قصيدة...آه يا بلــــــد...للمسابقه الكبري

آه يـا بـــــلد
......................
انا بكرهك ومن النهارده
انا هاقطعك من توب سنيني
لو ديب يحاول يفزعك
او حتي نابه يمزعك
والآه بروحك توجعك
مش هاسمعك
شكلك ملامحك هامسحه من نن عيني
مش هاخدعك
من حضن روحي انا هامنعك
طول ماالخيانه لسه نايمه فـ مضجعك
وانسي اني احبك واعشقك واتشوقك
ياكارهة نفسك والزمن
كون حجر بين اضلعك
دايما بتقسي وتخدعي
قلب اللي حبك
واللي ضحي لجل عينك
آه يابلد
دمي اللي سال حِنه لـ ضفايرك
تعجنيه كُرْه وقساوه
وانا بالغباوه اوهبك روحي وحياتي
وبحبر دمي اكتبك حرف فـ نشيدي
يلا البسي توب الخيانة لزفتك واتجملي
واتمختري فوق كل جثه فـ سكتك
واتبخري من عين حسدوك
تحسدك عـ اللي انتي فيه
واحد شايلك جثتي ورضيتي بيه
والثاني عايز يُملكك
ويدخلك قصر الهموم وتعيشي فيه
اتهني بيهم وامسحي صفحة كرامتك
واكتبي قصه شهيدك للزمن
جايز فـ يوم تتشوقي وتحني ليه
آخر كلام راح يوصلك
صندوق نقوطك فافتحيه
راح تلقي فيه
قلبي اللي ملفوف بالعلم
روحي ادفنيه
وارمي عليه طرحة مزاجك للخضوع
من غير دموع واوعي تبوسيه
اصل اللي زيك مستحيل
تقدر تعيش يوم بالامل
حتي الامل
رافض فـ يوم يسكن وريدك
طول ما فـ وريدك
نهر ذل بيجري فيه

» قصيدة..أعذريني..للمسابقه الكبري
» قصيدة...اصحي وفوق...للمسابقه الكبري
» رباعيات..للمسابقه الكبري
» مربعات....للمسابقه الكبري
» ايوه انا زعلان .... نص للمسابقه الكبري