قصيدة (وتر مِتــــهان) للإشتراك فى المسابقة

نقول كمان
تعزف عليه إزاى صوت الآذان
دابت خيوط الامل فاضل وتر متهان
حبة بواقى ضَىّ
تغزل ضمير إنسان
أنا الماشى على توبك الاخضر
ومتكدر
عشان خلخالك التايه على توبى
بيتمخطر وبيهدر
فى قطرة ميه عطشانه ومتهانه
تسبّح ليه كده بعهدك ؟
وغدرك بيا يتسبح على مُوجُه
وتتفتح....
جناين وردك النونو
فى ننى القلب
و ف عُيونــُــه
بارود أخضر
بيكره شـُوكـُه ومُـجونـُــه
ونتعاتب على جُـنـُـونـُه
ما طبعا غصنك الثاير
بيتمايل على غيرى
وغيرى بيكى مـش دارى
انا السارح ف احلامى
ابيع الحُب روبابيكيا
تفضى البيعه بالساهل على العاقل
وتاخدى المهر م الجاهل
وأستاهل..
مانا العائــل وبتيمم
بكاس المر من يدك
ومية نيلك الاحمر
بتتصفى قصاد عينى
ومتقدر على جبينى
أدوق الشهد متكرر و متقطر
ف دنيا كبيره منسيـــــــــه
بتفتح قوس وتتساءل دى إنسيّه
وتقفل قُوُسُه جــِنيّــه
دى ناس شبعانه مخفيه
وناس من جوعها مَرْميّه
بلا ديّه
إجابتى ليه كده حايره
مابين ديّه وبين ديّه
ويفضل حلمى ف المنفى ..
بيدّفى كده بنارك
تزيدى ليه ف أسرارك
وضى الشمس يتعتم
تعدى النظره سرحانه
وتلمس خدك المرمر
ومر الكاس يداوينى
ويا ويلى من المنكر
وأفديكى
الاقى النظره ف عنيكى بتتنكر
وِرَايَدَه دمى متعكر
وكل الناس حواليكـى
بتحكى قصتى ليكى
من الماضى... لحد الان
وهمس الناى بيشجينا
بيرسم طيف نواحينا
وتترمل خطاوينا
هشد ف وترى للآخر
وأقول للماضى أتآخر
بهمسة صوتى والأَنــْـــه
يرد الحاضر أتأنى هتتهنى
ونفس اللحن يتحنى و يتمنى
يغنيلنا مع الكروان
نقول كمان
تعزف عليه إزاى صوت الآذان
دابت خيوط الامل فاضل وتر متهان
إروى ف حضنـــك ضىّ
طرحك يكون إنسان
ونقول كمان....

الشاعر الجميل وائل حسين سيد عمر
وشهرته وائل عمر
شكرا لك على مشاركتك فى مسابقات
رابطة شعراء العامية المصرية
ونتمنى لك التوفيق بالفوز
فلك محبتنا واجمل الزهور

شكرا لك شاعرنا الجميل وائل عمر
لمشاركتك فى مسابقات رابطة شعراء العامية المصرية
ونتمنى لك التوفيق بالفوز
والتواصل المستمر معنا عبر هذا المنتدى
خالص شكرى وتقديرى

شكرا لك نجمنا الجميل
( الشاعر وائل حسين)
لمشاركتك فى مسابقاتنا الحالية
مسابقات رابطة شعراء العامية المصرية
ونتمنى لك التوفيق بالفوز والتألق المستمر
فلك محبتنا واسمى التقدير
[b]

» قصيدة " بورتريه " ... للإشتراك فى المسابقة ...
» للإشتراك في المسابقة الكبري (للشعر العامي) قصيدة ( المزاد )
» الشاعر / هانى يوسف - للإشتراك فى المسابقة
» أغنية " الألف ... والهه ..." - للإشتراك فى المسابقة
» موال ( الذل بنزاهير ) للإشتراك فى المسابقة