قصه شعريه بعنوان * إنتخابات الغابه *

إنتخابات الغابه !!

اليوم انتخابات الغابه
فيها أسود وفهود وأرانب
فيها زراف و
حمير وديابه
وكل مرشح واقف يشرح
برنامجه لتطوير الغابه

الأرنب من ورا نضاره
وبيوعد .. وبكل جساره
هيحسن في رغيف العيش
وبجزرُه هيمدّ الجيش
علي أيده الغابه هتتغير
في المنطقه راح تبقي مهابه

قال الديب هيجيب الخير
ويبدي مصالحك ع الغير
ويطور شكل التعليم
ولا يفضل في الغابه لئيم
ويصالح تعلوب أرنوب
ويطبع علاقات الغابه

وزرافتنا ماشيه تتمخطر
بتقول أنا فكري متطور
أنا هافرش شورعنا نجيله
وحفرها راح تبقي قليله
ومرورنا يمشي بقانون
يمشي عكس قانون الغابه

ومرشحنا التالي حمار!!!!!!!
بغشامته ينهق أفكار
هيخصخص شركتنا الكبري
ويبعها بالعمله الصعبه
ويصدر غازنا لأعدائنا
ويورد برسيم للغابه

أما أسدنا .. فواثق أنه
في الحكم أساسي ومع ابنه
قال هبدأ برنامجي بكلمه
لو مره حيوان يعارضني
أو لسِّن علي عظمة أبني
راح أخليه عبره في الغابه

أما الفهد بجد شجيع
جايه فلوسه م التطبيع
بيوزع منشور وينادي
فيه حل لكل المواضيع
المخنوق م الغابه يسافر
ويهاجر عن أرض الغابه

وف لحظة إعلان الفايز
أتجمع سكان الغابه
الكل بيسأل متحير
مين راح يبقي ملك الغابه!!

واهو طالع م اللجنه الفار
ومعاه ورقه فيها قرار
أخترنا الأصلح ريسنا
وحبيبنا وروحنا وحارسنا
أي معارض هايروح رفسه
ماهو في الأصل ياخلق حمار
ماحمارنا بقي ملك الغابه

بجعه سألت قرد كبير
قالت لأ ده بجد كتير
أزاي واحد أصله حمار
يبقي علينا ملك في الغابه!!

قال القرد بنفس الضيق
لعبه اتعملت ف الصناديق
واللجنه الخاينه الكدابه
خانوا وباعوا وضحكوا علينا
بحمار عملوه ملك الغابه

يالا نقول ف الغابه كفايه
دا ما يرضيش حتى الحدايه
قلنا إعاده قالوا نيابه
لو يرمونا ف سجن الغابه
برضو مش هنحيي حمارنا
حتى ان كان بقي ملك الغابه !!!!!!

» قصه شعريه بعنوان * عاشور للعاشور *
» قصيدة بعنوان - يا مصر .
» قصيدة بعنوان ( بقايا قلب ) للشاعر خالد الزكرى