قصيدة السندباد

------
يفور البحر
ويضرب مركبك وانت
على الصاري
تبص لآخر المشوار تجيبه عنيك
وتتمنى
تشوف ضي الأمل
ترجع لأحلامك
وانا ع الشط باستنى
أقول يمكن تعود بينا ليالينا
وأتمنى
تاخدني الريح على جناحها
توصلني لضي عنيك
وموج البحر يحدفني
وارجع للشطوط تاني
***
يفور البحر
ومركبنا بقى ريشة ف مهب الريح
شراع مكسور بيطوَّح يمين وشمال
وبنحاول نصاحب موجه
يحدفنا
يرجعنا
لسكة كنا نسيناها
ويبعدنا عن الأحلام
واناديلك
تبص بعينك النعسانة تلمحني
على الشط البعيد جنبك
تاخدني الريح لأحزانك
***
يفور البحر
وأنا وانت بنستني
على طرف الشراع الاخضر
وبتعافر
تعود لاجل الأمل ما يزيد
وبتبدل مكان الكف مجدافك
وتجدل من خيوط الشمس ف شراعك
وتقتل تاني ف الأيام بدل خوفك
وتتمنى يعود بيك النهار
شايلك نور من العتمة
يزق ف مركبك وانت
على الصاري
بتلمح دمعتي نازلة
كموج البحر
****
يفور البحر
والمح دمعة ف خدودك
بتمسحها بأمل كداب
بإنك راح تعود للشط
وأنا عارف
بإن الشط مش لاقي
الأمل منك
وباستنى
لكن ف يوم ما هاتمنى
تاخدني ف حضن أحلامك
وأفضل ع الشطوط واقف
أشوفك وانت بتعافر
ف قلب الموج
عشان من تاني ترجعلى
وأنا بعنيا مش شايف
شراع المركب الدبلان
وأبعتلك
مع الشمس اللي رايحة حداك
أمل كداب
[/center]

[/font][/right][/size][/font][/size]

الشاعر الجميل شريف عبد الفهيم شكرا لك على مشاركتك فى المسابقة
ونتمنى لك التوفيق والرقى المستمر
لك محبتنا وأجمل الورود

» قصيدة السندباد (عامية)
» قصيدة : شقى جدار الزمن ( قصيدة فائزة بالمركز الثالث في مسابقة الشاعر على الصافى الكويتية عام 2001
» قصيدة فى حب مصر
» قصيدة (انا مين )
» قصيدة متزعليش