القصيدة السياسية - عبيد الكلمة

فى رحلة غريبه مبتهداش
فى دنيا العيشة مش ببلاش
بنتلاقى و نتفارق

لكن فى الزحمة مبننساش

حبة قرارات
ملناش فيها لقمة نضيفه
ملايين دولارات
و احنا مبنشوفش التعريفة
ولا لاقين شغلانه بقوتنا
و فلوسنا تضيع فى التشريفه
و حقوق بتضيع
و النشرة تذيع
و الطبلة بقت شغله خفيفة

و ان قمت تدور على حقك
تلقاك كافر او علمانى
او ليبرالى و تبقا الجانى
و المجنى عليه هو المرتاح
و انت السفاح
الشابط فى رقاب المساكين
ابن الخاينين
ابو كلمة زيف و وعود فاضيين
جلاد الفرصة المقتولة
سارق حق المنسيين
بتدور ع الناس الخايفين
بتزيد خوفهم
تسرقهم من غير ما تشوفهم
او تلعب فى دماغهم بالدين

يابن المساكين ...
ازاى هتدور على حقك
و الحارس واقف بيحاسبك
على لقمة عيش مش موجوده
و ارواح راحت مش مفقودة
و عيون دنيتها بقت سودة
و القاتل هو اللى يحاكمك
الدم .. خلاص داسوا عليه
و الأم .. وجعها بتخفيه
و القاتل نايم مرتاح
متكرم بايدين معاليه

يا عبيد الكلمة الكدابة
فين حق الكلمة المقتولة
فى براءة النخبة المسئولة
فى حيطان زنازين
و عروق مساجين
و ضماير عامية و مقفولة
و الكلمة لمين
محناش عارفين
فين الزيادات المجهولة
و نسيبها لمين
و نقول رايحين
و الدنيا بقت مش معدولة

سبنالكم احلام تبنوها
توهتونا بفكر مكسَّر
سبنالكم فكره تغنوها
سيبتونا واقفين نتحسر
ما خلاص مبقاش فينا مكان
للفكره اللى فى ايدكم تكبر
و ان كنتوا نسيتوا العنوان
لسانا بنرسم و نفكر
هنكمل لو بين زنازينكم
و نعلى الصوت المتأثر
نرجع نهتف زى زمان
يسقط يسقط كيس السكر

أحمد رامى

الشاعر الجميل احمد رامى
مرحبا بك فى بيتك بيت شعراء العامية المبدعين امثالك
انت اسم على مسمى
كلماتك قيمة واسلوبك راقى
ونحن سعداء بحضورك المشرق ونأمل فى المزيد من التواصل
والتفاعل مع الشعراء واشعارهم
وانشاء الله تشارك معنا فى المسابقات القادمة
ونتمنى لك التوفيق والمزيد من التألق والرقى
فلك ارق تحية

لى كل الشرف استاذى بهذه الشهادة التى اتمنى ان اكون استحقها بالفعل
و سعادتى بوجودى معكم فى الربطة لا توصف و ان شاء الله انضم رسميا اليها
كل الاقلام هنا رائعة و اتمنى ان اصل لمستوى قريب من حضراتكم
بانتظار المسابقة ان شاء لله و لى الشرف للمشاركة بها وسط عمالقة من الشعراء الرئعين
تحياتى لحضرتك و تحياتى لهذا الصرح الرائع

» اسم القصيدة ما اعرفوش
» الشاعر / علاء أبوذكري
» قصيدة( الكلمة) للشاعر محمد عبد العزيز عطا