اللي يضحك ناس على صاحبه

اللي يضحك ناس على صاحبه
ويروح ينقل كل اسراره
واما يكون محتاجه ف ضهره
يلقيه طعنه ف أهله وداره

واللي تضحي عشانه بروحك
عمال يكشف كل جروحك

واللي تشيله ف نن عيونك
وانت مئامنه وهوا يخونك

واللي يبيع الماضي بحاضر
واللي بيؤمر وتقول حاضر
واللي عشانه بتعمل خاطر
واللي بليد وبيعمل شاطر

تفتكر انه يكون يتصاحب
أو تتباهى بجيرتك ليه
أو يتماشى معاه ويتناسب
أو مايهونشي وتبكي عليه
أو يتعاتب أو يتحاسب
أو يستاهل تسأل فيه
بيعه وبيعك كله مكاسب
واوعى تفكر يوم تديه

واتعلم علشان يا معلم
لما تقابل صاحب تاني
تبقا حريص واديك بتسلم
وعنيك تقرا عنيه ف ثواني

ولو ملقتشي كلام ف عنيه
قرب منه وكلم فيه
خليه يبقا كتاب مفتوح
ركز وانت بتسمع ليه

واما يخلص خليك هادي
دايما كل كلامك عادي

واوعاك تكشف سترك تاني
خليه جوه ف صدرك غالي
وانت معاه العشره هتثبت
ان كان صاحب ولا أناني

هيكون صاحب لو بيحبك
أو بيلازمك أوقات جرحك
واما بتخطأ ييجي يواجهك
ويكون وقت الجد مرايتك

لما يشوف الخير ف اديك
وانت بتفرح يفرح ليك
واما يلاقي الكل عليك
يبقا ف ضهرك ساند فيك

يومها تشد عليه بسنانك
واكشف كل ستايرك ليه
نعم الصاحب شيله ف عينك
واوعى تفرط أبدا فيه
.
رضــــا عثمــــان