مسابقة الشعر العامى من 15 فبراير الى 28 فبراير 2013 . احدى مسابقات رابطة شعراء العامية المصرية

المتسابق رقم 25
جيهان محمد فتحي ..... الاسكندرية

.... خاص بالمسابقة .....
================
ف عـــــــيــونــــك :::
$~*~*~*~*~*~$

أحب الحب ف عيونك شجر طارح ..
أنا والشوق وتكعيبة عنب سارح ..
ويحضنا نسيم البحر حنية ..
وأنا دايبة على كفك وفين هي ..
ملامح عمري من قبلك وكان جارح ..
$~*~*~*~*~*~*~*~*~*~$

أحب الحب ف عيونك مالوش حدود ..
وبين كلي واحساسك مفيش فاصل هنا ممدود ..
مفيش فاصل مابين نجمة وبين لولي ف قلب محار ..
وكل شموسي من غيرك ما تسوى قرار ..
أنا غرقانة من بدري وغطاني شذا عطرك يا أحلى ورود ..
$~*~*~*~*~*~*~*~*~*~$

أحب الحب ف عيونك حنين ياسمين ..
تقولي بهية عشقاني يا أحلى ياسين ..
أقولك عاشقة أنا ترابك وعطره يفوح ..
وده دمعي وصهيل شمعي صريح البوح ..
أنا وانت مفيش تالت .. على أشواقنا متصالحين ..
$~*~*~*~*~*~*~*~*~*~$

أحب البحر ف عيونك وموجه يضم ..
وأحب الليل وف هدوءك حنان الأم ..
وأحب الشمس لو تحرق جنون شوقي ..
وأحب التلج دوبانه مابين حضنك تقول دوقي ..
وأحبك وانت مجنوني واحساسي هنا بتلم ..
$~*~*~*~*~*~*~*~*~*~$

بقلمي /

.•*´'`°¤¸'¸¤°´'`*• .•*´'`°¤¸'¸¤°´'`*•
ღ@@ღ جــيـــهــــــان فـــتـــحــــــــي ღ@@ღ

(¯`v´¯) (¯`v´¯)
`•.¸.•´خـنــســـــآآآآآآآآآآآء الإســـــــكندريــة `•.¸.•´
*******************

المتسابق رقم 26
ادريس لحمر الوزانى
فاس . المغرب

شنو غادي نتبع .......
.......وشنو غاد نقتافي
واش كلام ما ينفع......
......ولا اقوال سلافي
علاش بغيتو نركع ......
......ونا شخص معافي
ولا هرم هاد السبع......
.....وتاه فالفيافي
راه وساع الصدع.......
........وكثرت عليه لقوافي
... صبحت وسط الجمع......
.....ما نتحرك ما نفافي
ما نحط ما نرفع .......
.........اللي فيا راه كا في
جوع غيرك واشبع ......
......ما هم من صنافي
علاش يبس الفرع......
......وتبدلو معاه وصافي
وكداك جف الدرع......
.......وحمات معاه لعوافي
ملي جف النبع.......
........تجمعوا ليا طرافي
كلمت صرط وبلع.......
......ما خلات حد صافي
لاتقول غير دفع .......
.......راه من عرق كتافي
الى صدر المنع.......
........وصار الثوب وافي
وغمرنا نور الشمع.....
......را الوافي ما يحافي
كلام .....لحمر ادريس
*******************

المتسابق رقم 27
الاسم :هبة بلال البرلسى محافظة الغربية

(ما تنخيّش)
دمانا السايلة عاللأعتاب
بتسألنى عن الأصحاب لسانى ينعقد منى..
ألاقى الدمعة ف_عنيكى تكفّن طلّة الننى..
وصوت القلب بينهنه من الحسرة
ما هيش أول ولا آخر دما سالت عشان ألقاكى منكسرة
ماهيش أول ولا آخر عيون تتفض
ولا أول ولا آخرايدين تسحل ولاد عالأرض.!!
ماهوش أول ولا آخر جبان يقمع..
ولا أول ولا آخر صراخ يطلع..
فما تنخيّش..
ألوف ماتت عشان النبض فيكى يعيش
أمانة بس لمينا وضمينا أكيد احنا ببعض أقوى
معاكى وبيكى نستقوى على كل الضلال والغدر
أمانة عليكى ترقينا وتدعيلنا فى صلاة الفجر .
هبة بلال.

*******************

المتسابق رقم 28
خالد صديق محمد
قنا . قوص . الحمر والجعافره

العيش الشمسي

................................... . .
الفرن البلدي
العيش الشمسي
أمي صاحية بتخبز
بدري
قمرة علي
الحصيرة قاعدة
بتحكي
مستنيا العيش يخمر
عشان تحمي
وأبويا قبل الشمس
علي الدرباس يمشي
لحد أخر زرعت جدي
ويقول سبحان ال مخدر
زرعي
لما تشوفه
اﻻرض تحدي
بلغت أبويا وجدي
وبعد ماشوط قعمز
عند جارة القبلي
بيحرت بمحراتة البلدي
الخط فوق الخط
يخدر الزرع بدري
ببركة أبويا وجدي
*******************

[i]

المتسابق رقم 29
خالد عز الدين . دمنهور. محافظة البحيرة

خالد عز الدين - دمنهور
(أحب المعارض)
***************************
أحب المعارض
وكل اللي شايل بنات ع الكتاف
وكل اللي عايش حياته هتاف
وأحب اللي شادد عليه الحاف
ووقت أما يقبض
تلاقيه مناضل
يسب الأفاضل
ويهتف ويهتف
وقلبه بيرجف
أنا مش قليــِّل
أنا مش بأخاف
تعالي يا حلوة عشان تسنديني
وأوعي تفكي إيديكي تسبيني
عشان العيال دي
مهماش ظراف
***
أحب اللي ماسك
ف نص العصاية
ف نقطة تماسك
وسايب أساسك
لأهل الغواية
لا يوم يبقى ضدي
ولاهوش معايا
وفاكر كلامه الوحيد الصحيح
وإنه ح يجمع ف حضنه الفسيح
لساخن وبارد
وطيب ومارد
وفاهم وشارد
بموقف مريح
ولازم أصارحك
ح تخسر ملامحك
لا يوم ح تراضيهم
ولا تنول رضايا
يا صاحب العصايا
***
أحب المعارض
بتاع الفلول
بيقتل ويسرق
ويطلب ينول
وصاحب هواية
بيجمع ديول
بيشرب سيجاره
وياخد قراره
يبلغ فراره
ويصرخ يقول
ما حدش يلومني
ويعمل فاهمني
فلوسي وشقايا
ح أسيب الديول
تحقق منايا
وح ارجع ضروري
وآخد قراري
لكن لما نكتب
نهاية الحكاية
***
أحب المعارض
بتاع االشاشات
ف وش المُشاهد
ف غاية الثبات
يناظر ويسأل
ويحرج ساعات
ويصنع بطولة
ف غاية السهولة
ويسخر
ويسكِر
ويسحر
عيون
ويملا حياتنا
بريبة وظنون
وتسمع كلامه عن المطحونين
تحس إنه شايل
هموم السنين
وعايزني أبقى ف غاية الخيابة
وأصدق بإنه نصير الغلابة
وهوه بيخدم سياده الديابة
علاج اللي زيه
شوية سكات
صاحبنا اللي مالي علينا
الشاشات
***
وأحب المعارض
لكل المواقف
وكل الكلام
يخلص مظاهرة
يخش اعتصام
يهوِّن .. يخوِّن
يوزع علينا
صكوك اتهام
ومهما تطبطب
ومهما تدادي
يشوفك تملي
ف صف الأعادي
ويوم لما خدنا برأيه
اعترض
لأن المعارضة
ف صاحبنا
مرض
تموت الحقيقة
لأجل الغرض
***
وفين المعارض
عشان الهدف
ومهما اتفقنا
وهوه اختلف
ملوش ف الخواطر
بيهتف بعقله
ومش بالحناجر
كلامه له قيمة
وغايته عظيمة
يساند بلاده
ف وش المخاطر
وديما يعارض
بعزة وشرف
***********************************
خالد عز الدين
جدة - نوفمبر 2011

*******************

المتسابق رقم 30

الشاعر/ عزت ابراهيم عبدالعال
-- محافظة الغربية . طنطا --

Ezzat Ebrahim
خاص بالمسابقه -
قصيدة ( سؤال على قوس الربابه )
-----------------
وبتعلن الأغنيه --؟؟
وبيعلن العابر فى بحر النغم
ان الكلام اللى فى الغنوه حلال
لو قالها عالمصطبه حيمسّكوه الزمام عالقمح
وان خدها قاضى حتبقىَ عدل ومصطلح دايم
وان راحت المولد حيزوّروها المقام
ولو سمعها اللى يعلم بحالى
حيخلى سبيلى -- وينطق الحكمه

---
ياعابر سبيل النغم الحزين
ماعمرهاش الربابه بتبقىَ حزينه
انت اللى فيك الوجع راكب
سكينه مسنونه فى سحبة قوس
على خدها بتبوس
يطلع نغم وردى
صفو النفوس ان كنت رايق يا وحيد الليل
حرر مافيك من ويل اتحبس
وكُح بوح الضنا الماسك فى الصدر صدرك يفوق
وتفوق تبص لفوق شاكر من المشكور
يتلم لك حسنه
حقك من المهنه
حق انبساط الوش عالوش البشوش حقك
حق انفلات اليأس من قلب اللى يسمعلك
قولك فى موالك --بلادى بلادى
فؤادى مرادى -- نشيد الوطن فى الأغنيات
حق الثبات اللى كان
قبل اما تيجى فى البدن مهزوز
حقك تعوز وحق غيرك يعوز منك
الهم يجرى تفوز برنة فلوس اللقمتين العيش
وسقفة أيادى الناس -- وجايز مفيش ؟؟
يا تفوز فى اّخر أّخر الموال
بضحكة الناس اللى فوق السؤال المحيّر
كلهم واقفين --
محيّر محيّر كلهم سائلين
على مين بكاه الجدع -- ليه الجدع تمللّى --
تمللى بيبقىَ حزين ---------------------

*******************

المتسابق رقم 31
رضا محمدمحمود(محافظةالشرقية)

خاص بالمســــــــابقة :--
.. عشااان خاطري..
==============
عشاااان خاطري....
بلاش عـ الوحدة تغصِبني..
بلااااااش.. يابني..
تسافر تاني وتسيبني
أتوه في الدّنيا من بَعْدَكْ
كفاية سنين مغلّبني..
وعَذّبني....مرار بُعْدَكْ
وليه تظلمني تاني معاكْ؟؟
وتكسر حلم في عيوني بيترَجّاكْ
ويتمنّاكْ..
تكون سَنَدي..وعُكّازي
وتنصفني على الأيامْ
واشوفك بس قبل ماانامْ
تمسّي عليّا وتبوسني على جبيني
وشايل حُقنة السُكّرْ..
ــــ في نفس ميعادها بالتحديد ـــ
وجاي بشويش.. تصَحّيني
بإيد..تسندني على كتفكْ
وبالتانية..بتسقيني
ولمّا اتعبْ...
تمدّ إيديك....وترقيني
وتقرالي من القرآنْ..
آيات الكُرسي والإخلاصْ
وتضحك.. وانتّ بتقولّلي..
رَقيتك..من عيون النّاسْ!!!
وتغزل نظرِتك إحساسْ..
بعطف الكون..يغطّيني
عشااااااان خاطري...
بلاش تزرع في قلبي الخُوف
على مستقبل الأولاد..وأيامهُمْ
وإنّك بس هـ تسافر..
عشان تقدر تعلّمهُمْ
وإنّ الحالة والأسعارْ...بَقتْ صَعبةْ
وإنّ الحل فـ الإصرارْ..على الغُربةْ
وتتحجّج بإي ظروف...عشان تمشي
وليه قلبك..يا روح قلبي مايرحمشي..
دموع أُمّكْ ؟؟!!!
أنا ياضنايا مش قاصدةْ
أزيدك هَمّ...فوق هَمّكْ..
ومغصوبة أقولهالك بكل وضوحْ
بواقي العُمر في دُولابي القديم دابِتْ
وحَتّى ملامح الضحكة..
على الوشّ العَجُوز... شابِتْ
وشايفة بعيني آخرتها..
ونِفسي من الحياه... طاابِتْ
يدوب عايشة عشان خاطرك..
حلاوة روحْ
أنا مش عايزة غير الستر في وجودكْ
وإنّ البيت..يكون مفتوح على حِسّكْ
وريح اليأس..لا تهِزّكْ
ولا تحني في يوم.. عودَكْ
ولو نِفْسَك تعيش مرتاح..
تحاسب في الغَلَط نَفْسَكْ

(رضـــا محمود)
*******************

المتسابق رقم 32
أيمن سيد الشاذلي ( محافظة اسيوط )

خاص بالمسابقة
قصيدة جسد فاسد قصيدة كتبتها من وحي تعليق تلفزيوني
سيدة تقول يا رئيسنا النساء تبيع جسدها لكي
ترب عيالها مع تحفظي علي هذا الكلام طبعا لكن دا حال الدنيا

قام الصبح الواد جعان
قام وياريته ما قام طرمان
لا عندي فينو ولا عيش خمران
كل قوتي اهو رغيف عطنان
آه يا زمن الفقير فيك حيران
عطشان وجعان ومكسي عريان
ولي ذاد كمان يا رب مرضان
مش كحة النصيبة الواد جربان
مفيش وسع خالص ضاق المكان
اروح فين منك يا تعابني يا زمان
أبيع اية مفيش عندي غير الحيطان
أبيع خلاقتي دام مفيش حتي حلقان
ولا أقطع لساني ويخلص الكلام
داولا شهادة تنططني ولا علام
لية يا موت نسيني في المنام
ولا لما تروق معاي تغير الكلام
اوعي تكون صحيح مبتحبش الفقران
ابيع ايه قولولي يا جدعان
مين يشتري لحمي الفاسد
وأخلص من عويل العيال
حرام ابيعك يا جسدي
طاب هحط حجربطني ونام
طاب ارشدني يأرب للقران
هصبر واعاند الكلب الشيطان
مش هسلم للديب ابوجنيه الجبان
عاوز لحمي عاوز معاي تنام
يقبا يا ابن الصرم في الحلال
آه ربنا مش هيسبني هو علمان
مش هينسانا المنان مهما كان
يا رب يأرب يأرب
أنا راضيه باي شي
بس ونبي ارجوك وكل العيال
*******************

المتسابق رقم 33
بدرية الأشهب
شاعرة وكاتبة ومقدمة برامج اذاعية . ليبيا

يا للى جمالك جمال..... طبيعى ربانى...
صوتك وتر مجروح.... وعنيك رهبانى....
ضيعت...... فى بحركم.... شطى وربانى...
طفيت شموع معبدى.....وسرحت رهبانى ....
انا كنت سايقه العوج........ والحب ربانى
*******************

المتسابق رقم 34
الاسم : عصام سيد محمود.
المدينة : محافظة المنيا - مركز سمالوط -

اسم القصيدة : ( خـــــايــــــــــــف عليكــــــــــــــى )
ركز • يا ام القوام مفروط مالك حزينة ليــــــــه
• شايف التراب عالطرحة متغبرة كده ليـــــــــه
• وشك الوردى دبـل تاهت ملامحه ليــــــه
• ولادك صبحوا وحوش يأكلوا فى بعض ليــــه
• الصدر بات مش صافى والحضن مبقاش دافئ
• والخوف ملأنا ليـه خايف يا مصر عليكى
• مش عارف اعمل ايه لما اجـــــــــــى اقربلك
• الاقيكى جفيانى ما انا اللــــــــى فاضلك
• وانتى اللى بقيالى يا مصـــــــر من فضلك
• عــــــــــــــــــــــــــوديلـــــــــى مــــــــــن تانــــــــــــى
*******************

المتسابق رقم35
الاسم : أسرف حسن صلاح الفضالى
المدينة : المحلة الكبرى

اسم القصيدة : { مدبوح ياطير }
*********************
ولسّانى
بخُش الفصل بستانى
وبتلقى بزور بشرية بتنبت
بوجدانى
وبرويها بنبض الفكر
وعصارة سنين العمر
وترعرع ....
وتنسانى!!!!
تباشيرى مداد العقل
مين غيرى
بينسج فكر أولادك كأولاده؟!
وأمجاده
يقدمها بطيب خاطر
شموس تفتح ببان الضى
ف نفوس الزمان الجى
تصبح زينة الأوطان وتنسانى !!!!
ولسّانى
بخُش الفصل من تانى
أدور ع اللى يسمعنى
ما هو الطالب خلاص باعنى
وليه أصلا هيستعنى ؟
أكيد الضرب متحرم
وأى عقاب ولو كلمة
بيتجرم
وقال شوقى بيطلب مننا نبجل
رسول العلم ف ديارنا
ومن عارنا
مدارسنا بقت سلعة
وأولادنا زباينها
وطبعا الزبون على حق
وحق الحق ما تقولشى لوزيرك لأ
تكتفنى ... ؟!!
وترمينى فى قلب البحر وتقولى
ما تتبلش ؟!!
طب انت بقيت وزير ازاى ؟
وشالوا ( الواو ) ولا درتشى ؟!!
أكيد معصوب
ومش مغصوب
بقيت محسوب مع سيادنا على ولادنا
عملتوهم فران تجاربكم الفاشلة
وأحلامكم بقت قرارات
كمان طارءة ؟!!!
وأخرتها ما هيش فارقة
ما كنا زمان بلد شهادات
بقت منابات
تخلص طب أو دبلوم
على الناصية هتترصم هناك بالكوم
ومش فارقة
ما لكش مناب بقت غرقة
وإمتى ف يوم يا طير الحق
تتحرم على السكاكين
وللمساكين تقدم غنوتك تانى
دا لسّانى
رغيفى الحاف بيلكمنى
وجوع أولادى يلكمنى
فخُش الفصل من تانى
عشان أكتب
جواب للشمس
يمكن يوم
ما تنسانى*******************

المتسابق رقم 36
الاسم /هبه فهمى درويش محافظه القاهرة

_ اسم القصيده ( عينى عليكى يا أمه )
...فيكى اللى باع القدس فى كلمه ...فيكى اللى حكم وسط الزحمه ...فيكى اللى قتلوا حاكمهم وقالوا دا ملوش لزمه ...ضاع فيكى للحق اى كلمة ...شعوبك جاعت باعت ضميرها علشان اللقمه ...فيكى الفقر والجهل هو السيد والحكمه ...والكرامه بقت من الماضى مجرد كلمه ...شالوا رايه القدس وحطوا بدلها العلم ابو نجمه ...وسابوا فلسطين لشعب من غير دين ولا رحمه ...فيكى اللى معاهم فلوس وبيشتروا بيها النفوس وفاكرين دى الهمه ...وشعوب تانيه فلوسها كتيرة من كترها ملهاش لازمه ...وشعوب مليانه فقر ومرض وبالهم والغم قايمه ...حاسه فيكى ان النفس ريحته بريحه دم شهداء الأمه ...ظلمك قابض روحى وجايبلى على طول الحمه ...امتى حالك يتصلح واقدر اقول تانى يا أمه ...ولا بقيتى مجرد حلم وحدعيلك على طول بالرحمه ...من احد كتاباتى فى كتاب جالى خاطر اكتب خواطر
*******************

المتسابق رقم 37
حسن توفيق عبد المطلب
قويسنا . محافظة المنوفية

الأولة فى الحب_خاصة بالمسابقة
الأولة فى الحب والغرام
كل الناس لامونى
والتانية فى العشق والهيام
القلب والعين مارحمونى
والتالتة من غير كلام
انت دوا عيونى
الأولة هيمان فى حبك
شفت الضنا فى بعدك
لفيت عليك بلاد
سألت كل العباد
والتانية أه من لوعتى
صبرى عليك وحرقتى
وانت ولاانت هنا
سايبنى أعيش فى ضنا
والتالتة أة لما جيت
فرح فؤادى واتهنى
لماشافك حنيت
الحياة بقى لها معنى
عنك أنا حكيت
الكل بأسمك غنى
بالأمل والسعادة عديت
ابعد يافراق عنا
على شطك أنا رسيت
وفى حضنك أنا ضميت
شعر حسن توفيق

*******************

المتسابق رقم 38

*******************

المتسابق رقم 39
حلمى قاسم على
محافظة قنــــــــــا_دشنا

خاص بالمسابقه

بتثورى ليـــه؟!!
**********
لما انتى مش هاتحققى اللــــــى
وعدتى بيه….بتثورى ليه؟
واما انتى مش هاتكملى لأخر طريق
مشيتى فيه؟…..واخدانا ليه؟
هــــــو احنا حمل اللى احنا فيه
لما انتى جايه تحملى وتزوديه
بتثورى ليه ؟؟!!
دم الولاد غرق شوارعك والسكك
من غير تمن راحوا بـــلاش
حتى الزهور الطيبه داسها العجل
وما شـــوفنا منك غير طنــــاش
بتثورى ليه؟
رميانا وسط بحــــور الم سقيانا خل
كل البلاوى اتجمعت ولا شوفنا حل
ولا شمس طالعه منوره ولا حتـــى ضل
ولاحاجه تفتح نفسنا والصبر حتى معانا مل
بتثورى ليه ؟!
لما الفقير كان فيكى يحلم بالرغيف
وليل نهار شقيان عليه وطالعه عينيه
ايه الجديد غَيرتى ايه ؟………..
ما هــــــــو لسه برضه بيعافر عليه
ويا ريت لاقيه………..بتثورى ليه ؟!!
والأمن نايم ف العسل من غير سبب
عاجبه السكات ..و باينه مـــــــات!
والخوف مسيطر ع القلــــــــوب
ناسج خيـــــــــــوط عشش وبات
بتثورى ليه؟!!!……………….
والزرعه ماتت م العطش والعيشه نار
والأرض صرخت واشتكت من ظلم جار
هو احنا لاقيين السماد ؟!!
علشان ندور ع الســـــــــولار !!
ايه يا بلد جـــــــــــرى لك ايه ؟
هو انتى غاويه العكننه ولا انتى ايه ؟!
طب لما مش راح توصلى مشيتى ليه؟!
***
خايف عليكى تغرقى ف بحور دموع
خايف اقـــــــــــــــــول لك كملى
الاقيكى عاشقه للرجـــــــــــوع
خايف عليكى يا بلد م اللى انتى فيه
*****
قلم/حلمى قاسم

*******************

المتسابق رقم 40
محمود على السامولى
محافظه الغربيه.المحله الكبري

(خاص للمسابقه)

مش مسئول..

مش مسئول عن حق
ضاع من اللي اتقتل
واللي اتسحل بكل مكان
مش مسئول ان اعدمو
ودفنو كلامى بالتراب
مش مسئول لو نجمه
خرجت عن المدار’’
لو خلت الدنيار دمار ’’
لو شمس غابت ضيها
ساعه صباح’’
مش مسئول ’’
لو البحر هائج من غير سبب
وموجه اعلن الطوفان
مش مسئول عن حلم
قبل ما يبتديء’’
يصاحبه كوابيس الانهيار
مش عارف امتي هنيتدىء’’
نحب بعضنا’’ نمد ادنا باحترام
نبطل نشك ببعضنا
نزرع بالارض خضار’’
مش مسئول غير عن كلمتى
عن غربتي’’جو وطن’’
عايش لحظه انكسار
هو الخوف من اللي راح
ولا اللي لسه جاي
ولا حروف
اتبعترت علي الورق
والقلب من
حرقته حفظهم صم
يا عيني عليك
يا ولد واللي ضميره حي
بكرة الشمس
تطلع والربيع اهو جي
وتتفتح ورود الجناين
وعطرها يملي الكون
ويكبر الولد
والقلب يفرح فرحته
والحروف تتلم...
......................mahmoud aly

*******************

المتسابق رقم 41
محمد طارق رجب . 17 سنه .........محافظة الاسكندرية .

خاص بالمسابقة ............ مسجون !!!!!!!

لسه فيكى يا بلد كلاب فرعون .......

اتعلمت فيكى الجلد على كل شكل ولون........

لسه فيكى يا بلد الظلم له حكاية .........

وكل واحد يحكى عنك رواية و رواية .................

انا العاشق لأسمك انا المجنون ........ انا المجنون بيكى يا بلد العجب.

انا اللى اسمى ...........................فى التاريخ انكتب ...............

....... انا المسجون .........

انا اللى فى عتمة الليل.......... بنور زنزانتى بأناشيدك.......

فى الحلم ببقى سايق الخيل .....انا اصلى تربيتك...

اتاتعودت على على ايديكى احلم ,,,,,,,, ولو حتى جوا .......السجون ,,,,,,,,,

يا بلد انا المسجون ....

انا المسجون ظلم انا المسجون علشانك .........

يا بلد يسجنو ابنك ويهربوا اللى خانك ...........

.............ويوم ماهتف بأسمك يقولو بلطحى مجنون ..............

ومهما تزيد الاهانة عمرالوطن ما يهون ...........

ده هو هو فرعون بس لابس غصن زتون !!!

هو هو فرعون بس لابس غصن زتون......

ما هو فرعون مات بس احنا نسينا .....

فرعون مات بس احنا نسينا ان لسه جنودة واقفين مئات ....

والثورة دى مش كلمه ....................الثورة دى حكايات ...

حكايه اللى عايش................ وحكاية اللى مات .............

حكاية سجان وحكاية مسجون... مسجون حر........ وسجان مسجون.

وحكاية شعب.......... بينسى اللى فات ..............

والثورة دى مش كلمة الثورة دى حكايات .............

حكاية اللى مات وسط الميدان.... وعرف يعنى ايه ثورة يعنى ايه ثوار.

حكايه اللى عايش .............ومش قادر ياخد قرار .........

بس فى النهاية ................. الثورة دى اختيار.............

اختيار الحياة من وسط بحر الموت ...............

اختيار الحريه اختيار الصوت ............

الصوت اللى بعد الليل بيطلع نهار.....

وافتكر :

ان عمر قتلك ما هيقدر يقتل فكرة .. وعمر سجنك ما هيحبس احرار..

................... هنفضل ثوار .....هنفضل ثوار...............................

Mohamed ..Tarek

*******************

المتسابق رقم 42
محمد عبدالرحيم محمد
محافظة سوهاج

للمشاركة فى المسابقة :

كتبت قلت بحبك
ودايب فيكى
يا مصر
وحكيت للكل عنك
ووصفت عرسك
يوم النصر
واذاى ولادك لبوا الندا
من كل عشة فيكى
وقصر
من قبلى لبحرى لسينا
يادوبك سمعنا الصوت
جينا ... نادينا
تحيا مصر
خدنا اديكى ... عدينا بيكى
دفعنا فيكى العمر
وشقشق فى سماكى
ضى الفجر
وصبح فيكى الشعب
حر

كتبت قلت بحبك
وكيف يا حبيبتى
اجبلك مهر
واللى كانوا فى الميدان
اللى نادوا باسمك
تحيا مصر
طلعوا ياروحى
نواينلك شر
اللى نور بعيونه طريقك
واللى روى بدمه ارضك
طلع بلطجى
عايش فيكى كسر
وطلعتى مش بتاعتنا
ده يدوبك احنا ضيوف
اخرنا فيكى العصر
واصحابك اصلا كانوا
يا ليبرالى .. يا علمانى ..
يإما سلفى او اخوانى....
والباقى حقه الستر
كتبت قلت بحبك
ودايب فيكى يا مصر
بس ياخسارة
كلامى عاجز
اصله اتغمس فيكى صبر
يادوب قيدك فك
اتحبستى تانى فى قصر
قصر سوره عالى
شعاره عاوزة صبر
قالك نهضة قلنا خير
بس النهضة طلعت كشرى
وكوباية شاى فى سوق العصر
قالك بس نفوق
دى ازمة انتخابات
وبعديها نعدى الفقر
ابقى قابلنى لو عدينا
يوميها يبقى الحوت
حج وساب البحر
قالك هنشغل ميدو وحمو
ومنى واخواتها وخالها وعمرو
بس يا خسارة .. يا عينى
شغلانتى طلعت
حلاونجى شعر
قالك خير ياولادنا
ده برضه مصر بلدنا
عاوزة منك حبة صبر
صبرنا كتير
بس الحبة ياعمى
طلعت ولا مية شهر
كتبت قلت بحبك
وعينى عليكى
يامصر
آخرك شوية شعر
على ورقة بيضة
فيها حبر
يقراها عمو
يقولى برافو
قصيدتك تنفع للنشر

بقلم/محمد عبدالرحيم محمد
محافظة سوهاج
بكاليريوس علوم 2012

*******************

المتسابق رقم 43
الإسم : محمود محمد وحيد كامل
محافظة المنيا.....مغاغة .....قفادة

اسم القصيدة " فوقوا بقى"

""فوقوا بقى"" خاصة بالمسابقة

يا دولة البهـــــــــــــوات
وحكومة عايشة بهــــات
هو الضمير لومــــــــــات
كيف العدالة تســـــــــــود

كيف الجراح هتطيــــــب
يا دولة التهليـــــــــــــب
لو تستحى من العيــــب
جايز وطنا يعـــــــــــــــود

جايز نعدى الليــــــــــل
يا دولة التهليــــــــــــل
لما الميزان بيميــــــــل
يبقى الامان مفقـــــــــود

يبقى البرئ مســـجون
يا دولة اللى يخـــــــون
لما الشرف بيهــــــــون
نمشى فى طريق مسدود

نمشى فى متاهـة ذل
يا دولة سيفها الغـــــل
لما الكبير بيضــــــــــل
إيه يعمل المولــــــــــــود

إيه يعمل المسكـــــين
يا دولة السكاكــــــــين
سكين على سكـــــين
دم الولاد مشهـــــــــــود

دم الغلابة أنهـــــــــــار
يا دولة الأشــــــــــــرار
الارض للأحــــــــــــــرار
لابد يوم هتعـــــــــــــــود

لابد من التغيـــــــــــير
يا دولة التدمــــــــــــير
لو فيكى ألف مشــــــير
جيشك أمان معهـــــــــود

جيشك لصمته حــــد
يادولة صــــــــــد ورد
فرعون خلاص إنهــــد
والحبل بقى مشــــــدود

الحبل فى الميــــــدان
يا دولة العصيــــــــــان
الحد فى القــــــــــران
مذكور وإحنا شــــــــــهود

*******************

المتسابق رقم 44
( سلامه خضر عبد العزيز )
محافظة الفيوم

تسلم كلاب الصيد لو تنبح .... لكن كلاب الفلول دى تدبح ...
تقتل ولاد اشراف وفى دمهم تسبح .....
يدى الاشارة قاضى خسيس واعلامى راح يفرح ....
ويمدح خراب البلد ما يصلح .....
تظلم كلاب الارض لما تشبهم بفلولى دا اقبح ..
حتى كلاب الليل مسعوره .....
تشوف كلاب الفلول تجري مذعوره
تنهش كلابهم فى الى اواها وخلاها مستوره .........
ليه تنهشوا فى الوطن يا عقول مخموره .........
اضرب ايادى الفساد يا ريس وافضح ....
لا حلم لا عفو لا تصفح............
تسلم كلاب الارض لو تنبح ......
لكن كلاب الفلول دى ادبح ....
اوعى تسيبهم ينبحوا تانى
دا السجن ليهم اصلح ....
كل الكلاب اتجمعوا فى الصوره .... تظهر لهم انياب تجرح......
. تنهش فى لحم الوطن دى وجوه معلومه .....
انيابها مأجورة...........
كل الكلاب اتجمعوا فى الصورة
( سلامه خضر عبد العزيز ) الفيوم
*******************

المتسابق رقم 45
هانى محمد رضا سعد -- الاسكندريه

وانا جاى من بكــــــــره
عدّيت على امبـــــــارح
وغرقت فى الذكـــــرى
وفضلت انا ســـــــــارح
وبعدها بفتــــــــــــــره
قالى أمل جـــــــــــانح
لو ماتت الفطـــــــــــره
بكره اكيد جـــــــــــارح
................................
واتارينى كنت بعيــــش
فى غياهب الخفافيـش
ماشى ببيع بشويـــش
كل شئ صـــــــــــالح
معايه او معاييـــــــــش
تفرق فى ايه يادراويش
سيل المطر مايجييـش
او يجى فى المالــــــح
..............................
طفح الزمــــــــان اندال
شر وبدون مكيــــــــال
نوايا كلت اعمـــــــــال
ظلم وفساد كاســـــح
بتر او استئصــــــــــال
من بعضه نفس الحـال
اسمه هُدى وانشـــال
رؤيــه بلا مـــــــــلامح
...............................
فى الوش جبين مذلول
مابيعقل المعقــــــــول
فكر وصبح منقــــــــول
خدعه شيطان فالــــح
الحب عرَض بيــــــزول
وبفكر غبى وجهـــــول
غشينا فى المأمــــول
يااااااااااااااه يامصالـــــح
.............................
طاغوت وفيه هيمــــان
أطهر مافى النسيـــان
اترجـرج البنيــــــــــان
والعله غباء طامـــــح
قتل الهوى الاحســان
وطاطينا ليك ياشيطان
وحبستنا ف وجــــدان
وهم الانا الجامـــــــح
.............................
حكمه وجــــــوا النـــار
فيها العجب ابهـــــــار
دقيقه تجيب انـــــــوار
وساعتها لهيب طايـح
كبد الزمان مشـــــوار
والنقش ع الاحجـــــار
مكتوب ف اخره نهـــار
وليل اكيد رايــــــــــح
.............................
*******************

المتسابق رقم 46
رضا عبد المنعم ابو الغيط
محافظة الشرقية

ايدى فى ايدك
نبنى بلدنا
ايدى فى ايدك
نحمى ولادنا
ادعى لفكره
تكبر بكره
تبقى هتاف
وسط التحرير
ادعى لثوره
فى التحرير
يبقى هدفها
روح التغير
ادعى لثوره
فى التحرير
يبقى هدفها
نبذ العنف
نبذ التكسير
ايدى فى ايدك
نبنى بلدنا
ايدى فى ايدك
نحمى ولادنا
ازرع شجره
تطرح ثمره
ياكل منها
كبير وصغير
حط الطوبه
فوق الطوبه
تصبح شقه
لكل فقير
ايدى فى ايدك
نبنى بلدنا
ايدى فى ايدك
نحمى ولادنا
ادعى لثوره
تبقى الشرطه
مع الثوار
ادعى لثوره
يبقى نجاحها
أصله حوار
ربنا عالم
بالمستور
ربنا وحده
رحيم وغفور
ربنا قادر
ينصر عبده
المسحول والمقهور
ربنا قادر
يرجع لينا
تانى النور
ايدى فى ايدك
نبنى بلدنا
ايدى فى ايدك
نحمى ولادنا
ادعى معايا
وأقول الله
ربنا قادر
ينصر شعبه
لما تكون
قلوبنا معاه
ادعى معايا
وأقول الله
ايدى فى ايدك
نبنى بلدنا
ايدى فى ايدك
نحمى ولادنا
خلى ايديا
كده فى ايديك
مصرنا ليا
مصرنا ليك
أما لوحدك
مصر هتبقى
واسعه عليك
خلى ايديا
كده فى ايدك
خيرك ليا
وخيرى عليك
عمر الدنيا
ما تفضل ليا
ولا عمرها
تفضل تديك
خلى ايديا
كده فى ايديك
افرح بيا
وأفخر بيك
مصر هتبقى
بيا وبيك
مصر بلدنا
ليا وليك
ايدى فى ايدك
تبقى ايدين
نحمى بلدنا
من الحاقدين
ايدى فى ايدك
تبقى ايدين
نبنى بلدنا
احنا الاتنين
ايدى فى ايدك
تبقى ايدين
نزرع فيها
فل وياسمين
مصرنا ليا
مصرنا ليك
مصر بلدنا
احنا الاتنين
مصر الأم
مصر الأب
قوم نحميها
قوم نبنيها
قوم نرويها
بكل الحب
رضا عبدالمنعم أبو الغيط محافظه الشرقيه

*******************

المتسابق رقم 46
بهاء محمد عبده
محافظة القليوبية رقم تليفوني
01007492643

حروف متبعترة

في حضن الليل مرسوم مكاني
من زمان من قبل مااتعلم اتهجى الحروف
من قبل مااعرف شكلي ولوني
من قبل مايتم تكويني وملامحي
ومن قبل مااحس بطعم الخوف

جيت من ظلام لظلام تاني
من قبل مااشوف واحس واسمع
من قبل مااحس بكياني
كان في ناس بالظلم بتصنع
نسيج شر وخيط بدم الغلابة
وحرفين جر من بني ادمين لديابة
وخيط ضعيف رابط ما بين الاتنين

ضي النجوم عاكس شعاع الامل
بيشاور ع النور اللى جاي من بواقي القمر
اترمى الضي وسط حروف متبعترة
يبين ملامح صبية وقلبها ملهوف

بتجري على حلمها تحميه من الخطر
تشد شيباك السما تحوط عليه
تحميه من برد الشتا بس عاوزة النور
وحوش بتنهش لحمها بدون خشى وكسوف

ياحروف متبعترة اتجمعوا
كونوا كلمة بصدها تسمعوه
نبض الانامل كالعزف ع الاوتار
وصوت عالي مسموع ومعروف

ياحروف متبعترة اتشكلوا
حددوا مداركم وارسموا
ملامح الصبية الدبلانة واعلنوا
عن بصيص الامل من وشها المخسوف
*******************

المتسابق رقم 47
عاطف حمدان محمد
محافظة قنا . ابو تشت

*** طب لمـــين ؟؟ ***
*****************
نفسي اسألها وعاوز
منها اسمع كلمتين
ليه يا مصر مدوخاني ؟
ردي قولي لحد فين ؟
نفسي افرح والقى مطرح
انسى جرحي فيه يومين
شافني واحد كان معدي
قاللي مالك ليه حزين ؟
السؤال ما يكونش ليها
واوعى تسأل طب لمين
السؤال للي غاويها
وقلبه دايب من سنين
واللي لو فارق عينيها
يغلبه الشوق والحنين
واوعى تسأل هو مين
هو طبعاً انت واحنا وكلنا
اللي تايه واللي عارف هو مين
اللي عايشين جوه خيرها
واللي منه محرومين
واللي رغم دموع عينيهم
فيها لسه مكملين
واللي حالفين يطفوا نارها
وياخدوا تارها ومشتاقين
ترجع الام العفية والصبية
رافعة من تاني الجبين
رافضة خيرها يكون لغيرها
غير لناسها الطيبين
فوقوا يلا وقولوا فوقنا
واحنا والله مكملين
بقلم / عاطف حمدان محمد - قنا
*******************

المتسابق رقم 48
الاسم...سيد محمد الحنبولى
.محافظة القاهره .حلوان

...خاص بالمسابقه
-------(((((((صـــوت بـيـنـاديـنـا)))))))---------

===========================
جـــــوه احـضـان الـسنين صـوت بـيـصُرخ ويـنـاديـنـا
صحـى فـى قـلـوبـنـا الــحنين للـعـروبـــه ولماضينا
كنا عايشين مـن سنين فى ارض واحد مــلك لينـا
مـن المحيـط للخليج خـيرهــا كـان طــــارح عــلينـا
ناس بجــــد مـخلــصين والشهامـــــه طبع فــينــــا
بـالقوه كنـا معروفين الـحــق واضــــح بين ايدينـــــا
أعـظم حضـارات السنين والتاريخ يشهـد علــيــنـــا
فــى كل شىء متقدمين والبشر تتباهـــــــى بينا
مجــد ومناره للعلوم و محـافــظـه على سنة نبينا
كنا بجــد مؤمنين وحدتنا اجمــــــل مـــــــــــــا فينـا
دلوقتى بنشكى للسنين والــدموع تحضن عنينـــا
حالنا ليه اصبــــــح حــزيـــن والهمـوم بتواسينــــــا

امــة باعت كل شــىء وارضها مش مــلك لـــيـهــا
خيرها اصبـــــح للغريب والتسول طبـــــع فـــيـهــــا
والزمام ما بقاش فى ايدها والعدو واصــــى عـليها
والفــراق مكتوب مصيرها والألأم بـتـهـد فـــيـــهــــا
واحنا بنرمم شروخها والجروح اللى فــى ايـــدهــا
والزمــان بيدارى خوفــها والامـــــل حاضــن عنيهــا
والتاريخ ماشى بيبكى بكى كــل شـىء عليهـــــا
والماضى واقف بيصرخ ويصحى النخوه اللى فيهــا
وهى ليه مش عايزه تصحى وترَجع مجــد ماضيها
ما انتى لازم ولابد تمشى وتكونى للعالم سفينـه
تحملينا جــــوه منــك و تــفــردى قلوعــك عــلينــا
احنـا عـايشين بره منك زى بحــر مالــوهش مينــا
نـفـسنـا مـــره تقودينــا مــــــن شتـاتنـا تنقـذينـــا
سوريا عـمــالـــه تنادينــا جــرحها يـصـعــب عــلينا
دمها علــى الارض يــُصـرخ واحـــنــا مغميين عنينا
والقنابله نازلـــه تـحــدف دمــرت اغــلــى مـــا لينا
واحنا مــــا باليد حـيــله االقــرار مـــــــش ملك لينا
احنا عــن اسلامنا نحكى ونقول دول اخـــوه لينــا
هـــو ده اخــر مـــالينا . اســـف يا سوريـــاواعذرينا
انـتـى اصــلاً عـايشه فينا
ياعروبـــه مــــا تسمعينــا
الـحـره عماله تنادينا .فلسطين اغــلــى مـــا لينا
هــى اصلا عايشه فينا. هـــــى رمــز الِعــزه لــيـنا
هـــــى مصنع للرجولـه.ارض عــاشــت للــبطولـــه
هـــى مزروعه فــــى قـــلــوبنا مـــن ايام الطفولـه

جـــــوه احـضـان الـسنين صـوت بـيـصُرخ ويـنـاديـنـا
صحـى فـى قـلـوبـنـا الــحنين للـعـروبـــه ولماضينا
-------------------------------------------------------
===================
ســــــــــــيـد الـــــحـــنــبــولــــــى

*******************

» المربعات الأرابيسك المعشقة . هنا مدرسة لتعليم لون جديد من ألوان الابداعات العامية المصرية . اسسها ويشرف عليها . الشاعر محمد فتحى رئيس رابطة شعراء العامية المصرية
» تنافس فى حب رابطة شعراء العامية المصرية . لمجموعة شعراء
» فى حب رابطة شعراء العامية المصرية
» فى حب رابطة شعراء العامية المصرية الكبرى
» اهداء الى رابطة شعراء العامية المصرية