قصيدة " استغماية "

زمان ...
وقت العصارى كلنا
كانت لنا لمة
نجرى نسابق ضلنا
وعنينا تتغمى
وان مرة حسيت بالخطر
أصرخ واقول أُمَّـة
وكأنها حصن الأمان
وما كنش حد يضرني أيام زمان
دلوقتى بصيت ع الولاد
ملقتش أمـَّـة تلمهم
وقت الخطر وتضمهم
تحمى العيال من بعضهم
وده اسمها
بتجمع الحب فـ قزايز قلبها
يشربه كل اللي عايز ودها
دلوقتى لما بيلعبوا
آل إيه يقولوا كهربا
والأمة صارت معيبة
وقانونها عاوز شقلبه
في الذمـَّـة والهمـَّـة
وساعتها نلعب كلنا
ونقول سوا أمـِّـة