مسابقة الشعر العامى من 15 فبراير الى 28 فبراير 2013 . احدى مسابقات رابطة شعراء العامية المصرية

المتسابق رقم 49
الاسم : ابتهال احمد محمد الشربينى
البلد : المنصورة / الدقهلية

عريس تفصـيـل
مــــــن غـيـر زفة تطـــبيل
وبـــــــدون صــرخة تهليل
وحاجات بتهــــــد الحـــيـل
انا عـايزة عريس تفصــــيـل
ويكون فى الاكــــل نباتـى
وبحبك مــــــوت ياحياتـى
يسمع أجمل حـــــواراتـى
ويـركـــــز فى التفـاصـيـل
صــاحب شخصية وهيبـة
ولاتطلع منه العيبـــــــــة
ويكون شاطر مش خيبة
متميز فـــــى التحصـــيل
صـــاحـب مبدأ وقضـيـة
ويكـون شخصــية قــــوية
استاذ حــــب وحـنيـــــة
متمكـــن م التحـــــليــل
ويكون أمــــور ووسيم
متفـــــــوق فــى التعليم
وحليم كده فــى التحكيم
يبقى كـــده باله طـــويل

لابس جلابية وعمــــــه
حافظ ع العهــــد بـذمــــة
بكفاءته بلغ القــــمــــــــــة
فى الأهـداف والتأهــيل
ميكونش صفيق وحرامى
ويعيش الدنيـا عصـامـــى
لمشاكله يبقى محـــــامـى
ما المشــوار لسه طــويـل
ويكون صــادق وصــريح
ويطــــير ببســاط الريـــح
يبنيلى فى العشق ضــريح
بعد مســـــــــــار التعديل
يسمع كده فيض اشعارى
ويحلّى كــل مـــــــــــــرارى
اتســــلى بيـــه فى نهـــــارى
والليل ميكونشى طـويــل
وبرستيج كده مش نيلــه
ويعيش ما الدنيا جميــــلـة
ميكونشى قليل الحيــلــة
ولاليه شبهـــــة تضليل

عايش مبسوط وبســيط
بس ميكـــــونش عـبيط
فى الموقف يبقى حـويط
يحزم من غـــيـر تعطـــيل
وكريم كــرمه مش عــــادى
يستحمل مــــر عنـــــادى
ويكون طيب اوى هادى
لأمـــــورى استاذ تسهيل
يشبه كده رشدى أبــــاظـــة
فى صـراحته يكســــر فــــازة
فى سماحته على طول طـازة
استـــــاذ فكــــــــر وتحـليـل
ويكـــــون فــــاضــل وجـليل
صـفته اسلوب تفــضـــــــيل
وشديد ميكونش عــــــويـل
يـــــرضــــــــى بكـــتير وقليل
مـتسـلطــن فـى التعـســــيل
جـــــــارى كـده فى التحميل
عنده سهــــــــــوله تشغيــــل
ما أنــا عـايـزة عريس تفصيل
*******************

المتسابق رقم 50
مصطفى الشحات صوار
فايد الاسماعيلية
01229693079
01146378440

ارجع يا زمان
*********
شباك اربيسك
ولوح سيدنا الشيخ
والمحبره والبوصه
وصوت الولاد
لما تردد وراه كلمه بكلمه
وكأنهم صدى صوته
وصوت خرير الميه
وهدير السواقى
ورقص البلابل على شباك المندره
ونشيد الفواعليه على السقالات
وغنى عمال الترحيله
وصوت جميله....لما تنادى
جمييييييييييييز عسل
وعبده بتاع الترمس بينده
جميل يا لوز
وريحه التشويحه اللى جيه من مطبخ الجيران
وصوت الازان
ساعه المغربيه
ولمه الولاد حوالين الطبليه
وتشبيكه ادينا
فى ايد بعضينا
وقله زمان لما كنا نسمى عليها ...كلنا نشرب
والميه تكفينا
ولقمه واحده كانت بتملى بطونا
وهدمه واحده كانت تدور وتسترنا
ودستورنا
تكون الجيره للجيره
لانعرف حقد ولا غيره..ولا سيره
كانت على لسانا
الا لمه الاحباب
ارجع يا زمان....ارجع يا زمان
وكفايه غياب
وهات معاك من امبارح
شويه خيوط ننسج بها بكره
لجل ما نعمل توب للعمر اللى جاى
انفخ فى الناى
لجل ما نفتكر لحنك الماضى
عيش يا زمان خليك فى وسطنا قاضى
وحكم بعدل ما بين امبارح وبين الحاضر وبين بكره
احكم يا زمان فوقنا مالسكره
عايشين فى بحر هايج ميته عكره
تقالدنا تاهت ما بين العولمه والتطبيع
واخلاقنا صارت يا دوب ذكره
ونخوتنا عشقت الجبن والحيره
ونخوتنا عشقت الجبن والحيره
ما تيجى نموت ونفضها سيره
بدال ما نعيش للخدمه والسخره
ارجع يا زمان قبل ما يفوت بكره
ارجع يا زمان وهات معاك الف شى وشى
هات معانى تنتفض تنفع زمانا الجى
الجرح نازف ولا عدشى نافع دوا او كى
ارجع يا زمان وشيل معايا الحمول
ارجع يا زمان دالحزن ناوى يطول
ارجع وهدينى... وخلى ايدك فى ايدى
ارجع وعزينى دا الفرح مات مقتول...............
بنينا للسكات هرم رابع
والخزى صار زلزال قاسى بتوابع
والحق تاه فى الحلق وصبح اللسان مخروس
والظلم بقى فى الخلق خلا القوى بيدوس
حتى الضمير انتهى ولا عاد بيتراجع
هترجع يا زمان الهنى ولا خلاص مش راجع
هترجع يا زمنا وتعدل المقلوب
ولا تسبنا نهاتى نفضل نقول مكتوب
الحيره طالت وخلت وجه شمالنا جنوب
ولا عدشى شىء نافع
هترجع يا زمان الهنى ولا خلاص مش راجع
*******************

المتسابق رقم 51
الشاعر /سمير الحجاوى
عضو نادى ادباء فايد(الشاعر العجوز)

سنين عمرى
&&&&&&&&&&&&&&
غابت شمس النهار
وجانا الليل وسكونه
بيقولوا شاب وبيخرف
يقولو زى ما يقولوا
على ورقى بعبى سنين
.............من التحصيل
ما انا غاوى وحجاوى
وقلمى ورثته عن اهلى
ما انا سواحلى
وابويا صياد
وورث البحر عن جدى
ما بين الموج وشطأنه
نسيم بيغزى وجدانى
ما انا منها نجوم ليلها
يطهرنى شراب نيلها
سنين عمرى ليلاتى
بغوص فى حكاويها
حكايه تهز وجدانى
وحكايه تمحى احزانى
ما انا الاتنين فى تكوينى
جمعنى بحرها ونيلها
هغنيلها وتسمعنى
وصوتى الاقيه فى ارغولها
ما انا العاشق وانا المعشوق فى موالها
ما انا العاشق وانا المعشوق فى موالها
ويوم ما ابعد.....بحنيلها

*******************

المتسابق رقم 52
سماح عبد المنعم محمد - محافظة القاهره

و انا اللى قلبى داب فى هواك وريد و خيطان ......
و انا اللى عمرى قضيته معاك زهور بستان ....
و انا اللى وجعى كان منك ... مكاييل و احفان .....
و انت اللى كنت لى فى العتمه شبابيك و بيبان .....
طفيت النور .... بنيت السور .....
جرحتنى بايديك و انا اللى ياما كنت اداويك .....
بأدعى لك مش بأدعى عليك ...
ماتخافش .... و لا يوم قلبى يقسى عليك
.........................................
" سماح عبد المنعم محمد - محافظة القاهره "

*******************

المتسابق رقم 53
الاسم علاء محمد أبوذكري
شاعر مصري يعمل بالخارج
محافظة المنوفيه

---------------------------------
وأفتكرتك
=======

وافتكرتك............
وأبديت أسرح في سيرتك
وأترسم ف القلب صورتك
وافتكرتك............
فاكره أحلام الطفولة والصبــــا
فاكره ضحكي ف الليالي الطيبة
فاكره عود ياسمين على سطح الجيران
لما كنا نتووه ونهرب م الزمــــــــــــان
فاكره فرحي وانكساري
فاكره نومي وسط داري
ويًا صوت عصفور يزقزق
لمًا كان يحرسني جـــــاري
وأبتديت أكبر وأفكر
نفسي بكرة يجي أخضر
بس بكرة ليه مجـــــــــاش
والجراد في الضلمه عاش
وافتكرتك...............
هو يعني أنا كنت ناسي
ده أنتي اهلك هما ناسي
بُعدي عنك مش أسيًة
حبي ليكِ مش كلام
قربي منك كان منايا
بس ضاع وسط الزحام
بس يوم ما بعدت عنك
افتكرتك ............
ياما قلت اقعد وعافر
ذي غيري م البشر
لما جيت أنده عليكِ
صوتي ف الحلق انحشر
قلت أنام أحلم بحضنك
حلمي جُوايا أنكسر
قمت قررت السفر
لمّا جيت أبعد بعيد
شفت صورتك ع الحدود
شفت نيلك . شفت زرعك
شوفت جنة للورود
كنت فاكر أني ها تحمل بعادك
كنت فاكر اني هرتاح من عنادك
بس يوم ما بعدت عنك
افتكرتك ............
افتكرتك حضن دافي
افتكرتك قلب صافي
افتكرت الدمعة في عيون الأحبة
افتكرت أبني بيكبر حبة. حبة
نفسي مرة أسألك ..
وألقى سؤالي له جواب
نفسي مره تسمعي
لو حتى تهجيني بعتاب
إنتى فاكرة ولا ناسية؟
ولا لسة حبيبتي أسْية؟
فاكرة أسمي والملامح؟
لمّا كنت كتير بسامح
لمّا حبيت البعاد
بس يوم ما بعدت عنك
افتكرتك ............
نفسي أرجع لك وأجيلك
يبقى زرعك ليه لغيرك
يعنى مهما أطوف بحور
نفسى اتعطر بنيلك

نفسي أحلم !!!
بس حلمي يكون حقيقة
نفسي أشوف الفرحة جوا عيون بريئة
نفسي أتنفس ترابك
نفسي يرجعلك شبابك
نفسي مره تندهي . وأرجع إليكِ
بس صوتي . يبقى صوتك
وأبقى نار للي يعاديكِ
نفسي أحلامي الجميلة
متنتهيش.............
بإختصار يا حب عمري
نفسي أعيـــــــش ...........................
--------------------------
-------------------------
من ديوان إنتفاضة شعب
إلى بلدي مصر

*******************

المتسابق رقم 54
حسام السبع . فلسطين

للمشاركة فى المسابقة
إفتــــرقنــــا
افترقنا .. وانتهتْ كل الحكايه
افترقنا..وخلاص آدي النهايه
بس ده هو إختيارك..
مش بإيدي الإختيار
مستحيل أرضى فراقك..
ده البعاد عندي انتحار
*****
افترقنا وانت بتقولي القدر
ده القدر جمّع قلوبنا
..ده القدر كان الربيع
مين يصدق انه قلبك.
.يا حياتي يوم يبيع ؟
باع عوطفي والحنان..
خلّى قلبي للهوان
حزني أغرب مـ الخيال .
جرحي فوق الإحتمال
من بعادك قايده نار
والبعاد عندي انتحار
*****
مش بصدق ياحياتي
انك انت تخدعيني .
. تحرميني إمنياتي
وبخيالي صورتك انت ِ ...
.انت بس وذكرياتي
مين يقول اني بعيش ..؟
ده الفراق لحظة مماتي
والبعاد عندي انتحار
*****
افترقنا واشتياقي ..
لسه باقي في الضلوع
وبعيوني لـهفه
تكتبها الدموع
قلبي يتمنى الرجوع ..
إنت عيدي والشموع
بس بُعدي يمكن ارحم من لقاك ِ !
واشتياقي ناره ارحم من رضاك ِ !
*****
ليه انا أبدأ ياعمري بالعتاب؟
إسأليني ليه أنا ارضيت الغياب
والفراق أصبح حقيقه ..
واللُقى أصبح سراب
وافترقنا وابتعدنا ..
والبعاد عندي انتحار
*******************

المتسابق رقم 55
السيد عبد الدايم عبد ربه ... القاهره

... صرخ يا واد ... سمعهم صوت السكات ...
خاص بالمسابقه ..
عليك العين يالي صورتك تترسم
يالي جبينك زي الجبال
شامخ وعالي وقصته موال
فينك بقي بقالنا زمان
في الضلمه بنستني
دمعتة نزلت مجمده زي الصخور
عبايته اللي كانت منوره زي القمر
لقيتها فجاه اتكرمشت واتكسرت
وكان عدي عليها وابور ظلط
ولقيته محني وبيسندوه علشان يقعد
مالك يا غالي ايه اللي كان واللي جري
شاور علي قلتي اسقيه شوية مي
شربه في شربه بللت دقنه وشاله
ومسح حنكه بيده وظهرت سنانه
وكانه فتح باب التاريخ
......................................................
كنا هناك علي باب الديوان
عارفه انتي باب الديوان اللي هوه المحكمه
نادي بسرعة وعلي بصوته محكمه
وقفنا لحد ما قعد القضاه
وسمعنا الافكاتوا وهو بيحقق معاه
انت اللي قتلت يا واد
انت اللي سرقتها وبعت المصاغ
انت اللي غرقت الارض وبورتها
ما تنطق يا واد ليه السكات
باين عليك من الارزال
اللي ما بتكلموا الا بلسعة قلم
ومن بين القضبان الحديد
بصيت عليه
رفع عينيه وكانها بتطق نار
بس طافيها الدموع
قاله ايوه يا بيه
انا الي قتلتها وسرقت المصاغ
وبورت ارضنا وبعتها للمشاع
انا اللي احتليت ارضنا
وبعتها ايوه يا بيه
انا اللي ايديا متشققه من كدي فيها
انا اللي لما بتبكي بمسح عنيها
فينك يا جدي
مش قلتلك بنزرع لا جل غيرنا
مش قلتلك نسيبها تموت
قلتلي بنزرع لبكره مش للقاعد جنبنا
قلتلي لو نسيبها احنا نموت
واديني قال سمعت الكلام
وزرعتها وفلحتها وحصدتها
وحصيدها كله طلع مرار
طلع زي الشيطان ما لوش امان
بقيت اني اللي خنتها
واللي سرق مني عرضها
هو الشريف اللي بينضرب له سلام
طيخ طراخ بيضربوه ورا قضبان الحديد
اسكت يا واد جاوب علي قد السؤال
حسيت ساعتها ان المكان ملاه سكات
وحال لسان المسجونين يا ولاد الكلاب
احنا اللي بنبات في العراء وانتم دفيانين
احنا اللي بنكتب بدمنا ودم عيالنا
بلادنا حره مستقله ....... طب لمين ؟؟؟؟
لقيت نفسي باصرخ واقف فوق الخشب
اللي مقعدنا عليه اوعاك يا واد
اوعاك يا واد تسكت ولو هيقطعولك لسان
لو قطعوا لسانك هايطلع مكانك مليون لسان
انتوا مين ومين قالوكوا تحاكموا المظلومين
اصرخ يا واد وعلي حسك خليه يجيب الميدان
خليه يصرخ بالف اه ملي خانقانا سنين
خليهم يسمعوا مره صوت انين الشقيانين
خليهم يناموا مره وفي ودانهم صرخة انين
صرخ يا واد واحنا معاك
ولتاني مره بصيت لقيت الدنيا قلبت سكات
وصوت البنادق وهي بتتعمر بيملا المكان
وطلقتين في الهوا رجعوا كل اللي جاي علي صوت الصراخ
عارفة يا زينة ولد الغروب
اللي متجند هناك في المحكمه
ابن عبد الرازق اللي حداه بقره وتورين
رفع الزناد فوق رقاب المسجونين
صرخت فيه اوعاك يا ولد
هاتضرب اخوك ولاجل مين
نسيت لما كنتوا بتلعبوا بالطحين
نسيت لما كنتم بتلعبوا في برج الحمام
طار الحمام و وعششت مكانها الحديات
اوعاك يا ولدي تصبح في يوم كفهم
رخي الزناد ولقيت عنيه مالهمش بيت
بيدورو علي اي بيت يرسوا عليه
اااااااااااااااااااااااااااااه وااااااااااااااااااه
شوفيلي شاش اربط جرحي اللي في راسي
خدت الضربه فوق دماغي لما جريت عليه
وشالوني شيل ورموني بره باب المحكمه
وفضلت اصرخ بس مين هايقول امين
بيقولو بنحاكمه بالقانون وانت كده ضد القانون
ولو معرفتش سكات راح تنحبس
ويطبقوا عليك القانون
.....................................................................
اكتمي جرحي بالبن يالا يا ام العيال
خلينا انام يمكن من النوم ماقوم
خليني اريح الوجع اللي في راسي
ذي مايكون جواه وابور طحين
يا باي عليهم سفاحين
ملقوش غير الغلبانين الشقيانين
طفت القنديل وعم الكون صوت النجوم
............................... تاليف السيد عبد الدايم

*******************

المتسابق رقم 56
سيد منيرعطيه
محافظه الشرقيه . الزقايق

خاص بالمسابقه
.....................
الحب علينا قدر
**************
لما أقول محتاج لحضنك
والليل فى قربك إحتياج
والقرب منك حياة
حياتى ملاها الحزن
والحزن منى قريب
ساعات بنسى الهم
وألاقى فرحى بعيد
لما بسمع ضحكتك
بنسى سنين غربتى
حلفت ميت يمين
أكون لحضنك أمين
وأروى عطش غربتك
وأزرع ورد وياسمين
ويبتدى عمرنا واحنا صدقين
ونكمل مشوار الحياة
على العهد متفقين
ويموت جوانا الحرمان
وعزله السنين
عاهدتك يا نبع صافى
ياعود أخضر ورياحين
أصونك مهما باعدتنا السنين
وأحلف ميت يمين
ان الحب جوايا بحر
يروى صحارى وطين
لما أقول بحبك
يهتز جبل أحد
وتكتر البراكين
دا الحب جوايا أمل
مخلوق ليوم الدين
بستنى طلعتك تروى
صحارى العين
دا الحب علينا قدر
وانكتب
وإحنا مش حاسين
يعلم ربى ويشهد
ان الحب أمر
واحنا مش خايفين
عاهدتك ياعمرى
يا سنينى اللى جايه
أفضل حبيب
مهما غاب الحنين
مهما تطول الليالى
وتتغير فصول وسنين
أفضل أحبك
وأتحدى المستحيل
وييجى الربيع الاخضر
وتشرق شمس الحياة
ويبتعد خريف العمر
عن كل الحياة
وما يدبل ورقك الاخضر
يا نبع الحياة
بسابق ريح الشتا
لما تهز غصون المحبه
والشجر خايف يكبر
ويبقى مأساه
طول ما الربيع اخضر
ح يبقى الخريف اكبر
ونعيش الحياة
حلفت ميت يمين
دا الحب علينا قدر
وإحنا مش حاسين
بقلمى / سيد منيرعطيه
*******************

المتسابق رقم 57
الاسم رفيدة محمد عبد المنعم
محافظة سوهاج مركز طهطا
القصيدة بعنوان مين يحبك يا بهية

مين يحبك يا بهية غير ياسين
مين يصون ضحكة عيونك
مين يكون ليها ضمين
مات ياسين وراه ياسين
وأنتى لسة زى ماأنتى
واخدة على كتم الأنين
والآلام اللى فى حشاكى
قايدة على جمر السنين
والزمان اللى ضناكى سلمك للنخاسين
كل توب يبرز بهاكى يحولوه لتوب حزين
كل طعنة يم قلبك يتقتل مليون ياسين
الأسامى مش مهمة ما احنا طين...

*******************

المتسابق رقم 58
الحسينى منير الشربينى
محافظة الدقهلية . بلقاس . مقيم بالسعودية

قصيدة عم قناوى
عم قناوى الخيال البسيط بيقول حكم يستفاد منها الجميع كنت ماشى بين البيت والغيط
لقيت عم قناوى زعلان وساند على الحيط قولتلة مالك ياعم قناوى زعلان قال انا خيال قولت حلو الكلام طيب لية زعلان قال ضاع الحصان ازاى اكون خيال قولتلة نجيب حصان تانى قال ازاى اعطية حنانى ويحس بيا تانى دة عشرة زمانى يابنى الخيل معدنة غالى ياترى فهمت كلامى !
قولت ياعم قناوى فهمنى من تانى قالى ياينى انت عايز سنين وليالى لانة احساس وحب مش حكاوى قولت احسة معاك والاحساس دايما غالى قال يابنى سيبك من كلام الاغانى انت عايز تفهم قولت نعم قال انسى كل كرة فى قلبك اتولد وخللى فى قلبك كل حب على الفطرة اتولد ودية بداية كل ما اتولد تعالى نربى الصغار على الوفا لما يكبروا يكونوا زى الخيل الاصيل تركب على ظهرة يطير مايحس انك علية ثقيل ويخاف عليك من مهاب الريح ودة اول القصيد فهمت يابنى ولا اعيد !!
قولت ياعم قناوى زيد قالى باين عليك شاب عنيد قولت سامحنى ممكن اكون عنيد قال اسامحك لية دة الدرس التانى انك تكون عنيد ضدد الشر وتزيد زيك زى الخيل العفى الشديد فى المعارك يكون عنيد والنصر دايما معاة يكون اكيد قولت ياعم قناوى عايزنى اكون عنيد قالى نعم اكيد وتكون مع العند شديد وفى الحق تكون اكيد قولت طيب ياعم قناوى انت اخذتنى كدة لبعيد قال بالعكس انت منى قريب قولت ازاى ياعم الحبيب قال الخيل فية العنيد والشديد والخيال فى ايدة لجام واللجام فى بعض الاحيان محتاج ايد من حديد مع الحصان العفى العنيد قولت ياعم قناوى دة انت كلامك عبر مش حكاوى قال يابنى سيبك من الاغانى وارجع لاصلك تلاقى الاصل غالى دة الموضوع محتاج سنين وليالى سيبك من شغل الغرب دة الغرب عينها على حصانى ويدفعوا فية مهما كان غالى اية رايك يابنى ابيعة قولت ازاى تبيعة واحنا نروح فين ياعمنا قال يابنى دة اللى زاد همنا عارفت لية يابنى انا زعلان قولت بالله عليك فهمنى شوية كمان انا ابنك وهاكون بعد زمان ورثك قال قربت تفهم الكلام قولت ازاى قال المقصود مش الحصان المقصود راكب الحصان ازاى اكون خيال وانت شايف الشيب قرب منى والضعف اهلكنى ماينفعش اكون خيال بصيت حواليا لقيت ابنى اضعف منى مانفعش يكون خيال ضاعت القيادة منى فزاد همى والفقر شرب من دمى استعنت بخيال تانى من جنس ولون تانى واتارى هو كان بيستنانى بهدلنى وبهدل خيلى وسود ايامى لانى استعنت بغيرى فهمت يابنى لية زعلان واية المقصود بالكلام الحصان موجود لكن مين يركب ويقود ... القائد ضاع وضيع الموجود قولت ياعمى فهمت المقصود واتعلم واركب واقود مع السلامة ياعمى والله موجود قال ياعم قناوى مع السلامة يابنى والله ييارك فيك ويبارك فى الجهود والحقونا قبل ماتتدمر البيوت ورجعوا مجد اجدادنا وخلينا للعالم نسود لان اجدادنا كانوا فى الاصل اسووووووود.

*******************

المتسابق رقم 59
الاسم : أشرف عبد الفتاح شفيق - مهندس زراعي
- رشيد - البحيرة -

ليلة ما كان القمر مخنوق
***
من زمان من كام سنه
وف ليله من ذات الليالى
كانت بلدنا معتمه
بظلم الدرك والوالي
الصمت فيها كان ملل
والملل كان السمه
وف ليله كان القمر مخنوق
ومش باين إنه هيبان أو يروق
بالطبول أو بالأغاني
نوره ينزل ف الشقوق
قالتلى أمى : هات لنا
من عند جازيه ببيضه جاز
الدنيا كانت ضلمه كُحل
وفجأه دوست ع القزاز
يا لهوى رجلى اتعورت
رميت البيضه والجركن
وقولت أركن
أنشف دم رجليه
ورجعت تانى لحد البيت
العطشان لشربة جاز
بجرحي وجركني الفاضي
شافتنى أمى ف الخلا
بصت وقالت : يا وله
ينّيلك أيه عورك
ومالك مقندل قندله
هوه انته طالع من عرك
من بكره تاخد كوز دره
م الخابيه جنب السندره
وخوفى ما يخدوش الدره
دى تبقى كارثه للبلد
يضيع خيرها على غيرها
وما نلاقيش خير البلد
من زمان من كام سنه
العيشه كانت دندره
والحلم كان بين طين ونار
والعمله كانت كوز دره
والأرض عاشقه للبوار
والحياه ماشيه لورا
والظلام كان ف البيوت
شيء ملازم للسكوت
والمكان هوا المكان
والبلد هى البلد
***

*******************

المتسابق رقم 60
محمد جابر المتولى
محافظة أسيوط

خيوط متلخبطة
كل الخيوط اتلخبطت
كل الكور جات فى الأوت
كل القوى متفككه
ومفبركه
والمصلحة
كرسى الملك
المشكله
كرسى الملك
وآدى الملك هو الملك
ايزيس بتنده ع الولد
فين الولد ؟
لسه الولد
راح يتولد
ايزيس بتتقايا المحن
ايزيس بتتشكل شجن
كل الايادى تشدها
ممدودة ترسم فى الألم
ايزيس يا غنوة بتنطفى
يإدين عيال متجمعة
شلل الخراب متربعة
جوه الشوراع والقصور
بين الشقوق تعابين كتير
بره الحدود عقرب كبير
وديابة تتمناها بور
الليل بيتسحب .. قلق
يسكن قلوبنا للدوام
والصبح دمه بيتخلط
مع دم اغلى للشهيد
والعيد معاده بيتلغى
مع فوضى عامة للسنين
وغلابة مكتوفى الهمم
عايشين عدم جوه العدم
ظاهرين فقط بره الصور
العيش ده عايزنه لقم
واللقمة منداسة فى عراك
السادة اصحاب الشاشات
اللى ينادوا باسم شعب
رافض يكون عبد لرمم
ايزيس خلاصها بيتحرق
والليل ركز .. سكن .. اتفرد
والكل يتخبط .. يقع
تخابيط وخبط فى منتجع
للمهوسين .. المحتاسين جوه العبط
الثورة فرحة بتتسرق
بره الحدود واقفة الغيلان
تضحك .. تصقف ع الهبل
الشاعر / محمد جابر المتولى
أسيوط
*******************

المتسابق رقم 61
رانيا على حجاج
محافظة الدقهلية

القصيدة المشاركة بالمسابقة

أعمل فيها عبيط

صحيت في يوم قلت أعيش سعيد
بصيت في مرايتي لقتني واقف وحيد
لبست وش تاني و الأبتسامة حديد
و نزلت أشوف الدنيا و جوايا أمل جديد
لقيت الناس تايهه و بتكلم نفسها
يا ترى الدنيا قاسية و لا نسيو شكلها
حنأكلهم منين و الهم قاسم ضهرها
دة الدنيا للغلابة بحر ضلمة و مفيش زيها
من كبرها توهنا و ماتت جوانا القلوب
و من المرض أتهرينا و كل يوم سلة حبوب
و كل يوم يعدي والقرش يفضى من الجيوب
و يقولو عيشه رضاه يا رتها تخلى من العيوب
و أروح أخلع الإبتسامة و أرميها جنب الحيط
و ألاقي الهم زاد كأني غرقان في المحيط
خرجت بلأمل رجعت من غير غنى و لا سيط
و قولت الهم لازم أنساه و أعمل فيها عبيط

*******************

المتسابق رقم 62
عاطف عبد العزيز الشاذلى
محافظة القاهرة

******* بيان ثوري وطني رقم (1) *********

دقّت ساعات الوطن
والدم زاح العطن
غطّى الميدان بالفل
هتفت جموع البشر
النجع ويّا الحضر
يامصر فجرك هل
من بعد ليل ضلّم
يا شعب يا معلم
قوم هب واتكلم
من بعد صمت طويل
وجيل يسلّم جيل
من كل حارة وبيت
ياما ياشعب عانيت
م الظلم لمّا شاع
والحلم لمّا انباع
والعدل يوم ما انداس
م الحاكم النخّاس
والحمل مد وطال
أيّام شهور وسنين
ويوم ما حان الحين
الطلق كان حامي
أذّن بفجر وليد
قال يابلد قومي
النبت نبت جديد
مجنون بعشق الوطن
يا الثورة في محبته ..
يا نضم أرضه ف كفن..
ولأنه مصري أكيد
صرخ ف كل مكان
نجع وحضر وكفور
يامصري هب وثور
ياعم ( نجم ) قوم
صحّي معاك القوم
كل اللي كان غفلان
يسبح ف عز النوم
فكّرنا بالسجّان
والقاضي والجلاّد
وكل ندل جبان
حكّم لنا الأوغاد
حكمونا با الطغيان
والظلم لمّا انزاح
القلب طاب و ارتاح
نطلع معاك الغيط
نملاه أغاني وزيط
تحكلنا ( كلب الست )
والقي ( البيان الهام )
وهات معاك ناسك
( سيد ) و( عم إمام )
نسهر ف( حوش آدم )
ونزور ( ضريح ناصر )
الحضن صار واسع
ماعاد بيتحاصر
كل الكلاب غارت
والثوّرة اهي فارت
زيّ البنات البكر
( زينب ) و( نوّارة )
والدنيا دوّارة
ياعم ( أبنودي )
شعرك بيدّيني
إحساسي بوجودي
خلّي القلم يصرخ
هات الكلام م القلب
يفوت ف شرق وغرب
وف كل أرض يخط
يكتب بعزم وجد
من يوم ( حراجي القط )
واخوانه قاموا السد
و( وهيبة ) لسّه صغار
والكحل ف عنيها
تحت السجر زنهار
والكل حواليها
تصرخ تهزّ الميدان
يامصر آن الأوان
(عدّى النهار ) الكئيب
والليل ضلامه بليد
والشمس مهما تغيب
تسطع بدم الشهيد
ياعمّنا ( حدّاد )
يامسحّراتي القوم
حان اللقا بمعاد
اصرخ ف ناسك قوم
وارمح ف كل الأرض
ساعة جهادنا فرض
زيّ الصلاة والصوم
الثوّرة ثوّرة شعب
داق المرار والصعب
دق لنا ع الطبلة
وجهّنا للقبلة
أذّن لنا وكبر
راح الزمن لاغبر
ما انت اللي قبل سنين
شعرك نبت م الطين
خلا السواقي تدور
والقمح فات ف البور
والمصري صار م الحين
فلاّح بعلم ونور
ياعمّنا ( جاهين )
مصر النهارده فين
علما وشيوخ وشباب
حكما وبنات وعيال
فتحوا لنا أبواب
صبحت حياتنا نضال
ارسم لهم ( صورة )
(على إسم مصر ) السد
حتلاقي نفس الشكل
اليوم وأمس وغد
عوضين وعطوة وسعد
همّا كريم وسعيد
ف الشدّة صبر وجد
والعزم عزم حديد
يقيم حياتنا صروح
اصرخ بعزم الصوت
يمكن جراحنا تموت
يرحل قديمنا يفوت
وتردّ فينا الروح
هات عمّنا ( بيرم )
ينشد في أزجاله
ويطوف بترحاله
ويّا جموع الناس
انفكّت الحراس
( الأوّله) في مصر
العشّه جنب القصر
تهف بكل حماس
ع الخاين اللي باع
قلب الوطن بالليل
والأمن لمّا ضاع
ضيّع غنا ومواويل
( والتانية ) في الميدان
الفجر شق وبان
الشعب قال ( ارحل )
ردّدها صبح وليل
سقط النظام وانهار
من فوق ضهور الخيل
ومصر بقيت مصر
وهبة زاينها النيل
والتالتة دمّ شهيد
شمعة فرح بتقيد
نوّر ف قلب الوطن
سطّر لمجده نشيد
طاف بينا زيّ المطر
لو غدر برضه قدر
ياهل ترى يتمحي
ويضيع مابينا هدر ؟
يا مصر يابهيّة
من بعد ليل دامي
صبحتي ثوريّة
أيّامك الجايّة
نقدر نعدّيها
بالصدق ف النيّة
حنلاقي ميت حيّة
تخرج من الغيّة
ان خفنا تلسعنا
نصبح بلا معني
وان دسنا فوق راسها
نحبس ف أنفاسها
حنعّدي م الخيّة
صوت الأدان يعلى
وندق أجراسها
ونشغّل المصنع
ينتج ويدينا
ويجلجل المدفع
فوق راس أعادينا
والزّرعة خيرها يزيد
ويهل يوم العيد
ويهل يوم العيد

****ميدان التحرير 11فبراير 2011 ****

عاطف عبدالعزيز الشاذلي

محافظة القاهرة

*******************

المتسابق رقم 63
الشاعر ثابت عبد الظاهر محارب
فايد الاسماعيليه

( أسكنينى )
أسكنينى قصه من قصاقيص الغرام

دوبينى كلمه شقطهالى شفايف ملكها الإنسجام

أسمعينى مره حرف تاه من طواحين الملام

خايف على بكره من الأيام

تعالى وأفردى شعورك عليا

الضلمه تخنق والحدود أعتاب

عودى بقلبى أل تاه منى

من البدايه شباب

ألى عاش جنبك 000 سنين جنبك

وما نابه غير سهم العتاب

طاب قوليلى حتى قبلا

مايجى يوم وتغرقينى

هتيجى للحظه وتهجرينى

كنت أقولك أسكنينى ؟!!

كنت أقولك أسمعينى ؟!!

كنت أقولك دوبينى ؟!!
( بقالى كتير )

بقالى كتير على نفسى على نفسى بأدّور !!

كتير مشاوير ولسه برضه متحّير

كل البحور تاخد وبتوصل

وأنا قاربى لسه مستنظر

يا موج حادف بلاد الشوق

أنا عاشق .. أنا المعشوق

أنا قدرى تملّى أفوق

على أخر نسايم ضوء

سنين أخرتها بتلومنى

على حالى .. على صبرى

وأنا ألى يطل على قلبى

يلاقى الفرح فيه مشنوق

وكام تكتر ألام وألام

وكام تحدف عليّا ملام

وليه تغرق سفن أحلام

وليه تدمع فى حضن حبيب ؟!

*******************

المتسابق رقم 64
على محمود محمد . وشهرته ( على جامع )
محافظــــــة قنـــــــا

انفجار

*****

اتبسملى
وارقينى م العين اللى مشافتنيش
لحظة ماكنت باجاول اطفى الشمس
وافتكرى تاخدى الحلم من جواى
وتكحلى زموشك فى وقت الاشتياق
تترد غربة روحى لعيونى
تشوفينى مش غيرى
تدعيلى اكون محفوظ
لجلن بناتى يشرفوم نوبل
ترجعلى روحى بدعوتك فى النعش
ادفنها جوه الجرح
تطرح حروف هتمه
ليه لما طال الانتظار للنور
دعيتيلى فى العتمه
مع ان ابويا كتبنى فى وصيته
وكتب قصادى
خرم ابرة ضى؟
ياللى الطيابه استوطنت عقلك
اتغيرت عملة زمانك من زمان
فيا ترحلى
ياتضيفى وشك لون على المكياج
يرجعلك العمر اللى عدى يهدهدك
وساعتها عمرى ماهاحسدك
ولا هافتخر
طب هاعمل ايه؟
راح احط سدرى ف حوصلة بكره اللى فاتنى
وانفجر

شعر/على محمود محمد
( على جامع )
محافظــــــة قنـــــــا
*******************

المتسابق رقم 65
الشاعر أحمد عبد القوى محمد عبد الغنى
---- محافظة بنى سويف ---مركز الواسطى-

قصيدة(حقك عليا يا بحر)
------------------------------------------------------------
سهران بغازل فى النجوم
والبحر كان سهران
كام موجه حدفت نحيتى
وعملت مش دريان
فجأه ندانى البحر
ولاقيته بيقولى
ملاقيش معاك ميه
اصلى يا واد عطشان
رديت يا موج البحر
بطل بلاش تمحيك
برضوا انا اللى اسقيك
شكلك بتدلع
أو م الغزل غيران
ردت نجوم الليل
قالت يا بحر اختشى
سيب الولد غلبان
قال يا نجوم الليل
ياما دا جانى عليل
يشكيلى من همه
وانا كنت بسمع شكوته
بين موجى وبضمه
فجأه يسبنى وحيد
بعد اما كنا اصحاب
انا ليا عنده عتاب
وقت الفرح ينطرح
وسط النجوم يحكى
وف حزنه ييجى يرتمى
بين موجى وبيشكى
أنا كنت مرساه
يوم بكاه
وف وقت غضبى ع الخلايق
كان موجى بيهزر معاه
أيه اللى جاه
غيران انا
م انا كنت مرساه الوحيد
من كام سنه
ليه يرتمى فى حضن الغريب
وقت الهنا
كام ليله عدت مننا
وموجى مستنى المعاد
كان موجى اعزب موج هنا
بس بجراحه ملحى زاد
أنا م النهرده
مليش صحاب
خليه ما بينكم يرتمى
انا موجى واخد ع الغياب
ضحكت نجوم الليل وقالت
كل دا جواك يا بحر
ودموعى نزلت م الخجل
لما اشتكانى للنجوم
كان عنده حق فى كلمته
ليه هوه واحده للهموم
وعلى العموم
حقك عليا ياابو البحور
ابوس على موجك الهادى
بحلف بشوقى ولهفتى
جايلك وفى معادى
هشكى لمين غيرك
ما انت اللى فيك زادى
اوعاك يا بحر الهوى
تقدر تخاصمنى
جتلك وقلبى ذليل
منك متحرمنى
هرمى الشباك جواك
قلبى هيستناك
ع الفرح تعزمنى
حقك عليا يا ابو البحور
لساك يا واد زعلان
أياك تكون ناسى الهوى
ناسى ليالى زمان
وان انت اول من ندانى
الشاعر الغلبان

-------------------------------------------

*******************

المتسابق رقم 66
محمد رمضان محمد
....نجع حمادى ..... قنا

أحكى عن العاشقين
............................
احكى عن العاشقين
حدوتة بكرية
كل البنات حلوين
يهوو الملاغية
كل القلوب عاشقين
حب البنات غية
العمر شجرة تين
ضلة وحورية
حتى ف قلب البحر
هتلاقى بنية
ولو رسيت ع البر
عشرة وحنية
يغنى شط الغرام
لحبيب وشمسية
يحكى لقلب الموج
حكاية منسية
اسال بنات الحور
راكبن ف دهبية
عاشقين لشط النيل
ولا مراكبية
شايف بنات النيل
نايمين ف عصرية
عاشقين لسهر الليل
ولا لفجرية
لية يا بنات النوبة
اليمة قبلية
وغربتى ف السفر
مولودة قبليا
لية يا غزال حجبوك
عن طلعتك ليا
الخوف عليك جانى
والفرقة مجنية
الحلوة من مطروح
ولا اسكندرانية
قلب الولد مطروح
جمعوة مع بنية
حلوين بنات الطور
الطلعة بدرية
مكسوفة شمس الضحى
برقع وجلابية
عيون بنات سينا
قاعدين ف ضل عريش
تروى كباد الابل
وقلوب فواعلية
ف الوادى والواحة
النظرة دباحة
الغيرة قتالة
دم الجمال دية
لو رحت شط الهوى
هيغلبك موجة
تعوم على عومة
وترجعك هيا
لو رحت بطن الجبل
هتلاقى قلب الحجر
يعشق بنات الغجر
ويخاوى جنية
من يوم ما قلبى اتولد
عاشق بنات البلد
بكل ما فيا
القلب عز المطر
يدق دق الخطر
واقف يشمسية
مستنى وعد الغرام
وبسمة وردية
القلب ميت فدان
وقلب البلد ف ميدان
والبنت منسية
قلب البلد لو تاة
يلاقوة مع صبية
وحتى ف الجنة
هتلاقى حورية .......
محمد رمضان محمد .......قنا.
.مسابقة رابطة شعراء العامية المصرية

*******************

المتسابق رقم 67
أحمد محمد كامل
محافظة الاسكندرية

بنيّـة وشوش

حاول ،
يغسل ملامحه من الهموم ،
و يعبّي قرص الشمس ..
فـ جيوب السفر
و فـ قلبه ،
أول غنوة غناها لحبيبته ..
و الوطن
و قصيدة م انكتبتش لسّة
ممزوجة بالحلم اللي سايل
فوق ملامح سكته ،
حبتين
من ندا عينيه البراح
و ابتدا الرحلة
علي ضهر آخر مُهر ..
بيراهن عليه
سقط الفرس
جوة بنيـة وشوش
باهتة الملامح
بتخبي من عينه الطريق
و تحط فـ ضلوعه الوجع
ألبوم صور

بحر اتعلم ينهش جرحه ،
و يهّد قصوره الرملة و يحلف ..
إنه بريء
يتحني ..
من دم بكارة طيبته
رغم ان امبارح ..
كان صاحبه
و فـ وسط طاحونة ألبومه
إترشقت فـ عينيه جنـيّة
شمس بتغرب ،
وقت ما تنطق ،
كل السماوات بالنور
بنت رماها الموج فـ عينيه ،
و اما امتلكت .. فلتت
من قوس الأحلام البكر ..
و غابت
سابت في وريد البوح ..
دمعة
و علي آخر صفحة فـ ألبومه ..
ملكة
بدأت ترفع طرف التوب
و تخطي فـ مرمر قلبه و تهمس ..
إنه الفارس
و العرش اللي فـ قصره بتاعها
آمن .. سحبت
من حبل الأحلام مشبكها و فتحت ،
لفراش الأحلام الباب ..
إتسرسب

دلوقت راجع ..
من الرحلة الوجع
خالع النعلين و خارج
م الوطن
داخل ( لواد غير ذي زرع )
_كافر بكل الأمنيات _
و فـ قلبه ..
آخر غنوة غناها لحبيبته
و قصيدة بدأت تنكتب ،
و مقطعين .. من ( لا تصالح ) .

*******************

المتسابق رقم 68
الاسم / محمد احمد صلاح احمد سلامه
الشهره / محمد سلامه
من القاهره

*** نحي الرايات *********
الدم اصبح للّوَز ..

حتىَ الجُثث .. علىَ سطحهُ .. ماشيه

والناس .. عليها .. بيهربوا ..

وخدينها .. جري

آن الأوان .. ياللي انت حي

تفتح بيبانك

لإستيعاب .. هذا الحدث

حتىَ نفاذ .. اخر نفس

قبل الممات...................................

نحي الرايات

لملم شتاتك يا وطن

الفكر .. ملهوف ع الفُتات

حُمّىَ .. اللي فات

والكمَدات

معادّتش .. قادره تريحك

وبيجرحك .. فوقهُم كمان

بُكرا اللي جاي .. بمقطفهُ

ف إديه اليمين

و ف الشمال ..

رافع سلاح .. الميكروبات

ناصب كَمين

لملم شتاتك يا وطن

رايح لفين ؟!

ثورة جياع ؟!

ثورة جياع .. بين شفّتين

متشقاقين .. نازله الدموع بترومهم

حتى الخريف

بقا ضيف خفيف

على قلبهم !!

ولا المساطر ع الخريطه

بتنشورك !! .. ف تقول كمان !!

لاء مش كمان

لملم شتاتك يا وطن

منتاش جبان

واقف بطولك إنما . .

قادر تسد

من غير حمايه . .

من غير وقايه من أحد

دا انت اللي كلمه تشجعك

ف تموت شهيد

لملم شتاتك يا وطن

محناش عبيد

مشهد وعيد . . .

مشهد وعيد كان ف السما

عم السواد معَتقش ضي

و اللافتات اتعلقت

واترصصَّت بينها الشاشات

والبث حي

البث حي بيشربك . .

بالشفاطات

لملم شتاتك يا وطن

شبعان .. سُكات

مفهاش .. سُكات

الارض مفروشه بأهات

والشمس غابت عنَّها

واتسحبت

بشويش بعيد

لما أختفت .. ع اللامكان

حالة هوان

صحّي الحجر .. لبّي الندا

حقك .. مجاش

حقك ف إيد .. شلة غجر

باعوا .. ببلاش

باسم الإيمان

دا مش إيمان

لملم شتاتك يا وطن

صوتك .. أدان

صوتك أدان ..

رن الجرس .. ع ال للسنا

ف المكْـــــلَمه

ف الإعلانات المُبهمه

و التلميحات المُعلنه

و الإشعارات

لملم شتاتك يا وطن

و إوعاك تميل ع الإغراءات

إوعاك تميل ع الإغراءات

قبل الندم

باقيلنا دم ..

ومحوّشينهُ ع الرفوف

وف حصّّالات

علشان نخوض المعركه

ف انعي اللي مات .. و انسىَ البُكا

مش راح ندوق

تاني المراره و الالم

حي اللي فاضل .. م العلم

نحي الرايات

***************** ****** **************
الاسم / محمد احمد صلاح احمد سلامه
الشهره / محمد سلامه
من القاهره

*******************

المتسابق رقم 69
محمد ابو الحسن
فايد الاسماعيليه

اضحك
******
اضحك
فوت
طنش للى يعشش
جوة نافوخك
بكلام مر
واملا قلوب الناس
بالبهجة
بكلام ينفع مش بيضر
خلى الحبر ف قلمك قاضى
وتكون راضى
ورأيك حر
علق والزق
جوة قلوب الناس
لك صورة
وسيرة تملى
اليك بتسر
اضحك خلى الضحكة حياتك
واوعاك تنسى فى يوم عباداتك
ده لو دبلت وردة ف كفك
تحيا بذكر الله وتخضر
وطموحاتك راح تعلى وتعلى
طول ما الحكمة عليك بتمر
انسى المك
واعرف قلمك
كاتب ايه
راجع دايما سطر بسطر
......
محمد ابو الحسن

*******************

المتسابق رقم 70
الشاعر أحمد رفعت احمد
محافظة قنا مركز ابوتشت

قصيدة الحسّابين "

ي معبيين الصُفح
يا رسّامين ع الحيط
كتبوا وطنا قصيده
وقالولى حُط
ف ................ حطيت
"الشعر إن كذب الفؤادُ به
لا يعجب الشعراء كلامَه "
وطنى أحب نهاراٌ
جاء الليل .....فلامَهُ "
ـــــــــــــــــــــــــــــ
حطّت ديوك البلد
الفرّوجات فقشوا عيال ألوان
وطنى اللى اخره كان إسبرين
عيّان
هذا الوطن
هذا الوطن لن يشكو يوماً
ديوكاً لا تبيض
سبعٌ عِجاف
ونهرٌ إن ألقيت فيه 1000 عروسٍ
سيخاف
ولن يفيض
ـــــــــــــــــــــــــــــــــــــــــ
يا رشدى أباظه
لن تأتى هاميس الليله
فاحفر لنا بئراً للنفطِ نعيش بهِ
هذا الشعبُ الساكنُ فينا
من يا وطنى جاء به ِ
؟
من يا وطنى كتب عليك الموت
بالخرطوشِ وبالمولوتوف
"من قد ملأ جُعبة كتفك "
جُبن وخوف
السندوتش المحشى فول
عامل دماغ من ....مفيش
البنطلون ساقط
وطن بيموت ومش
بيعيش
فى التليفزيون
آتوون
بيغنى ل عمرو دياب
والشعب ف وطنى
ووطنى ف ايدى
وإيدى ف جيبى
وجيبى
على طووووول مخروم بيبص ل تحت
ما اعتدنا يا وطنى ع الفحت
ما اعتدنا الموت على الجدران
ما اعتدنا الشعر اذا ما قيل
يُهان
وطنى
لا شعر اليوم ولا أشعار
سنزّج بكَ فى السجن لبضع سنين
وسنٌلقى بالحكم المُعلن فى جوف النار
هاميس
من قدّ قميص الوطن الباقى فى التحرير ؟
من جعلكى احلى بنات الكون
من طالب بالتنقيب عن التغيير ؟
وطنى وإن مات على كتفى
فهوَ مرفوع
لا معنى لبقائنا عُزّل
وبدون نتاج
وبدون شروع
.......
وبدون شموع
لن تأتى يوماً من أحببت
وضعوا فى الطلِ سؤالاً
فتحرّيت الكذب حيال الطلِ
أجبت
ووضعت ثلاث كراتٍ فى الصندوق
وجمعت لهنَّ من الاراضين السبعِ
بعض شروق
وجعلتكى يا هاميس ضُحىً
تخرج كل صباحٍ بالميدان
ومنعت أباظه من حفر الابار هناك ونمت
فاستيقظت على صوت البترولِ وليس على
صوت الاذااااااان
*******************

المتسابق رقم 71
حسن عبد الهادى عبد الحميد الجيار
. محافظة الدقهلية

(غراب البين )قصيدة بالعامية المصرية تأريخ للثورة المصرية
غراب البين بيتشدق ويتمطع ويتكلم بأسمائى
وأنا الشعب اللى ضاع حقه وحتى اللقمه مش لاقى
ويتكلم عن الثورة وبيرتبلى أشيائى
سيجارته الشيك بتتلوى وبترفزلى أعصابى
فى عز ما كنا بنعانى يبوس الإيد وكان راضى
وإن قلت رأى بيخالفه بقيت أهبل ومش عادى
بقينا خلاص بنتصنف يا شعبى يا إما إخوانى
يا سلفى ياإما علمانى وألف خسارة يا بلادى
تتوه الثورة وولادها ويبقى القاضى جلادى
وبيتاجروا بأحلامها وكله كلام على الفاضى
وأنا الشعب اللى ضاع حقه وضحوا وماتوا أولادى
وم شايف حسيس فيهم يقوم يعمر الوادى
ولا شايف سنابل قمح ولا مصنع لأولادى
ولا شايف كلامهم حلم هيتحقق لأحفادى
أنا شايف وشوش ناعمة وأشيك بدلة والنعمه
بتتلمع على الشاشه فشر بيجو وأبو لمعة
كلام معسول وتسمعله لكنه خالى من المعنى
وأنا الشعب اللى ضاع ضاع حقه وخدت فى ضهرى ميت طعنه
وأنا الشعب اللى ضاع حقه وحتى اللقمه مش لاقى
أنا الحلم اللى كان ثورة ونور الفجر لولادى
ومت شهبد فدا وطنى وشفت الحلم دا قصادى
لاعمرى جريت ورا شهرة ولا استدفيت بأعدائى
ولا إتخليت عن المبدأ وقلت مامى أو دادى
لا عمرى كنت متفرنج وع الهولوكست وبنادى
أنا النيل اللى فاض خيره وشق الصخر فى الوادى
أنا يوسف صوامع قمح سنابل خيرها لبلادى
وأنا شيخها وقسيها وقسيسها كماين نار لحسادى
وأنا السمره اللى عرونى وسحلونى وكان عادى
ودانيال اللى باع روحه فدا أرضك وكان راضى
وعاش الشيخ عماد عفت مثال الطهر لأحفادى
مفيش ثورة بدون مبدأ مفبش دعوة بدون هادى
شعر حسن الجيار

*******************

المتسابق رقم 72
خالد محمود عبد الفتاح --- محافظة الدقهليه --

/////// شــــــمــس العـــزة /////////
:

معــــــــــقول يا مصر شمسك اشرقت ؟

معقوله بذرة الحريه فى ارضك نبتت؟

وعيدان البوص الخايبه اتقلَّعت ؟

معقول عيدان القصب رعرعت؟

ال وانا اللى كنت فاكرها سوست

طلعتى عفيه وارض بهيه ورجالتك جلجلت

فى ميدان النهضه انا شفت النهضه ابتدت

شفت الحريه بتقضى على الخسه ونارها شعللت

نار حمرا وبيضا وسمرا اتبسمت

نار ما بتحرقش الا الخاين نار نورت

وارادة شعب ما هوش نايم والغمه انجلت

سنتين يا مصر بتنادى وصرختك جلجلت

دستور يا ولادى دستور يا اسيادى ...

والخونه قلوبهم حجرت

انا نفسى شكيت فى عزيمتك وقلت استسلمت

وفى الفجريه صحيتى ولادك والانياب كشرت

وحلفتى يا مصر لتاخدى بتارك والسكة ابتدت

وانا عن نفسى هاقول لدستورك نعم اصلها بوخت

ويا رب يا بلدى يصونك واطمنى شمس العزة اشرقت

*******************

المتسابق رقم 73
وليد على حسن .. الاسكندرية

________________________________

بدلة الحلم .. حمرا

-=======

لسة الولد متشعبط

فـ ترماى الامل

مع ان شمسه كل يوم

تنزل معاه فـ بحر يأس .

و الترمايات اصفر و ازرق

احمر ..

لون بدلة الحلم اللى ساكن

منذ ايام الطفولة

و لسة متعبّى فـ أزايز

و الكمسرية ..

نازلة و طالعة

ما بين محطات الترام

تقطع تذاكر ..

عُمر المحطّات اللى جاية

*******************

» المربعات الأرابيسك المعشقة . هنا مدرسة لتعليم لون جديد من ألوان الابداعات العامية المصرية . اسسها ويشرف عليها . الشاعر محمد فتحى رئيس رابطة شعراء العامية المصرية
» تنافس فى حب رابطة شعراء العامية المصرية . لمجموعة شعراء
» فى حب رابطة شعراء العامية المصرية
» فى حب رابطة شعراء العامية المصرية الكبرى
» اهداء الى رابطة شعراء العامية المصرية