* ترمايات * مش معاهم * و بيبكى * .. من طرف وليد الابيض

ترمايات
=====
فوق سطوح الذكرايات
ببتسم مع كل حلم
إلا حلم ..
كنت أخاف أول ما يجى
ببقى ماشى ببسكلتة
فوق قضيب الترمايات
لما كان يجى فـ خيالى
كنت أقع أول مافكر
و أبقى شايف ..
أبن فرناس وقت موته
وهو بيحاول يطير
ببقى راكب بسكلتة
بس لازق فـ الرصيف
عُمرى ما جربت مرة
أمشى عك الاتجاه
عَدت سنين ..
و خدتنى دوامة حياتى
و نسيت ركوب البسكلتة
و أما سنى بقى 40
خرجت مرة للميدان
لسة وحشانى الترام
نفسى ألعب كورة تانى فـ الجناين
بس فات وقت الكلام
شوفت مجموعة شباب
كانوا ماشين عـ القضيب
و أندهشت أزاى قلوبهم
قادرة تتحدى القضيب
يعنى أنا ..
كنت الجبان ..؟ !!
_________________________________
مش معاهم
=====
صوت البحر متغيرش
و أنا قاعد
على نفس الترابيزة
قدامى الرقعة
و بَرُص فـ جيشى
و أصحابى
قاعد ويّاهم
و بروحى معاك
مشغول بوزيرى
عايز أحميه
و بمد إيديا
على شوب المنجة
ألاقيه فـ إيديك
و بتضحك / أضحك ويّاك
مش عارف ليه
ديما تغلبنى .
و فـ أخر مرة
لعبتك فيها
كنت أنا كسبان
بس خسرت وجودك
لما سافرت .
و فـ أخر مرة شوفتك فيها
كان توبك أبيض
راجع فـ تابوت
****
قدامى الرقعة
تلاعبنى
أنت احرف منى
جايز
بس أنا ليّا
دماغ
و عندى عزيمة
_________________________________
و بيبكى
===
كان واقف يبكى
ويّا حيطان العزلة
لوحده ،
و الساعة
قلبها واقف ،
و الكون بيدُور
و بيرجع بيه سِنّة بسِنّة
شايف نفسه بمريلة بيج
و جزمةْ باتا
و بين دراعاته
حاضن شنطة
قفلها بايظ
من غير إيد .
و الناظر واقف
فـ طابور الصبح
-الطالب إللى مجبش المصاريف
يطلع برة
يُخرج
من وسط زمايله
بيقدم رجل
و التانية
بيأخّر فيها
عينه بتلمع مـ الأحراج
بتنقط لولى على خده
ينزل نار ،
ليه كل صحابى
بيجوا الصبح معاهم
ماما ؟!
و انا باجى لوحدى
و أمّا بروّح
مش بلقى فـ بيتنا
غير جدو و تيتة،
و بابا
فـ البيت التانى
و معاه اخواتى
و ليهم ماما ..!!
و قلب الساعة لساه واقف
فين ماما ..
تقرب منى .. و تسمع
دقة قلبى ؟
___________________ من طرف / وليد الابيض