يا عريس مصر اللي جاي... بقلم / حامد عطاالله

شفت ريسنا ف منامي
============
يااا رئيس مصر اللي جاي
نفسي اقولك كلمتين
شفتلك حتة منام
قمت اشوف اراضيك منين
قلت لازم اروح واقولّه
حتى لو هتعب سنين
لجل م حكيلك منامي
اللي شفتو مرتين

قال ياسيدي !!!!
=========
انت ف الكوشة عريس
جنب حتة دين عروسة
بنت من معدن نفيس
و الخلايق حايسة حوسة
اللي يرقص عشرة بلدي
و اللي قام هنَّاك ببوسة
و اللي طبل و اللي زمر
و الجميع هنّى العروسة

جيت ف ودنك قلتلك
===========
العروسة سبق جوازها
جوزها كان واد عسكري
باع دهبها وراه جهازها
اصله كان واد مفتري
جتلو فرصة و انتهزها
كان فقير اصبح ثري
و البنية عشان دا جوزها
رغم خيبتو بتشتري

و انت برضو سألتني
============
هي وياها عيال ؟
قلتلك دي عيال كتير
بنت ولادة و عال
و الجيوب مليانة خير
قلتلي مابلاش يا خال
دي البنات غيرها كتير
قلتلك من غير جدال
هي ليك بشروط كتير

قلتلي و كمان شروط؟!!!
==============
قلتلك ايه يابني مالك
حطها في عنيك و صونها
و العيال خدهم عيالك
هي راح تعطيك عيونها
يبقى مالها هو مالك
بس اوعى ف يوم تخونها
تاخدو درس يكون ف بالك
أصلو كان هايف و خانها

يعني بقى هي اللي سابت ؟
===============
قلتلك دا رئيس عصابة
أشأش اللي اديه تطوله
بهدل اولادها الغلابة
كان يوم اسود يوم وصوله
لم حواليه الديابة
لو سرق بيسقفوله
بلَّغت عـنو النيابة
جم خدوه و بيحلقوله

و النهاردة هو فين ؟
============
اتخلع زي الشراب
و اترمى زي الكلاب
و انفتح كشف الحساب
عالِّي سرقو م الدولاب
و السجون لولاد شباب
و الهوان ويا العذاب
ربنا قال في الكتاب
القصاص هو الصواب

انت اسئلتك كتير
=========
خلص بقى و اثبت شهامتك ..
ليه تخاف
الأم ريحها .. و كون عوض
لسنين عجاف
ميتها تبقى من عنيك .. و اكلها
لحم الكتاف
و اكرم عيالها .. دول خلاص
جالهم جفاف
عايشين سنين حرمان .. ما داقو
اللقمة حاف
الكل يتعالج و يتعلم .. و يبقو
عيال نضاف
اعدل ما بينهم كلهم .. لو عشتو
على حد الكفاف
هتكون عنيهم ليك سرير .. و الرموش
هتكون لحاف
==========
بقلم / حامد عطاالله[/b]