علــــ القــهـوة

بقولك ايه يا حكيم
وانتا يا عكاشة
ولا بلاش
أصلي هقول ايه
الزمن ماخلاش
وبعدين كل الكلام انتو عارفينه
خابزينه .. وعاجنينه
وهارشينه..
ده انتو بتشربوه
وعلى القهوة والناصية
بتقولوه ..
طب ده اللي كنت هقوله
مطلع عينكم
مغلبكم.. وتاعبكم
ولا عمره سأل
عنكم..!
ولا قال فينكم..!
والله انا مش أنبوبة غاز
ولا بوتاجاز
ولا هي فازورة ..
ولا الغاز...!
أنا بس بهدي النفوس
أنا صوت منحوس
أنا صوت كل الغلابة
اللي معهاش فلوس
واللي بتسهر تبوس
كفها ..
وتحمد ربها ..
على كل حال ...!
اه صحيح
على كل الحال..
بدل ما احنا قاعدين كده
ما تيجوا نثور..
نعمل مظاهرة ..
على باب الحارة
أو في العبور...
ولا بلاش ..
خلينا قاعدين
أحسن تقولوا اني
بنزين ..
أو حبة فياجرا
أو كيروسين
أو وزارة بتصدر الغاز ببلاش
لولاد الـــ......
ولا بلاش...
خلينا ساكتين
طب هقولكم على شيء تاني
أنا أصلي أناني
والزمن خلاني ..
راجل شراني..
اه .. انا شراني!
شيطان
بركان
وزير الاسكان
وزير المالية.. بلطجي
لا .. مش هوا اللي بلطجي
أنا .. أنا .. يتكلم عني أنا
أنا شمحطجي
وبميت لسان ...!
يابني انتا هوا
ما تردو عليا
ساكتين ليه
اوعوا تكونوا خايفين
انتو محششيشين؟؟
طب فاكرين ..
من ثلاث سنين
لما رحنا القلعة
والحسين..
كان في شلة عيال كده أونطجيه
بتبيع حاجات الصين
يا ده كان يوم
فاكرين..؟
يوميها جت الحكومة لمت كل الغلابة
اللي واقفين
وانا كنت بعربية كبده
واقف في القلعة
أو في الحسين..
بعمل سندوتشين
جاللي واحد من اياهم
وقال ايه
بقوله : عايز ايه
لاقيته بيلم الخزين
بيكسر العربية
وبيضرب في الزباين
وعامل كمين..!

فاكرين ..
نطيت في كرش أمه
خليته يختشي على دمه
صعب عليا
واديته السندوتشين
أه اصل الناس دي غلبانه
طول النهار جعانين
شكلكوا ماكنتوش واقفين
اومال كنتوا فين ...؟
مابترودوش ليه
انتو ليه ساكتين؟!
شكلوا كده هيستوا
أو تيستوا ..
أو مسطولين..!
لا بس خلي بالكوا..
انا جامد أوي
لا تهمني حكومة
ولا داخلية..
ولا خارجية..
دول بلطجية ..
يادي النيلة ..
كان قصدي أقول
دول صحبجية
وعلى فكرة ..
أنا قابلتهم كلهم
وكلهم صحابي ..
عايزين أمارة..؟
يوم في العمارة
وأنا رايح اعمل البطاقة
القومية ..
قصدي الصحية
اه .. أومال ايه ..
لاقيتهم عمالين ربطية
حاجة كده زي الجمعية
ياخدوا منها فلوس الغلابة
اللي زينا ديه
وقال ايه الريس بتاعهم
اسمه جيمي..!
ده اسم يقابل بيه ربنا!
شكله كده واحد خواجه
مش من هنا...!
وكانوا بيقولوا حاجه كده
عن واحد من عندنا

عارف يا حكيم
ها يا عكاشة
اللي عايز أتكلم عنه ده
حتة واد زي البغاشة
شبه البغاشة
لا تقولي كوسة
ولا فقوس
معاه حبة فلوس..
شكله كده عامل للربطية
كابوس..
أصلوا موكوس..
مش عايز يسمع كلامي
ياما قلتله ..
انها عصابة
شجر في غابة
وهوا السوس

انتو ساكتين ليه
ماتردوا عليا ..
هوا انا بكلم نفسي..
مالك يا عطية
وانتا يا عكاشه
في ايه يا مرسي؟!

بتشاورلي ليه؟؟
أبص ورايا ...؟
ليه ...؟
هوا من اللي كان سامعني؟

دستور يا عينيا
ميـــــــــــــــــــــن؟
الداخلية...!!!


يا باشا... يا باشا
دي شلة بكاشة
من الصبح قاعدين
بيقولوا في كلام أونطة
اشي عن توحة وحواديت طنطا
وحكيم وعكاشة..
طب دي حتى القاعدة اسودت
وانا قربت اتعمي
وعلى فكرة يا باشا
لما الريس يمشي
هرشح جيمي..!
واغنيله .. وأدعيله
الهي يفك كربه ..
ويتغني ..
ويقدم لابنه في الكلية..
ابن الناس الحرامية
يوووووو...
قصدي المفترية
لامؤاخذة يا باشا
قصدي البلطجية
....
قصدي الشمحطجية
.....
العواطلية..
....
المدلكاتيه..
..
مش عايزة تيجي الكلمة اللي جوايا يا باشا
قصدي ..
قصدي...
قصدي البغاشا..
يوووووووو
البوكس فين يا باشا ؟؟؟!!!!!!