مسابقة الشعر العامى من 15 فبراير الى 28 فبراير 2013 . احدى مسابقات رابطة شعراء العامية المصرية

المتسابق رقم 74
مصطفى احمد محمود
العنوان/ محافظة المنيا مركز سمالوط

كلمة عتاب ع الحظ والدنيا والبلد اللي مدتناش والعمر اللي عدى اتعدم وقبضنا تمنو بلاش الصوره حلوه لناس ام للغلابه فلاش يعنى ايه يبقى اللي جاى مش قد اللى رايح يعنى ايه تتعب وتشقى تحصد روايح ويعنى ايه تخاف لبكره يجى بفضايح والــــــــــــــــكل رايــــــــــــــــــــــح البسمه والشــــوق والامـــــــــــل واليأس جونـــــــــــا اكتمــــــــــــل وانك تحس بلحظه حلوه محتـــمل حلـمى الصُـغير كتـفـوه وربـــــطـُوه وفى حلـقـه مـقـفـوله ســـــابوه هتعيش كــــده وتـموت كـــــــده من غير رضا او بالرضا هتعيش كده يأمــــا هاجــــر وانا مـش مهاجـــر رغم انى حلمى ضايع بين اديكى وانى مــش صــعبان عليـــــــكى كلمه من قلبى يامصر ان روحى فيكى حسى بينا احنا من الظــلم انكـــوينا حسى بينا احنا وقت الشده تلاقينا بركان غضب للي يجور فى يوم علينا ومتـزعلـيش منـى فـى كـلامــى اصـل انتى مش حـاسه بالامـى ومش الامى الام كتير زى فى اوانى ضاعو فيكى مين اللي جــــــــأنى خــلي الـــــكل بــيــــــــــــعـــانى ياريت ياريت تكونى سمـــــعانى ــــــــــــــــــــــــــــــــــــــــــــــــــــــ الشاعر/مصطفى احمد محمود العنوان/ محافظة المنيا مركز سمالوط 43شارع سعد زغلول

*******************

المتسابق رقم 75
سحر جمال حبيب _ الاسكندرية

,,,, لحن جرحي ,,,,

بعزف علىَ لحن جرحي
ودموعي ساكنة جوة الاهات
ملقتش حد يداوي جرحي
فَضلت أعــزف مِن سُكــات

اَفَرّح قلوب و قلبي بيبكي
دا مشفش الفرح إلا ساعات
اعزف و انا لحني يحكي
و قلبي خـالي مِن الدقات

الـدنيا جــت كتير علية
دنا شوفت كتير حِكايات
مشفتش ابدا زي حِكايتي
دِي قصة من غير كلمات

بودع قلبي بدمُوع عينية
مِن غير لُقَا و لا سلامات
وِ ودعـــت معاهـ الـحنية
اصل الحنان فِـ الدنيا دي مات ....
اتمنىَ التوفيق للجميع ,,,
و يكفيني مشاركاتي بين نجوم شعراء العامية .. تحياتي

*******************

المتسابق رقم 76
الشاعر / خالد مهنى عبد القادر جمعه
محافظة الدقهلية مركز شربين

مشـــــــــهد عبـــــــــــــــــثى
اللـــــــــــــــــــــيل
اكمن النور بيعايرو بلـــــــــونه
و بطلع فيه القطط الفاطسة
و طباطيب الاعجاب
موش عاجبه
أم قرر يعمل نيولوك
و يفك
من أقرب باب
راح شال الماسك الاسود من وشه
و محنى ايديــــــــــــه
و عنيــــــــــــــــه
فوق حاجبه
بقى ليل بهــــــــتان
سهــــــــتان
و مضـــــــلم
و أدان الفجر الناس بتصلى الضهر
و العصر
اتلخبط فما جاش
و لا بان له خيوط
و المغرب ظبطوه الناس بيلم هدومه
و مبلغ عصيان
و الليل حيران
راح يرجع ليل
أم يفضل مسخ
و العشـــــــــا
صلاها الناس
غيبا على روح الليل المسخوط

الشاعر / خالد مهنى عبد القادر جمعه محافظة الدقهلية مركز شربين

*******************

المتسابق رقم 77
شريف محمد خضر \ المنيا

شريف خضر .
انسان وتعبان ف الحياه قاصد تروق
طالع جبل ولقمته باصص بشــــوق
ساعة وصوله لقمته فكره انتصــــار
يلاقى قاعده الجبل هيه الل فــوق !!!!!!!!!!!!!!!!!!!!!!!!!!!!

===============================

شريف محمد خضر \ المنيا

*******************

المتسابق رقم 78
حامد عامر حامد ../اسوان/ادفو

قصيده بعنوان/ آه.............................

الاوله آه ..والتانيه آه..والميه آه
الاوله آه صوت الوجع دباح
والتانيه آه قلب الوطن سفاح
ولحد مية آه..ياريته دم جراح
وانشد نشيد منسي
وانعي انا لنفسي
واهو كل يوم اموات
والبس فتوب مبلي
لبسه الي كان قبلي
وكلنا اخوات
وابكيلي يابو العم
الحزن خلف هم
موصوفلي انا بالذات
شارب انا مالكوع
والجسم ساكنه الجوع
مرمي علي الطرقات
ومين بعدي راح ينفع
ومين ديتي يدفع
ويعد فالجنيهات
ارخص مزاد
ويومين حداد
واربع خمس كلمات
مجهول يافاعل مش اكيد
ولافيش دليل ايه الجديد
وفالختام برءات
آخر نفس ياحياه
ضاع الوطن او تاه
لازم فيوم نلقاه
ونسكت الآهاااااااااااااااااااات

*******************

المتسابق رقم 79
احمد عبد الكريم هيكل
القاهرة حلوان

بشتاقلَكّ أَوْي يا مَصْر
بسافر قَدْ مَا بسافر
وبشتاق لك أوي وبرجع
مش عشان أنا شاعر
ولا عالصبر أنا ما قدر
وَلَّا فِي غربتي بدمع
وأقول بكره أَكّْيَد هرجع
واخدك جوه أحَضّانَي
وادفه بشمسك أَلَصّافيهِ
وأقف لحظه مع نَفْسِي
وياخدني صمت أيامي
ويغلبنى الْحَنْيـن ليكي
ألاقيني فجأه أنادِيكي
واخَدّ شنطتي في إيدي
ألاقَيْنَيْ رجعت أنا ليكي
وَعَلي بابك هناك أرَكْع
عَشًّان بَجّد وَحْشَانِي

بشتاقلَكّ عَشَان أَنًّا مَنّك وبيكي
ومن غيَرَكّ مقدرش أكَون أنا تاني
مقدرش أخالَفّ جنسَيَتَيّ
مقدرش وقت الحاجه ليا
وفى عز الشدَهْ متلاقينش
معرفشي أقوال أَنًّا مالي

مقدرش أكون وا حد تاني
عرَفّتي ليه أنا بشتَاقلك
وَأَكِيد من شوقي عرفاني

مَشّ مُحْتَمَلّ أَنَّا وانتى نَقْدَر نفترق
حتى لو فرَقَنَا الِقَدْر والْحَلْم منا يتسرق
دا اللَيْ بنا أكبِرْ كتير مـ الأمنيات والذكريات
داللي بنا دَمّ ونيلَ وّحاجات بطوال الأهَرْمات
مهما أقولك واللا أعدلَكّ بالَسْعات
مش هقولك أَطَمنى وأسرح وأقلّب فـ اللَيْ فات
هقولك حاجه بس أخيرَهْ انتهى عَصْرَالسكات
أنتهى عصر الممَالِّّّيك والمجوس وَالطغات

شَوْفِي دلوقتي شَكْل الميدان
شوفي أيه حال الجبان
اللي كال حقي وحقك اللي وقعَ بْيني وبينك
شوفي أيه أخر الطغيان
عرفتي ليه
بشتاقلك أوي وبَرْجع
عرفتي ليه أنا بشتَاقلك
وأكيد من شوقي عَرْفاني

*******************

المتسابق رقم 80
عبد التواب الرفاعى
عضو رابطة شعراء العامية المصرية

وكل ما اشتاق لحبى القديم
اطلع بسرعه ع السطوح
وامسك بايدى خشب الغيه الحزين
ال بيشهد ع الهوى والروح
وقت اللقى
كان الحمام موجود
والغيه رغم زحمتها
الا انها مفروشه بالورود
وكأنها مجهزالنا حفلة عشا
وورد حب
وكأن العندليب
بيغنى لينا فى الغرام موعود
وضى القمر
اه ع القمر
شاهد عيان على حبنا
ايوا القمر
لما اختفى ونوره انطفى
توهنا عن بعضنا
خلانا نمشى ف الف سكه
ومستحيل من تانى يوم
يرجع حبنا
بس انا
كل ما اشتاق لحبىالقديم
برمى خد على غيتى
ورغم انى وليفى طار
والقلب نار
الا بانى بحس بشعور غريب
شعور عجيب
طيفه ساكن كل حته ف المكان
والحمام رغم انه مش نفس الحمام
الا انى شايفه ف المكان
وبحس انى رجعت ييجى تلاتين سنه
ايوا انا فاكرهم انا
كان عمرى يسبق عمرها بخمس سنين
كان قلبى زى قلبها مليان حنين
كان ليها اب
الله يسامحه
فرق هوانا وحبنا وعشرة سنين
اختارلها المال الكتير
وعزبه كل ارضها مسقى بأنين
انا لسه فاكر عمرها
كان عمرها عشرين
وعشرين حمامه ف القفص
هجروا القفص
وعاش القفص مهجور حزين
ورغم ان الحمام مالى القفص
بس القفص بقاله ييجى تلاتين سنه
بيبكى انين
ولاحد سامع شكوته
ولاحد حاسس بلوته
وهو حد ينسى حبه

مهما مرت السنين Very Happy
وانا لما بطلع بصبره
لما باقوله
والله فاكره ياقفص
بنفس صورته وبملامحه
وساعات كتير ليه بوصفه
مااناأكتر واحد يعرفه
حبى القديم
....................................
شاعر الحب عبدالتواب الرفاعى

*******************

المتسابق رقم 81
(رمضان ابو العينين سليم _محافظة المنوفية)

ثواني(رمضان
اجيب الحلم من تاني
واكتب شعر واغاني
لو انت قلبك نطق
معاي هداني
خلاني اقولك
بعد الزمن مافاتني
حيرني
علي الجنبين سواني
انا راجع احبك
بس مشكلتي معاك
انك اناني
,,,,,,,,,,,,,,,,,,,,,,
ممكن بقي
نحلم سوي
بوطن غير الوطن
ممكن بقي نغني براحتنا
وننسي................ حيــات الشوارع
والشباب الضايع
والدم المسفوح
والقلب المجروح
وكل حلم
كان للوطن
قدامنا مدبوح
(رمضان ابو العينين سليم _محافظة المنوفية)

*******************

المتسابق رقم 82
الأسم: اسلام احمد عامر
السن 18 سنه
محافظة بني سويف

وآدي القصيدة
.
كل شعري اتحرق
كل المشاعر ف الورق
مفضلش غير حبة غنا
ملقتش أجوبه ممكنه
حتى حلمي اتسرق
وكل حاجه متلخبطه
مفيش حد بيطبطب
مفيش حاجه متظبطه
وخط العمر بيشطب
مسيرنا نموت وننساها
وياما هنشوف وهنلاقي
من حفره لحفره لمتاهة
وانا ميت ومش باقي
سرقتوا الضحكه من ليلنا
سرقتوا الحلم من جيلنا
وسبتوا الدمعة تقتلنا
محبوسة بتكوي جوانا
آه يا غلبنا يا ويلنا
امتى الحزن ينسانا
ولسه الخوف بيعشش
جوانا بيسرق خطاوينا
مشتتنا لكام معنى
سارق احلامنا وأمانينا
خطوة نمشيها ترجعنا
لحفره تاني تودينا
وكل طرقنا مسدودة
وأحلامنا اصلا محدودة
يجي ألف حاجه مفروضة
مفروض البكا ف أغانينا
وطن ولسه بيتبني
وف لحظه جينا هدناه
طب ازاي يوم نتفق
وكل واحد ف اتجاه
...
اتمنى تاخدوا القصيدة واشارك معاكوا . . وشكرا.
*******************

المتسابق رقم 83
الإسم: محمد زيور حسن
محافظة بني سويف

.
لا بدايه ولا نهايه
ولا وصف يمشي معايا
ولا حتى اشعاري
ازاي اكون ابنك
مش حاسس بالأمومه
بردان اترمي ف حضنك
علشان يدفيني
الاقيه جبل تلج
مليان رعد وبروق
والمطر علو الجبل
مالي المشاعر والعروق
مقدرتش اتحمل
فبعدت عن حضنك
والحضن دافي بدور
علشان يدفيني
على فين موديني
يا بردي يا القاسي
الاحضان تدفيني
ولا تزيد بردي
وديني ماتودي
وانا ذبني إيه يابلدي
وابني اللي ضحى بدمه
علشان حضنك يدفي
كل اللي حاسس برده
بس الأمل موجود
ولسه الجهد واصل
ورب العباد موجود
مابينوش وبينك فاصل
والكل يفديكي
وبروحه يحميكي
وبهمة الرجال
تخصب صحاريكي
وطول مافيكي رجال
يقفوا ف وش الظالم
هتبقي تاج الدهب
على كل روس العرب
ويقفوا يحيوكي
انتباه يهد جبال
. . . . . . .وشكرا . . . . .

*******************

المتسابق رقم 84
شعر / محمد السيد عبد الفتاح إبراهيم
محافظة الإسكندرية

قصيدة ابو خطوة
زمان شفته
جدع مارد ...
وفارد ع القمر طوله .
ما حد يردّ له كلمة ،
ولا يكسّر في يوم قوله
يدق الحارة بأقدامه
بيخلع قلب جدعانها ،
يهز بيوتها ...
بيبانها
وألاقي الكل خدامه ،
وطوع أمره
مع إنه ولا عمره ،
رفع أيده علي غلبان .
وكان دايمـًا ..
يرد الحق لأصحابه ،
ويكسر للشيطان عينه ...
وأنيابه
وفي غضبه ...
أحسّ الدنيا هـ تمطر
وفـ هزاره ...
تجلجل ضحكته سكر
وكنت أشوفه أتسمّر
يناديني ...
ما تتخضش
بيسكت قلبي ما يدقش
مَ أنا جوايا خوف الناس
يقرب لي
بتطلع روحي فـ الأنفاس !!
يطبطب فوق كتاف قلبي ،
ويديني ريال فضة
أخبيه جوه هندامي
وتكبر بيا أيامي
وصورته لسه قدامي
أبو خطوة
أبو خطوة اللي كان مارد ،
لقيته ع الرصيف فارد
جناح الذل والحسرة !!
بيتكلم بصوت مخنوق ،
وقلب حزين !!
بيضحك
ضحكته مُــرة !!
سنين ... وسنين ،
كأنها قطر عدي عليه
وداس فوقه متين مرة !!
أبو خطوة
عجوز محني على عكاز
، بقي زيوه ،
بيتسنّد على همُّه
ملامح حزن فـ جبينه ،
كلام ...
الحبر من عينه ،
دموع تسقط على خده ،
بتمسحها أيديه بكمه
قتيل ...
يا مين يشيل همّه ؟
ومين فينا برىء منه ؟!
ومن دمّه ؟!
*******************

المتسابق رقم 85
محمد نعمان الهوي محافظة قنا
مركز ابوتشت شارع فلسطين

.يا زهرة البستان
.......
يا زهرة البستان
يا وردة الريحان
دوما .انا ظمآن
لعطرك .الفتان
يا زهرة البستان
.......
طول ليلى شاغلانى
والنوم ينسانى...
واشكى لخلانى..
عن لوعة اللأشجان
يا زهرة البستان.
........
قلبى حلف ما يتوب
عن حبك المكتوب.
مهما تكون نسيتى .
دة بعيد عن النسيان
يا زهرة البستان
........
انتى الحياة انتى
زى الزمان كنتى
قاسية وظالمانى
حنى..انا انسان
يا زهرة البستان
.......
مهما الحياة طالت
والبعد عنك زاد..
عمرى ما انساكى
او اتوة عن العنوان
يازهرة البستان..

*******************

المتسابق رقم 86
محمد لبيب مصيلحى
القاهرة 43 سنة

*رســــالتى اليكـــــــى
************

تبتعـــــــد منـــى أفكــــارى
وتنســــى تـــرد لســلامى
طيب ليــــه وأنا المشتـــاق
وعمـــلت أيــــه لنسيـــانى

فكــر لمــا كنــت معــــــاك
وصوتى كــان ساكن بهواك
مستنى همســـة برنيـــنى
وأجـــرى الطريـــق لرأيـــــاك

تعـــب قلبــــى الآنتظــــــار
ودخلــت بمـــرحلة الانتحــار
بنسيـــان شجـــونك ليــــــه
بنبض وبأحسـاسى أنا محتـار

كل شــــويـــه تقولى ثوانــى
وتسكــت وتعــــدى ليـــــالى
وأنــا ســــاكــن بالغصـــــــون
ليــــه بــس أنــت ســـايبــنى

أعـــد معــــاك كل النجــــــوم
وأمشــــى وأنا كلـى همـــوم
بحــــروفى هــاشتكى بيهـــا
سحـابة ماشيه بكــل غيـــوم

كلمنـــى ولــــو بكلمتيــــــــن
بنظـــــرة واحــــدة بالعنيـــــن
وقـــول بـــس أنك فــــاكــرنى
وأوعــــى تغيـــــب سنتيـــــن

الشمـــس شعــــاعها يدفــــى
وبتنســــج خيــــوط بملامحـــى
لمـــا بتـــرمى عليا الســـــلام
بحلفـك والنبى تســــأل عنـــى

رســـالة وبعتها بقصيــــــدة
فيهـــا التمنـــى لحبيـــبـــه
تجـــاوبنــــنى وتــرد عليـــــا
بكلمـــــة واحــــدة لعنيــــــه

******************************

بقلم / محمد لبيب مصيلحى
26/2/2013

*******************

المتسابق رقم87
منير أيوب
الولايات المتحدة الامريكية

زجل يا أعز صديق ــ خاص بمسابقة الشعر
يا أعز صديق نفسى تخونى
أو مره ف يوم تبعد عنى
دا ف غدا و فطور
أو عشا و سحور
قاعد ع السُفره مجننى

يا أعز صديق تعالى وحدك
و متجبش معاك أى ضيوف
من جوه ليه شايل سوستك
بكل بجاحه و بلا خوف
يابو دم تقيل
باكلك بالليل
و أصرخ و أقول يانا يا بطنى
دا ف غدا و فطور
أو عشا و سحور
قاعد ع السُفره مجننى

يا أعز صديق يابو ١٠٠أخ
أيش بُصاره و طعميه و نابت
و كل يوم بتصيدنى بفخ
و خيوط المعده معاك دابت
من غير تهويل
بتهد الحيل
و أنا كارهك إمتى هتكرهنى؟
دا ف غدا و فطور
أو عشا و سحور
قاعد ع السُفره مجننى

يا رب ياللى خلقت الفول
ما أنت برضُه خلقت اللحمه
ليه دا بناكلوه على طول
و موش لاحقين م التانى شمه
يا رب الفول
يلغوه و يزول
و لا يرجع تانى يألمنى
دا ف غدا و فطور
أو عشا و سحور
قاعد ع السُفره مجننى

منير أيوب ـ الولايات المتحده الامريكيه

*******************

المتسابق رقم 88
الشاعر اسامة العيسوى
محافظة الجيزة

العيش البلدى

العيش البلدى ..خسارة فيه الاسم ده
علشان بلدى ..اجمل كتير ..م الشكل ده

داحنا يا مؤمن جوعنا فيوم..قولنا فمصر الخير بالكوم
هو رغيف هايعز علينا..روحت أجيبه شوفت الخير
شوفت طابور زى النمل..قولت يا ساتر يوم الحشر
قالوا العيش لسه ماجاش..احجز دورك لو كان عاجبك
شوفت اتنين من على جنب..فوق السن ومالهم ذنب
قاعدين يدعوا يقولوا يارب..طول العمر فوجع القلب
بصت عينهم شبعانة قهر..ضمة ءاديهم محفورة فقر
ستات واقفة وشايلة عيال..رجالة واقفة تهد جبال
قامت شبطة قوام ف الحال..علشان دور اتاخد قال
بص معلم م الشباك..قال ياولاد ال .....كله هناك
ابعدوا يلا عن الشباك..قومت رجعت وكلى سكات
شميت ريحة العيش جيالى..شوفت قفاص العيش قدامى
طالعة ولكن من باب تانى..قالوا معارف لابن الأيه
اصبر حبة شوية يا بيه..قولت انا بيه تشكر يابنى
قولت يا ءابنى بتشتغل ايه..قاللى انا عاطل من سنتين
خدت ليسانس ودبلومتين..عقلى شغلنى باختراعين
رحت أخدلى براءة جودة..قالوا يا كابتن مش فاضيين
سوقت ف توك توك بعت حاجات..بعت كروت وكمان فلالين
البلدية قفشت فيا..قالوا دا مجرم واد نصاب
قمت قفلت عليا الباب..قلت أنام وخراب ف خراب
لو كان ليا معارف فوق..كنت شبكت فشغلانة زوق
أدى حكايتى يا عم الحاج..عندك حد يشوفلنا حل
فجأة سمعنا صويت وصراخ..ناس بتقطع بعض بجد
علشان لسه ما جاش العيش..واحد مات واقع ع الارض
ست كبيرة بتصرخ يابنى..عمر ما كانلك يوم أعداء
صوت ف الزحمة سمعته بيصرخ..طفل رضيع متشعبط فامه
وامه بتتحسر على حالها..سايبه الواد فالبيت مع سته
ست كبيرة ماهياش قده..وامه بتسأل فين العيش
واحد قال بصراحة حرام..رد عليه بياع العيش
قاله مافيش بقى عيش علشانك..علشان تبقى تلم لسانك
روح بقى هاتلك عيش م الغالى..قاله يا ريت ماقدرش عليه
أصلى فقير ويادوب على أدى..أصلى موظف فقطاع خاص
ممصوص دمى كده وخلاص..ولا ليا يوم ف الشهر أجازة
أعيا مخصوم يومى بتلاته..قاله خلاص ما تلم لسانك
قاله انا أسف ولا كان قصدى..أصلى مزوغ ساعة من شغلى
شغلى كرهته ولا بيكفى..واسمى موظف يا خراب أهلى
جت عربية بتجرى بسرعة..عدت على بلاعة بتطفح
اتغرقنا مجارى بترعى..والعربية جريت تسرح
والدبان بيعف علينا..جنب الكشك زبالة كتير
كشك العيش دا عايز تغيير..يبقى نضيف او اى بديل
راجل ساند ءايده على كتفى..قالى انا راجع م المستشفى
جاى اجيب لولادى العيش..لكن باين انه مافيش
دانا ما عرفتش أكشف خالص..والدكتور بقى يشخط فينا
واترصصنا جنب الحيطة..قال ياخوانا الكهربا قاطعة
والاجهزة ويانا عطلانة..يلا اتهوا وتعالوا بكره
أم عجوزة جت سألتنى..قولى حبيبى ينجيك يابنى
لسه ما جاش العيش البلدى..نظرة عينها قسمت قلبى
فلتت دمعة غاصبن عنى..قولت يا أمى لسة ما جاش
لسه ما جاش العيش البلدى..لسه ما جاش العيش البلدى
لسه ماجاش العيش البلدى
لسه ما جاش العيش البلدى
اسامة العيسوى /الجيزة

*******************

المتسابق رقم 89
عادل غتورى . محافظة الشرقية . الزقازيق

خاص بالمسابقة
(خربشات فى حب الوطن)
*******************
اظبطى سهمك فى نبلك

سددى فى قلب النفاق

فى البطاقه الاسم ابنك

اما فعله لا يطاق
***
يا حبيبى قلبك مفارق

وانا قلبى فى العشق داب

هتخطى امتى المفارق

وتعدى بحر العذاب

المكنه فرمت عجايز

العجله داست شباب

الديه أربع برايز

والثكله سفت تراب
*****
قلبى عى الارض يجرى

والعرض لفاه ملايــه

الضربه جاتنى من الخلف

واخويا جاى من ورايا

اخويا والام واحده

والاب قال مالبدايه

اللى يحبك يا مصر

يثبت صحيح الروايه
***
الشاعر: عادل غتورى
مدينة الزقازيق

*******************

المتسابق رقم 90
حسام محمود -- محافظة الجيزه

خاص بالمسابقه حب من غير امل
--*--*--*--*--*
بحلم الاقي الشوق----في عنيها يتكلم
دايما تبص لفوق--------ولا مره بتسلم
وانا اللي شاري الود-----طول عمري مستنى
... تحس مره الحب-----------او حتى تتعلم
وارجع واقول يمكن--------كل ده اوهام
لكن ده مش ممكن-------ده عنيها فيها كلام
لما بنتقابل----------------- صدفه في طريقنا
بحس بعيونها--------------بعتالي احلي سلام
وكل ما انساها-------------واضغط علي قلبي
تيجى هي تشغلنى-------وتجيلي في الاحلام
هعيش مع حبي------------لو حتى مش ليه
وان كان على قلبي---------قادره تداويه الايام
--*--*--*--*--*--*--*--*--*--*--*--*--*--*--*
كلماتي/حسام محمود--الجيزه

*******************

المتسابق رقم 91
د/نادر محمد

التعويذة "

نظرة تخوّف
جُوّة عنين بتقول إطمن
مهما تأجّل .. ولاّ تسوّف ..
ولاّ تقول ع القاسي حنيّن ..
حزنك طوّل ...إرجع .. كمّل
تِلقى الآخر زى الأول
ضِحكة بتغرق فِ المأساة ..
قارب هارب من مرساه ..
فِ لهفة عمرك التايب ..
و شِدة عتمة الورطة ..
و نشوة رَجْعِة الغايب ..
و توبة بتجرى للغلطة .
و بحر حزين .. و نور باهت ..
و جرح قديم و تجديده ..
و حتى قلوبنا لو تاهت ..
تقول اللحن و تعيده ..
و تِلقى صبرك الفايق ..
بيتسابق مع الأيام ..
عشان يِسكر .. بكاس رايق ..
فيتعكَّر ...
و لو فكر فِ يوم يِفلِت ..
يِلاقى قلبِك المارق ..
بيتنكّر ...فِ توب عايق ..
و قلب ملاك ..
و ميت شباك .. بيتسكّر
و بحر آلام ..
يزيد ملحه .. و بيمرّر
و قصة طويلة تتلخّص ..
بِجملة وجيزة بيعيبها ..
إن حروفها تتكرّر ..
و تِصبح زى تعويذة ..
بتحكيلنا عن المجهول ..
و ليل بيطول ..
على الصاحى و عَ النعسان ..
و دنيا بنت ليل جاهلة ..
فِ رحلِة مستحيل سهلة
و صرخة فِ الرحيل تِعلى ..
و تِصبح فِ الرجوع أعلى
و لعبة صغيّرة بتبدأ ..
و لكن من سكات تِكبر ..
فِ لحظة غيظ ..
وجَعْها لذيذ ..
و تِوصل لذّته لإدمان ..
فِ أرض بتعشق التجريح ..
و ذنب صريح ...
بيتكرر .....
و يتمسّح فِ توب أخضر ..
و قلب جريح ...
بيتمرّد .. و بيقرر ..
يحب الفجر فِ طلوعه ...
يلاقى العتمة تِتعطّر ..
و عمْر صبية يتمخطر ..
يروح يتغطّى بضلوعه ..
و يصحى يلاقى أحلامه ..
بتتوضّى ... و بتنوّر
و يِعلى الصوت على المدنة ..
يقول الماضي لو فارق ..
و مهما تِجرى و تسابق ..
حروف الكلمة مكتوبة ..
وكل الجاي متقدّر .
قصيدة التعويذة للاشتراك في المسابقة.
د/نادر محمد

*******************

المتسابق 92
د/منال عفيفى محمود
الهرم / محافظة الجيزة

DrManal Afify رساله لكل المصريين
(خاص بالمسابقة)
*****************
قلبى معاكوا يامصريين
بعد تاريخ خمسه وعشرين

اللى بينزل منكم ينزل
بس يحدد هدفه لفين

الموضوع مش وقفه وصرخه
وحشد بيوصل للملايين

الموضوع بقى قبطى ومسلم
إيدهم واحده متحدين

هايحققوا وحده وطنيه
ضد الخونه المندسين

وينادوا بثوره ربيعيه
ثوره نضيفه بدون تخوين

ثورة إبنى وإبنك وابنه
ثورة كل البنى آدمين

علشان نمسح دم الشهدا
بعد ماسال على كل جبين

وكمان يخلص حكم العسكر
ييجى مكانهم مدنيين

تحكم حكم بشرع المولى
يسحق كل المنتفعين

بعد ماخللوا العيش بالواسطه
ونهبوا الثروه .. بالملايين

وكمان غشُّوا ف أكل الفقرا
سلبوا حقوقهم فى التموين

حتى الغاز أنبوبته اتمنعت
عملوا أزمه .. فى البنزين

بعد ماباعوا الغاز المصرى
للأعداء وبرخص الطين

بس رجائى وأملى يامصرى
من غير شهدا أو مصابين

ده احنا قلوبنا خلاص اتحرقت
على شهدائنا نور العين

بعد مادفعوا الروح والدم
لاجل يعيش إخوان تانيين

يومها العالم كله هايشهد
بنجاح حلم الثوريين

وبتحقيق حرية اتولدت
من أرحامكوا يامصريين
****************
د/منال عفيفى محمود

الهرم / محافظة الجيزة

*******************

المتسابق رقم 93
سيدفاروق احمد
محافظةاسيوط

ماعيطتيش
=======
ياحابسانى ورا السرداب،
بشوفك من شقوق الباب..
مع الاغراب!
تشاوريلهم على وكرى..
ألاقى الفكر ودا وجاب!؟!
يعيشنى ف خوف ورهاب
مانيش قاتل ولا هربان
ولاعقرب ولا تعبان
أناانسان
محاوطانى وحوش وغيلان
انا عاشق فقيرغلبان
تودينى ،تودينى لكون تانى
وسيع خالص مافيهش عذاب
تفوتينى تلاقينى
اموت ساكت
بدون اسباب
ده انا نبضك وتأييدك
وعمرى دم ف وريدك
دة انا الورد اللى فتح فى بساتينك
انا عنبك..انا تينك
انا كلمة ف تدو ينك
اناناسك ،اناشخابيط تلاو ينك
انابكره..انافكرةدواو ينك
ونقطةحبر ف دواتك
اناقلمك و فرشاتك
اناعصفورعلى غصنك
واناحامى حما حصنك
ف جاو بينى كفايه سكوت
مانيش هلفوت
بعلو الصوت أناديكى
ولاقيكى ما بترديش!!
أخضر بور أراضيكى
وأعيشك عيشة الدراويش
كده:تناتيش!!
و يبقا الحق و يايا
و يبقا الحب جوايا
و لا حتى تشاو ر يلى
شربت النيل ما شبعنيش
و غنيتلك مواويلى
و قلتلك:أجيلك و لاهاتجيلى؟
صرخ جيلى :
و قال حريه وعدالة
و قال :هنموت و رجالة
و قال :رجالةلوهنعيش
و قعت شهيد فدا عرضك
بدمى اتحررت ارضك
و حتى دموع مادمعتيش!!
وحتى عياط
ماعيطتيش!!
===================
25/9/2012
سيدفاروق احمد
محافظةاسيوط

*******************

المتسابق رقم 94
شريف حسين طالون
محافظة البحيرة

قصيدة للمسابقة ..

"لمّا توصل بالسلامة "
........................................

لما توصل بالسلامة
هاتلنا ربطة مشبّك
وابقى حاسب ع المشنة
واربط المخلة وشبِّك
.....
كانت امى تقولى دايما
خلى بالك م الطريق
خلى بالك م السلاح
كانت امى لما تدعى
يبقى أصغر شىء براح
كنت بمشى وقلبى سايبه فى حجرها
وامّــا ع السلم تعيط
كنت بزعل مـنــّـها
...........
كنت بكدب لما بضحك ع السلالم
والسلالم عارفة انى مش راح ارجع
كنت بسمع ..
كل كلمة ع الحيطان بتشدنى
وتهزنى .. كلمة ضنايا
كنت بارمى الكون ورايا
وامشى اسرع
.......
عارفة يا امّا ..
كل خطوة كنت بنزف قبل ما انزف ع الحدود
كنت بمسك فى الخطاوى
كنت حاسس بالجمود
وانتى صورتك مالية شبّاك المحطة
والرصيف بيقولى ارجع
كل شىء حواليّة خايف
كل شىء حوالية مكسور الشفايف
كل شىء ساكت بيسمع
.............
وانتهت كل الحكاية عند شباك التذاكر
لما شفتِك بتقوليلى خلى بالك
خلى بالك لــمّا توصل
عند ربك افتكرنى
بلّغه منى السلام
قوله أمى مش هتندم لما اروحلك
ابقى قول كل الكلام
لـمّـا توصل بالسلامة
ابقى قول كل الكلام
...................................................
....
شريف طالون

*******************

المتسابق رقم 95
أبوبكر عادل سالم
مصر القاهره. مصر الجديده

قصيده للاشتراك فى المسابقه

***************
رساله الى العرب

دابت قلوبنا م السخونه فى الكاسات
ما بقتش عارف هجر من غدر واهات
كل المعانى اتقلبت بالمعلقه
والوش يضحك ويا لمعة الكاسات
والكعب خبى الليل والعمر الحزين
اهين واها ف فقعه رسمت سواد العمر
فى الكحل الجميل
حتى الكاسات اتقدمت ف صينيه مليانه رسوم
قاعد وواقف والى يشكى من الهموم
لكن نظافة الزخرفه تنسى الهموم
الكل يشرب مننا
من فرحنا ومن حزننا
والاها تنزل ماسكه فى الحب الكبير
تاكل وتتغذى تخرّج الف جيل
والضحك اصبح مستعار ووشوش كتير
وف لحظه تسقط الكاسات م بين ايديك
والحلم يصبح جوه ارضك مستحيل
والصوره تقلب للى شايفنها بعيد
نفس الصينيه والكاسات اتغيرت
لكن ضيوفنا المعزومين متغيروش
أبوبكر سالم
شاعر الضباب

*******************

المتسابق رقم 96
أحمد إبراهيم الشرقاوى
دقهلية

خاص بالمسابقة

..ثورة إرادتك
:
:
:
صوتك نهار ,,
خوفك مُسيِّل للدموع ,, ،
ثورة إرادتك مستمرة ،
إياك تحنِّى الحلم بشعور الخضوع ،
إياك فـ يوم تُكُفُر بفكرة ,,
إيمانها بيك عايش فـ روح الإحتمال ،
إياك تموت على حضن خرطوش الرجوع ،
إياك تصدَّق إنها لعبة عيال ،
إياك فـ يوم تِمِضى التحالف للدلع ،
إياك فـ يوم تركع لترهيب الظروف ،
فتّح عيون قلبك وشوف
كل الزوايا لرؤية الحلم البعيد
وإعزف لبكره .. رؤية الأحلام نشيد ،
إحفظ تاريخك صم وابدأ سمَّعه
بينك وبين الأمنيات ،
فاكر زمان
أيام إيمانك بالإيمان ،
فاكر صراخ قلبك فـ حضن المعركة
فاكر ثبات قلبك فـ حضن الدربكة
أيام ما كنت محسوب ع العيال
لعبة عيال كان وقتها
بس إنت كنت مصدق إنك قدها ،
مطلوب شبابك يلتزم بقانون طفولتك
تفضل فـ عين كل مرايات العمر متمسك بصورتك
تفضل بَطَل
متقولش كان جوايا أصلاً شىء جميل
لكن بِطِل ،
إقرا فـ تاريخك كل تفاصيلك زمان ،
وإياك تسّلِم رغبتك كَبش لبديل
الكَبش مش هيكون فدا ..هيكون دليل
إن إنت خاين للقضية ،
مش هِيّا هِيّا ,,
هِيّا موت الحلم فـ شوش العيون
على إيد مشاعر رحلتك ،
وهِيّا إحساسنا بيقين
إن إنت قد المسؤلية
المسألة أكبر كتير
من جيم وسين
المسألة ,,
شمال شمال ,, ويمين يمين .

حَالِةْ كَلَامْ l أحمد الشرقاوى

أحمد إبراهيم الشرقاوى
دقهلية

*******************

المتسابق رقم 97
عبدالتواب محمد مجاهد
محافظة بنى سويف

نص المشاركه
بعنوان(طفل شارع)
ـــــــــــــــــــ
يا طول بالك يا طول صبرك

غريب حالك وطول عمرك

وجع منبوذ

برغم إنك أسير قدرك

قلبت الضحكه ف وشوشنا ل مدة بوذ

بمين هـ تلوذ؟

ب كوبرى معلقك تحتُه كما الأراجوز؟

ب ناس ع الكوبرى بتعدى تدوس اللوز؟

يا مجنى عليك ف ترحالك وحِملك كسر

ومين يأويك ويصفالك يا نسمة عصر؟

جريحه يا مصر

ومهما تحُطى ف شفايفك نسايم روز

ف قلب الضحكه100دمعه وألم فارع

وطفل ما لوش ف دنياكى غير الشارع

زمن بارع..ملاكى بروز

وداس العالى ع الواطى

فى ناس تتعَشا ب الكندوز

وناس ع العضم بتطاطى!!!
ــــــــــــــــــــــ
عبدالتواب محمد مجاهد

*******************

المتسابق رقم 98
لاسم/ احمد جمال الصغير
العنوان/بلبيس شرقيه
رقم الهاتف/01273509976

مضاعفات

كتر الوجع هدنى لما بقيت نصين
حدود وسلك وحرس جوايا فى خِصْمين
نص يقول للتانى روح شوف حدودك فين

ردت كرات الدم حدودنا دى واحدة
الهم هو الهم شرايينا متحدة
إزاى ها نبقى اثنين ونْمَوِتْ الوحدة

يا أسُود على عرشنا يا مقضينها هزار
يا مكتفين الوجع ببرودكم الجبار
صرخ الجنين فى الرحم كفيانا ذل وعار

كفيانا نصبح دول أصغر من الذرة
والغرب يصبح دول أكبر من القارة
مهما تزيدوا الوجع أنا أمتى حرة

شلال ماليه السم نازل على حلمنا
فاتح هويس الدم قاطف ربيع عمرنا
إلغى الحدود يا وطن لملم شتات لحمنا

الشاعر /احمد الصغير
لاسم/ احمد جمال الصغير
العنوان/بلبيس شرقيه
رقم الهاتف/01273509976

*******************

» المربعات الأرابيسك المعشقة . هنا مدرسة لتعليم لون جديد من ألوان الابداعات العامية المصرية . اسسها ويشرف عليها . الشاعر محمد فتحى رئيس رابطة شعراء العامية المصرية
» تنافس فى حب رابطة شعراء العامية المصرية . لمجموعة شعراء
» فى حب رابطة شعراء العامية المصرية
» فى حب رابطة شعراء العامية المصرية الكبرى
» اهداء الى رابطة شعراء العامية المصرية