخدك منناهو اللي منعك تنزلي
آن الآوان بقي حلحلي شعور الــــدهـب
وتكحلي..إقري كلامي ورتلـــــــــــــــــي
ما انت الدوا وانا العليل المبتلـــــــــــــي
بكره غيومك تنجلي والضحكه بيهاتزلزلي
قهر الزمن وكل من دفع التمــــــــــــــــن
اتاريه بعشقك مبتليـــــــــــــــــــــــــــــي
وانا العليل المبتلــــــــــــــــــــــــــــــــــي

كمال نور الدين الحمراني
قنا/ابوتشت/ال حمران...............خاص بالمسابقه
‏
*******************

المتسابق رقم 6
احمد رامى .. محافظة دمياط

و آخر كلمة فى بلادى هتبقا الموت
و أصل الموت ملوش آخر
مين اللى قال الموت سكوت
ده كل حاجه بيتولد منها الصمود
انا نفسى
أجيلك ارتمى فى حضنك
أدوق حنيتى منك
أكون ابنك
أموت لو هبقا على أرضك
و اعيش لو هو ده حلمك
ما فى الأول و فى الآخر
أنا منك
أنا عاصى
لكنى برده مش ناسى
فسامحينى فى احساسى
مأنا اللى دوقت نار ظلمك
فعاوزة ازاى اصوغ حبك
و انا مش عارف اطفيها
عشان فيها
شيطان بيلف حواليها
ولو تهدى يعليها
و تفضل قايده فيا النار
لكنى برده مش بنهار
فبيزيدها
و بيسيبنى أدوب فيها
فنتوحد
و ببقا النار
و لما انهار
يكون غضبى
فبحرق كل من قتلوا هتافاتى
و اوقف كل ساعاتى
و يعلا صوتى كالبركان
أنا آت
هعدى رغم أناتى
و يتحرك زمانى بيا
يرمينى على جسمك عشان احميه
لكنى بخاف من نارى تعلق فيه
فبرجع تانى لمكانى
و كل جراحى تنسانى
و اشوفك واقفه أدامى
و ماده ايديكى بالضمة
و تدمع عينك الفاهمة
بانى بقيت خبر ماضى
لكن راضى
و تخلط دمعتك ضحكه
عشان سامعه
روحى ليكى بتنادى
أنا ميت
عشانك انتى يا بلادى

الاسم / أحمد رامى
المحافظة / دمياط
خاص بالمسابقة

*******************

المتسابق رقم 7

يحيى مرتضى محمد . محافظة الاسكندرية
*******************
اخر حاجة كتبتها فى رثاء عمر"بائع البطاطة" :

سامحنى يا عمر ماقدرتش اوقف الزناد
مقدرتش اقلل عدد الشهدا اللى زاد
دمى ودمك بكرا ينباع فى المزاد
مع كل عيد بيتولد ينزل حداد
مع كل خطوة للامام نزداد بعاد
مع كل اصلاح نحصده نجنى فساد
معرفتش اسمع صرختك وسط السكات
مقدرتش اقول مين اللى مات
خانتنى دموعى خانى الحنين خانى الثبات
يالف رحمة عاللى مات
يا الف رحمة عالضمير ويالف رحمة عالحاجات
يالف رحمة عالشهامة والرجولة والذكريات
يالف رحمة عاللى مات
يالف رحمة عالمعانى الحلوة لما تموت ويااللى مات
يابذرة الحرية لما تنبت ف السبع سموات
دمك يا عمر يروى التراب يروى النبات
يخرج ويحلف ان زاد الظلم لازداد عناد
اسف يا عمر ولو ان اسفى مش هيرجع اللى مات
يا الف رحمة عالمعانى الحلوة والذكريات
يالف رحمة عالشباب اللى مات

ليحيى مرتضى محمد
محافظة الاسكندرية

المتسابق رقم 8
هشام عوض محمد . المنصورة . الدقهلية

خاص بالمسابقه
الاسم :- هشام عوض محمد
أقيم خارج مصر ...الاصل من المنصوره
__________________
بحبك موت
♥♥♥♥♥♥♥♥
هقول من عشقي فيه سطرين
♥♥♥♥♥♥♥♥♥♥♥♥♥♥♥♥♥♥♥♥♥♥
وتالتهم في سحر العــــــــــين
♥♥♥♥♥♥♥♥♥♥♥♥♥♥♥♥♥♥♥♥♥♥
ولو عـ القد هحكي ســــــــنين
♥♥♥♥♥♥♥♥♥♥♥♥♥♥♥♥♥♥♥♥♥♥
وأقول وأعيد وأقول تاني

وطبع الحسن عـ الخــــــــــدين
♥♥♥♥♥♥♥♥♥♥♥♥♥♥♥♥♥♥♥♥♥♥
وسهم بلحظ من رمـــــــــشين
♥♥♥♥♥♥♥♥♥♥♥♥♥♥♥♥♥♥♥♥♥♥
وقعت وكنت مـ العاشـــــJـــقين
♥♥♥♥♥♥♥♥♥♥♥♥♥♥♥♥♥♥♥♥♥♥
وقلت ياريت بتهوانــــي

وقولت إليه بشوق وحنيــــــــن
♥♥♥♥♥♥♥♥♥♥♥♥♥♥♥♥♥♥♥♥♥♥
منايا نكون سوا اتنـــــــــــــــين
♥♥♥♥♥♥♥♥♥♥♥♥♥♥♥♥♥♥♥♥♥♥
وبحر هواكي فيه دايــــــــــبين
♥♥♥♥♥♥♥♥♥♥♥♥♥♥♥♥♥♥♥♥♥♥
وقلبك كله علشانـــــي

وطبعك ليه فـ حبي ضــــــــنين
♥♥♥♥♥♥♥♥♥♥♥♥♥♥♥♥♥♥♥♥♥♥
وصعبك امتى ليا يلــــــــــــــين
♥♥♥♥♥♥♥♥♥♥♥♥♥♥♥♥♥♥♥♥♥♥
أكيد قلبك لناس تانـــــــJــــيين
♥♥♥♥♥♥♥♥♥♥♥♥♥♥♥♥♥♥♥♥♥♥
سكوتك نار وكويانـــــي

قالتلي طريق وفيه ماشــــــيين
♥♥♥♥♥♥♥♥♥♥♥♥♥♥♥♥♥♥♥♥♥♥
وقلبي إليك وليك جايـــــــــــين
♥♥♥♥♥♥♥♥♥♥♥♥♥♥♥♥♥♥♥♥♥♥
وغيرك ليه وأمتى وفــــــــــــين
♥♥♥♥♥♥♥♥♥♥♥♥♥♥♥♥♥♥♥♥♥♥
شوية صبر تلقانـــي

ولو كُرهك فـ قلبي يومـــــــــين
♥♥♥♥♥♥♥♥♥♥♥♥♥♥♥♥♥♥♥♥♥♥
لكان ردي أصد واهـــــــــــــــين
♥♥♥♥♥♥♥♥♥♥♥♥♥♥♥♥♥♥♥♥♥♥
وداد قلبي عليه ملاييــــــــــــن
♥♥♥♥♥♥♥♥♥♥♥♥♥♥♥♥♥♥♥♥♥♥
وحبك ليا غوانـــــــــــي

وبعد مـ كان فـ قلبي أنـــــــــين
♥♥♥♥♥♥♥♥♥♥♥♥♥♥♥♥♥♥♥♥♥♥
وكنت هموت عليه وحـــــــــزين
♥♥♥♥♥♥♥♥♥♥♥♥♥♥♥♥♥♥♥♥♥♥
لقيتني بقول يادوب حرفـــــــين
♥♥♥♥♥♥♥♥♥♥♥♥♥♥♥♥♥♥♥♥♥♥
بحبك بموت ياتعبانــــي

♥♥♥♥♥♥♥♥♥♥♥♥♥♥♥♥
*******************

المتسابق رقم 9
حماده صلاح الشافعى
ديرب نجم . محافظة الشرقية

خدوني اسير
بفيزا وعقد ومرتب قالولي كبير
خدوني اسير
وضحكوا علينا ووقعنا في فخ كبير
خدوني اسير
ورحت وشوفت بعنيا
عالم كدابه انا نيه
وباعوا وشتروا فيا،،لاني غريب
ساقوني المر في قزاز
وقالو فقير مالوش عازه
وجيت في وظيفه ممتازه،،ده انتاغريب
تجيبلك شقه وعروسه
دي بلدك فقر منحوسه
وخطه بجد مدروسه،،وسبني وقال
روح انتا وهاتلي ريالاتي
ياترجع تاني جزماتي
يامصري يااوطي مل واطي،ومش رجال
روح ارجع تاني للطينه
ده وسختولنا اراضينا
وجيتوا تسرقوا فينا،،يامصريين
تعالي خديني يابلادي
قوليلهم ابني وعمادي
ميتزلش كده قصادي،،ده ضي العين
قوليلهم ان انا معلم
وخت اديه علي السلم
عشان يكبر ويتعلم ،،ويبقي امير،،
خدوني اسير،،
خاصه بالمسابقه
حماده صلاح الشافعي ،
ديرب نجم ،الشرقيه،
وحاليا اسير ،،
*******************

المتسابق رقم 10
وائل شعبان طه . محافظة بنى سويف

خاص بالمسابقة
وائل شعبان طه محمود
محافظة بنى سويف / م : 01113763340

قصيدة "عالم وشوش"

فيه واحد تشوفه تحبه وانت ما تعرفـوش
وواحد يضحك فى وشـك وجوه قلبــه ...
حوش يا رب حوش
وناس ممكن تموت عشانـك ولا يخافــوش
وناس لو مت قدامها عــادى ما يتهــزوش
وفيه خلق بتقول اللى جواها وما يخبوش
وخلق لا بترحمك ، وتقول لغيرها ….
ما ترحموش !!
*****************************
وواحد ولا تعرفه ويقول عليك كداب ما تصاحبوش
وواحد ولا عمرك شوفته وتلاقى حضنه بالورود ..
مفروش
وناس تكدب وعارفه اننا عارفين ومـا يسكـتـوش
وناس صدقها فى عنيها باين ويسكتو وما ينطقوش
وخلق عاشرتك ، عرفتك وينهشوك ولا يكسفـوش
وخلق جايه من بعيد ، ولا تعرفك ، وتقول براءتك ..
باينه على الوشوش
*****************************

وواحد طول عمره صاحبك ، ومن لئمه
ما تفهموش
وواحد قابلته صدفه بس قلبه زى وشه
بشوش
وناس عايشه عشان تاخد وما بيـدوش
ونـاس شايلـه بين ضلوعها جبال ومـا
بيشكوش
وخلق تعبانه وشقيانه بذنب ما عملتهوش
وخلق هايصه فـى النعيـم وما تستهلـوش
*****************************
وواحد يتمسكن ولما يتمكن ما تشفهـوش
وواحد يبقى جنبك وعاشقك وما تحسـوش
وناس مش طايله ولو جريت جرى الوحوش
وناس من ظلمهم ومن الفساد رَبـت كـروش
وخلق ممكن تبيعك يا صاحبي عشـان قروش
وخلق عارفه انها زايله واخرتها تدخل نعوش
وواحد عالى فوق بس يشيلك بين الرموش
وواحد ولا حاجه وتلاقى ريشـه منـفـوش

عالم وشوش..عالم وشوش..عالم وشوش

*******************

المتسابق رقم 11
ناصر على توفيق . محافظة سوهاج

أنا ميـــــــــن ؟؟
========
أنا اللي الكل ظالمنى
سنين وسنين

ومتوكل على الباري
بعيون راضيين

أنا بالفقر عيروني
أنا بالجهل تهمونى
وسبوني ولاموني

ومهما يقولوا في حقي
أنا ثابت ليوم الدين
----------
أنا الهامة أنا القامة
وقصدي نبيل

أنا اللمة أنا البسمة
واصلي دليل

أنا تعرفني من لونى
أنا اللي كتافى حملوني
وغدونى وغطوني

ولما الضلمة تحاوطنى
بايدى انور القنديل
---------
أنا النخلة اللي ما تبخل
بطرح ف يوم

أنا الساقية اللي ما تخشى
لا خوف ولا لوم
أنا الشجرة اللي ما تهيِّف
أنا الى بكرَمى بتكيِّف
أنا القاسي أنا رهيَّف

في بحر الحق ترميني
تلاقيني أسد في العوم
-----------
أنا مصري أنا صعيدي
وارضي براح

بعيش يومي وأنا راضى
وأبات مرتاح

أنا اللي الحب بطاطيني
أنا اللي القمة تكفيني
أنا اللي بموت على ديني

ومهما الدنيا تديني
باتوكل على الفتاح
-------------
أنا المسلم مع القبطي
أنا العنوان

أنا الكرنك أنا هابو
أنا الانسان

أنا التاريخ ما ينسانى
أنا اللي العفة عنواني
ورحمة ربى ترعاني

وفى الضيقة وفى الفوقة
بلملم فرحة للغلبان
=========
ناصر على توفيق
2013 م
*******************

المتسابق رقم 12
محمد فهمى مراد . محافظة قنا

الاسم محمد فهمى مراد.. محافظة قنا خاص بالمسابقة( مشاعر مواطن مصرى ) الظلم الشديد من المفسدين... وكبت السنين زاد الانين.. ان ثورت مرة اصبح سجين ...وان رحت برة ادوب حنين ارجع لبلدى وارجع لناسى.. وارجع اعانى وارجع اقاسى..ذل وهوان والفقر دايس.. والغدر زايد والمر كاسى... واقول لنفسى هييجى يوم يبان نهار من غير غيوم.. والشعب يقدر ياخذ قرار... نعيش تمام من غير هموم... يقدر يقيل راس الفساد يقدر يجيب حق العباد.. يقدر يعمر فى البلاد... يقدر ينمى فى الولاد... ان البلاد ملك الشعوب مش ملك حد من الكلاب... وان الحياة هبة الاله وان الطغاة شوية ذباب.. واتحقق الحلم اللى كان .. بثورة عظيمة فى الميدان.. هبو الولاد من كل صوب.. ولا حد فيهم كان جبان.. طالبو بسقوط النظام ..واجهوا الرصاص والانتقام ..منهم اللى نال شهادة ..والباقى ماسكين الزمام .. قالوا الرئيس لابد يرحل... من البلد من غير كلام... لابد من اسقاط نظامه اللى اتولد ياكل حرام.. ولما غير فى الحكومة ولما جاب نائب همام واجهوا الرزالة والتناحة ..بالصمود وبالاعتصام... غار الرئيس ومعاه سوزان ..وكمان علاء واخوه جمال... لكن المراية بتقول حكاية.. فين الحقيقة وفين الخيال... مين اللى فتح فى السجون ومين اللى حارب بالجمال ... مين اللى خلى الامن غاب ..ومين اللى ناوى على الخراب لما انتوا شايفين الخراب ...ما تشوفوا راح فين الغراب.. والله الغراب علم قابيل ...يوارى فين سواة اخيه..يبقى حرام اقسو عليه ..واسمح لنفسى الوصف بيه لناس حسالة وناس زبالة... باعوا الوطن باعوا اللى فيه
*******************

المتسابق رقم 13
مصطفى رشوان السلامى . محافظة أسيوط

مصطفى رشوان السلامي / أسيوط / مصر
خاص بالمسابقة : قصيدتي بعنوان :
( الليل اللي خيم ع الدروب )
*********************
الليل اللي خيم ع الدروب

و غزا و غزغز فـ القلوب !

و كتب كتابه بالمقلوب !

نصب الدمار ..

في كل شبر فيك يا وطن !

و ترفرف الرايات السود

على مداين الهم و الغم !

و كاسات الدم

صواني بتدور ..

جوّا ريفك البكر يا دمشق !

جوّا قلب دير الزور !

و فـ الشوارع

الدمار مسكوب !

و الليل اللي خيم ع الدروب !

***************
خيم يا ليل ..

و زدني ضلام ..

زدني آلام ..

زدني وجع !

ماانا الجدع ..

أنا شهيدك ..

أنا الدم اللي بيجري

فـ وريدك !

أنا وليدك ..

اللي عاشق ذر ترابك الطاهر

يا حلب !

أنا فدا عرضك اللي

اتسلب !

و قلبي عشانك اتخلع !

أنا الوجع !

و إن خلص النهار من عيونك ..

أغرسلك مليون نهار

من دمي ..

دمي اللي جوّا أرضك

اتزرع !

نبت الأمل ..

يا أم الجدع

اللي بينزع النهار ..

من جوّا بطنك يا ليل !

ويبدّل المكتوب !

و الليل اللي خيم ع الدروب !

***************
قومي كدا بقى

يا حَمَاه ..

و اصمدي ..

يا بنت الوطن !

و إياكي أسمع منك

ف يوم الآه !

مهما فتت حشاكي

الشجن !

قومي بقى قلبي

رَجالِك ..

و أولادك السمر

رِجالك ..

حتى ابني الوليد ..

أبو الضوافر خُضر

جَالك !

يرجعلك بكارة الفرحة

اللي كنت بلمسها فيكي

لما بحضن عنيكي !

قومي يا شام العرب

وانهضي ..

إيدك فـ إيدي

جوّا قلب وريدي

جوّا شوارعنا

نلف و نجوب ..

و نقطّع الليل

اللي خيم ع الدروب !
====================
شعـــر / مصـطـفى رشـوان السـلامي
*******************

المتسابق رقم 14
الشاعر / شريف عبد الفهيم
محافظة الجيزة

وشوش وشوش
داهنة بوية
والحقيقة متتحكيش
صدق أبدا متلقوش
القريب تكدب عليه
والغريب مبترحموش
والوشوش زي السراب
يوم هاتلقى المية فيها
بعد لحظة تروح فشوش
وش مرسوم فوق شفايفه
ضحكة صفرا بدون رتوش
وش لما تشوفه تضحك
تحته تلقى سنان وحوش
دي الوشوش من كتر زيفها
الحقيقي متعرفوش
هما فاكرين الشطارة
لما تكدب أو تلوش
ليه تفكر إن إحنا
الخداع ما بنفهموش
وش لما تروح لحده
يرزعك بإيدين شاكوش
يا اللي فاكرين الشطارة
إنكم ملكوش وشوش
اوعوا تنسوا في يوم عقولنا
أو تقولوا مبيفهموش
أصل عمر الكدب يوم
راح يدوم متصدقوش
اصل انتم في النهاية
راح تلاقوا الناس مفيش
في النهاية إنتم انتم
وأحنا في الآخر نعيش
*******************

المتسابق رقم 15
محمد عبد الرحيم محمد . محافظة سوهاج

للمشاركة فى المسابقة :

كتبت قلت بحبك
ودايب فيكى
يا مصر
وحكيت للكل عنك
ووصفت عرسك
يوم النصر
واذاى ولادك لبوا الندا
من كل عشة فيكى
وقصر
من قبلى لبحرى لسينا
يادوبك سمعنا الصوت
جينا ... نادينا
تحيا مصر
خدنا اديكى ... عدينا بيكى
دفعنا فيكى العمر
وشقشق فى سماكى
ضى الفجر
وصبح فيكى الشعب
حر

كتبت قلت بحبك
وكيف يا حبيبتى
اجبلك مهر
واللى كانوا فى الميدان
اللى نادوا باسمك
تحيا مصر
طلعوا ياروحى
نواينلك شر
اللى نور بعيونه طريقك
واللى روى بدمه ارضك
طلع بلطجى
عايش فيكى كسر
وطلعتى مش بتاعتنا
ده يدوبك احنا ضيوف
اخرنا فيكى العصر
واصحابك اصلا كانوا
يا ليبرالى .. يا علمانى ..
يإما سلفى او اخوانى....
والباقى حقه الستر
كتبت قلت بحبك
ودايب فيكى يا مصر
بس ياخسارة
كلامى عاجز
اصله اتغمس فيكى صبر
يادوب قيدك فك
اتحبستى تانى فى قصر
قصر سوره عالى
شعاره عاوزة صبر
قالك نهضة قلنا خير
بس النهضة طلعت كشرى
وكوباية شاى فى سوق العصر
قالك بس نفوق
دى ازمة انتخابات
وبعديها نعدى الفقر
ابقى قابلنى لو عدينا
يوميها يبقى الحوت
حج وساب البحر
قالك هنشغل ميدو وحمو
ومنى واخواتها وخالها وعمرو
بس يا خسارة .. يا عينى
شغلانتى طلعت
حلاونجى شعر
قالك خير ياولادنا
ده برضه مصر بلدنا
عاوزة منك حبة صبر
صبرنا كتير
بس الحبة ياعمى
طلعت ولا مية شهر
كتبت قلت بحبك
وعينى عليكى
يامصر
آخرك شوية شعر
على ورقة بيضة
فيها حبر
يقراها عمو
يقولى برافو
قصيدتك تنفع للنشر

بقلم/محمد عبدالرحيم محمد
محافظة سوهاج
بكاليريوس علوم 2012
*******************

المتسابق رقم 16
الاسم .. خلود عبد القادر عبد العاطى
محافظة .. البحيره
.................................................
بدأنا مشوارنا سوا
كان حلم لسه ف اوله
مين ابتداه ؟؟
مين قال ده سهل و نعمله
مين حط راسه بين ايديه
وقال ده صعب نحققه
و يفيد بايه ؟!!
بس ابتدينا حلمنا
مكانش معانا طوق نجاه
رايحين ندور ف الحياه
على حلم يجي يضمنا
نضحكله يوم يضحكلنا
امل كبير ف ربنا
نوصل بسرعه لبيت دفا
يلمنا
طال الطريق
وتعب القلب م المشوار
ف ليل غميق
يأسنا يطلعله نهار
زاد علينا همنا
الحلم غاب
بس الامل
ميعرفش معنى الانسحاب
والشمس مسيرها يوم تظهرلنا
بين الضباب
مهما نورها غاب عننا
هنصحى يوم نلاقيها
فوق السحاب
بتضحكلنا

قصيدة / أبو خطوة
المتسابق رقم 17
شعر / محمد السيد عبد الفتاح إبراهيم
محافظة الإسكندرية
************
زمان شفته
جدع مارد ...
وفارد ع القمر طوله .
ما حد يردّ له كلمة ،
ولا يكسّر في يوم قوله
يدق الحارة بأقدامه
بيخلع قلب جدعانها ،
يهز بيوتها ...
بيبانها
وألاقي الكل خدامه ،
وطوع أمره
مع إنه ولا عمره ،
رفع أيده علي غلبان .
وكان دايمـًا ..
يرد الحق لأصحابه ،
ويكسر للشيطان عينه ...
وأنيابه
وفي غضبه ...
أحسّ الدنيا هـ تمطر
وفـ هزاره ...
تجلجل ضحكته سكر
وكنت أشوفه أتسمّر
يناديني ...
ما تتخضش
بيسكت قلبي ما يدقش
مَ أنا جوايا خوف الناس
يقرب لي
بتطلع روحي فـ الأنفاس !!
يطبطب فوق كتاف قلبي ،
ويديني ريال فضة
أخبيه جوه هندامي
وتكبر بيا أيامي
وصورته لسه قدامي
أبو خطوة
أبو خطوة اللي كان مارد ،
لقيته ع الرصيف فارد
جناح الذل والحسرة !!
بيتكلم بصوت مخنوق ،
وقلب حزين !!
بيضحك
ضحكته مُــرة !!
سنين ... وسنين ،
كأنها قطر عدي عليه
وداس فوقه متين مرة !!
أبو خطوة
عجوز محني على عكاز
، بقي زيوه ،
بيتسنّد على همُّه
ملامح حزن فـ جبينه ،
كلام ...
الحبر من عينه ،
دموع تسقط على خده ،
بتمسحها أيديه بكمه
قتيل ...
يا مين يشيل همّه ؟
ومين فينا برىء منه ؟!
ومن دمّه ؟!

[color=darkblue]
جُم وقالوا يلا نثور
المتسابق رقم 18
الاسم/ أحمد إبراهيم عبد العظيم
محافظة / الإسكندرية

يوم ما قطعولي حبلي السُري
كنت بصيح
عشت أصيح
دنياي هي آضايا
آخرها لحد في قبري

عشت خايف في الظلام مهزوم
أنام بجفن كسره الهم مظلوم
أصحى يشرق النور على جبيني معدوم
جعان وحقي في بطن الغير مهضوم
أطش وشي بشوية ميه
أَكُلي لقمة قاسية هنية
أنزل أجري أطلب رزقي
ولو قابلني واحد ..قالي يا فندي
أقوله اليوسطفندي جيبه مخروم

عرفت ناس جدعان
وناس فرسان
وناس مش ناس ملهومش أمان
وناس ماشية كما الخرفان
كنت بعيش وأتعايش مع الخلق والهوو ما أنا ...إنسان

الدنيا صراع
البشر أنواع
والنفوس أطباع
الدم في الحق واقف
وفي الباطل مركب وشراع

الناس أجناس
و الحق أحتاس
مرة يكون فوق الراس
وكتير تحت المداس

ولما جُم وقالوا يلا نثور
افتكرتها نكتة أو إشاعة في البلد بدور
رحت هناك ..شفت حاجات
قنابل..غازات .. دموع وآهات
شهيد فوق شهيد ....وقع ..مات
اللي أندهس واللي أتقنص واللي أنضرب واللي أتحبس
ناس تقاوم وناس بتصرخ
وناس صوتها راح ومش حتسكت
أصل صوت الحق رجع في الحناجر يغلي
قال مش حرجع أنداس تحت رجلي
أما أكون حر أو شهيد دم بيجري
يفوح عطري ومسكي في التاريخ يحكي
اني أنا المصري صبر
ت كتير لكني
وقت ما أثور إرادة الله تكون حلمي[/color]

المتسابق رقم 19
هشام الجوهرى . محافظة الدقهلية

______________________
فى القلب ميت مليون نكد
وكلام عجيب من غير سند
حكايات كتير ملهاش عدد
كلامها مدبوح ع السطور
وحروف بتنزف كام ولد
اللى شهيد واللى مصاب
واللى كان أعظم مدد
***
وليل بيفرش ضلمته
خفاش يطفى شمعته
طاير بيعرض سلعته
حتة سلاح وف جعبته
طلقات كتير
وف طلقته
أرواح كتييييييير
حالفة لتلعن طلته
****
ونهار بيعلن هدنته
غابت معالم سكته
وظلام بيرفض طلعته
خايف ليفضح خطته
لخراب بلاده
وضياع ولاده
وجفاف مداده
لو طلع ضى النهار
أو حتى بانت سكته
***
غاب النهار
طال الانتظار
ببخور ونار
عملوا له زار
علشان يقوم من كبوته
خنس النهار
رافض ينور دنيته
***
حل الدمار مات العمار
خرب الديار شعللها نار
حرق الصغار ويا الكبار
نايم هابيل
تاهت ملامح هيئته
نزل الغراب
نبش التراب
مش لاقى حد يعلمه
ازاى يدارى سوءته
***
بلقيس وقاعدة فى قصرها
شامخه ومالكة عصرها
العقل زينة عرشها
تستنى كلمة م الحكيم
تقوم توحد ربها
لكن الهدهد مجاش
*****
أيا وطن
يا كنانة خاوية
مفهاش سهام
يا أمة غاوية
الانقسام
ياحكومه ضايعه
بسياسة مايعة
رجالها بايعة
مصر ببلاش.
***
ياأم تعبانه
فى الهم غرقانه
بالحزن مليانة
منتظرة ناصر
يجيى يحمى حدها
تصنع قرارها لوحدها
يبنى ويرفع سدها
يمنع طوفانها يحمى غيطانها
يقطف جنانها يشفى جنانها
ناصر مجاش.
***
عصيان ثلاثى فى القناه
بيقولوا بمسح دمعها
أتاريه بجفف نبعها
قايم يعكر صفوها
بتنادى أنور بالعبور
عشان يروق دمها
ساعتها تنسى همها وتغنى "عاش"
بس يا خسارة أنور مجاش
****
عاوزين يا ساسة حبة كياسة
نفهم سياسة ننسى الغلاسة
وحب الفلاش
وبلاش نقسط حب الوطن
عاوزينه كاش
****
واللى بعرضه عمال يتاجر
ولعهد وطنه خاين وفاجر
ف رقبته دين
رافض سداده
زايد عناده
والله ما عاش
وتاريخ ميلاده
لسه مجاش
****
وزمان حزين قاعد بيعزف
ألحان بترجف
خوف ع الأمل
واقفة الثوانى
ويا الدقايق والساعات
تنزف آهات
تبكى وتشكى م العقارب
اللى دست سمها
ف ساعة زمن
ومين يمص السم
من قلب الوطن
وترياقه لسه مجاش
****

المتسابق رقم 20
لمياء حسين عبد المطلب . محافظة قنا

لمياء حسين عبد المطلب .....محافظة قنا ...خاص بالمسابقة

خايفة ....

خايفة فى يوم اصحى

الاقينى من غير سما

الاقينى من غير ارض

الاقينى من غير وطن

الاقينى تايهة فى دروبى

ومن غير محبوبى

وتوبى

بقى حتة قماشة و كفن

ومن كتر جروحى

كل دقيقة اشم ف روحى

خايفة الاقينى

بقيت جثة عفن

اااااااااه

نيل بلادى

بقى دم ولادى

وقلبى قتلته

ايوه قتلته

و ف التراب اندفن

وطنى ضاع من وطنى
وطنى عمال يدور على وطنى ...
تااااااااااااايه ويدور الزمن ..تايه ويدور الزمن
*******************

المتسابق رقم 21
احمد عبد الحميد عبد الجواد . محافظة السويس

نبوءة الثورة
أمن دولة
تعظيم سلام ... نجم الغلاف
قلمي اللي عاش ... عمره ما خاف
خلوه يوقع الاعتراف
ولا عمره يكتب ع الجفاف
والشعب أصبح عيشه حاف
والباشا ياكل في الخشاف
ويقوللي نام تحت اللحاف
وان جبت سيرة الانحراف
مليون طريق علشان تخاف
***
قلمي اللي كان ... حر في ملامحه
والحق رمحه ... خربوه
وعشان صراحته أو بجاحته .. عذبوه
علموه الخوف وأكتر .. ع الشناكل لعبوه
هددوه بالحبر الاحمر .. خان مبادئه وباع أبوه
****
أيوه كان قلمي شجاع
لماَّ كان للحق معني
لما كان في الناس نخاع
ينفجر في كل محنه
النهاردة الحق ضاع
والكلام الحر لعنه
الكلام الحر لعنه
****
حطيت في نفسي وانكتمت
وخدوني أنا فاكر كان يوم سبت
من بيتي لأمن الدولة ركبت
ضربوني لحد ما عقلي شت
سألوني بتحبس ليه الكبت
مع انك طعم المر شَرَبْت
ولا عمري جريت ولا عمري كتبت
ولا عمري في يوم من عمري كذبت
لكني بفضل الله أجبت
****
أصل أنا فلاح والارض براح
بتجيلها المطرة ويطلع نبت
واخرج بالمنجل ليها واحش
واعمل م المعزة بتاعتي المش
ولا عمري في يوم م لبست الوش
وما نيش محتاج في الدنيا اغش
والقمرة في ليلي هي الدش
طب ليه انا اخاف م السلطة وأكش
*****
لو كنت يا باشا خايف يوم
أصرخ وانادي ان أنا مظلوم
وأصحي عليك الناس بالكوم
ونهد البرج من البدروم
ونعدي الحلم الميت عوم
ما تخافش يا باشا أنا نايم نوم
ولا عمري بفضل الجبن ح أقوم
****
ما تخافش يا باشا الحالة أمان
والشعب بتاعنا بقاله زمان
اتعود دايماً يبقي جبان
ولا عمرك تلقي في يوم انسان
يتشجع يدلي بأي بيان
والراس الصاحية في التوهان
غرقانه في بحر من الحرمان
والثورة الكامنه في البركان
مش قادرة تعبر ع الدخان
ما تخافش يا باشا الحالة أمان
******
ده الواد الكاتب اسمه أونطه
بيشوفك واقف بين الأرطه
وبلدنا عشانك صبحت نقطه
والشعب بيخدم فرد الشرطة
والواد شمشون بيموت م الشخطة
ويبوس رجليك خايف م السلطة
وأنا لسه براعي في ليلي البطة
علشان ما تبيض وتحط الحطة
وأشوفك وانت تنط النطة
فاهم ولا احكي كمان يا عَبُطَّه
****
ماتخافش يا باشا اعمل معروف
ده البحر الأحمر بقي مرصوف
والموج الهايج مات م الخوف
والبرد بيحصد فينا ألوف
ولبست لوحك كل الصوف
وصبحت في ليلة عيدنا خروف
والصبح مصيرك بقي معروف
والصبح مصيرك بقي معروف
*****

كلمات أحمد عبد الحميد عبد الجواد
شاعر - السويس
*******************

المتسابق رقم 22
منتصر سلطان محمد ضيف الله
محافظة اسوان

فراشات الضى
********
لسعة برد الغربة
دراويش الليل العابرين ..
م الشاى للينسون
دخان ..
فى الدنيا يا انسان
تتلحف دفا أنفاسك
و تكح ..
من ألم الليل
الشابك ..
فى بقايا سجارتك ع الارض
يتدلدل ضى عنيك
يوصل رجليك
التايهة ما بينك ..
و بين عطر بنات الليل
تحت الضى ..
زى الفرشات ..
حولين العمدان
ملمومة عيون السكيرة
تنزف رم ..
عصيان مقصود
على حبة بيرة
و الأكتر ..
تطرش هم
بتجره لغاية قلبك ..
قزازة البيرة
و دخان التبغ الطاير
يلسع فرشات العمدان
التايهين .. من خمر الضلمة
تطوح برائتهم ..
توقع ..
تتبعتر ..
يفرشها الليل سجادة
للرجلين التايهة ..
ما بينك ..
و بين عطر بنات الليل
و انت ف المشهد وحدانى
بتوفر أنفاسك للبرد الجاى ..
من جواك
بترتب أسبابك ..
على ضهر شفايفك
دخان ..
عايز تلقى لبردك تعليل
يرضى يساع أسئلتك ليك
دخان التبغ الطاير حوليك ..
مش هو نهاية الموضوع
و لا حتى الليل الفانس ع العمدان
و لا رشح الروح ف العين ..
الشابكة ف ديل فرشات النار
لما نسيت تتوضى ..
مشغول بتعد العمدان
بتعد الفرشات ..
حولين الضى
*****
منتصر سلطان محمد ضيف الله - مصر - اسوان
*******************

المتسابق رقم 23
مدحت عطية حسن . محافظة الاسكندرية

الاسم/ مدحت عطية حسن
محافظة الاسكندرية
بيتنا القديم

لما بتاخدنى
الحياه
بحن لبيتنا القديم
بحن للسندره
بحن للكراكيب

بحن لريحة الهوا
للشمس وهى بتغيب
بحن للقفطان
بحن للجلاليب

بيوحشنى
صوت الحنفية
وهى بتنقط
مع أن برضه
بيوجعنى

والسلمه المكسورة
الـ طقت
مهما بروح
بترجعنى

أيوه السلمه
كانت مكسورة
بس كنا سُلام
كان بالنا واسع
وفاضى
كنا بنعرف .. ننام

الساعه الـ
فى الصاله أم رنه
نحاس
صوت البياعين
والناس

ياريت تنطقى
يا جدران
ياريت تتكلمى
ياحيطان
وحشنى صوت
الباب
وحشنى صوت
الجيران

كفاية تحس
إن حد قبلك
خطى المكان
حد حَلَم هنا
فيه حد .. كان

حتى الترابزين
الحديد
كان بيحضن
كل إيد
كان بياخدنى
معاه لفوق
مرة حزين
ومرة .. عيد

كان فيه
صبيان .. وبنات
كان فيه .. حريم
كان أحمد
يصاحب حنا
ومريم
تصاحب ريم

بيتنا الكبير كبير
قديم
وأن جه يوم
ووقع
هتلقى الحياه
تحت .. الرديم

*******************

المتسابق رقم 24
عزيزموسى الجارحى.. محافظة الاسكندريه

بياع بطاطا
............
حضنك دا فين

ولمين

بتمدى ايدك بالحياه

قلبى اللى فرقته

ف شوارعك

تايه ف مليون اتجاه

عمرى اللى سبته

ف حضن نيلك

مالوش نجاه

ولامرة حسيتك يافرحه

ولامرة اديتينى انتباه

بالعكس

واخدانى اشتباه

مفرقانى ع الرصيف

بياع بطاطا

النار بتولع من حشاه

والرغيف الحاف

عشاه

متغطى بالاحزان

ليلاتى

وفرشتى

وجعى

وآآآآآه

أمى

مودتنيش مدارس

يعنى اللى دارس

فرقت معاه

يعنى اللى حبك

كنت فاهمه حبه

وموافقه هواه

يعنى اللى فك

الاسر عنك

بتأيديه

وواقفه وراه

ولا الحواجز

كل يوم بينكم بتكتر

كل يوم الظلم

اكبر

وانتى بأيديك مكبلاه

بياع بطاطا

مايهمهمش

مايهمكيش

ان كان يعيش

او رصاصه

ف يوم تطيش

تبعته للجنه

يعرف

معنى الحياه

عزيزموسى

15/2/2013

*******************

» المربعات الأرابيسك المعشقة . هنا مدرسة لتعليم لون جديد من ألوان الابداعات العامية المصرية . اسسها ويشرف عليها . الشاعر محمد فتحى رئيس رابطة شعراء العامية المصرية
» تنافس فى حب رابطة شعراء العامية المصرية . لمجموعة شعراء
» فى حب رابطة شعراء العامية المصرية
» فى حب رابطة شعراء العامية المصرية الكبرى
» اهداء الى رابطة شعراء العامية المصرية