سِفر البداية الإصحاح الثاني

( 1)
كل الناس _ تقريباً _ ..,
شايفني مسيح !!
و بشوف فـ عيونهم ,
نظرة غريبة
خليط من شفقة و خوف
و انا وحدي المؤمن ,
إن إيديه ما هيش مصلوبة ,
إنما جناحات ,
حتخلّق ليا مساحة ...........
أطير

( 2 )
إعتدت
بعد النظرة الأولي لآخر الشارع ,
اغمض عيني و اكمل مشي
مع إن كتير نصحوني :
الشك طريق ,
بيحط فـ قلبك طول السكة يقين .
و برغم وقوعي فـ حيرة
ما حاولتش ,
غير إني أغمض عيني و اكمل ...

(3)
حايلتني عشان تقرالي الكف
بالطبع رفضت
رغم ان النظرة اللي فـ عينها ,
قدرت تقنع كل اصحابي ,
يمدوا كفوفهم

(4)
ما حاولتش ابص فـ نفسي _ بجد _
علشان اتأكد
من إن إزاز نضارتي ..,
ما بيكدبش

(5)
بعد اللفة التالتة
قررت أبص ورايا
فـ لقتني ,
وقعت حواجز يامة
_ الظاهر إني اخترت حصان أعرج ,
فـ تراك مش صح _
بس الظاهر ..,
مش دايماً بيكون تأكيد
و أكيد
إن الشفقة اللي فـ عينهم
مش تأكيد علي إني مسيح
و لا خلتني أفتح عيني ,
بعد النظرة الأولي لآخر الشارع
و لا أفرد كفي لحد ,
لمجرد إنه يمارس طقس عبيط
و أكيد ..
إن الفرص الباقية خطاوي
لسه يادوب حبدأ .....,
أمشيها