قصيدة واحد صحيح

واحد صحيح
هاتلى شىء واحد صحيح
من غير كسور
بس ميكونش اعتيادى
وم التعود اترمى ف اخر الطابور
وكل ما يقرب لشباك انانيتك
يمكن تناوله تذكرة
تسمح لحلمه بالمرور
تزقه تانى بقوتك
ترجعه وتوجعه
وتقوله لسة ملكش دور
هاتلى شىء واحد صحيح
يكون صريح
من غير رتوش
ولا صبغة باهتة على الوشوش
وعند اول مشكلة
بيدوب يبوش
وكل الوانه تسيح
ويبان لنا وش الحقيقة المستخبى
اللى عشنا العمر واحنا منعرفوش
وشها المر الابيح
يصرخ يصيح
معدش بنا شىء صحيح
حتى هوانا اللى اتولد واضح صريح
اللى كان واقف جبل ما تهزه ريح
اللى كان واحد صحيح
بقى جزء من مليون سفر
جنب منه على الشمال
بقى كسر عادى
او احتمال
ممكن يموت
ممكن يطاطى عشان يعيش
ممكن يحارب
رغم انه خلاص جريح
لا هينتصر
ولا عدش تانى ينكسر
لانه خلاص مبقاش صحيح
بقلمى نجلاء نعيم