ولسّه مش عايزاني احبك.؟..ضياء الدين البري

السلام عليكم .. كلام من قلبي
أحمد مصطفي البري كتب :

ولسّه مش عايزاني احبك.؟
.....

بتجافيني .؟
وتقولي لي أنسي حُبّك.؟
رغم إِنـّك
بين ضلوعي وْعايشه فيّا
نبض قلبي نبعه منـِّك
نهر يجري جوّا دمّي
وبعيوني لسّه شايفك
فوق جبينك زارعه ليّا
بسمه طارحه شهد حُبِّـك
دانتي وانتي فْ عز بُعْدك
بالقي همسك بيناديني
وبحنانه بيواسيني
وبوصاله بانسي همي
الحروف التايهه منّي
غنوه بيلحنها نبضك
ولسّه مش عايزاني احبك.؟

فوق جبيني شمس حُبّـك
جايبه بكره طرحه ضلك
بين غيومك قلبي شايفك
جايّه شايله نسمه طايره
وفْ سمايا نجمه سايره
إبتسامتك هيّ هيّ
تروي نبضي ونور عنيّا
وبحنانك
تحضنيني بنبضه حيّه
وتقولي لي أنسي حُبّك.؟

لمّا بانسي غصب عنّي
من حناني أسقي وَردك
في الميعاد ينده عليّا
تيجي صورتك وتعاتبني
والقي طيفك بيغازلني
حتي روحي فْ بعدي عنّك
بتناديكي وتخاصمني
وتعاندني وتقرا وِردك
يبقي ليه بتعاندي قلبك.؟
وبرضه مش عايزاني احبّك.؟
دا بْمزاجك
لأ وحتي غصب عنك
اسمحيلي اقول بحبّـك

...

» ولسّه مش عايزاني احبك..ضياء الدين البري
» من غير إحم يابا .. ضياء الدين البري
» بين شطـّينك بالقي حنانك..ضياء الدين البري
» وبضمير الشعب قــرّر.... ضياء الدين البري
» إلطــم خـدودك يـازمــن .. ضياء الدين البري