التعـــــــــــــــــويــــــــــــــذة

التعـــــــــــــــــويــــــــــــــذة
(1)

(سيهوت..سيهوت)

(بركاس..مركاس)

الهروب م النار دمار

والرجوع مفهوش خلاص

الرماد لازم يموت ،

(بركاس..مركاس)

(سيهوت..سيهوت)

مُوووت

تـ شـ شـ ش

..................

(2)

مخالبها بين الخان

بترص الجمر اللى ف عينها

وبخور الموت

والأتر الباقى فـ إيديها

حتّة منسيّة فـ قلبك

ملفوفة على الدُمية القش المطبوعة

بملامح إحساس الخوف ،

مخالبها السودة

فوق البلّورة السحرية

بتراقبك .

وطاويط القلب المهجور

بتثور وبتطلق

الدم الأسود فـ عروقها ،

والدبوس المسموم

بيشُك الدمية

(سيهوت..سيهوت)

......................

(3)

جوه البلّورة

أدغال

وشعور بالعجز

ودموع البنت اللى فـ قلبك

مش عارفة السكّة

وبتروى الجدران المزروعة

بين الأشجار

وتزود إحساسك ديماً

إنك قش،

سبع جبان،

معدن صدّى فيه الحس،

مش قادر تاخد بإيديها

(الهروب م النار دمار)

.....................

(4)

الدبوس بيخرّم قلبك

وطاويط الشر،

وجيوش الضلمة المبعوتة من جمر عنيها

خطفت منك احلامك

والبنت التاهة اللى فـ قلبك

وقعت فـ الأسر

(الرجوع مفهوش خلاص)

..........................

(5)

سم الدبوس فـ عروق القش بيجرى معاك

والأسد الغاضب

افترس الخوف

لو قلبك صدّى

شراينك بتضخ الموت

احرق تعويذة ضعفك..

إكسر

بلّورة عينها المشروخة

(الرماد لازم يموت)

احرق قلبك

مّوووت.