الشاعر..رضـا فايــد..(زجـل ..شعر عاميه).أحلي الحروف..آه يا قلم..حلم كداب

مشــاركة..الشاعر.رضــا فايـد
.....................................
(1)..قصــيدة زجـــــل
................................

أحـــــــــــــــــلي الحــــــروف
......................................
أحلي الحروف فـ اسمها واكتبها بالياسمين
والقلب من حسنها ......دايب بقالوا سنين
عاشق تراب ارضها والناس دي مش فاهمين
دي الروح يادوب مهرها تطلب واسد الدين

ياللي انت بتحبها... ازرعها ورد وفل
واغزل حروف اسمها طرحة وعليها التُل
وابني صروح مجدها يشهد عليها الكل
واوعاك ف يوم تنحني او مره ترضي بذل

إشرب سبيل نهرها وامحي أثار المُر
واروي عطش أرضها واخلع جذوع الشر
وافرد قلوع عزتك ف البحر أو ع البر
خلي التاريخ يوصفك... ثائر ودمك حُر

إمسك بإيد دفتك..... خلي السفينه تمُر
تمشي بسلام ف البحر وتصيد في لولي ودُر
دوس ع الصعاب كلها واياك في يوم تنْجر
مهما تقابلك محن.... إوصل لأبعد بر

لملم جراح فرقتك.. وحّد أيادي الناس
هتلاقي فيهم بشر زي الدهب والماس
واللي يبان خسته تحت المداس ينداس
وارفع جبينك فوق واوعي توطي الراس

..................................................
(2)..شـــعر عامــيه
..............................
آه يا قلم
..................
نوِّهت أكْسر كلمتك
وارميك انا فْي بحر الغضب
جوَّايا آه تملي الكُتب
وفــ قلبي نار زي الشُهب
لكن خلاص لجل العَتب
هاربط عينيك واقفل عليك
واقطع وريدي بالسكوت
واصرخ آهات تعزف طرب
وايَّاك تقول بعتك لها
بإْيديَّا هامسح خطوتك
واخنق ف صوتك واذبحك
واوقف نزيفك بالخضوع
وسط الضلوع دخل إيديك
دوَّر وشوف يمكن هاتعرف
وقتها ان الظروف فارضه عليَّا
ارضخ لها
ولْأِنّ روحي تْحبَّها
هاسحب مدادك مـ الوريد
واوقف أنا نبضك أكيد
قبل اما تحفر قبرها

.....................................
(3)...شــعر عامـيه
............................

حلم كداب
..................
خلاص مليت اقول الآه
وانا تايه مابين شطين
لاانا عارف هاروح علي فين
ولا شايف بنن العين
يضيع صوتي مابين امواج
بتحدفني وترميني
وتكسر حلم بضلوعي
ولما اصرخ تقول انسي
مافيش مرسي ولا مجداف
ادام عايش بتستني
وطول العمر تتمني
تشوف حلمك بيتحقق
تتوه في الغربه وتعاني
وتنزل دمعتك تجري
علي خدودك وتتشقق
ويطلع طرح احزانك
وليد ميت باحضانك
خلاص خليك كدا صابر
علي جروحك وعيش وهمك
وخلي الحلم بجفونك
يجوز الحلم يتحقق
ويطلع لك شمس وتشوف
امل فجرك نهار شقشق
ودا كله حلاوه روح
ياطير مدبوح ومتعلق
بحبل الموت ومستني
امل يحيك
ويرجع صوتك الشادي
وتعزف بالجراح موال
يشق الليل ويرجعلك
صدي صوتك يضويلك
ف قنديلك ويملي لك
ظلام ليلك غني وتهليل
وترجع تاني م الاول
وتلقي حبر اوراقك
قوام سايل علي كفَّك
وتبدا عزف الحانك
وتتعذب باحزانك
غريب تايه باوطانك
وشطآنك مليها الشوك
وكان آخر امل عندي
اشوفك تاني متغرَّب
ويوم موتك خلاص قرب
فا مـ الاحسن ياريت تنسي
وخد جرحك وشوق فرحك
وروح دور بعيد يمكن
تلاقي الشطّ والمرسي
ولو روحك خانت صبربك
ياريت تحفر هناك قبرك
واخر كلمه تكتبها
تكون شاهد علي قبرك
انا انسان غريب عنكم
من الاحسن افارقكم
وصوتي يموت

الشاعر الجميل رضا فايد شكرا لك على مشاركتك فى المسابقة
ونتمنى لك التوفيق والرقى المستمر
لك محبتنا وأجمل الورود

» مرببعات..فن الواو..الشاعر..رضــا فايــد
» حـنـــــــــــــين..الشاعر..رضـا فايد
» كبـرياء انـســــتان..الشاعر..رضـا فايـد
» الشاعر..رضـا فايـد..مربعات..رباعيات
» لقاء الحروف . الشاعر محمد فتحى والشاعرة هبه مشعل ( 1 )