مسابقة الشعر العامى من 15 فبراير الى 28 فبراير 2013 . احدى مسابقات رابطة شعراء العامية المصرية

المتسابق رقم 99
الاسم / حمدى النجار علي
ــــ اسم الشهرة ـــ حمدي الشريف ـ
محافظة / قنا

!!!ــــ{ احاسيس مختلطة }ــــ!!!
*********************
المشاعر بينا شاعت ..
اختلطت الاحاسيس ,,,
وجـــــــــوانا تاهـــــت ..
وال كــــان امبـــــارح ...
شىء واضح وثابـــت ..
اصـــبح النـــــــهاردة ...
من غير ملامح وباهت ..
ما احناش عارفين مين :
القــــــلوب ال اشــــترت ,,
وميــــــن ال باعــــــت ...؟
ما هو نفس الوجـوه والنظرات..
والعيون بتبص في كل الاتجاهات ..
لكن عدت ما شــــــافت ...
بياض من سواد من رمــاد ,,,
واللمحه في كل ناحيه ضاعت ..
العقول راح منها الانتباه والثبات ..
والعبىء بقي علينا مقرارات ..
النفوس من كتر الآآآآهات ...
بتلهث ورا الايام والساعات ,,,
وانفاسها تعبت وجاعــــــت ...
بعد الخطاوي ما اتقدمت مسافات ,,
والسكه بقت طريق ماشي ,,
من غير عثــرات ولا هـــزات ...
والحلم عــــدي وفـــــــات ...
رجعنا تاني خطوات وخطوات ..
الدمعة الواحدة ولدت بكي ودمعات ,,
النفس ماشي يادوب من غير دقات ..
والنبض عايش لحظات مخاض ...
الذكريات مجرد خيــــــــالات ...
يبقي لسه الانفـــــــــاس ...
عــــــايشه ولا راحـــــــت ...
مع الصـــمت والســـــــكات ...!
...........................................
اللمحه عدت ما بانــــت ...
والعيون فاقدة النظرات واللفتات..
ما احناش شايفين مين :
من غير ما يبدي ندم وانين ,,
مر عــ الجروح وفــــــات ,,,
ومين ال مشي لحاله وفاتنا ..
من غير سؤلات ولا جوابات ..
ومين ال مصمم علينا ,,,
وجوانا باقي صامد وبات ...؟
ومين ال قبل ما علينا يفوت ..
صحي فينا شجن الذكريات ,,
وهز جوانا القبور و الاموات ,,
وجابلنا المـــوت والرفـــات ..
ياتري وصلنا ولا لسه الاوقات ..
معاندانا والشروق أشعاعات ..
غايبه ورا الضباب و الغيـمات ,,
والانفاس رايــحه ما جــايه ..
مع الرعشات و الصدمـــات ..
ال قـــدامنا دي حقــــيقة ,,,
وشىء واضح وثابـــــــت ,,,
ولا دي اوهام وآشــاعات ...؟
وبكرة نفوق على كل شىء ..
حوالينا طق فرقع مااااااات ...
وما نلمس حتي الرفـات ..
الوجع جـــوانا طــــــرح ...
فروع جانحه من غير ثمرات ..
حتي ضلها راح مع الغيابات ..
بس نفوســـنا بتـــعاني ...
في صـــمت وســـــكات ...!!
.......................................
محتاجين للحب واليقين ..
فينا يسكن ويرسي ويبات ,,
يحتل فينا كل مكان وزمان ,,
ويكــون دليلنا للايمــــان ...
ويزيح من دروبنا الازامــات ..
ويصاحب كل الخطــــوات ..
النهاردة الشدايد نار ولفحات ..
بكرة تبقي رمــاد وفـــتات ..
وال في قلبه وروحه سواد ..
انفجر وفرقع طق ماااااااات ..
حتي ضله ضل الخــطي ,,,
وتاااه من السكه والعلامات ..
وراح زمانه من غير سلامات ..
اكيد بعد الصـبر والتضحيات ,,
وكتر الاحــلام و الأمنـيات ,,,
بعد عــذاب الانتــــظارات ...
تتولـــد معــــانا حاجـــات ..
تعيش وتحـــــيا وتطـــرح ..
زهـور و ثــمر وابتسـامات ..
والمشـــاعر والنبضـــات ...
ال غابت و ضاعت وتاهت ..
تترد مع الطيور و النسمات ..
الامل لازم ولابد يعووود ....
بعد الازي ما ضل وفـــات ...
ويحتل كل اللحظات والساعات ..
ويملا الارواح احلام ونفــحاااات ..
تعالوا ننســـــي ال فـــــــاااااات ,,,
ونفدي ال جاي بكل الانفاس و النبضات ..!!!
ــــــــــــــــــــــــــــــــــــــــــــــــــــــــ
الاسم / حمدى النجار علي ــــ اسم الشهرة ـــ حمدي الشريف ـ
محافظة / قنا ــــــــــــ اللقب / شاعر بلا حدود @

*******************

المتسابق رقم 100
فداء نعيم زيدان
فلسطينية / صيدا - لبنان

مش ليكي
&&&&&&&&

احترمي نفسك يا بت
دي الدنيا مش ليكي

ما كفاية تجرى تدوري
ع الفرح حواليكي

الفرح لو كان قاصد
كان دق بابك يوم

يبقى كده اتلمي
وارضي بالمقسوم

وان عزتي يوم تحلمي
ماتحلميش بيها

وحصالة الأحلام
ابقي بقى ارميها

وحاسبي لياخدها
شحات جعان عطشان

يشوفها يحسبها
كنز وضحكله زمان

وينكسر قلبه
وتزيد عليه أحزان

ويدعي لرب الكون
ما تشوفي فرح ف يوم

وتكمل معاكي يا بت
ناقصك ... معاليكي !!!

كفاياكي جري يا بت
دي الدنيا مش ليكي

*******************

المتسابق رقم 101
خالد عبدالفتاح مصيلحى
المحلة الكبري . محافظة الغربية

واتقابلنا فوق شط القنال
سنيوره حلوه أيه فى الجمال
قلت اخطبها قالوا دا شيئ محال
مهرها غالى وبعيد عن ايدك المنال
مش انت طالب ودها ؟
طيب
كلم اهلها ... وادفع مهرها
وخليك طويل البال
سالت مين اهلها
قالوا بمبوطيه من لحمها ودمها
فى العدوان الثلاثي وقفت
قدامهم وحدها
بلد الباله كلها رجاله
وبتعرف تحمى عرضها
ووقت الشده مافرطتش
ابدا فى ارضها
عرفت هى مين اللى انت بتحبها
بورسعيد اللى ولادها حموها
واندفنوا في بطنها
اللى كل مصري بيقول
انا ابنها واتولدت من صلبها
عرفت ان ممعكش ياشاطر مهرها
رجعت لشط القنال
ادرب الودع واعد حبات الرمال
واقول هنا وفى نفس المكان
ياما مات من الرجال ابطال
ساعتها بس اتمنيت اكون
شاعر او زجال
او حتى بتاع موال
عشان اكتب واحى ناس
شافوا من العذاب اهوال
عاشق انا لترابك وهعيش
على ارضك انا .... جوال
خالد عبدالفتاح مصيلحى المحلة الكبري غربية

*******************

المتسابق رقم 102
فداء نعيم زيدان
فلسطينية / صيدا - لبنان

مش ليكي
&&&&&&&&

احترمي نفسك يا بت
دي الدنيا مش ليكي

ما كفاية تجرى تدوري
ع الفرح حواليكي

الفرح لو كان قاصد
كان دق بابك يوم

يبقى كده اتلمي
وارضي بالمقسوم

وان عزتي يوم تحلمي
ماتحلميش بيها

وحصالة الأحلام
ابقي بقى ارميها

وحاسبي لياخدها
شحات جعان عطشان

يشوفها يحسبها
كنز وضحكله زمان

وينكسر قلبه
وتزيد عليه أحزان

ويدعي لرب الكون
ما تشوفي فرح ف يوم

وتكمل معاكي يا بت
ناقصك ... معاليكي !!!

كفاياكي جري يا بت
دي الدنيا مش ليكي
*******************

المتسابق رقم 103
احمد عبد الوهاب

Ahmed Abdelwahed
خاص بالمسابقة....
ــــــــــــــــــــــــــــــــــ
وياريت لمّا آجي ألقاكي !!!
ـــــــــــــــــــــــــــــ
وبلقاني ..
انا مكلبش في جواكي ..
وبلقاكي ..
شطوط للراحه في الغربه
وهلقاكي في يوم مرسي ..
لقلبي الشط والمرسي
ومن لمسه
أنا هانسي
أنا هانسي شقايا سنين
دا لو كان مين؟؟!!
ما يستحملش هجرانك
أكيد هايتوه..
ما انا المعتوه
وانا العابد في محرابك
وانا الواقف علي بابك
ونفسي في أي يوم أرسي
وانا هرسي
انا هرسي علي شطوطك ..
علي همسة حنان صوتك ..
ما انا المحتاج
أمرمغ وشي في ترابك
والاقي المرسي في شطوطك
وأغزل بكره بخيوطك
واحط الشيله عن كتفي
وأغسل قلبي جوّواكي
فلو جيتك ..
ماتكسفنيش ..!!!!
وياريت لمّا آجي ألقاكي ..!!!"
*******************

المتسابق رقم 104
بهاء الدين عبد الحكيم بدوي ..
مصري من القاهرة -
ومقيم بجدة بالمملكة العربية السعودية -

اسم القصيدة : ( بنت مصرية )
*^*^*^*^*^*^*^*^*

عجبي على بنت مصرية
سمرا بلون النيل ..

الرمش غزلاني لبلاب
سرح طرح مواويل ..

أما العيون دي حكاية
وبنظرة تشفي عليل ..

وياعيني ع الحاجب
طالل بيتعاجب ..

غار الهلال منه
ومانام الليل ..

والخد لون الورد
متزين بشامة حسن
يتبسـم تقيد قناديل ..

والأنف نبأة محندأة ومزوأة
إسم الله عليك ياجميل ..

والفم فراولتين دايبين حنين
من رقته سكر يدوب ويسيل

والشعر فِتَله حرير
اسود بلون الليـــل ..

والرقبة مرمر مصور
شامخ وجذع نخيل ..

والقد مياس ولميس
على ميل النسيم بيميل ..

لاتقول فينوس ولا بلقيس
دا حاجة مالها مثيل ..

أما الطباع بالحيا متزينة
والجدعنة طبع فيها اصيل ..

وقت الشدايد شديدة
فارس وراكب خيــل ..

واللي يهينيهـا ياويله
راح يشوف الويـــل ..

وساعة الحب بحلالهـا
عاشقة ومالها مثيل ..

---------------------------

*******************

المتسابق رقم 105
محمد صبحى عمران
محافظة كفر الشيخ

خدعتنى
خدعتنى وقالت لى سلاما
دمرتنى وحطمت فى أحلاما
وبكلماتى أهديتها ألحانا وأنغاما
حتى الحروف شكلتها لها ألوانا
والحبر سال وجفت به الأقلاما
أعطيتها ودا وساقيتها حبا وحنانا
ورسمتها بصورة الأميرات عنوانا
ووهبتها العمر بين يديها كان خدما
ولكن خدعتنى وقالت سلاما سلاما
خدعتنى وهدمت م بداخلى من أحلاما
هيهات ياقلبى ويا قلمى ياكاتب الأحزان
خدعتنى امرأة بلا قلب بهيكل انسانا
ياويلتى ويا حسرتى على حبى الذى كانا
ويا فرحتا حسادى وشماتت الأعداءا
يا خادعتى هل تعلمى بجروح الأحبابا
هل تعلمى بكل ماتركتية لى من أحزانا
اذهبى الى ماشئتى فأنت وهم بلا عنوانا
ارحلى واعلمى أننى صخر قوى البنايانا
وأن عزيمتى فى الله لا يقدر عليها انسانا
وبينى وبينك الحياة ولا يهمنى انسن ولا جانا
وسوف أقف بكيانى متحدينا خداع الأياما
وحين تعلمين بقوتى وفرحت الأياما
فلا تعودى فليس لكى فى قلبى مكانا أو عنوانا
بقلم :محمد صبحى عمران
كفر الشبخ

*******************

المتسابق رقم 106
الشاعر احمد فخري \محافظة اسوان

قصيدة ( حد السكين )
بعد ما تعبه ضمه فزقيه صدره لصور اصحابه
اللي فاتوه
متعلق علي باب كابوت
خايف ليحاسب يتحاسب
علي كاس شربوه
اصحابه في قعدة قهوه
وبعديها سبوه
بعد خسارته في ورق البخت
وعطامه ربت صراصير
وأكلت عكازه الايام
من مد الخطوه في تراب السكه اللي حافظها
وحد السكين بيحز رقبته
تعبان من تقل الشيلة
وندرة كلمة حق يتندغ بيها
في زمن الطراطير
فجاة
شق سكون روحه صوت بنت بتنادي باسمه
فك زراير احلامه
وكوم روحه علي اقرب دكه
مفتح عينه على الضحكه
اللى ترد الروح
اكمنه ارتاح

*******************

المتسابق رقم 107
الشاعر محمد أحمد إمام
أسم الشهره:أبو عمر
العنوان: محافظة الجيزه المدينه:أطفيح

أسم القصيده:الأنتظار.......
علي أضواء عمدان النور كنت باقف مستني الفجر اللي يضيع ف ظلام الليل علشان اشوف بعيوني الشمس جات الشمس معاها غيوم شيلا دموع تمالالي البحر والشوك شجره بتطرح صبر ودمي بينزف ع الأسفلت وحوادث بتروح وبتيجي من عربيه لقطر العمر وطريقنا قدامه مخاطر عايزين نرسى فيوم علي شط علشان نعبر م الأحزان ونمهد لشروق ايامنا ونسطر ف حياتنا الحلم علشان يبقى أمل وسلام نقلب صفحه كتبها الظلم نبدأ نزرع حب بجد علشان يطرح لينا محبه بعد ما عشنا سنين ف المر وانا واقف هنا مستني قدامي شجرة أحلام أننا نرجع زي زمان ومعنا كرامة الأنسان...

*******************

المتسابق رقم 108
الاسم/عمرو عبدالله محمد ابراهيم المحيميدي
محافظة بني سويف/مركز/ببا

اسم القصيده/قطر الموت ......توت توت..نادى الموت

قطر وباص..فات وخلاص

مين انسان..عاش اخلاص

توت توت..كتر الصوت

مين بينادي..مين بيموت

طفل بريئ..مات ف طريق

مين هيكون..ليه تاني صديق

ام بتبكي..واب بيصرخ

وقطر بيجري..فات من بدري

حلق حوش...جُبن وحوش

رَخص دم الابن المصري

فين من بدري

توت توت...صوت مكبوت

عايز يصرخ ...بعلوا الصوت

مين القاتل..مين مظلوم

مين يا حكومه..عليه هلوم

سواق باص..وحارس نايم

دعس الناس..مين ليها دايم

مين هيحل الواجب البايت

حصه نصوص في جرحي الفايت

وارفع علم الطفل وكبر

مصر دموعها زايده بتكتر

مين هيداوي جرح أليم

ياه ع الجرح لما يعلم

بيقتل آها عايزه كلام

شوفت ازاي الجرح معلم

لما الطفل يموت بعلام

هو شهيد صبح صبحه

وراح الجنه بدمه وحبه

اصل الجنه ما يدخلهاش

غير طالب علم دمه بلاش

ودع امه وودع بلده

الله يجازي ظالم جلده

وراح للجنه وقلمه معاه

اصل الجنه بتتمناه

وطول ما الجنه بنحلم بيها

لازم ضمايرنا نصفيها

لاجل ما تبقى الجنه حياه

عمرو المحيميدي

*******************

المتسابق رقم 109
هلال ابراهيم احمد ... محافظه الجيزه

السيكا شيكا بيكا

أنا مش ح أكتب عن الحب والغرام
ولا اللحمه بقى سعرها دلوقتى كام
أنا ح أكتب عن الحب وعن الســلام
ودى رساله فلسطينى لبلد العم سام
دارس مزيكا السيكا شيكا بيكا
*********************
السيكا شيكا بيكا
سياسه نهاوند وسيكا
إفهم الله يخليكا
السيكا شيكا بيكا
سلام مربع أجدع سلام
قالوا بيعوا مقلناش بكام
دول ديابه دول لئام
دى سياسه الناسه كوناسه
مدوا إيديهم وكلها نجاسه
إفهم بقى يا ابن المحتاسه
دى سياسه الناسه كوناسه
والسيكا شيكا يا أمريكا
أنا أديب ديب الأدباتى
عمال أصرخ وأهاتى
وفيه كتير زى حالاتى
قرد وسارح بقراداتى
يعمل عجين الفلاحه
ما يعرفشى فين الراحه
دى سياسه ودباحه
السيكا شيكا بيكا
دى سياسه النوسه كونوسه
بقينا فى إيديهم زى العروسه
هما اللى يحركونا يا ابن المفعوصه
بشويه دولارات او حتى ببوسه
دى سياسه النوسه كونوسه
أه يا عروبه مغصوبه
إتحكم فيكى ابن المضروبه
ومين راح يحميكى
ولحد امتى راح نطاطى
لابن الغانيه والفلاتى
يحكموا قوتى وذاتى
أنا راح أقول ولا أخافشى
لازم نصحى ما ننامشى
وطنى وإزاى امشى
بسياسه النوسه كونوسه
والشيكا بيكا
تفهم أخيكا
شغل البولتيكا
ألأونا ألأدونا
عملوا مزاد وباعونا
بقرش ممسوح ومصدى
راح تطلب ودى
وتعالوا نشوف
حالنا الننا كوننا
وإيه اللى جرا لنا
ونتيناهو ليه بيبهدلنا
عرب ومسلمين يا إخوانا
عشمان صاحبنا يخش الجنه
يا خى هأوأو يا إخوانا
يلا يا ويكا ندرس مزيكا
السيكا شيكا بيكا
وسلامى ليكا
ولأبيكا وأخيكا
وسلام مربع لماما أمريكا
وسيكا شيكا بيكا
يا ابنى دى امريكا

*******************

المتسابق رقم 110
محمد احمد المسيري السن ثلاثون عاما
المحافظة الغربية

أرجو الاشتراك في المسابقه
القصيدة وشم العلم
الحلم ملفوف بالكفن
في تابوت ومرفوع ع الكتوف
مرسومه دمعة دفنته
والخلق مصفوفة صفوف
قالو عليه انه اتقتل
علشان بطل
لكني لامح نظرته قبل الفراق
قالت كلام بره الكتاب
قالت لغة مافهمها الا اللي حلم
وحلمه تايه في الضباب
واشم علم
مستني ايه من اللي اتظلم
مستكتر الاهة عليه
ضاعت ملامح سكته
لما فقد صورة عينيه
مستني ايه
حامل تابوت
والضحكة قبل الفجر موت
والفجر مستعصي عليه
انه يسكن في السكوت
علشان كده
رافض يكون بالشكل ده
قرر ينام له الف عام
يمكن يكون جوه الزحام اصل المرض
لما الغرض يقتل نفوس
والحلم يقلب ميت كابوس
يبقي الكفن حلال عليه
واللي بايعين القضيه مشتاقين للحلم ليه
عل القلوب واشمين كفن
والسواد وقت الحداد
ده اصله نابع من القلوب
لا يوم شافوه ولا سلمو علي اللي راح
ده كان غريب عن موطنه لما سادو عل البراح
هو قال كل الكلام
فمتحلموش اني اصدق كدبكم
وأكدب الحلم اللي كان
شايفه متواري بتراب
حبة تراب من كدبكم حبة تراب من جهلكم
وحبة تراب من عضم طاهر قبلكم
ضحي بحياته
واللي حصل
انه انكسر بعد مماته
لما رأي سر خلوده
جاره مرمي في مقبرة
مدفون معاه وشم العلم
بقلم الشاعر/ محمد المسيري

*******************

المتسابق رقم 111
شاعر المراكبيه
اشرف محمد على / الاسماعيليه

قصيده ( كرات الدم الحمراء )

نازل ف ايدى العلم
علشان احيى فريق
راجع بدمعه ندم
وف بحر دمى غريق
انا اللى مجنى عليه
بقيت انا الجانى
واللى قتل ف الناس
مظلوم كمان وبرئ
******
عملت ايه علشان اموت؟
لا فى ايدى شلت سلاح
ولا سنجه ولا نبوت
علمى اللى فوق رفرف
حس انى هاستشهد
نزلت دموع السما
هتفت بعلو الصوت

هتفت كفايه حرام
بعتونى ليه برخيص
روحو اسألو الاسلام
الحكم مش توريس
مش قتل
نهب
وظلم
ولا دبح ضحكه ف حلم
ولا عشان المال
الدم يبقى رخيص

ع الخد نزل المطر
يجرف بحور الدم
من صوت سنابل القمح
نزلت دموع الام
صرخه
وشهقه موت
صوت عالى جوه سكوت
جى يهتف اتوحدو
ولا الهتاف بقى جرم

جمهور ومتجمهر
على بعضه يتكبر
خلى الرصيف يبكى
وسؤاله يتكرر
امتى ها تتجمعو
على صوت امام كبر

ايه زنب طفل برئ
نازل وكان فرحان
وف ايدى الف صديق
متقيدين ب لجام
سأل السؤال والقصد
رافض ف يوم يتهد
ايه معنى كلمه وطن؟؟
لما الطن يتهان!!

ايه معنى حريه ؟؟
ووطنا اهو بينهار
بين قتل
بين تخريب
ويقولو استقرار!!
حتى نار الفتنا
مشيت فى سكتنا
اذاى يقولو شهيد؟؟
والجنه صبحت نار !!

ليه اى حد يموت
على طول يقولو شهيد ؟؟
وزمان قالولى الموت
لشهيد دا اجمل عيد
اذاى عيون الفجر
الصبح تبكى ندا ؟؟
واذاى غصونا الخضر
تدبل ف بورسعيد ؟؟

احطرت مين الصح؟
مين اللى كان غلطان ؟
مين اللى ماسك علم ؟
مين كان خسيس وجبان ؟
مين اللى وقت الفرح
فجر قنابل جرح ؟؟
مين اللى خان الوطن ؟؟
والله ما انسان !!

دا اكيد مدقش الطمى
ومكلش من ارضها
مصر اللى رب الكون
فى كتابه قال عنها
فيها سلام وامان
ورسوله قال شجعان
يبقى اللى خان الوطن
عمره م كان منها..

عمره م كان م الشعب
اللى ارتوى م النيل
عمره م شاف الحب
معدن بلدنا اصيل
المصرى مهما يكون
بلده عليه م تهون
لو يوم وعد يوفى
بالوعد ذى الخيل

بلدى خلاص صبحت
مركب وفارده شراع
عرفت طريقها منين
واتحملت اوجاع
سايره كما الابطال
عدت بحور وجبال
علشان تقول للظلم
الفين سلام
ووداع.....
************
الشاعر / اشرف محمد على
الاسماعيليه

*******************

المتسابق رقم 112
عبدالهادى حامد الشعراوى
المحلة الكبرى محافظة الغربية

(عشقك موت )
بحبك موت
وعشقك موت
وقربك موت
وبعدك موت
دا كلك موت
............ وانا والقلب بنموت
فى حبك موت
بموت فيك وف عيونك
وسحر الرمش وجفونك
وطرح الورد على خدك
دا لون الفل من لونك
بحبك موت
بموت فيك ياغنيه
يافرحة قلبى من جوة
ياضى فى العيون سارح
بحبك وانت مش ليه
بحبك موت
بموت فيك يامولاتى
ويشهد شوقى وآهاتى انك كل احلامى
وحبى الماضى والاتى
بحبك موت
بموت فيك وانا المجنون
ومهما بعدت برده هكون
هشوفك فرحة مرسومة
تزين السما والكون
بحبك موت
بموت فيك يأغلى الناس
ياطعم الحلو جوه الكاس
كفايه على بعيونى
اشوفك فى عيون الناس
بحبك موت
بموت فيك وفى الخفة
بتوب الطهر والعفة
ويشهد ربى على حبى
بحبك وانت فى اللفة
بحبك موت
بحبك موت ياسهراية
ياحرف العشق يا آية
يطيب الجرح لو شافك
خيال حتى فى مراية
بحبك موت
بموت فيك ياسلطانه
دا حبك زارعه مولانا
بيطرح كل يوم احاسيس
تذيد العشق جوانه
بحبك موت
بموت فيك ايابلسم
ياطهر من مياه زمزم
يكفى ان فى عيونك
براءة وصفاء مريم
بحبك موت
بموت فيك وانا عارف
يان القلب مش لايف
كفاية تبقى احلامى
وانك ضىء به شايف
بحبك موت
بموت فيك ايا سمرا
يالون الطينة والحمرا
عجينة قلبى من طينك
تعيشى بطينتك الحرة
بحبك موت
بموت فيك وعشقك موت
مهما العمر رح هيفوت
هيفضل عشقى جوايا
حتى لما بعد ماموت
............... بحبك موت
...............................
الشاعر القروى الساخر
عبدالهادى الشعراوى
*******************

المتسابق رقم 113
الاسم : عزت عليوة عبد المنعم - القاهرة
باحث مساعد بالمعهد القومى للقياس والمعايرة

يرجى ابدال القاف جيم وكسر واو ال "ولد" لزوم لهجة أهل الصعيد

مهداة لكل جندى وضابط شريف رفض أن يصوب سلاحه على أخيه
من مذكرات 25 يناير 2011
…………………………………………….
أنا ياما بقالى زمان بين العسكر .. أنا واحد من العسكر
ومستنظر .. أخد تصريح
اجيلك ياما ابوس يدك ويد ابويا
وكيف ابويا وكيف الناس وكيف الأرض والاخضر
أنا واقف هنا ياما بقالى يومين على بطنى
وضد عناصر التخريب أذود الشر عن وطنى
قام الباشا يكلمنا.. يفهمنا
عن القلة اللى مندسة
بكل الجبن والخسة
شباب النت والفيسبوك .. شباب فاضى
خطرهم ياما مش عادى
قالوا لنا كتير عنيهم
قالولنا مش بنى جلدى ولا وطنى .. ولون الوش مش لونى
وأولها يقولوا عيش وحرية .. وسلمية وسلمية ..
وخلف الضهر بسلاحه يغفلنى ويقتلنى
وطايح فى الملا يكسر
يصير الأمن متكدر
يصير الباشا متكدر
فدا الباشا أنا ياما وكل الشعب والعسكر
@@@@@@@@@@@@@@@
ويوم الوعد قالوا الأعداء بيتوضوا وح يصلوا
يرد سعادة الباشا
خدوا بالكم مافيش شيطان بيتوضا
لقيت الولد مش شياطين
خدتنى الحيرة يامايا
بأمر الباشا والميرى
راح اضرب اخويا وبيدى
اجرح وردنا البلدى
وكان الذنب والتهمة .. تظاهر سلمى مش اكتر
@@@@@@@@@@@@@@@@
وف الميدان وساعة الجد
دنا منى وخبرته
دانا منك ياولد امى
ولونك مش بعيد عنى
أنا نازل أصحى الشمس من نومها
وازيل الغمة عن بلدى وتبقى عفية من يومها
رميت درعى وعصيانى .. خلاص أعلنت عصيانى
عشان الورد والياسمين .. ولجل بلادى ترجع زين
كلام الباشا يتكسر
@@@@@@@@@@@@@@@@
وفات ساعة .. وصاروا كتير .. ولا الألافات
وخوفهم مات
وصدر الأمر
من الباشا إلى الباشوات
رصاصة غدر
عشان يسكت أدان الفجر
لكنه ياما لم يسكت
أدان الفجر كان أعلى
بدم الشهدا متعطر

*******************

المتسابق رقم 114
بـكري علي خليفة / الأسماعيلية

قصيدتي للمسابقة

أسكـت صوتـك
ــــــــــــ
أسكت صوتك الجبان

ما عاد للخوف مكان

فشعبك فاقت غفلته

وانتفضت كل الأديان

حررنا الأرض من ظلمك

وارتعشت يد الطغيان

أرفع رأسك يا مصرى

للعالم ألقى ببيان

انطق بالحق وعلمه

فالدهر وحيداً ظمآن

فرجالاً نحن وأشباحاً

وقلوباً نار وبركان

نهاب الحق ونأخذه

يجمعنا قلب الإيمان

فالقمر عادت بسمته

وشمسك فى كل مكان

محبوساً أنت يا ظالم

ومحاصر بأربع حيطان

العالم يشهد ثورتنا

والحق عليك سجان

وستلقى حتفك يا مبارك

وسيأكل جسدك غربان

ظللت تلهو بلقمتنا

وتدوس علينا كفئران

ثلاثون عاماً تعصرنا

تضربنا بسوطاً ونيران

صوتنا لك إجباراً

فسيعلوا الحق كقرآن

زقنا آلاماً من حكمك

لم نشعر يوماً بأمان

ثورتنا ستبقى شامخة

محفورة عبر الأزمان

شهداءً ضحوا بأنفسهم

وبأمرك قتل الشجعان

سيظل شعبك يحتقرك

لأنك فى الحق جبان

ستظل حقيراً يا مبارك

ورجالك طى النسيان

لوثت مصر بيديك

للظلم أنت عنوان

فسنين عشناها بفقراً

والحزن بكل الأركان

يا مبارك أنت رجل ظالم

وستقتل حتماً فى ميدان

اليوم يحاكمك شعبك

وستبقى فريسة سجان

ملعوناً أنت وحاشيتك

وامتلأ ببطشك أزمان

تتوسل للعالم أجمع

فى السر لتهرب يا جبان

دعوات الشعب ستقتلك

وسيملأ دمك وديان

وسيبقى تاريخك الأسود

محفوراً فوق الجدران

ويصير العار على رأسك

وتزف عريس الطغيان

وسنرسم بالحبر الأسود

صورتك أضخم ثعبان

وسيرحل عهدك للأبد

فتصير بقايا إنسان

ـــــــــــــــــــــ
بـكري علي خليفة / الأسماعيلية

*******************

المتسابق رقم 115
شوقيه كامل صليب .. محافظة المنيا

ماتتنسيش
............
على قد ما قلبك شال
من هم الدنيا اهات
وتمرمغ توبك ذل
ولجموكى سنين سكات
لسه فيكى روح عفيه
وايد قويه
تضربى الخوف بدرعاتك
لسه شابة مستحييه
تعشقك كل العيون
والكون بيرسم ضحكتك
فى عيون ايزيس
والنيل يلملم دمعتك
والليل ونيس
ماتتنسيش
فى لمة العيد الكبير
وحكاوى جدة تملا قلبك بالدعا
تلفلفك فى شال حرير
مرشوش دفا
فى نسمه بتعدى على قلبك يطيب
وزقزقة عصفور بيتعلم يطير
ماتتنسيش
يا عروسة طالعة محنيه كفوفك هنا
وبتغزلى من فرحة احلامك غنا
زغروده مبدوره على السكك
قطرات ندى
غالى الضنا
واغلى من نور العيون
لو شعره من راسه تضيع
يتهز قلبك غضب
ويصبح نسيم روحك جنون
يا معدية كل المحن
صبر السنين
مزروع على توبك شجن
ماتتنسيش
دانتى باقية والزمن
بيعبى من حبك حكاوى
ويشهد على سنين انتصار
فامتسمحيش للغدر يمحى غنوتك
واحلام صباكى
هاتعيشى لينا للمدى
و للمدى روحنا فداكى
جايز ف يوم
ترجعى احسن ما كنتى
وف سكتك
تفرش غناوى

*******************

المتسابق رقم 116
هـــاني أحمد مكاوي - محافظة الجيزة

وباحـلـــم يـــوم أشـــوف النــــــور !!!
==============****===========
لـــــــــــــ ) هــــاني مكــــاوي (

أنا عايش ف بيت مهجور
ف ليل غامق ماشافش النور
باقوم وبانام بدون أحلام
كما الساقية يادوب بتدور !!!

أنا فرحان لكن مقهور !!
... أنا غير اللى عاش ف الدور
أنا المسجون ورا الأيام
أنا الساحر أنا المسحور

باعيش بالروح بدون ماتروح
واعيش مرتاح وانا المجروح !!
واقوم واصحى ولما باقوم
باكون عايش وانا المدبوح !!

أنا باحلم بصبح جديد
بإيد ما يكونش فيها حديد
ونفسي بس أكون إنسان
وحلمي إني أبات مستـــــور !!

أنا مابقيتش غير سكة
وكل الكل داس فيها
أنا لو حد يسألني
هاقول فيها وهاخفيها

أنا المجهول !!
أنا المعتوه أنا المعقول !!
أنا اللى باشيل على كتافي
وفى الآخر بالاقي نفسي أنا المنقول !!

أنا اللى قتلت أفراحي
بسيف الهم كان صاحى
وف الآخر بابص لاقيتني
أنا المقتول !!

ولما باموت ..
يغيب اللى يشيعنى
بيستكتر بدمعة عين يودعني !!
كإني حد مش معني !!
وإيه يعني ..
أغيب عنهم ..
مانا طول عمري مش منهم
أنا ذى اما اكون مبتور !!

أنا عايش لكني باموت !!
معادش فية أصلاً صوت ..
أنا مليت ماعادش الجرح يوجعني !!
ومين يا صوتي يسمعني ؟؟؟

والف وادور !!!
ولقمة تخليني أحنى
ف ضهري شهور
أمد إدية للإيد اللى ما تسواش
ودمع عيوني يسبقنى وأقوله بلاش !!
يرد الدمع ويقولي بلاها غرور !!

أنا اللى هربت م الضلمة
عشان أرتاح ...
أنا اللى فضلت باشتمنى
وانا لنفسي باكون مداح !!
باصبرني وباعيش ف الدور
وباحلم يوم أشوف النور !!

أنا اللى هربت م الضلمة
وناس ظالمة
باشد الحلم من بينهم
وباحلم يوم أشوف النور !!
وباحلم يوم أشوف النوووووووووور !!
====================

*******************

المتسابق رقم 117
لمياء عصام عبد الحميد
اسكندريه

عارف يعني ايه؟؟
:::::::::::::::::::::::
عارف يعني ايه تحب باخلاص و في الاخر تتصدم
تيجي علي كرامتك مره و اتنين و متفكرش في الندم
تصبر و تتحمل و انت متاكد ان مافيش امل
تقسي علي قلبك وتموت كل دقيقه من الالم
عارف يعني ايه؟؟
يبكي قلبك من غير دموع
تضحك للناس و جواك موجوع
كل احلامك بعده في لحظه تروح
لكن اشتياقك و حنينك ليه مش بيروح
عارف يعني ايه؟؟
الحزن يقسمك نصين و يكسرك
الخوف من البعد و الوحده يقتلك
تاخد القرارتقول هابعد خلاص
و قبل ما تخلص الكلمه تلاقيه يوحشك
عارف يعني ايه ؟؟
اثق فيك من غير حدود
وامشي معاك في طريق مسدود
عمري ما اشك لحظه انك تبيع او تخون
يا ريتني قبل ما عرفت كنت اموت
عارف يعني ايه؟؟
تظلمني وانا اللي اسامحك
تجرحي وانا اللي اصالحك
تهجرني و انا اللي ارجعلك
عارف يعني ايه ؟؟
مهما حصلي منك
أحبك
و مقدرش ابعد عنك

بقلمي .. لمياء عصام عبد الحميد
اسكندريه

*******************

المتسابق رقم 118
شريف عادل السيد ........الجيزة .......
01123377332

فلسطين

بكيت وعينيه جفت من الدموع

بكيت ومفيش امل فى الرجوع

وسط المعارك والقنابل والنيران

اطفال بريئه بيموتوا اطفال صغار

ايه ذنبهم عملوا ايه

ليه حظهم يتالموا يتحملوا

نهاية زمن مليان دمار .

وسط كتيبة الاعدام

وسط دايرة الانتقام

.علت صوت المدافع

وهرب ضو ء النهار

ماتت جموع البشر ..... ماتت الوف الناس

فى لحظة خطر ........... دق القدر وموت الاحساس

اتحطمت احلامهم ....... ادمرت امانيهم

عاش الالم فى بالهم ...... والحزن كان ماليهم

لازم نعيش من اجلهم ........ لازم نحرر ارضهم

لازم نجاهد ذيهم ............ وسط طلقات النيران

لازم نغير بايدينا............. عمر الدموع ما بتغير

شى اكيد صعب علينا .............. نحلم وشعب بيدمر

صوت الضمير اندبح ................ صوت الحقيقة مات

ناس بترقص من الفرح ................ وناس بترقص من الاهات

بلد الجماجم والقبور............. بلد الجراح من غير حدود

بلد بيحكمها اليهود ............. تحت اسم دوله دولة فلسطينية

يا فلسطين ... يا فلسطين ..... يا فلسطين

شريف عادل السيد ........الجيزة .......01123377332

*******************

المتسابق رقم 119
ناصر صلاح عبد العاطى
محافظة القاهرة

إبعتوا لىّ الجزمه ديه
من أغاني حرفوش المجذوب00
جزمه ماركة إف بخ
مش مهم جات في وشك وللا لا
المهم جات فى قلبك
طخ00طخ
المهم 00 كسّرت قفص الإزار
اللي حاطط فيه برودك00كبريائك
المهم صورتك ايه
ابيض اسود00اسود اسود
مش فى عين اللى شالوك فوق الكتاف
اللي خافوا وألفوا الشعر فى ريائك
قبل ما فى عيون جنودك
صورتك الألوان دى راحت
جازمة العفريت دى خلت
ناس كتير م الغفله فاقت
المهم ان انكسر انفك غرورك
المهم لسه فينا برضه راجل
لا 00 وفعله دوا يولد ألف راجل
بالجزم أو بالمراجل
المهم ان انت فاكر
لما وطيت انفلت 00 من سهامها
بُص تانى الصوره واضحه
هى ركبت فوق كتافك من غضبها
هى قطمت ضهر اهلك
هى مارضتش تمسك
هى اطهر 00 هى خافت من نجاستك
المهم رجعت اكتب
بعد صمتى من سنين
المهم الجزمه ديه
رجعت لىّ الحنين
ابعتوا لى الجزمه ديه
ابعتوا لى الجزمه ابوسها
ابعتوا لى الجزمه لسه
فى مهمه ليها عندى
ديل لبوش لازم يدوقها

*******************

المتسابق رقم 120
إبراهيم عبد الحميد محمد عبد العال دياب
من ديوان ( يا مصرنا )
القاهرة فى 19/2/2013

مسابقة الشعر العامى
قصيدة
كلها محصلة بعـضها

يالى شاغل بالك ، سيبها هتمشى لوحدها
الدنيا مش دايمة لك ، ولا دايمة لنفسها
هنحزن ليه ونزعل ونوجع قلبنا وقلبها
يمين شمال ، شرقها غربها ، وشها زى ضهرها
ييجوا فلول أو ثوار أو إخوان ، كلها محصلة بعضها
الشعب الغلبان تعبان ، والناس والخلق فاض بها
أقولكم أرحل وأسيبها ، مبقتش مصر اللى عرفتها
لا كنت عايز ثورة ، ولا فوضى ، ولا حاجة منها
كنت عايز أمان ولقمة عيش ، وأهى ماشيبة لوحدها
عايزين حرية إشربوا ، دبحتوها وشربتوا دمها
فوضى مش حرية ، دولة مش عادية ، هدمها جهلها
أه كان فى فساد ، بس كانت مصر لسة فى مجدها
المجد راح وتاريخها راح وحاضرها راح ، وبكرة إيه يحصل لها
أكتر من اللى حصل ، أستر يارب على ناسها وأهلها
مش تشاؤم لأ ، لكن ضباب وغيوم ، مش شايف حاجة منها
دى مش مصر لأ ، ولا دول ناسها ولا دول أهلها
بقت وشوش تحوش الأمل من بكرة إللى جى لها
بقت خفافيش ضلام ، وكلام لا له معنى ولا يشفع لها
ولا حتى حد حاسس بيها ، ولا حد عايز يسمع لها
بتنادى يا ولادى ، الرحمة حلوة ، وإحنا نقسى ونذلها
مش قلت لكم ، مش فارقة ، فلولها زى ثوارها زى إخوانها
كلها محصلة بعضها ، وعجبى عليكى يا بلدى أه منها وأهين لها

إبراهيم عبد الحميد محمد عبد العال دياب
من ديوان ( يا مصرنا )
القاهرة فى 19/2/2013
*******************

المتسابق رقم 121
الشاعر الشاب
أحمد دفاع حسانين عرفات
محافظة الشرقية ... مركز كفر صقر

#..........<< زمن العجب >>.............#
#..............<<<>>>>..................#

يـا خـلـق زمـن الـعـجـب أحـتـرت أنــا فــيــك
أصـاحـب فـيـك الجـدع يطـلع أعيل ما فـيــك *

يـــا خـلـق زمـن الـعـوج تـعـبـتـوا أعـصـابــى
عـيـاركـوا ليـه فـلـت وجـه عـلـى حـسابــى *

يـا خـلـق زمـن الفـشل مـش قـادر افـهمكوا
كـلامـكـوا زى الـعـسـل والـعـكس افـعـالـكوا *

وأيـه يـفـيـد الـجـدل فـــى خـلـق أمـثـالـكـوا
أتـفـقـد فـيـكـوا الأمـــل وحـتـى أصـلاحـكـوا *

يـا خـلـق زمـن النفاق دى سيـاسه مرفوضه
إن كـان بينـكوا إتـفـاق يـبـقـا النـفـاق موضه *

يـا خـلـق زمـن الـعـبـر أنـا صـوتى مش للبيع
يـا بتــوع حقـوق البشر أنا حـقى سـد منيع *

مع تحياتى
الشاعر الشاب
أحمد دفاع حسانين عرفات
محافظة الشرقية ... مركز كفر صقر

*******************

المتسابق رقم 122
أحمد ربيع سليمان النخيلى
الاقصر -- اسنا......(( الشهير حمادة النخيلى))

(عمدة .... و شيخ ........ وبلد ))
يا عمدة يا شيخ البلد ............ الناس دى عاوزه القوت
أنزل وشوف البلد .............. حال البلد بيموت
الجوع وعدم الأمن ............ خلوا الشجاع كتكوت
يا يموت عشان لقمته ........... يا إما البلد حا يفوت
يا يعيش معاك فكرتك ........... ولو خالفك صبح هلفوت
والعمدة وشيخ البلد ............... دول همهم سحتوت
تروح تغور البلد ..................ان شالله كله يموت
.........................................................................
العمدة ويا الشيخ ..................... دول أصلهم بيشد
قالوا دى حال البلد ................. محتاجه للى يشد
راحوا قوام وجروا ........................ لى عمهم مرشد
راح قال لهم دا بديع ................... سابهم وراح ينشد
بيغنوا ضد البلد ............... عمدة وشيخ مرشد
وتروح تغور البلد .................... وسلمى ع المرشد
........................................................................
سابت البيوت القطط نزلت عشان القوت
كانت زمان مرتاحة ما بتاكل الفتفوت
دلوقتى شح الزاد هجر القطط لبيوت
يرحم زمان يا قطط كانت السمك بتفوت
ملت الشوارع قطط من كتر جوع بتموت
...........................................................................
أهل الحكم قالوا ونظروا لحال الطير
من حالها عرفوا لو فى البلد فى خير
لو جات على بيوتهم وبتاكل العصافير
عرفوا الغيطان شحت ويا عمدة قل الخير
جات ع البيوت يمكن للعمدة تبقى نذير
يسيب البلد يرحل على شان يعود الخير
........................................................................
أصل البلد قالت العمدة مش خبره
والشيخ فاكرها توب ومحضر الابره
والناس أهل البلد من أصلها صابره
ياما كتير البلد خلت كتير عبره
..............................................................
يا عم يا بو ربابه غنى معاها وقول
العمدة وشيخ البلد راح ياجى يوم ويزول
وتغنى تانى البلد حكمه دا مش حيطول
والمصرى عمره ما كان فى بلده يوم معزول
واللى عليها قسى سابها وصبح مذلول
وبلادنا طول عمرها اللى تقولوا تنول
وبكره يا هل البلد شاعر الربابه يقول

*******************

المتسابق رقم 123
احمد يوسف

Ahmed Youseef
( طلع النهار )..قصيدةالمسابقه
ابعد بقى..!
يا كل قلب بيوجعو صوت الفرح
ما بقاش مكان للكدابين
والسوسنه طرحت لقى
طبطب امانى المجروحين
وانت اللى واقف..
جوا نفسك تشتكى
رافض تصدق فرحتى
وان القمر..!
لساه بيطرح كل ليله
ألف غنوه حنينه..
عاشقه دموع السهرانين
والخوف هرب
والمغرمين..!
واقفين يغنو حلمهم فوق الميدان
والبرد مكسوف منهم
والليل بينده على الادان
لجل النهار اللى اكتئب
يرجع يغنى من جديد..
غنوة دفى
تكسى أهات المجهدين
وانت اللى لسه بتشتكى من غير أوان..! مستنى ايه..؟
يعلن وجود الضى المبتسم
بعد الادان
صدق بقى..!
وكفايه كدبك عالدموع
وان بكرا المنتظر..
مرهون بكلمة صبر
ضاعت مننا جوه الحصار
اقنعتنا ..
واحنا اللى كنا مصدقين
ان الامان ..
عايذ يقرب مننا
وان الوعود الميته
عرفت خطاوى حلمنا بعد المرار
وانت المرار
وانت اللى ناقش..
كل اشكال الآلم على كل دار
وزرعتنا..!
لحظة ما توهنا فى حلمنا
فوق المدار
وعايزنى اصدق ضحكتك..
يا ابو عقل مجنون بالوهن
وان الكفن هو الوطن..!
وان كنا عاشقين للحياه
نبدر ولادنا وحلمنا تحت العطش ونقوم ندور جوا روحنا المجهده يعنى ايه كلمة وطن..؟
هو الآلم محتاج معانى تفسره ..!
لما العجف..!
شيط شواشى القمح قبل ما نحصده
والغربه حرقت كل اغصان السجر(الشجر)
والجوع زرعنا ف البيوت قش وعقل
واحنا اللى كنا بننفطم فوق القادوس
عجزنا من كتر البكا جنب القلل
أأأأأه يا وطن..!
يا معدى بالاحلام على كل اوكار الوهن
أأأأأه يا وطن..
يا معلم الثوار كل اشكال الشجن
أأأأه يا وطن..
يا اللى لهيب العشق خللى دمنا
ارخص تمن..!
أأأأأه يا وطن..
يا اللى تاريخك جوه عقلى وفكرتى
خلانى اشوفك من زمان أجمل وطن
أأأأأه يا وطن..
يا اللى دموع الشقيانين طول عمرها
عايزاك تكون حضن وسكن
أأأأأه يا وطن ياأبن المحن..!
كان يجرا ايه لو صنتنى..!
من غدر اعداء الوطن
ابعد بقى..!
يا كل قلب بيوجعو صوت الفرح
لجل النهار اللى انجرح من قسوتك
يفرح بقى
مبقاش مكان للكدابين
ولا عاد ضلام..
يفصل مابينى وبين نشيد المجروحين
ولا سكتى بعد اللقى..
ها تكون لغير المقصله
ولا دعوتى..!
بعد التاريخ اللى ابتدى
يسقى النقى ها تكون كلام
حتى الهموم اللى..
انت راسم جرحها قبل الاوان
رافضه السلام
فات الأوان..! ملايين نهار
طالعين يغنو ف الميدان
والروح بتسرى فى الصور .. يا ابو قلب خان
وانت اللى كنت بتستفزك
شكوتى رغم الاهات
ولا يوم حاولت تكون برئ
وتجيبلى هدمه مقطعه
تستر جراحى ف أى عيد
واقف بتبكى وحدتك من غير أمل
ابعد بقى .. فات الآوان..
طلع النهار المنتظر علشان يغنى حلمنا فوق الميدان.. والليل جبان..!

*******************

» المربعات الأرابيسك المعشقة . هنا مدرسة لتعليم لون جديد من ألوان الابداعات العامية المصرية . اسسها ويشرف عليها . الشاعر محمد فتحى رئيس رابطة شعراء العامية المصرية
» تنافس فى حب رابطة شعراء العامية المصرية . لمجموعة شعراء
» فى حب رابطة شعراء العامية المصرية
» فى حب رابطة شعراء العامية المصرية الكبرى
» اهداء الى رابطة شعراء العامية المصرية