الشاعر / حسن صابر .. قصيدة خايف اموت

خايف أموت

خايف أموت .. وخوفى ده حالة .. ميقدرشى يوقف قرار الاحالة
ولا حتى يقدر يحوّر يزوّر ...يعاند ويرفض مصيرى استحالة

وافكر فى كنهو الاقينى تايه .. مابين العقيدة وبين الظنون
ايمانى بحقيقته مخالف شعورى .. وخايف لعقلى يصيبه الجنون

ماهو ازاى تاخدنى الحياة والامانى .. والاقيلى مرسى والاقى مكانى
واكافح واناضل واجرب واحاول .. وفجأة افارق وجودى وكيانى

سنين غصب عنى قضيتها فى جسمى .. ولا اخترت اهلى ولا اخترت
اسمى وكل اما باكبر اتارينى باخسر .. رصيدى ف عمرى ولونى ورسمى

ومطلوب اوافق واعمل برئ .. واكمل حياتى وامشى الطريق
اعيش غصب عنى واموت غصب عنى .. انا كل لحظة باموت بالبطئ

يارب انت وحدك عارفنى وشايفنى .. وراضى بحكمك ولو ضد ظنى
حياتى وموتى .. كلامى وسكوتى .. مهماش كفاية عشان ترضى عنى

ياربى بعلمك خلقت الوجود .. وعايش بنعمك انا مش جحود
وكل اللى قولته وبايدى كتبته .. مالوش معنى غير انى خايف اموت