إلطــم خـدودك يـازمــن .. ضياء الدين البري

السلام عليكم .. كلام من قلبي
أحمد مصطفي البري كتب :

إلطـم خدودك يازمن

......

إبكي ياعين
نهْـنـهْ ياقلب
وفين أهاتك ياعلم
نبضك حزين
شبَّعْْـنا غـُلب
والقلب م الظلم اتقسم
هانت عليك ..
أرواح صبايا بتعشقك
رغم الأنين ..
جوّاها نبض بيعزفك
كانت بتحلم يوم تحب
وتعيش حياه،دفء بحنين
الحلم جوّاها اندفن
جوّا الجفون
عيون بتهرب م الشجن
ولسّـه برضه بتكتبك
وفوق جبينهـا بترسمك
والنبض قبل مايتولد
يعشق حروفك ياوطن
وصوت شهيدي الْ اتخنق
من غير أهات
شوفـْـنا الأيات
وبدون غضب
فرحان وشوفناه يبتسم
جوّا التاريخ،إسمه انكتب
ونبضه لسّه بيتجلد
ودموع حبيبتي اللي روت
شراقي في قلوب اتـْكوت
بنار وليدها اللي اتشنق
قدام عنيها المجروحين
شافت سنينه بتـتْـنهب
واللي نهب ...!
عايش بيربطها بْـوتد
وبين ملامحه بيترسم
رعب ومحن
والقيد بارود
من غير حدود
يدهس ضلوع بنت وْلد
ولإمتي ياكل الهمم .؟
هنشوف ولادنا المدبوحين
قدّام عنينا بتندفن
من غير كفن ..!
وبدون مانعرف هوّا مين
اللي دبح ..
سكّينته قاسيه ع البدن
واللي اندبح ..
دمّه بيجري بدون سبب
غير إنـُّو بيحب البلد
وفين حقوق اللي اتظلم
م اللي ظلم ..
إلطم خدودك يازمن
واسمح لي مرّه أسألك
هيّ بهيّــه ، رايحه لْـفييين ..؟

.....

» من غير إحم يابا .. ضياء الدين البري
» صبرك ياقلبي شويّه .. ضياء الدين البري
» بين شطـّينك بالقي حنانك..ضياء الدين البري
» ولسّه مش عايزاني احبك.؟..ضياء الدين البري
» وبضمير الشعب قــرّر.... ضياء الدين البري