أنا اللي قتلت ياسين

بقالنا سنين بنسأل

يا بهية مين قتل ياسين

وأحنا خادنا عزاه خلاص

ودفناه من سنين

ولسه برده بنسأل بهية

مين قتل ياسين

وليه بنسأل بهية

واشمعنا يعني ياسين

طب دلوقتي نسأل مين

ع اللي ماتوا بالملايين

ع اللي جاعوا بالملايين

ع اللي ضاعوا بالملايين

نسأل برده بهية

ولا نروح نسأل ياسين

آه يا ياسين يا مسكين

فى عينك الحسرة

وهدومك عليها الدم

وفى أيدك السكين

لسانك جوه بوقك

الظلم مخوفك

الجوع مكتفك

وعيونك حيرانين

(يا بهية وخبريني

مين قتل ياسين )

وتطلع مين بهية

ويكون مين ياسين

ياسين كل شاب ساب بهية

عشان بلده البهية

وظن انه صلاح الدين

فمات عشان بهية فاتهموا

فيه بهية فدمه راح هدر

وراح وراه الاتنين

اللي قتل ياسين ومن بعده بهية

...............أنا

.....................أيوه أنا

أنا اللي قتلت ياسين

وضيعت بهية

..............وضيعت البهية


أقولكو أنا ياسين

........أو بهية

...................أو أكون الاتنين

أنا المقتول وأنا القاتل

أنا الجرح وأنا السكين

أنا القاتل بضعفي

وجبني

وخنوعي

من سنين

وأنا المقتول وكفنوني

فى دموعي

يا عين

وأنا اللي قتلت ياسين

.......................وأنا ياسين