الشاعر علاء البلتاجي ... بخصوص الموسوعه

بسم الله الرحمن الرحيـــم

علاء احمد رجائي البلتاجي
شاب مصري من مواليد 14 اغسطس 1983 بالقاهره
من اسره من الطبقه المتوسطه ( المثقفه ) .
محمول : 01204653909

لديا ديوان الكتروني بــ عنوان ... انا المصري مفيش غيري ( اشوف وشك بخير ) .
و صفحتين عامين بالفيسبوك

و عضو جماعه صدي الادبيه

اكتب شعر عامي و غنائي و زجل و رباعيات

ومن اعمالي :
________________________________

- انا المصري مفيش غيري ( اشوف وشك بخير ) ....


عشان اقوللك انا ابقي مين !!! ؟

محتـاج يجي أكتر من سنـه ...

لكن هـ حاول في كلمتين .

.اشرح و أوضح مين انــــا !!!

و بأعلي صوت للموجوديين...

هـ اطلع و اقول في المأذنه

أنا أتكونت من حضنك و نيلك في الوريــد..
انا كبشه تراب منك من بحـري او الصعيـد
و أنا اللي خلعت توب حزنك و انا الطقم الجديد..
و حلم ف رمش من جفنك حققته مع الشهيد

أنا أللي نمت ف الشارع ف حضنك ع الرصيف..
و داويتي جروحه ف الجامع و قسمتي معاه الرغيف
أنا الشاب اللي كان صايع و بقي حــر و شريف..
و ليكي الحصـن و المانـع و قدامـك ضعيـف

أنا النسر أللي علي علمك حرس غيه حمام...
و رفرف ف الهوا بأسمك و صان حفظ السلام
أنا أللي حلفت علي قسمك علشان الناس تنام..
وانا أللي عشان يزيل همك كتـب أحـلـي الكلام

أنا أللي شغلتي تفكيري و نسيت حجات كتير...
و مشيت وراكي في مصيري و أنا الأعمي البصير
و دوست برجلي دبابيري عشان صوت الضمير.....
انا المصــري مفيش غيري و أشـوف وشك بـخـيـر

•––––ılılı.ılılı علاء البلتاجي ılılı.ılılı––––•


__________________________________

- ( ينصر دينك يا فلسطين )


ينصـر دينــك يا فلسطيـــن !!!
دين تتوحد فيه فلسطين
أيد السني في أيد الشيعي
و أيد القبطي فوق الأتنين
ينصر دينك يا فلسطين
***
يا فلسطين ينصر دينك
عمر ما حق الله بيضيع
ولا يوم نقبل حد يهينك
ولا هنوافق علي التطبيع
ولا هنسامح مغتصبينك
و انتي في زهر العمر ربيع
طارحه زتون و جناين التين
ينصر دينك يا فلسطين

***
ينصر دين القبه الخضرا
و بيت المقدس مع بيت لحم
ينصر دين عيسي أبن العدرا
و الأخوات علي ولد العم
و ع أللي يهوب جنب الأقصي
و ع أللي بيسفك فيكي الدم
و ع اللي يدنس حرمه دين
ينصر دينك يا فلسطين

***
ينصر دين أبطال في النار
عايشه بقوه و كل جساره
ينصر دين أطفال أحرار
ماتت ماسكه في أيدها حجاره
و عين نسوان بتطق شرار
كسرت بيها عيون رجاله
و مين في حريمك يرفع عين !
ينصر دينك يا فلسطين

***
ينصر دين الله في شهاده
أخدها بأسمك كل شهيد
بطنك مليانه و سداده
تملا الكون أبطال و يفيض
ده ينصر دين امك ولاده
ولا بتعجز ولا بتحيض
و كل وليد في تحته جنين
ينصر دينك يا فلسطين

***
ينصر دينك ع الأرهابي
المكشوف قدام الناس
أللي في حق الغير بيرابي
و كله عيوب من الساس للراس
لمي عيالك يلا و حابي
فتح في حضنك جنب حماس
تلقي النصـر قريب و مبين
ينصر دينك يافلسطين


█▓▒ علاء البلتاجي ▒▓█


__________________________________________

- حد فاهم ايه العباره !!!



الحكاية و الرواية
و القضيه و الجناية
مـ البداية للنهاية
مثبتة منغيـــر أدلة

القتيل هو اللي قاتل
و القضاء عادل مماطل
و اللي عاطل ع اللي باطل
و الفانلة في الجونلة

أهدوا بس استنوا بس ... واحدة واحدة يا ناس معايا
كل حاجة شايفها عكس ... كأني باصص في المراية

اليمين جه ع الشمال
و الحرام زي الحلال
و الجواب شبه السؤال
و اللي قدامي ورايا


كل حاجة في كل حاجة
و شعب مشغول بالسذاجة
الفرخة جت قبل البيضة ..؟
ولا البيضة قبل الدجاجـة !!!


حد فااهم أي حاجة .. ؟؟؟


كل حاجه أهي واضحة اهية ... و اللي مش فاهم يقول
التحرير دول بلطجية .... و العباسية دول فلــول

ولو قعدت في بيتكوا بيه ... تبقي واطي و حزب كنبة
و اللي اخدوا هناك عينيه ... خد في اخر الفيلم بومبة
و اللي قال لي بتقول ايه ؟ بــ اقول له اصبر راح تنـول


أقرا تاني و شوف كلامي
بس مش هذكر اسامي
مين شريف او مين حرامي !!!
كله عارف و لسه خايف

مين اللي باع لـ عدوي غـاز
و سابني اموت و أولع بجــاز
و علي شعب كامل داس و فــاز
و الشعب نفسه قال له أسـف

و اللي مات يدفع غرامه
و اللي عاش يرجع لماما
بيتكوا بيتكوا مع السلامة
جتكوا داهية ده حالنا واقف

كل حاجة في كل حاجة
و شعب مشغول بالسذاجة
الفرخة جت قبل البيضة ..؟
ولا البيضة قبل الدجاجـة !!!

طب حد عنده سؤال في حاجة .. ؟؟؟

عااادي اسأل مهما تسأل
و الكلام عمال بيطول
انت لسه شوفت حاجة !!!
اهدي يابن عمي و أتقل

مين سرقها و جاب ضرفها ؟؟ ... و كان يقول لك في الصدارة !!
مين اللي سابها تموت بخوفها ؟ .... و لما ماتت قال خسارة !!

مين حرق كتب الحضارة ... ؟؟؟
و مين اللي راح عند الوزارة ؟؟؟
مين سرق ثورتنا منا ... !!!
و ضي عين احمد حرارة ... ؟

مين اللي زاد ضيقتنـا ضيقة ؟
و خمنا و لعب الضنيقة .... !!!
مين كشف اصل الحقيقة .. ؟
و مين كشف لحم العذاري ..؟

مين قتل خالد و مينا ... ؟
و مين اللي ماتوا هناك في سينا ؟؟؟
مين معانا و مين علينااا ... !!!!
و مين اللي داسوا علي النصاري ...؟

مين خربها سنين مداين ؟
و مين اللي شافه و عليه مماين ؟؟
مين اللي وطني و مين اللي خاين !!!
و افتكرنــا ولاد حماارة ... ؟؟؟


حـد فاهم أي حاجة !!!
حد فاهم ايه العبارة !!!



.
.

█▓▒ علاء البلتاجي ▒▓█

____________________________________

- من رباعيات علاء البلتاجي

1


ماشي و بلف الكون علي رجلي بتمشي
فرحان سعيد ممنون و بــ صدر الطرشه
قالوا زمان اضحك و الدنيا هــ تضحكلك
و رغم اني بضحكلها معرفش ليه أفشه ؟؟؟

عجبـي !!!

__________


2

طبعك غريب و عجيب يا مذكر الأنسان
فيه سبع لما يخيب بيركبوه النسوان ...!
يتاطي من خيبته و يقل من هيبته
و مقدرش أوضح عيب ليزعلوا الخرفان
عجبـي

____________

3


الفيلم ده كوميدي و جو قديم و رخيص
و انا بردو مش هندي ولا واد و عيل سيس
اسطوانة مشروخة و قديمه و منسوخــــه
بالكدب منفوخة و بتقولي جاي لي عريس

عجبي!!!

__________

4

تعبت من التفكير في حياتي و العيشه
عقلي خلاص هـ يطير بقي أخف من الريشه
شغال كتير و أحتار و تاعبني ليل و نهار
و ياريته كان بزار او كوبس او فيشه

عجبـي!!!

_______


5

هــ تكسب ايه من الدنيــا يالي قصدت المال
من غربه للتانيه شقيان في رزق حلال
فاكر النهايه سعيده يا وحيد في تنهيده
و وراك في ست وحيده بتربي بطولها عيال

عجبي !!!


_____________________________________


كل الشكر للاعضاء و الاداره و اسف علي الاطاله

تحياتي و تقديري للجميع

شيماء عمر كتب:

شكرا لك على مشاركتك
فى موسوعة شعراء العامية المصرية
استاذنا الفاضل الشاعر علاء البلتاجى
تقبل مرورى وتقديرى

كل الشكر والتقدير ليكي يا شاعرتنــــا
و اتمني ان لا يحرمني الله من شرف مرورك
تحياتي