انا اصلى ترزى

اشعار عبد الحليم الزلوعي
ترزي
الواد ده اهبل وجاي بيسال
همه ناسي كارهني ليه
واقول لنفسي يا واد ما تتقل
ومهما كرهوا ها يعملوا ايه
ما انا اللي ماسك كده فى اللجام
واموري ماشيه تمام التمام
طب خلي واحد يقول كارهني
وانا با اربي من غير كلام

لاعمري غاوي حاجه م الفنون
وهوايتي هيه املا السجون
من غير لا ظيطه ولا يحزنون
منا اصلي ترزي وقماشي ناسي
والكل عارف حب الكراسي
وانا ليا كرسي طول ما انت راسي
يا واد يا مرسي هات الجرايد
اشوف اللي ايد واشوف اللي عارض

تعالي يا ابني نفتح معارض
لانجزاتك ومشروعاتي
والدنبا بمبي كمان وفله
ورحمة امي يشرب في قله
وكمان بابور وفوقه حله
نقفل مصانع كل المحله
وساعتها يا ابني البركه هله
دى انجازتنا عاوزه مسله

انا عمري شايل حملي التقيل
استبن كنت وما ليش بديل
يوماتي عاوز واحد قتيل
ونقول دا حظه ورزقه القليل
في بلدنا حاجه ما لهاش مثيل
قالوا لنا نهضه طلعت عليل
رجعوا وقالوا ده كلام هزيل
ان كنا قولنا هاتوا الدليل

وانا م البدايه قولت اني ترزي
وعشيرتي قالت هلل وخيط
ابص الاقي الناس تعيط
الكحكه يعني في ايد اليتيم
محسود عليها من اللئيم
ضهري انكسر من الخياطه
والشعب كله اخرالاطه
بس اللي عارض نام ع البلاطه