قصه شعريه بعنوان * عاشور للعاشور *

عاشور للعاشور

زميلنا الوقور محمد عاشور ** نادينا عليه بصوتنا الجهور **

وقلنا ملخص عيشتنا المرار** ماجالناش زياده من اربع شهور**

وهلل ساعتها وذاد الهتاف ** وقال للزمايل معاكوا ما اخاف**

هاقول المرتب أصابه الجفاف **معانا يادوبك فلوس الفطور**

ساعتها انتخابنا عاشور الشجاع ** يناقش ويفهم سياسة البتاع **

وبالعقل طبعا ومش بالدراع ** ويفرض قراره في كل الامور**

وأول أمورنا المهمه ياساده **يزود أجورنا تعود بالافاده **

ومصنعنا يكبر وننتج زياده **زياده تدخل جيوبنا السرور **

وتاني أمورنا ياصاحبي المحبب **ليه الجو:ف الشغل دايما مكهرب

مطالبي البسيطه خميره تعقرب **وتكبر وتعلا ف راس الماجور **

وليه لو تطالب جنابه بأجازه **كإنك خبطته برقبة قزازه **

ويلغي الفرح والصلاه والجنازه ** ولو كات جوازه عروستك تغور

وليه قبضي ميه وغيري مئات **وقالوا ده رزق .. اشتغلت ف سكات **

واطبق عشان أكل عيشي وابات ** ولو قدَّروني .. هاوفِّي الندور **

ومن بعد ساعه تشوف المدير **يقول ياجماعه .. خير ان شا الله .. خير **

علي المولي رزقك ودوده وطير **ياريت كل واحد يخليه صبور **

وساعة خروجنا من الشركه حانت ** لقينا عاشورنا مع الأمن ساكت **

من الضرب صوته ,(ضعيف وخافت) ** جرينا وسيبنا عاشور للعاشور**

عرفنا ساعتها الأيادي الخفيه ** ومين اللي يقدر يدير الوسيه**

وبعنا القضيه وعاشور الضحيه **خسرنا العلاوة و دخلنا الطابور **

نادانا عاشور المعلق وقال **شوية زباله .. وحبِّة عيال **

مافيش فايده فيكو ولا ف النضال *فحتني مديركو وخدت الخابور ؟

ياساتر علينا من الظالمين **وم اللي يبيعك وم الخباصين **

لا مله ف شريعته ولا عنده دين ** يضيع مهابتك مابين الصقور **
...................................
‏"

» قصه شعريه بعنوان * إنتخابات الغابه *
» قصيدة بعنوان - يا مصر .
» قصيدة بعنوان ( بقايا قلب ) للشاعر خالد الزكرى