عبد الحليم الزلوعى ـ أشعار بالعامية المصرية

( 1 )
اتعلمت الكتابه
--------------
اتعلمت الكتابه
بحروف اسمك حبيبتي
وحلمت بيكي ياما
جوايا من طفولتي
وكنتي م البدايه
اول حرف في حكايتي
اتعلمت الكتابه
بحروف اسمك حبيبتي

دور يا قلبي شوفها
من بين كل الوجوه
أكيد انت عارفها
ولاعمرك يوم تتوه
دا حب العمر كله
وعيوني بيوصفوه
اتعلمت الكتابه
بحروف اسمك حبيبتي

الشوق واخدني ليكي
أمواجه بتناديكي
مدي ايدك خديني
ع الـبر هـتعرفيني
علشان صورتك حبيبتي
مرسومه فوق جبيني
اتعلمت الكتابه
بحروف اسمك حبيبتي
-------------------

( 2 ) إتكلمى

ليه السكوت اتكلمى
وباعلى صوتك سلمى
قلبك لشوقى يحضنه
والحب ليه تستسلمى
مشوارنا لسه ف أوله
عاوزين يا روحى نكمله

يا حبيبتى انتى دنيتى
فى الدنيا بصى اتلفتى
مين اللى فيها كلها
غيرك يونس وحدتى ؟
مشوارنا لسه ف اوله
عاوزين ياروحى نكمله

سمعتى قلبى ودقته
وعرفتى شوقى وسكته
قلبك يا روحى برقته
يقدر بنظره يسكته
مشوارنا لسه ف اوله
عاوزين ياروحى نكمله

بالشوق تعالى وقربي
دوبى فى حبى وجربى
عمرك ماتبقى لحظه فيه
وتحاولى مره تهربى
مشوارنا لسه ف اوله
عاوزين ياروحى نكمله

--------------------

( 3 ) الإستفتاء

قوم إتكلم واصرخ
عاوز اسمع صوتك
يا محـيـرنى سكوتك
لسه الفرصه ف ايدك
اوعى الفرصه تفوتك

يعنى المطلوب منك
عند اللجنه تروح
تهتف باسم بلدنا
من اسنا لمطروح
تنقذ أمه بحالها
ووطنا المجروح

مصر أمانه فى ايدك
يا ابنى ربى يزيدك
قـوه وعـزم وروح
لازم يوم الاستفتا
عند اللجنه تروح

وانت يا روح الروح
قول للدستور نعـميـن
أول خطوه يا سيدنا
شوف ها توديـنا لـ فين ؟
على دوله مدنيه

الاسلام أهو دينها
منه تصيغ قوانينها
وبتتكلم عـربى
واحنا كمان عاوزينها
دوله تكون عصريه
وعــداله وحــريه
والأمه المصريه
بالوحده الوطنيه

دستور بلدك عينك
حافظ يا ابنى عليه
لما تروح ع اللجنه
قوللى هاتخسر ايه
ترفع ذل وعار
ودقون خلوها نار
باسم الدين حاربونا
وهمه لدينّا العار

لازم نخلص منهم
واولنا الدستور
يعنى تروح ع اللجنه
ها تشوف مصر النور
وانت واخويا واختى
احنا علينا الدور
هانقول ايوه قويه
ونحيى الدستور

هانروح بالملايين
ما احنا خلاص عارفين
مين الفاسد فينا ؟
وحكم باسم الدين
وحرق مصر بحالها
ولا فعل الملاعيين
وانت يا نور العين
هاتقول للدستور
ايوه كمان نعمين
------------------
( 4 )
الجحـــــــود
يا طاهـره في زمـن منجوس
بدون رحمه عليكــي يــدوس
وف الزحـمـه و بتـعــــــــــدي
لوحدك ومافيش كــدة يساعدك ؟!
يمــد الايــد يــروح واخـــدك
ماهــو شايفك واهـو عــارفك
ونتـلـفـت وفي الزحـمـه بنلـقـاكي
غـريـقـة يـا أمي فـي دماكي
بيـرعـاكـي عجوز زيـّـــك
يـمــد الايـد مـا تـوصـــلك
ويـنـده تسمعــي صـوتـــه
تـمـدي الايــد ومرعـوشــه
وكانــت لحـظـه مهووســـه
عـجـوز وعـجـوزه يتسانـدم
عـشـان واحــد يقـــف منهـم
دا حـال الدنيــا يــا صابره
عـلـى الكسـره و ع الاولاد
تشيـلـي تـولـدي تـربـي
وكـان يـومـك مـا بيعــدي
وتجــري الخـطــوه ما تهدي
وتـاخـدي مـن سنين عمرك
وتـديـهــم ماهـم لـحـمـك
دا يمكـن يـوم واحــد منهم
يشيــل هـمـك ومــا هـمـك
تجــوعي ويـشبــعـوا هـمـا
وكـنـتــي سعـيـده بـ اللمـه
بهمـه انتى كـبرتـي وعـلمتـي
وربيتـي وخـرجـتـي وجـوزتـي
وداريـتـي الدمـوع ف العـيـن
ومـا همـك لــوووووم اللايمين
ودقـتـي الـغـربـه ومرارهـــا
ورحـلـه بتخـفـي اسرارهـــا
ونارهـا تهـون مع اللي تكون
طلباكــي تـربـــي في ولادها
ما هـيّ بنتــك ومن بطنـــك
بتخـرج هـي في ميعـادهــا
في شغـل يطول بطـول اليـوم
وتيجــي تـعــد في المعلوم
كـتيـر ألوفـات وبزيــاده
وانتـي يــا صابره كـالعاده
تشيـلـي تحـطي وتجـيـبـي
وتيجـي الواقعـه والكسـره
ومـا سألـت جرالك ايـه ؟
مـا مـدت ايدهــا لو بجنيه
ساعـة العــوزه ترميكــي
وتـبقـي عـبـره للسكـان
تـناديـكـي يـا مكـسـوره
يـا مقـهوره شوفيـلك حد
بقـي غيري وكتــر خيري
انـا شايله بقـالي شهرين
واشـوف الدمعه فـي عنيكـي
باعتـه رساله للجاحـديـن
لايـقـروهـا ويـرمـوهـــــا
وينسـوهـا مـا باعـرف لـيه ؟
وراجـعه الدمعه جايه تسأل
يكـون الـدم بـقى ميـه
وظلم الأم حـنيــه
وانـا خايـف في يوم اكبر
اشـوف نفسي بقيت هيه
------------------------
( 5 )
الحضرة المصرية

وفــى الحضرة ونقر خفيف
وسيدنـــا الشيخ فارد ايدة
وضحكـايــة بتـتــنطـــط
بتجري وراهــا بتسيبة
يزيـــــن بيهــــا تجاعيــــدة
يقــــول اللحـن بالفطره
يقولــــــوا وراه ويعيدوا
ويتمايـــل ويتمايلـــــــوا
وكل الصــــورة والمشهد
وانــا منهـم وانا بـاشهد
تقــــول الله الله الله
الله حـى الله حــي
حروف المدح نشوانة
تسبح فى جميع لاركان
وسيدنا الشيخ ماسك دفه
وايد بردانة تدفى
وحتة لمبة سهرايه
من الضهرايه بتنازع
ورغم العوذة بتوزع
بنورها تنبة الغفلان
وماتفرقش في الحضرة
ما بين قاضي وبياع فول
ودا فنان ودا مسئول
ودا حلاق ودا بهلول
وتلقى شباب وتلقى كهول
وناس ساكتة وناس بتقول
وزي الحضرة ما توحد
بياض فى بياض وبيوحد
وسيدنا االشيخ كدة واقف
امامة الصف جاي بالطول
يعنى طويل مع قصير
كهل عجوز مع صغير
وبدل الصف يبقوا اتنين
نمدح فى نبينا الزين
وحضرة ف ام هاشم
وحضرة فى الحسين
في وسط الصف ومواجة
لمولانا سي فرقع لوز
قصير بس دمة خفيف
وعين مولاانا ع الحضره
وعارف هوة من ضهره
مين جي ومين رايح ؟
ومين خلى البخور فايح ؟
ومين خيبان ومين فالح ؟
ومين طالح ومين صالح ؟
يهدى الجو ويصالح
مابيصالح ولو زعلان
لحد ما شيخنا بيسامح
وسيدنا الشيخ باين ولهان
فى ذكرة للنبي العدنان
وفرقع لوز مع الهذيان
يتطوح زى أبو قردان
فى خفة قول تلات غزلان
بيتـنطـط ولا الر هوان
وباين للجميع نشوان
وكله يدوخ من الرهقة
وكلة يفوق علي الشهقة
وفرقع لوز وقف يصرخ
صرخته لكن بتدوي
اهى البركة من المولي
لكن النفحة من سيدنا
ادعوا له الإله يحمية
لاخر العمر ما يسبنا
وفرقع لوز يقوم يجري
بس بخفة الرهوان
فى ايدة فوطة مبلولة
وفي التانية بخور وعطور
ينشف للإمام وشه
ويركع زى ديك مسعور
وايد مولانا علي راسة
خد النفحة وقام باسة
وفرقع لوز كدة بنفسة
بخفة وانت ما تحسة
يوزع ع الحضور اطباق
وفيها الرز واللحمة
ومولانا يوزع عيش
يشق الرغيف نصين
ويرمي با يدة للحاضرين
من الفرحة يروحوا صارخين
ومولانا بيملى بقة بالمية
من الابريق ابو بزبوز
ويا بختة اللى كدة بيفوز
وتبقى البخة يعني كنوز
واحد قاضي فاتح بقة
ونفسة البخة توصللة
يقوم مولاانا يندهلة
ويديله الرغيف مخصوص
يعني القاضي م المحاسيب
واحد تانى من المجاذيب
بيخطف م الرغيف حتة
واحس بضحكتى ها تسيب
وفرقع لوز بعيد مترين
يهددني بطرف العين
ومولاانا يقوللة امين
وفرقع لوز يقدمني لمولانا
يخدني في حضنة ويبوسني
كدة في قورتي ومن راسي
الاقى الكل يحسدني
علي البركة اللى انا فيها
وفرقع لوز بيتبسم
اوعى الحضرة تنساها
ها تكتبها وبلغاها
ويوم الاتنين تيجى معاها
-----------------

( 6 )
يا سوسنه
ياسوسنه حقي أنا
أغير توبك الـ لابساه
يا حبيبتي من هنا
التوب قدم وصار عدم
وضاق عليكي التوب كثير
ماهو عمره من عمر الهرم
عمرالنقوش في صخور وجير
ودي اذهلت كل الامم
والآه بتجري في الخيوط
اللي حاسين بالالم واحنا
ونشوف عيونك مكسورين
وبتحضني دمعة ندم
يا سوسنه يا مؤمنه
انا عشت في حضنك عصور
كم الف عام وكام سنه
والنيل بيجي كل دور
تلقى القلوب مطمنه
والدنيا عاتمة وانتي نور
ياحضاره للناس ملهمة
طب شوفوا نقشي ع القبور
شوفوا المعابد والقصور
شوفوا اللى باقى منها
حير عقول الكون
دي مصر سابقه عصرها
شايف حلاوته وقتها
وتاجها مصنوع م الحرير
والعين بينطق كحلها
والعقد مصنوع من ياقوت
والتاج مداري شعرها
شوفتينى كاهن فى المعابد كلها
أقدم القرابين وأحيي الآلهه
عشان يصونوا عرشها
ويعيش معاها نهرها
ويفوت عليا عصور كتير
والتوب يضيق على جسمها
والعيال .... الطيبين
عاوزين يشوفوكي في أمان
ويلبسوكي توب جديد
صنعوه من دم الرجال
حتى البنات قاموا يغسلوه
وبدمهم كان المحال
وفصلوا التوب الجديد
ومزينينه ....بالحنان
ومصممين وفى الميعاد
يشوفوكي واقفه وفى عناد
يلبسوكي التوب جديد
هنا فى الميدان
نفس الميعاد
-------------
( 7 )
السيدة نفيسة العلوم

وأهـل للعلــــــــوم أعـــــــــلام
والســــــــت ,,, رايتـــــــــهم
أمـــــــانه لاجـــــل الحبيــــب
نعــــــرف ,,, كرامتـهـــــــــم
دول آل بيت النبى
ومصــــــــــر حـضـنتـهــــــم
هاديه النفوس بالجلوس
فى مقــــامــــك الطـــــــاهــر
ياعطياهم نفس الدروس
يـــاصايمــــــه للأخــــــــــــر
وفى الرحاب بنغوص
نعـــــــرف ,,, ونتفــــاخـــــر...
يــاعاشقــــــه مصـر وترابها
مــــن عشقهـــــمـ فيكـــي
ويجــــــي أهـــل الحجاز
نيلهـــــــــا,,, ينـــــاديكـــي
وترابها برضو اللى فاز
كان المقــــــــــام ليكـــــي
زيحى الهموم م القلوب
يـــا طاهــــره يانفيســــــه
يانسمه ســاعــــه الغروب
فـ الوحـــده و أنيســــــــه
يا دمــع ســال ع الخدود
يــا آهتــــي يا حـــبيســـه...
رحلــه هدايتــي ابتـــــدت
بالقاعـــده فــ مفــــامـــك
و فــ كل ساعـــه رضـــــا
بلقــــانى فى مكانك
نفسي أنـــول الــرضـــــا
وأكـــون فــ خدامك
يـــا طاهره مــــــدي الإيد
للـــي اتشبــــك بيكى
يــاصايمه طــــول السنه
ولا تفطري إلا فــ عيـــــد
بيكى مصر نالها الهنا
والسعد له مواعيـــــــــد...
ياأم العزايم شداد
والعـزم فــ الشــــــــده
نفسي أعيش فالرحـاب
لـــــو طالت المده
طالب المدد ع البــــاب
أصـــل المدد عده
يانسل طاهـــر وقـــــادر
ببركـتـــــه يهـــــديني
المــــوج واخدنـي معـاه
يـــاســــت عـــدينـــــي
بر الأمــــان نشــوان
يـــــــاست ودينـــــــــي
دور و شوف النسب
بيتــــوه معــاك العتــــب
قولت السبب معلــــــوم
ف أنت بتسأل مين ؟
دي الســـت أم العـلــوم
يــ أم المقام عالى
والجلســـه معقــــــوده
كل الحبايـــب هناك
ودي صحبــــه موعـوده
أمـــــانه لأجـل الحـبيـب
تقوليلنا وبعوده
و بعوده نحي الفـــــــرح
عاشـــق وقلبى انجرح
تايه وضـــاع فــ الطريـق
والليله قلبـــه انشــــرح
وهو جوه المقام
شجر المحبـــــــه طرح
مســك الختــام السلام
واكتر من الالف عـــــام
والطاهــــره حوالينــــا
ياساكنه فينا بمنام
وقالهــــا خيــر الأنـــام
نفيســــه أحــق بينــــا
-----------------------
( 8 )
الصاحب
حاســـــب مــــن الصاحب
للمخبـــــــــي يبــــــــــــان
لتصاحبــــــه بالمـعــروف
لتفـــارقـــــه با لاحســــان
وخـــــاف من الصاحــــب
اللــــــي كمـــــان زنـــــان
عمـــــرك ما تلقى معــــاه
لا بـــــــــر ولا احســــــان
تسمـــــع كلام يرضيـــــك
مـــــا كلـــــه بالمجــــان
وان جــه مره يواسيـــــك
تحاوطــــــك الاحـــــــزان
وان قـــــال دا ســــر ليك
يحكيـــــه في كـل مكــــان
تســــاْل عليــــه تلاقيـــــه
حاكيــــه لميــــة انســــان
وان شـــاف واحد غريـب
يحكيــــه كمــــان وكمـــان
والبلـــــــــــوه يهمســــلك
دا الســــر في الكتمــــــان
تلقــى روحـــــك بتــــروح
اسكـــــت وقول غلــــــبان
ما هــــو دايــما الزنـــــان
راجــــل مالهش امـــــــان
وان كنـــت مش عــــارف
اســـــاْل وقول يا زمــــان
وايــــاك مـــن الصاحـــب
اللــــى مالـوش صاحــــب
غــــــدار وطبعـــــه فيـــه
ويــــــوم مــا نتحاســـــب
تلــــقاه عليــــك حاســــب
اللــــي مــــا يتـــناســـــب
معـــــاك وهـــايـــرضيـــه
تلقـــــاه يروح ساحــــــب
حقــــده اللى هوه ماليـــه
تبقــــى انت له صاحــــب
سهمـــــه كـــده صايــــب
وسكتـــــــه مصـــــايـــب
في الشــــده ما تلاقيـــــه
على طول يروح سايـــب
حبـــــل الــــوداد دايــــب
وهـــوه ما لــــو حبيــــب
قلبـــــه كمــــان غايـــــب
دايمـــا كــــــده خايــــــب
في الفرح ماله نايـــــــب
ها تصاحبه بقى علي ايه
-----------------------

» الشاعر عبد الحليم الزلوعى . الحضرة المصرية
» أمن دولة ( بالعامية المصرية )
» عبد الحليم الزلوعى . هش
» عبد الحليم الزلوعى . مدد مدد
» عبد الحليم الزلوعى . السبوع