ولسّـه عايزه تفهمـي .؟ للاشتراك في المسابقه..ضياء الدين البري

أحمد مصطفي البري كتب :
ولسـّه عايزه تفهمي ..؟

****

(1)

الحلم ضاع ..؟
واللا انتي لسـّــه بتحلمي ..؟
غيط السنابل
لو يرتوي ، يطرح أمل
يمحي ضلام بدر اكتمل
وبأعلي صوت ينده صبي
سجـّان طموحه كان غبي
رغم الحنين ، ضل وجاع
تاهت كتير فيه السنين
جوّا الجفون ، طرحت أنين
قومي انهضي وْنادي عليه
فكّي القيود منْ بين عنيه
ترجع ملامحه وْتترسم
نلمح جبينه بيبتسم
وعشان تعيشي وتـسلمي
إتجملي ...
واتحملي ..
وحاولي مرّه تحلمي ..!

***
(2)

ولسّـه عايزه تفهمي ..؟
طب حاولي يمكن تقدري
طوفي الحارات ، وفْ كل حيْ
علي نبض إبنك دوّري
جايز تلاقي شبْـه ضيْ
أو حلم في الزمن اللي جيْ
بصي فْ عنيه
إتأملي ..
تلقي الهمم ، ملهاشي زيْ
شايفه السنين ، دايره تعاديه
سيباها برضه وتهملي .؟
حسّي بْألامه وارحميه
واللا انتي خايفه تحلمي ..؟

**
(3)

ولسه عايزه تفهمي..؟
إبنك ملاه الخوف ظنون
روحي اندهيه
يمكن يكون
ع الشط مالْحقش الغرق
مسجون ف حلمه الْ اتخنق
وسط الغلابه المقهورين
بقلوب صحابه وْطيّبين
من بؤس حاله قدّروه
أمير عليهم نصّبوه
يمكن يعيد أمجاد أبوه ..
اللي اتشنق
مخافشْ لمّا عذبوه
ولبّـسوه توب الجنون
ومسابشْ طينك يتحرق
مهما الغراب طل وزعق
عشان تعيشي بقلب حيْ
ومّا الحبايب دول شافوه ..
من هلـّته فرحوا وْنادوه
قدْروا علي جرحه وْداووه
فتّح عنيه ، لمح الأمل
شدّي له عزمه وشجّعيه
الباقي منّه لمْـلميه
واللا انتي ناسيه تحلمي .؟

***
(4)

ولسّه عايزه تفهمي .؟
مهما الزمان ضل وْغدر
من غير كلل
حنّي علي أهل العلل
دي النخوه موجه فْ بحرهم
وحبّك انتي يـْلمّهم
رغم الحياه ، مر بْـكآبه
والظـُّلم عشّـش وسطهم
دبّاح وهاضر دمُّهم
الليل ناسيه بدر وقمر
ونـْهار بيسقيهم ملل
دايما يفوت ..
ساكنه السكوت ..
حزين وصابه كتير خلل
والجوع بيضرب ع الدفوف
لحن الوفا
مجاش في يوم حن وعفا
حر العطش ، بيزيد دفا
والقهر لاوي الكلمه ليْ
مرسوم علي جبينهم تابوت
وشبه صوره ع الجدار
شكل الكلام ، باين خطوط
ودْموع تلالي وتبتسم
نجوم بتهرب جوّا ليل
والمر طاوي الدنيا طيْ
مسعور وناوي يلمّـهم
لكن صمود الصبر حيْ
يكوي فْ قلوب الشر كيْ
اللي بتاجروا في الضياع..
واللي نسيكي فْ يوم وباع ..
واللي مَلَك أرضك مشاع ..
حلف الحيتان ، ويّا الديابه
جوّا المحيط ، زارعين ديدان
تطرح عقارب سُمّهم
جوّا الميدان ..
بيْقطـّعوا فْ صلب الكيان
وكتير ضحايا لـْحلمهم
ويقولوا عنـهم دول رعاع
مالهمش حق الإنتفاع
ويزيدوا يامّه فْ ظلمهم
وكل دا إكمنهم
عاشقين سماكي وكل طير
ومظلومين والقيد حقير
كتر المحن ، بيْزيد صلابه
مستنيين تخفي السحابه
النبض يرجع حيـّهم
وتعيشي تاني بقلب حي
جوّا القلوب ، مالكيشي زي
قومي الحقيه
فكّي القيود من بين إديه
الروح فداك بتهون عليه
واللا انتي رافضه تحلمي ..؟

***
(5)

ولسّـه عايزه تفهمي ..؟
طب دوَّري
لو تقدري
يمكن تشوفي الطير طشاش
ماشي وتاهت سكـّـته
ضاعت ملامح عشّـته
بيخاف ف لحظه يتجرف
وتاخده موجـَه وينحرف
جوّا الشتات يموت غريق
وتْـتـُّوه معالم جثـّـته
كان نفسه يحلم يوم يطير
جوا الحدود ، حر وطليق
في الجو لحنه بيتعزف
في الحلم طار، مرّه ومجاش
تاه السنين ، جوّاه أسير
ريشه اتنتف
عملوه بخور
حتي اللسان من سكتته
عمّال يفور
جوّا القفص ، بطـّل زعيق
حلمه اتخطف
وفْ حضن ليل فجْـره الشحيح
ساعاته ريح
بتزيد أنين قلبه الجريح
يصبر ويمسح دمعته
يمكن في بكره بْلهفته
يلمح شعاع ، جوّاه حنين
أو شبه نور ، يعلن نهار
وكفايه إنـّو من سنين
مسجون في غار
مصاحبه فيه نبضه الحزين
من بعد مانسيتي الطريق
وقـْبلتي نفضل مطحونين
ذنب الضحيه كان فقير
أحلامه خوف
قايم ونايم ع الجبين
من كل دا هرب الضمير
ومصمّمه تقسي عليه .؟
هاوديني مرّه واسمعيه
واللا انتي لسه هاتحلمي ..؟

***
(6)

ولسّه عايزه تفهمي .؟
طب دوَّري
لو تقدري
يمكن أكون
شَـدّه بكسره أو سكون
أو وهـْم شارد أو ظنون
عنوان وتاه من غير دليل
يمكن خيال..
أو حتي شيء صعب المنال
أو فرع صابه كتيرعفن
في الرّاكيه نبضه بيندفن
يمكن بواقي م القليل..
أنِّـةْ وساكنه جوّا ليل
أو آه بتزعق في السكون
دمعة وتايهه في العيون
جوّا الجفون متيتمه
نبع الدموع متلتمه
لاقلب يرحم أو وصال
الفقر سايق في الدلال
حتّي الجنين
حاسس بمر المظلومين
جي الحياه من غير مصير
نبض الولد وتره الحزين
ينده عليك
تفكي قيد قلبه الأسير
الظلم بدّد نورعنيه
ضمّيه في حضنك صبّريه
وبرضه لسّه هاتحلمي .؟

**
(7)

ولسّـه عايزه تفهمي ..؟
طب فكري
واستغفري
قولي يارب
يسمع نداكي كل قلب
حَـبِّـك وحُـبّك كان له ذنب
يدعي لربه في الصلاه
يهدينا ويفرّج هموم
ملناشي في الدنيا سواه
عشان تحاولي تغيري
إنسي الحكاوي
قومي انهضي وكفايه نوم
إنسي كمان تقولي آه
إنوي في لحظه وقرري
مدّي إديكي وابدري
حبّـة تقاوي
يمكن تجيها الروح في يوم
تنده علي نبضك يقوم
تخـْضر أغصان الحياه
تطرح غناوي
من بين حروفها يتولد قارب نجاه
يقدر يجدف بالأمل وكتير وراه
ينده نهار الكون رماه
جوّاه ضلام وليله صعب
كفايه نار وكتير ملام
العقل تاه وشْبعنا غلب
الله فْ علاه
حبة طموح ، تنده أمل ، ضل وتاه
وانتي اللي ربي كرّمك من فوق سماه
زارك صحابي وأنبيا وْنلتي رضاه
إمتي تفوقي وْتندهي إبنك بحب
ومّا نشوفك تحلمي
إبنك هايلمح خطوته تحلم معاه
نبته الضعيف يحيي الهمم
يمحي الهموم واللي ظلم
وهاتفضلي رغم العلل
أرضك منار ومحبتك
في كل قلب
ونعيش حياتنا بعزتك
أصل الأمل ، روح الحياه
بالحب قومي وازرعيه
وصالحي إبنك واوعديه
ساعتها والله هاتسلمي
وهاتفهمي
وحاولي يامّـه تحلمي


....