اعتراف . احمد كامل

إعتراف
لما النوارس قررت ..
تهجر سماية المفتوحة لها
و اما حبيبتي إبتدت ..
ترفض إيدية الممدودة لها
إتسرسبت أحلامي مني
زي حبات المطر ,
علي أرض بور ..
قاطعة المخاض
كل الشطوط مكسية مد
إلا شطي
جذره هد الحلم ..
لحظة الارتحال
كل الشموس ..
فارشة نورها ع البشر
إلا أنا ..
شمسي لمت ضيها
و مرّوحة
سيباني وحدي ..
داخل طاحونة أسئلة
و حبيبتي حاسة ..
إني بضعف .. و انكسر
يا حبيبتي ,
قلبي اللي كان ..
أقوي من جنود سليمان
لساه بيقدر ينتصر
لساني قادر ..
إني اضمك
و الملم الأحلام فـ ضلك
لساني قادر ..
أعشقك
_ لو تعشقيني _
صدقيني
ما بيتولدش الحلم أبداً ..
( مريمي )
و اعترافك ..
باحتياجك ليا مش خطيئة
إعترافك ..
أقصي لحظات اكتمالك
و اعترافي ..
باجتياحك ليا مش هزيمة ,
و باعترف :
أنا حلمي محتاج لك
رحم .

كل اعمال الشاعر احمد كامل متميزه تمنياتى بمزيد من الابداع

» ثورة . احمد كامل
» بشاير . احمد كامل
» أول غناوي العشق . احمد كامل
» سِفرالحياه والموت . احمد كامل
» اعتراف ........... أشرف البنا