أنا المصرى . للشاعرة نجاة عبد الحليم

أنا المصرى :-

أنا اللى زعلت م الدنيا و كل الناس
أنا اللى قلت انّها فانية و ما بتسواش
أنا اللى قلبى متحسّر .. أنا اللى خانوه الحرّاس
أنا اللى عضمى متكسّر .. أنا اللى انداس
أنا اللى عنيّة ما بتشوفش طعم النوم
أنا المحروم
أنا المظلوم
أنا اللى ضحكته تاهت مع الأيام
أنا اللى عشت فى الأوهام
أنا اللى شمعته قادت لغيره يا ناس
أنا الثورة .. أنا الإحساس
أنا المصرى
أنا المصرى

أنا اللى زعلت م الدنيا و كل الناس
أنا اللى قلت انّها فانية و ما بتسواش
أنا اللى عانى فى سنينه من الأوباش
من الهبّاش
من النتّاش
وم الغشّاش
أنا اللى شفت بعنيّة الأهوال
أنا اللى غرقت فى الأوحال
أنا اللى ضاقت بيه الحال
أنا البايع و انا الشارى و انا الكيّال
أنا الأرضى و أنا الجوّال
أنا الكلمة و انا الغنوة و انا الموّال
أنا الماضى و انا الحاضر و انا مستقبل الأجيال
أنا المصرى
أنا المصرى

أنا اللى الدنيا غرّتنى
أنا اللى الدنيا دبحتنى
أنا اللى الدنيا خدعتنى و بعض الناس
أنا اللى الشوربة لسعتنى و تبت خلاص
أنا لا الطيبة نفعتنى ولا الإخلاص
أنا عمرى ما حسّيت انّى زىّ الناس
أنا المحتاس
أنا المفتاح و انا الترباس
تعبت خلاص.

كلماتى
من ديوانى الرابع " ثلاث شاعرات و ثلاثون قصيدة "
الشاعرة نجاة عبد الحليم

» أنت منى ( الشاعرة نجاة عبد الحليم )
» الصمت الرهيب ( الشاعرة نجاة عبد الحليم )
» اهداء الى من يهمه الامر للشاعرة منال درويش
» اول جائزة من مصر للشاعرة منال درويش
» انساك . للشاعرة فداء زيدان . للمسابقة