خمسة أدان.....أيمن عبدالعال سلامة

إبنى الغالى الأسطى فريد
أنا أبوك يا أبنى الحاج يزيد
بكتبلك من زعلى وعشمى
ليه بتغير فى المواعيد
إزيك وإزى عيالك
إوعى تقول فى الغربة سعيد
وإزى مراتك
والست حماتك
حقا صحيح نازل فى العيد
إشّوّقنا يا ولدى لشوفتك
ما أنت غريب من عمر حميد
وحميد أصبح رجل طولى
ومن شهرين دخل التجنيد
وأختك فاطمه خطبها عريس
شوقى ابن خميس الحلاق
اللى كان وياك فى باريس
واللى بعت معاه بلطو أُمك
صدرها يا أبنى نفسه يُضمك
حقا صحيح يا فريد يا ضنايا
الستات فى فرنسا عرايا
والرجالة هدومها خنافس
أنت يا واد مش قولتلى إنك
بتخيط للناس دى ملابس
يبقا إزاى شغال طوالى
دا أنت زمانك قاعد لايص
يا أبنى فريد من حق أنا سامع
إن بلدكم من غير جامع
واللى تقوله الجامع فين
يعمل أطرش وماهوش سامع
وحقا صحيح فى فرنسا دى خمرة
وخدود الستات كالجمرة
ويعشقوا واحد إسمه فرند
خاف يا فريد على مرتك عندك
واكسر ضلع لبنتك هند
لأحسن أطخك بعيار واحد
حتى أن كنت فى أرض السند
وانت عارفنى يا واد يا فريد
لما بيركب راسى العند
وابنك يا أبنى الغالى نيازى
إوعى يروح أفراح فى الحته
فيها عوالم فيها غوازى
عيشة الناس دى حرام فى حرام
فضها يا أبنى وانزل مصر
قبل ما تندم ع الأيام
ملعون أبو فلوس الغربة
اللى تخسرنى الإسلام
يعنى عادات الناس دى إنساها
وإوعى تسيب مرتك لهواها

ملعون أبو فلوسهم يا أبنى
ياما فقير بيعلّى ويبنى
طول ما هو عايش فى الإيمان
إرجع مصر يا ولدى بسرعة
إبنك فيها يعيش فى أمان
يعرف دينه ويعرف أهله
والشيطان هيخاف يندهله
طول ما بيسمع خمسة أدان
طول ما بصلى خمسة أدان
..........................................