يا مصر مين ح يزور

يا مصر مين حايزور
مهما الزمـــان ح يـــدور*** أهرامــــــنا زي النــــور
جدي اللي عاش مشهور *** خلاني أخطــــي الســور
وأزرع أراضـــــي البور *** وأزعــــــق بقلب جسور
يا مصر مين حايزور
يا مصـــــــر يا أم الأمم *** أرض الحضاره والكــرم
النيل وجــــــوك والهرم *** يتشاق إليكي اللي أتظلم
من نور جمـالك واتحرم *** إنه يشــــوف بدر البدور
يا مصر مين حايزور

يا مصر يا أحلـــي البلاد في المجد من قبل الميلاد
مزروعه في قلب الولاد ولحد ما يجي الميعــــــاد
بحلم يكون لينا إقتصــاد ثابت علي مر العصــــور
يا مصر مين حايزور

يا مصر يا مهد الحضاره *** يا دايمه للعـــــالم مناره
دا اللي جالك يــوم زياره *** واللي شاف منــك أماره
جو ساحر أو عمـــــــاره *** يتمني يرجــــع أو يزور
يا مصر مين حايزور
الشجــــــــــر لما يميــــل *** في المزارع والنخيـــــل
والرمال تشفي العليـــــل *** كـــل من داقــــك يا نيـل
لازم ح يرجع للسبيــــــل *** والشواطــــــئ والبحور
يا مصر مين حايزور

ف ابو سنبل أو ف الكرنك *** يا جميل وريهــــــم فنك
خليهم يحكوا عنـــــــــــك *** والعالــــــم يشهد إنــــك
فنان وتركت لإبنــــــــــك *** والدنيا تاريخ محفـــــور
يا مصر مين حايزور

رمسيـــس أو عنخ آمون *** تمثــــــالك كله فنـــــون
العالم بيـــــــــــك مفتون *** ومثالك مش ح يكــــون
مثَّالْ أبداً في الكــــــــون *** خلي العالم مبهــــــــــور
يا مصر مين حايزور

تمثـــــــالي كان غرقــان *** في الرمـــله ليــا زمــان
إبني وجـدلي مكـــــــــان *** مشهور في قلب ميـــدان
وطلعت م النسيـــــــــــان *** للعالــــــــم المنظـــــــــور
يا مصر مين حايزور