مسابقة الشعر العامى من 15 فبراير الى 28 فبراير 2013 . احدى مسابقات رابطة شعراء العامية المصرية

المتسابق رقم 124
الشاعر حسن عامر
محافظة الشرقية

بختصار نفسى اكون صاحب قرار
مش اسمو اية مربوط فساقية ليل نهار
افضل الف ذى الشريط
عمال يلف عمال يسف لاسمعنا غنوة ولا حاجة حلوة
كل اللى فيكى دايما مرار
بختصار نفسى اكون صاحب قرار

بحبك وانتى كارهانى ووقت الفرح نسيانى معندانى
امشى الطريق لمنتهاة وارجع للصفر من تانى
واعمل عبيط
وكان الفرحة عنوانى مش سيعانى
انا امتى اكون لية راى ولا اختيار
بختصار نفسى اكون صاحب قرار

بجمع بواقى الامل وافرد شباكى ع الطموح
يمكن حالى يتعدل والياس ينسانى يروح
مجبر انا على ارضك عايش بداوى جروح
عايش حلاوة روح
مجبر انا على ارضك
ياما نفسى افضفضلك وابوح دى الكلمة فحلقى متحاشة
والصبر على ارضك كفر فوقى انتى فخطر
ثورتك كانت انتعاشة وناسك ماليها الضجر فوقى انتى فخطر
ابنك زرعة دبلانة مستنية المطر فوقى انتى فخطر
استسلامك ل اوهامك جريمة لا تغتفر فوقى انتى فخطر
مليت سكوتك وكلامك بكفاية اعذار
بختصار نفسى اكون صاحب قرار

والله يا بلدى بحبك ولو هتزيد همومك هم
داالهم وانا جوى حضنك لية احلى واجمل طعم
اعذرينى
ثورتك هى البداية والنهاية
ثورتك كانت ومازلت اصل الحكاية
الثورة لازم تفوت ع الشوارع والحوارى والمصانع والبيوت
الثورة فكرة والفكرة لو طال الزمن مش ممكن تموت
والظلم لو كتف ارادتى محال يكتملى صوت

انا دهرك ومن صلبك
واللى داق طعم الميدان
واللى صدرة كان حيطة سد لرصاص جبان
واللى كان واقف اسد ف وش الطوفان
لازم يكمل المشوار
بختصار نفسى اكون صاحب قرار

*******************

المتسابق رقم 125
عصام الدين محمد محمد السيد قمر
محافظة بني سويف

_______________
في محطة القطار
في محطة القطار رحت أقابل حبيبي
بعد طول إنتظار حس بي وهييجي
وأخدت معايا شوقي وأخدت لهفتي
عشان لما اشوفه ألاقـيه بمحبتي
وأفتح لحضنه إيدية وأغمض علي كتفه
وأنسي كل الأسية واللي في غيابه شفته
***************
قطار وري قطار بيعدوا
ومجاش ولا وفي بوعده
ودموعي علي خدي سالت
وتاهت أفكاري وإحتارت
ليه إداني أمل في لقاه
بعد ما طال في البعد جفاه
وليه دلوقتي بيلعب بيا
وأنا حيران مش حمل أسية
***************
حسيت بالحزن عصرني
ولملمت خيبة ظني
وفـ لحظت إحساسي بإني
هواه خلاص ودعني
لقيته بيجري عليا
ويبوس علي راسي وإدية
ويقولي ياحبيبي سامحني
معلهش إتأخرت شوية
****************
وفي بحر من الدموع وبكي وابتسامة
مبقيتش أردد غير حمدلله ع السلامة
وإيدي حضنت إيده وأخدنا بعضنا
حنين الله يزيده حبيب قلبي أنا
وساعتها بس عرفت حرقة الانتظار
وأنا وحبيبي ودعت محطة القطار
********************
كلمات عصام قمر

*******************

المتسابق رقم126
الشاعرة هناء فاروق أنور موسي نوار
محافظة الأسكندرية

قصيدة " حد يجاوبنى
_____________________
مليون سؤال و سؤال فى نفسي
بيتصبّو فى عقلي صب
بصرخ و أقولها بأعلى حسِّي
... دلّونى يا أهل الطب !!
مين اللى عاش طول عمره يتيم ...
مع إن كان لُه أم و أب ؟؟
مين اللى دمّر حلم قديم ...
و حرم قلب من إنه يحب ؟
حد يجاوبنى
مين اللى يقدر يمنع طير
فى السما .. من إنه يطير ؟؟
مين اللى يكره يسمع غُنا ..
أو حتى زقزقة عصافير ؟؟
حد يجاوبنى
مين اللى كان مسجون فى خلده ...
و عاش جوّاه زى الأسير ؟؟
مين اللى إتغرّب جوّة بلده ...
بعد أمّا غاب فيها الضمير ؟؟
حد يجاوبنى
مين اللى عمره ما داق الفرح ...
و عاش العمر كله حزين ؟؟
مين اللى يقدر يداوى جرح ...
عمّال بينزف من سنين ؟؟
حد يجاوبنى
مين اللى ياما شال فى نفسه ...
و حبس جواها صرخة أنين ؟؟
مين اللى لما غابت شمسه ...
تمللى كان ياخده الحنين ؟؟
حد يجاوبنى
مين اللى يقدر يطول السحاب ...
و يملك يمنع نزول المطر ؟؟
مين اللى يقدر يمحى الضباب ...
و يلمس بايده ضى القمر ؟؟
حد يجاوبنى
مين اللى عاش ويّا السراب ...
وكان وجوده أكبر خطر ؟؟
مين اللى غطّاه التراب ...
بعد أمّا ذلّه كل البشر ؟؟
حد يجاوبنى
مين اللى قال إن العتاب ...
ممكن يصلّح اللى انكسر ؟؟
مين اللى فتح مليون كتاب ...
و قدر على يأسه ينتصر ؟؟
حد يجاوبنى
مين اللى لو كان لُه صحاب ...
يسيبهم و يتوه فى السفر ؟؟
مين اللى فرّق بين لَحباب ...
و قال دا هوة حكم القدر ؟؟
حد يجاوبنى

خلاص حكيت عاللى تاعبنى !!
و برضه محدش رضي يجاوبنى

بقلم : " الشاعرة هناء نوار
*******************

[i]

المتسابق رقم 127
الاسم : إسماعيل أحمد العسكري
مخافظة الشرقيه

أود أن أشارك في المسابقه وشكر الكم_
موظف الأيام دي *** مفيش في جيبه فلوس ---
بياكل أكله د ايما *** حاف من غيرغموس---
ياكبدي عليك يا أخينا***عايش كده منحوس---
من غلبك متلقيش***غير طحنك للضروس---
ديون كتير عليك*** محتار حتسد مين---
وآخر الشهر قرب *** وأكيد حتستدين ---
عشان تداري هيبتك *** ف وسط المحظوظين---
أحسن علاج لحالتك*** إشتري نفتالين---
ويوم ماتروح وتقبض*** ع القبض حط حته---
يمكن تطول حياته*** يومين أو حتي سته ---
واللا يفوق شويه *** مايمتشي يوم بالسكته---
لكن في النهايه***أكيد حتاكله العته

*******************

المتسابق رقم 128
علاء عبد السميع
****************
كلمة فى الإذاعة المدرسية
--------------------------
الصبح باس ماما
وهيه بتحط الكتاب
فى الشنطة ويا السندوتش
خلى بالك من أخوك
الولد زى الربيع
قال لابوه حاضر
وهو بياخد المصروف
كان مطيع ..
الشمس شقت ريقها
صبحت ع الشجر فى المدرسة
مكان ما يتلموا العيال فى ضلتها
ميلت ع العلم
العلم نازل وبيخبى فى عنيه
حيرته ودموعه
إزاى طابور المدرسة
ما وقفش
والوقت ده موعد طلوعه
الحرس بشارته وكابه لاحمر
لسه ما رماش السلام
مع إن الجرس دق ف معاده
العيال اتأخروا ليه النهارده ..؟
مع إنهم ..
وعدوا أكتوبر
فى كراسة التعبير بالانتصار
ويناير ..
فى كراسة الرسم أجمل من صورته فى التحرير
..
فى الأتوبيس
الصبح
قال لأصحابه
عن كلمة هيقولها بقلبه
بامتلاكه للشجاعة
زى ما الأبله قالتله
باسم هذا الحب من قلبه الصغير
كانت
كلمته فى الإذاعة المدرسية
ع الضمير
فجأة مالت شنطته
مال عليها
الولد يحضن الكراريس
اتسحبت لحظتها الشمس م الأتوبيس
الولد كان بينزف كلمته
ع الكراسات ..
وع الصحاب
الضحكة فى عيون الولاد
لسه استوتش
الدم سال ع المريلة
فى الشنطة ..
ف كابه لاحمر
جوه السندوتش ..
والعلم على صدره
كان ..
بيهتف
والملايكة تقول وراه
الطابور
مل لما الوقت طال
الطابور فى المدرسة
لسه بيستنى العيال
المس حضنت كل أطفالها بجراءة
لولى العيال / فتافيت
ع السكة منتورة
يا مس فين حضنك
يا ماما .. يا ..حلمك
أمانة يا عمو
قلمى الرصاص
نفسى أكمل اسمى فى الكراس
على كلمة كانت للإذاعة
- مدرستى يا مدرستى -
كتابى القراءة ..
ع السكة الحديد ..
فى المزلقان ..
جنب الغفير ..
الكلمة كانت
................
( علاء عبد السميع ) سوهاج

المتسابق رقم 129
محمود محمد مرعى . الأقصر
_____________________

هــــــــــــــــــــــــى
معرفش إيه
اللى خطر فى قلبى
لما شوفتها
وسط الميدان
كانت
فراشة ملونه
بين الغيطان
وسعات كتير
كانت مدد للأوليا
بترج روحهم
ينعموا بالوصل
فى سعات الغضب
كانت لهب
يسرى ما بين
تلج السنين
تطرح ورود
يملى خياشمنا أمل
كانت قبل
منحوته فوق كل الخدود
بإشارة من كفها
الحانى الودود
تبنى سدود
وتشدنا نحو الصفوف
نبنى مدينة لإنتصار
كانت خضار
يوهب قلوبنا لارتوا
ينفخ فى
صاحرينا الحياة
طوق النجاه
كان فى
ابتسامتها البريئة
كانت جريئة ف حلمها
وكان الوصول
ملهوش بديل
كانت دليل
للفجر ما بين الغيوم
تمسك إيديه وتقسمه
لقمه هنيه لكل قلب
لاجل اما نوره
يتولد
كما بسمه
فى عيون الصغير
نورت كل القلوب
المؤمنه بالحب
واتسرسبت
فى قلوبنا ضى
كحل عيونا
بالأمل.

محمود مرعى / الأقصر.

المتسابق رقم 130

المتسابق رقم 130
يوسف رضا شاهين
المنوفيه
________________________
لمــــــــي عـــقــــــــــــــدك

لمــي عـقـــــدك ياصـبـيــه
لــــولا لــــولا جـمـعـيـــــه
عـقـدك المفــروط ضحــيه
الـف أيــد بـتـشـــد فيــــــه
واللي رابط بين لولـيـكـــي
خيـط يفـّــرق مش يجـمــّـع
لـو فـــ نفسـك يبقى ليكـــي
لـو فـــ حلمك عقــد يـرجع
يبـقـــى لازم تحـكـمـيــــــه
وبرباط صـــافي اربطيـــه
لمــي عقـــــدك يـاصبيـــه
لــولا لـــولا جـــمـــعـيـــه
****************
عقدك اللي فــــوق كتافــك
كان يغير منـــه الصبايــــا
عدى حزن الكون وشافــك
وابتــدى يبـكـــي بكـايــــا
لمـا شــافك واقفـــه خايفـه
خـــاف مـن الأيــام عليــه
لمـــي عقـــدك يـــاصبيــه
لـــولا لـــولا جـمــعيـــــه
***************
كــل لـــولا لـيـها صاحب
اقــوى م الصـوان شـويـه
إنمــا الشيـئ اللـي غايــب
إيـــد تلـمـلـمـهـم شــويـــه
إيـــد تــرد العـقــد لـيـكـي
إيـــد تشـــد الإيـــد عـليــه
لمـــي عـقـــدك يـاصـبـيـه
لــولا لـــولا جـــمـــعـيـــه
***************
درة العــقــد اللــي كــانت
بـيـن نجــــوم متـجمـعـيـن
مـن مـابيــن العقــد سابت
وسـط عتـمـة ليـل حـزين
نــوّرت الـعتـمـه مـنـهـــا
وعتـّمـــت ع الـكــل ليــه
لمـــي عـقـــدك يـاصـبـيـه
لــولا لـــولا جـــمـــعـيـــه
***************

المتسابق رقم 131
الشاعر سمير احمد محمد القط – الجيزة

________________________

خاص بالمسابقة مع خالص الود والتقدير
أمى ياخلق ....
أنا اليائس ...انا المهموم
انا اللى كنت فى الماضى
صايغ اسمك
ومن اعالى القوم
انا اللى حاربت اعدائك
وحاربنونى
وسبونى
وهانونى وجلدونى
انا المعدوم
انا اللى شارب من
كيعان الصبر كاساتى
مانيش حاسس
الا بصوت الجرح
مكتوم بآهاتى
انا السابق ..انا المسبقوق
انا اللى فى احلامى
طُلت الشمس..وطرت لفوق
وبين حاضر ..وبين ماضى
قسمونى ..
بسيف حامى وانا محروق
انا اللى طفت
فى الميدان مع الشجعان
وعلى توبى لقيت اسمى
غريب شارد بلا اوطان
انا اللى فى حضنك
كنت بتشاهد ..ماخفت من
سلاح.. ولا شوم .
مانيش راضى
ولامطاطى
ولا سامع لصوت البوم
انا القاتل وانا المقتول
وانا الفاعل وانا المفعول
ورغم اللبس نتشابه
مع الدم ..مع المعدوم
انا اللى اتهمونى ...بافعالى
وسبت مالى وعيالى
وانا شايل على ضهرى
تلال حزنك ..وانا مهموم
انا اللى زجونى
فى حضن الظلم والطغيان
وسابوا الجانى يقتلنى
سنين عمرى مع الغربان
وضاع الحق منى
بتشويشهم
وكذب الحرف فى لسانهم
مانيش منهم
لانى بصدقى انا معروف
ومات الخوف
وهانزلك كمان تانى
واكتب اسمك
وانت عارفانى
شهيد مات
بصوت المك
فدا دراك..فى لحظة صدق
مكتوبة ومرفوعه
تنادى... تطوف
لانى جزء من طوبه
بيبنى قصرك المرفوع
رافضك تبقى مغلوبة
لنبت خنوع
انا الحاكى انا الراوى
بالف كتاب
مانيش حاوى
ياغصن البان
فى شعره يسيل دمعه
سطور ف ديوان
ويكتب حرفه من دمه
ومش ندمان
انا الهاوى انا الناوى
انا الباقى على عهدك
ووعده معاه
ومهما يسير اويجرى
خطاويك تكون سبقاه
لانك آيه وحكاية
شموخ اسمك
يضلل نيلك الممدود
ويروى الارض
تنبتلك
سباع واسود
ومهما زادت
جراح جسدك
بكلب وديب
ونبش غريب
يعيش مطرود
وتبقيلى وابقالك
صروح عايشة
تحكى ملاحم حب
عطشانه
لبحر الجود

***************

المتسابق رقم 132
هاني علي احمد.............
سوهاج - طما

________________________

يا خوفي منك يا كنانة
..............................

رغم العذاب والهم
واللي شوفتوا منك...والغم
وظلم ولادك و اخواتك
وطناش الخال والعم
وحقي اللي ضايع
وبيتاكل مم.......
وهواكي اللي اتخنق
لاعاد بيرفرف راية
ولا حتى بيتشم
حسيسيني مرة ان عروقي
فيها شوية دم
حضارتك بقت زمارة
سبع تلاف سنة
سبع تلاف سنة
بغبغانات شغالة
كلمتين بايخين في عبارة
العالم سبق الصوت.... وإحنا
مش عارفين نقفل مزلقان
ولا عارفين ننظم ...اشارة
ناس مش لاقية ...ومحتارة
وناس لافة البلد في سجارة
مرة فكرت...ادوق حلاوتك
للأسف.....طلعت سنارة
سافرت وسبتك....قالوا :-
مفيش ف الغربة ... دفا
رجعت لحضنك....فرحان
ملقتش غير.... الجفا
ازاي تسقيني الضنى ؟
وتقولي يلا بالشفا
اوعي تكوني بعتيني
صفقة ..ساعة صفا
يا خوفي منك يا كنانة
يا خوفي منك يا كنانة
........................

هاني علي احمد.............سوهاج - طما
***************

المتسابق رقم 133
محمد محمد الساعي
دمنهور -البحيره

________________________

وانا صغيَّر ..
وكانت امي بتاخدني ..
لدنيا تانيه م الاحلام
وقبل ما انام..
كانت تحكيلي حدوته
عن الشاطر وست الحسن
وبرضه كمان عن الغوله
ولما تشوف في عيني الخوف
تدفيني بأجمل حضن
وكنت أسألها ليه يامه
تمللي الشر موجود جوا حوادتنا
ودنيتنا
ترد تقولي ياضنايا
يا أجمل فرحه جوايا
عشان ما الخير يبان يابني
لابد انه يكون فيه شر
ساعتها كنت مش فاهم
لكني وقتها مضطر ...
أصدقها
واسرح بين اديها وانام
ولما اصحا ..
افكر تاني في الغوله ... وحدوته
واجري أوام على التوته
وأتخبى في ضل فروعها .. وافكر
وأحلم اني يوم فارس
واحارب أمنا الغوله..
وأقتل خوفي جوايا وانا باقتل
رموز الشر في الغوله
في ايدي سيفي ومعايا رماح الخير
واصحا مش بالاقي غير
في ايدي فرع م التوته
بحارب بيه
والاقي جنبي بنوته
بتمسك ايدي وتقولي
جرالك ايه
تحارب مين؟
فاكر نفسك ابو زيد الهلالي سلامه
ولا انت صلاح الدين؟
تعالى نهزها التوته
دي بس حكايه نتسلى باحداثها
في حدوته
لكني وقتها بابقى
واخدني الحلم للآخر
وماسك سيفي وبحارب جيوش الشر
ويطلع سيفي في الآخر
مجرد فرع م التوته
ما يقتلشي ولا نمله ولا غوله
يصيبني اليأس لثواني
واحس الدمعه منعاني
من الأحلام.. وأتحيَّر
وأتذكر كلام امي
وانا متخبي جوَّا الحضن
وباسمع منها ست الحسن
وحلمي لسه جوَّايا
ولما كبرت برضه حلمي ما اتغيَّر
لأن الشر في حياتنا بقى أكبر
وصبحت امنا الغوله دا شيئ هيٍّن
مجرد رمز مش أكتر
واصبح .. غول الشر جوانا
يوم ورا يوم بقى بيكبر
وسيفي لسه ويايا
مجرد فرع م التوته
كأني الفارس المغوار .. في حدوته
ولسه الحلم جوَّايا وما اتغيَّر
زي زمان ....
وانا صغيَّر
***************

المتسابق رقم 134
(رامى محمد عبد الحميد
(محافظة اسيوط)

________________________
ع الحدود

ابنى شايلينه ف تابوت

كان بيحرس على الحدود

مات شهيد مغدور بدمه

خسه من فعل اليهود

كان بيجهز للفطار

فجأه سامع ضرب نار

نار هتقتل فيا يمه

بكره مش طالع نهار

ماسك التمر فى اديا

وهو متلثم بخوفه

وبرصاصه ضربها فيا

جبان وخايف انى اشوفه

اوعى اسمع صوت نحيبك

او تقولى انا ابنى مات

خلدينى بذكرى حلوه

وانى عايش للجهاد

سلمى على كل طيرى

وإزرعى الامجاد فى غيرى

فكريهم يوم غناهم

انهم عايشين فى خيرى

سلمى على عشق روحى

فرحه لسه ماعشتهاش

فكريها بإن دمى

ف موتى مش هيروح بلاش

إحكى ليها كل كلمه

قلتهالك مره عنها

عرفيها بإن موتى

عمره ما هيبعدنى عنها

امسحى فى دموع ابويا

واحضنى غالى وغاليه

طمنيهم ان روحى

طالعه للجنه البهيه

اوعى تنسى عم حنا

ولا خالد يوم خطوبتى

فهميهم إن موتى

جاى وبيزغرد لتوبتى

إهداء لروح شهداءنا على الحدود المصريه

رامى محمد ادمن جروب كلمه لمصر

***************

المتسابق رقم 135
محمد احمد اسماعيل الشرقاوي
محافظة الاسكندرية

________________________

زي كل ليلة

زي كل ليلة من ليالي حبنا
زي كل نجمة عدت وباركت لنا
زي قلبي وقلبك ماكانوا يوم حبايب
تعالا ياحبيبي نعيش الباقي من عمرنا

الليالي دي ياما سهرت معانا
والقمر ويا النجوم شاركوا غنانا
حتي موج البحر رقص لما سمع شدونا
زي كل ليلة من ليالي حبنا
تعالا ياحبيبي نعيش الباقي من عمرنا

قالوا ياما الناس علينا
وياما حاولو يفرقونا
كانزا كل ما يوصلوا لنا
كانوا اكثر بيقربونا
كان كلامهم بيزود فرحنا
زي كل ليلة من ليالي حبنا
تعالي نعيش ياحبيبي الباقي من عمرنا

تعالي نخلي الحاسدين يشوفوا
تعالي نخلي الشمتانين يتوهوا
تعالي نقول لكل الناس
ايوة كل الناس
كنا مين وبقينا مين
زي كل ليلة من ليالي حبنا
تعالي ياحبيبي نعيش الباقي من عمرنا

عارف انت ايه ياحبيبي ليه
انت كل الدنيا دية
انت لو جابو لي ملو البحور حب هدية
او عطوني الشمس تاج
او نسجوا النجوم طاقية
برضه انت -- انت بس -- اللي ليه
زي كل ليلة من ليالي حبنا
تعالي ياحبيبي نعيش الباقي من عمرنا

انت فاكر اول ليلة
ايوة ليلة ماتقابلنا
والا فاكر كل همسة
بدئنا بيها واتكلمنا
تعالا نخلي كل ليلة هي اول ليلة
تعالا نرجع كل لمسة بينا جميلة
زي النهاردة واللي جاي من ليالي
زي مابعت الدنيا
واشتريتك انت ياغالي
يالا خدني وياك وطير
نطوي سوا جناح الليل
نعلم الناس الحب وكل الطيور
ونزرع في السما حبنا
نجوم ونور
ونعيش باقي عمرنا ملاك وحور
زي كل ليلة من ليالي حبنا
تعالا ياحبيبي نعيش
الباقي من عمرنا
***************

المتسابق رقم 136
بهاء احمد توفيق
محافظة اسيوط

________________________

♦♦ هياها نفس المِحن ♦♦
وبأمر مين تبقى الايدين ورا ضهرنا متشبكة ..؟؟

وبأمر مين نضحك زعل والضحكة يغلبها البكا ..؟؟

أمرك عجيب يا موريانى الفرحة فيلم ...

ومعيشانى الحق حلم ...

ومطفشانى من سنين ظلمك لظلم ...

ومفهمانى عشان أعيش لازم أطاطى

عايزانى وقت الذل أخرس أو أخاف وأجر واطى

عايزانى كيف وانا بتسحل اخدك فى باطى ؟؟؟

لسه الديدان سارحين على بدنك بيبنوا ألف عش

لسه الطريق مفروشة غش ف غش

لسه عيالك ع القهاوى وع الرصيف بتنش

وكلاب كلابك لبسوا نفس الوش

من كام سنة سيبانى أشكى بلوتى

طب كام سنة هفضل أدش ؟؟؟

ملعون ابوكى يا كارهة للتغيير

يا بير بيسقى الغير ...

وانا بس ليه ماشاربش

عطشان بطول عمرى .... وانتى مبتحسيش

ركنانى ع الهامش أهش وانش

يا محرمانى أعيش ...

ومحرمانى أموت ...

عايزانى بين البينين أفضل كده ...!!

طب اعمل ايه ما قادرش

جسدى النحيل من طعنتك بيكش

يا معلمانى الشحاتة فوق رصيف القهر

عايزانى ليه مفضوح ...

أمشى ف طريق العهر

حتى الغسيل الوسخ .. نشراه ف عز الضهر

شمتوا كلاب السكك واستهزءوا بيا

سلبونى سيف عزتى .... واستفردوا بالمهر

خايف من اللى جاى ... نبت الشقا طارح

العتمة ع الأبواب ... سحبانا لـ امبارح

الدم تمنه دم ... مش تمنه نتسامح

جامح يا خيل الجشع .. يا ابو زفة ظباطى

يا دولة المهيصة والضحك ع الفاضى

يا دولة المريسة بين عسكرى وقاضى

يا دولة المتعسة لمعارضة كدابة

واخوان ديابة بتنهش فيا وتراضى

وكأنى مش موجود بيقسموا التركة

وقالولى لو زعلان اشرب من البركة

حطينا ايدنا خلاص ع العزبة والشركة

وانت مالكش مكان ...

هياها نفس السِّحن والخامة والماركة

هياها نفس المِحن فوق القلوب باركة

دخلوا الفراودة السجون .. لعبوا اللى ع الدكة

مكفاهمش اللى ضاع بيبصوا للفكة
***************

المتسابق رقم 137
الشاعر فتحى عباس

________________________
فين الشرق
يا بوصلة اتجاهك فين انا تاه مني الشرق

رسمتك صورة في خيالي
لا بيها حدود ولا حواجز ولا فرق
رجعت لامي اسألهاهو الشرق فين
قالتلي في الضلمة بتضيع الاتجاهات
والالوان بتبقي لون واحد مفيش فرق
ليه يا امي كل ما كمل الصورة
في خيالي تضيع زي البرق
حطوا حواجز علي الحواجز
وبدل الحدود والفروق عملوا مئة فرق
العراق فيدرالية
السودان جنوبية وشمالية
وليبيا بيقولوا في السكة اهي جاية
يا ناس حد يقولي اصدق الي انا شايفة
ولا اللي باسمعه قلبي انشرخ من الاه
وعيوني خلصت دموعها ما بقوش يدمعوا
انا باتكلم في الفضاء ولا الناس ما بقوش يسمعوا

***************

المتسابق رقم 138
محمد صبحى عمران

________________________
مهموم والحزن ملانى
والفرح مش عارف عنوانى
والكل بيفرح يتهنى
وغرقت فى بحر أحزانى
بأحلم بالجنة وأنا صاحى
وفى نومى كوابيس مسكانى
مستور وحالى متيسر
لا نافعنى جاهى ولا مالى
سبحانه ربك ومقدر
يمحى همومى وأحزانى
فى حياتى عمرى م بتأخر
عن خير بيظهر قدامى
و أسف ان كنت مقصر
فى عبادتى والدنيا لهيانى
وحدانى وعايش فى الدنيا
غرقان فى همومى وأحزانى
أبكى على حبى ال تركنى
ولا أبكى بس على حالى
فى الوحدة حاسس بضياعى
والدوخة دائما مسكانى
فكرى شارد متحير
محتاج لمرسا وعنوانى
وشراع المركب متكسر
والبحر هايج قدامى
ع الشط أنظر بعيونى
و أتمنى أوصل بأمانى
والموجه تشلنى وترمينى
بتهيج حزنى وأحزانى
والفرحة قادر تسكنى
وتبعد جروحى وأحزانى
يا حزن مالك كدا مالك
عمال تلف وتتمنظر
وناطق اسمى على لسانك

***************

المتسابق رقم 139
محمد حسن ابو العبادى
ابن محافظة قنا احمل اقامة القاهرة
والان اقيم بدولة قطر

________________________
يا امة انا رايح مدرستى
...
عاملة حداد يا غالية

حدادك هيطول

... مبقيناش عارفين

مين فينا القاتل ومين مقتول

ولا مين اللى عليه الدور

ساقية وقواديسها بدور

احلام مسروقة وعجل بيدور

ونفوس مريضة وراس مخمور

#### #### ####

تلميذ وكان رايح مدرسته

فرحان بكتابه وكراسته

وقلوب خضرة . ملهاش خبرة

حالمة ببكرة

وزقزقة عصافير

ونسايم هالة . عا الجناين طالة

وبلبل حزين

وصوت صداح بامل وكفاح

وحلم دفين

ودعوة ام صابرة

حاملة عذاب السنين

وضحكة سن هنية

ساعة الصبحية

باحلام وردية

وموال حزين

### ### ###

ووشوش ضاحكة

وايادى فاردة . تدعى رب كريم

نبت زهر الارض

وطل وندى المواويل

جناين ورد ..شفايف همس

متعود عليها النيل

بساتين زهر . شاربة من النهر

حالمة بامل طويل

### #### ####

يا امة انا رايح مدرستى

شايل كتابى انا واختى

يا امة يا بدر اكتمل

انا رايح وكلى امل

داخل دروب العلم

احقق الحلم

ابعد عنك الانين

يا امة مدرستى بتنادى

بصوت نشيد بلادى

وحديث وفقه وقران كريم

### ### ###

خد بالك يا ابنى من نفسك

وروح ربنا يستر

ويا ريت حلمى فيك يتفسر

واشوفك مهندس بخريطة

ولا طبيب ماسك بالايد مشرط

تشفى الام التعبانين

واللى بالامراض مسكونين

### ### ###

خرج احمد .............. خرج احمد

وجواه صوت امل

صوت علم

صوت حلم بيتولد

ركب اتوبيسه على مدرسته

واخ معاه وكمان اخته

مشى الاتوبيس

ومزلقان كان فاضى

لا صوت ولا صورة

ولا حد بينادى

وقطر سريع . يسابق الريح

وسايق نعسان

جاى من ليل جبان

حامل الم . حامل موت

حامل حزن كبير

ضرب ضربة . مالها صدة

خلت الاتوبيس نصين

وراح احمد . راح احمد

اختلط لحمه بعضمه

بلون النيل

لحم نساير . ودم سايل

وبدل المدرسة . راح عا المشرحة

وبدل المريلة . لبس الكفن

اه ياامة .. واه يا يا با

ضاع حلم الغلابة

اتقتل الحلم الاخضر

انطفى نور البرائة

وبحر البقر حاضرة

ووشوش مليانة كأ بة

وكلمة حق ضايعة

وخيال مأ تة

فساد باقى فينا ومعشش

وافاعى كبيرة فى عضامنا بتسمم

سوس وفى اساسنا بينخر

عطب وعفن ساكن فينا من سنين

ونظام جديد . قديم

لا مسائلة . ولا محاكمة

ولا حق عاد للميتين

***************

المتسابق رقم 140
sahar zahran.......cairo

________________________
ياأم العيون حلوين
يااللى بشوف فيهم
شمس النهار منورة الميادين
وحب وامل فى غيطانك طارحين
وطيبة ناسك من القنطرة لشلاتين
ومهما حاولوا الاعادى
يقسموا ولادك شمال ويمين
بردو حتفضلى ام الدنيا وجوه العين
انكتبلى اتعلم حروف شٍعرك
واغزل كلام الحب فى عشقك وفى شعرك
خصلة حنين وخصلة انين
وخصلة رضا من كف ولادك الشقيانين
ومهما شٍقوا ولا داقوا مر السنين
عمرنا مانبيع هواكى
عاشقين ترابك مسلمين ومسيحين
مااحنا كلنا مصريين
على عهدك متواعدين
نحافظ على آرضك
ازاى نفرط فيكى
وعرضنا هو عرضك
عطاشى روانا شهد نيلك
وان توهنا فى دنيانا
من غيرك نناديلك
ومين يمسح دمعنا غير مناديلك
ونسمة هوا ساكنه ظلام ليلك
ثورة وقامت ضد عدوينك
ضمنا قلب واحدوتحريرك
راح الشهيد يتنسم فى جنته بعبيرك
ماهمه الا انه يموت فى سبيلك
وانتى عروسه الكل آثيرك
تحيى وتضىء قناديلك
ولا عدو واحد يتهنى من خيرك

***************

المتسابق رقم 141
محمد السيد حسن
محافظة الشرقية

____________________
Mohamed Hassen
مسافر مفارق ركن الجدار مسافر لإبعد مكان إنتظار لكوكب بيؤمن بحق الشرود---مسافر لإني في رف الهوامش سنين ببقى ميت ساعات بس عايش---كرهت الشوارع وبخل النهار كرهت المدامع وضيق لحتضار---كرهت الخضوع في ذل السؤال كرهت الرجوع لحضن الضلال--لحكم اللهيب وعفر الدبيب وخجل العذارى في وصل الحبيب كرهت الاماكن وبرد القيود---مسافر مفارق لإقصى حدود لإخر استدارة عن ارض الجدود---لضلة وزرعة لضمة ونور وضحكة بترعى جنين الزهور---لهمس السكوت على فرع توت لطل البيوت وقوة(طالوت) ومهرة بلجام فارسها (داوود)---مسافر مفارق لكني حعود في حلقي المعاني في قلبي البرود--في شهقة وزفير بحلم وامل في ضلعى الضمير بيحمي الحمل---وضلة ومية وجنة عدن لومضة تنور جبين الوطن وحطة فراشة فوق خد الورود----رجعك وشايل خلاصة الربيع رجعلك في حضني آخر رضيع --- بمادنة وادان برنة جرس بشهد الزمان بموكب حرس بعشقى الوفي بسيفي العفي وحليب النهود--ببرد (الرسول) بطيبة(هاروون) وجدول عرق سابح في طين بحبر وورق وحكمة ودين---رجعلك صباح كريم المطر رجعلك براح بدايتة القمر بهالة ملاك بسبحة وسواك ببرق ورعود---بكل اشتمالي بروح اكتمالي ياخضرة الشريفة يا ضمة عفيفة يااول واخر وطن للخلود---==محمد السيد حسن---==محافظة الشرقية
================

المتسابق رقم 142
الشاعرة . نونا العرينى

____________________(أين أمى)
أمــــــــــى امى...........................أمــــــــى يا أمى
نــفـــسى ترجـــعى لى............وبأديــــك تضـــمى
دمـــعى جــــوه عـــينى.............م الفـــراق يــاأمى
يا حــــاســـه بأنـــينـــى..............حــبك جـوه دمى
...............................أمى يا أمى.......................
لما قفلوا عليكى قبرك..........قدام عينى الدنيا قفلت
ليه ياأمى تسييبى أبنك......دنـــيا فيها الرحـمه قلت
مين ح ياخد إيدى بعدك......قــــلب أبــنك ورده دبلت
دربى مظلم بعد بُعدك......وف طريقى رجلى مشيت
..............................أمى ياأمى.......................
وف طريقى قابلت حب .........بــس غــير حبك ياأمى
نسّى قلبى كل غلب.........حب زاح من قلبى همى
عينى شافت أحلى حب.....والجــراح نامـت وألــمى
يا حــبيبى لــينا رب..............أيوه راح يــدينى أمـلى
............................أمى ياأمى......................
ياحبيبى شوف ظروفى.........أد إيه ماســكه ف إيدّيا
ياعــيونى بصى شوفى .........دنيا صعبه مش هنيّه
لازم أنحت صخر خوفى .......وأدعى ربـى تـبقى ليّا
لأجله أحارب وبسيوفى......والحــياه راح تـبقى هـيا
بـس أمى جــوه قلبى.........هى سر النور ف دربـى
لسه صوتك جوه ودنى.....تنــصحـينى بحــب ربــى
..........................أمى يا أمى.......................
(بقلم نونا العرينى)
================

المتسابق رقم 143
الشاعر على السيد

___________________
الدنيا وما فيها

شعر / على حزين

قاعد ورافع وشك للسماء
بتفكر فى ايه يا عم
إمبارح راح وعدى خلاص
وبكره لساه غيب لساه
انساه ولا تستناه
ولا تخليه ع البال
والنهرده ذى الفل
اشطه ياعم وعال العال
اولادك دول حلوين
وربنا يحميهم من العين
فارس راح المدرسه
وخديجه غلبانه
ويحي ربنا يشفيه
والسيد اديك مستنيه
وامهم اصيله وبت حلال
تستاهل تقلها مال
زينه والله وعال العال
وأميره وبنت الأمره
طيبة وطاهرة وعلى الفطرة
عيشه معاك بقالها زمان
مستحملاك ياعم وشيلاك
ومراعيه بيتك عيالك
وعيشي معاك علي قد الحال
ان كلت ملح كلته معاك
وان كلت فراخ تفضل مستنياك
لاتحط الذاد ولا تدوقه
الا لما تيجى اتعشيهم
واتلعبهم واضحكهم واترضيهم
مهى ديما طالبة رضاك
صوامة وقوامة وحافظه لكتاب الله
وصيناك فى مالك وعيالك
وفى خصورك وغيابك
وعلى الهوى عيش معاك
والحلوى والمره مقسماك
لعمرها جات فى يوم وقالت لك هات هات
هات زى المسوان
اللى بتربى الهتهات
وانت عشان كده بتحبها كمان
يبقى بقى مالك قاعد ليه زعلان
مخنوق مضايق قرفان
وإيدك على خدك سرحان
شايل هموم الدنيا فوق راسك
مالك إيه إللى جرالك بس
الفلوس ملعون ابو الفلوس
بتروح وتيجى بالك عاملة
زى إيه الفلوس عامله زى الدبان الازرق
لا بتتلم ولا بتيجى الا على اللى مش نظيف
وكمان اللى مش تمام
وانت نظيف وعال العال
وزى الفل كمان
لعمرك وسخت إيديك
ولا دخلت جيبك لقمه حرام
ولا بتحب تأذى غيرك
عشان كده ربنا مباركلك فى صحتك
وعفيتك وفحيلك وعيالك ومراتك كمان
الكنز اللى انت مش عارف قمته
يبقى بقى بوس ايدك لتنين وش وظهر
واحمد ربنا عشان يديك كمان وكمان
وياما عطاك كتير كتير
نعم من غير حد ولا عد
اولها الايمان واخرها القناعة
يبقى بقى قاعد ليه زعلان
مهموم مضايق سرحان
وشايل الدنيا فوق راسك
زرعتها بطيخ طلعت خيار اياك
اوعاك تقولى الدنيا اوعاك
اياك اسمعك تجيب لي سرتها
دى خسيسة ووطيه وفانيه
ولا تساوى فردة جزمة قديمة
جيفة ومعفنه ورمه قزره
وبيجروا عليها الكلاب السعرانه
ترضى تكون زيهم
ان رضيت انت انا والله ما ارضهالك
يبقى بقى قوم فذ على حيلك
وشوف اللى وراك
دا عيالك مستنينك تقعد معاهم وتحكيلهم حوديت
وتديهم جرعت حنان
وسيبك بقى من التوها والسرهان

================

المتسابق رقم 144

الشاعر محمد بشير الاقصرى
الاسم محمد رمضان بشير ..
المحافظه الاقصر

كلنا ثوار
__________________
فينا اللي كان بالكلمة
واللى فتح صدرو للنار
بس ملعون أبوها ثورة
لو هتوصلنا للدمار
ملعون أبوها
وإللى خنوها
هما إللى خلونا بيها كفار
أرحموها
وأسندوها
وابدأو فيها العمار
مصر عالية
مصر غالية
بلاش تحرقوها بالنار
مصر مايلة
مصر شايلة
محتجاكم فى بداية المشوار
بلاش تخونوها
وتفتنوها
وادخلوها فى مليون حوار
مره فتنه طائفيه
ومره هات اللي ليه
كلنا فى حالة سعار
بالذمه دا مش يبقا عار
كلنا فى لحظه ثوار؟
ملعون أبوها ثوره
لو هتخلى البلد دمار
ملعون أبوها
واللى خنوها
واللى خلونا بيها كفار
أفهموها
وريحوها
يجرى إيه لو اتفهمنا بالحوار
انا بصراحه عقلى طار
هوا مين فيكم بيصنع القرار؟
ولا أطرار
اااااااااه لو فلت العيار
واتغيرت اشكلنا
واتقسم ما بينا الشعار
أسلاميه...علمانيه
ليبرالية...سكسونيه
وما خفي من الأسرار
عسكريه.....مدنيه
مهلبيه......سلطانيه
ارحمونى انا عقلى طار
وأفهمو يعنى إيه ثوار
ثوره تغير
مش ثوره تشربنا المرار
ملعون أبوها ثوره
لو هتوصلنا للدمار
وكلنا ثوار
================

المتسابق رقم 145
الشاعر حجازى يونس عمارى عبد الحميد
محافظة الاقصر

____________________
***********************
الكرسى .. خاص بالمسابقة
*****************
الكرسى ياما شال
مع انه مالوش حمّال
لكن مرغم يستحمل
يشيل كتير اندال
العقل ياناس نمل
والقلب ياخلق دمل
وكيف انا اتكمل ؟
اوعاك تقول بالمال
مين يقدر يتجمل
ويساعد الجمّال
برك الجمل يتأمل
لقى ع الكرسى ريال
مقطوع ما متصمل
واتخانقوا عليه العيال
وافيال ماشيالنا اميال
دبحوا الجمل البارك
من بعد ماعزمه انشال
ياد انت روح بارك
للى جاى كيال
كيله يفسد معارك
وثوره للأجيال
وياريته كان شارك
وساعد الجمًال
لكنه جاى متعلم
حربف كراسى نشال
والكرسى ياما شال
مع انه مالوش حمّال
من بين حموله جمل
بارك ولسه مازال
فى الكلاب بيحمل
والميزان اهو مال
صدقنا ماخلصت عبس
دخلنا فى المتزمل
يتأمل كده فى امال
يشبهوه بالصحابه
وساعات يقولوا بلال
كل اللى جاى بربابه
غنى عليه الاطلال
قالوا النبى جابوا
يقعد مرتاح بطّال
ويشحتنا الأعطال
الناس باست اعتابه
وجات ع الطبطابه
من يومنا فى احتلال
من يومنا فى احتلال
______________
================

المتسابق رقم 146
عمرو المحيميدى . محافظة بنى سويف

____________________ما بين اسمك
وبين رسمك
رسمتك لوحه يا بلادي

يشق النور
بصوت مكسور
ويفرش فرح مش عادي

واندهلك

تجيني بضيك الشفاف

واشتقلك

الاقي الروح هنا ما تخاف

على حيطانك

رجعت لقيت هناك ذكرى

وكام فكرى
وكام ورده
معاها زهر بستانك

على حيطانك

لقيت النيل هناك مرسوم
بين الكلمه اهات وهموم

وانا ماشي

لقيت ابنك بيندهلي

يسمعني غناوي زمان

وعشق مكان

هناك خدني مع الاحلام

يقولي نسيت

حلفت يمين ما انا ناسي
دا لحن الغنوه وناسي

وغنينا
كلام معسول على الضايعه
وكام كلمه
معاها احلامنا مش بايعه
وشوفنا هناك

على الكوبري خطى الايام

ونور شِباك
ياما اخدني لعشق وئام

لقيت صاحبي
سألني وقال

ليه الغيبه؟
ليه تنسى
هنا الطيبه؟؟

بكت لعيون
على كلمه نطقها وقال
نسيت موال
وكلام اتقال

مع الصحبه اللي عشناها
مع الضحكه اللي شوفناها

انا ما نسيت
انا فاكر كل ثانيه معاك
ومش ناسي
قصايد كنت اقولهالك
ف عشق هواك

انا بندم على الصحبه اللي يوم تاهت
ويوم ارجع لقيت ناس كتير باعت
لكن بلدي هتبقالي
هنا الموال

وكل قصايدي هكتبها
بعشق خيال

وهرجع اشرب هنا حبي
مع القلب اللي عاش الحال

ماليش غيرك يا حضن الليل
يا جرح عليل
هنا ساكن في غربه وطال
انا ليكِ
هكون موال

عمرو المحيميدي
================

المتسابق رقم 147
الشاعر/ عمرو رمضان سيد احمد
محافظة القاهرة
_________________
((انا اتنين))

انا اتنين
واحد بطبعي و التاني بقناع لابسني
واحد الخير فيه عادة و التاني في شره حابسني

واحد ضميره حي و التاني ضميره حجر
واحد لسه بيعافر و التاني خلاص فجر

واحد عبد ربه و التاني شيطانه غلبه
واحد مجرد شكل و التاني هو اللي حكمه

واجد ايمانه مليه و التاني قساوة الدنيا فيه
واحد نفسه بتلومه و التاني بيدفن اللوم
واحد من زمان نام و التاني فرجان ب النوم

-انت مين ؟!
-انا اللي حاميك من ناسك
-بس انا الاصل !!
-بقيت صورة و بقيت انا اساسك
-انا لسه صاحي
-انت صاحي بس انا سايئك
-مش هقبل
-ما خلاص قبلت و غصب عنك

ماتحاولش انت خلاص بئيت عبدي
-انا عبد ربي و هرجع ليا تاني نفسي
-ربك هو اللي سلط الناس عليك ولا نسيت !!
-ربي مبيسلطش عبد علي صالح انا اللي فيوم سهيت

-بتدافع عنهم ؟!! مش فاكر طيبتك افتكروها ايه ؟!
-فاكر ..بس ربي فوق و الظالم قادر عليه

-يابني ديه مفرمة و انت مش أدها
-المؤمن مبيتفرمش.. نفسي هتغير نفسها

-بس انا الحاكم دلوقتي
-و انا فوئت و جه وقتي

- انت خلاص بقيت مدبوح
-لأ.. انا لسه فيا الروح

واسمع الكلام ده ليك

الحرب بدأت بيني و بينك
يا انتصر .. ياأكون انا اسيرك

البيت بيتي و زيارتك مش محبوبة
نفسي هتفوق بعد ما كانت مغلوبة

مش هئبل تكون الامر و الناهي و الطايع انا
مش هقبل تكون انت اعايش و انا مدفون ب الحيا

مش هئبل اكون غنم و انت الراعي
مش هئبل اكون فرس و في ايدك اللجام بتاعي

هكتم صوتك و ضميري هيئومني
الطبع غلاب .. مش انت اللي هتحكومني

تحدي النفس صغب بس انا قد التحدي
هحاول .. و واثق من مساعدة ربي

» المربعات الأرابيسك المعشقة . هنا مدرسة لتعليم لون جديد من ألوان الابداعات العامية المصرية . اسسها ويشرف عليها . الشاعر محمد فتحى رئيس رابطة شعراء العامية المصرية
» تنافس فى حب رابطة شعراء العامية المصرية . لمجموعة شعراء
» فى حب رابطة شعراء العامية المصرية
» فى حب رابطة شعراء العامية المصرية الكبرى
» اهداء الى رابطة شعراء العامية المصرية