الغراب النوحي

الغراب النوحي
__________

في يوم صحيت من نوم تقيل
لقيت دماغي ع المخدة بتنفرم
وصوت رهيب خلى وداني تنخرم
كان صوت غراب النوح مجلجل ف السما
يصرخ ومالي الدنيا نعق ونمنمة
كان يوم خميس
قبل الغضب ما يعم نيل القاهرة
لما الكلاب
قتلوا الشباب
اللي ف قلوبهم
شالوا حبك يا وطن
وفي الميدان
كنا واخدين الأمان
كنا واقفين ديدبان
قال الزمان
ثورة شباب أخضر
بيشرب مية النيل العفي
شعبِك وفي
يا مصر عمر شباب نهارك يوم خفي
تستحلفي
وتقولي لموا ضفايري من فوق خد السما
نبدر بدور الحب فوق أرض الميدان
لكن الجبان
يحصد سنابل القمح الاخضر
من فوق ضهر الجمل ويا الحصان
أصله جبان
فضل الغراب النوحي ينعق ف البلد
بس الولد
شايل ف صدره حبك يا وطن
حارب الزمن
بقى يستخبى ف حضن أخوه
ألا يطلوه
برصاصة غادرة جاية من فوق السطوح
ما هو الجبان
يخاف يقابل الولد من غير سلاح
سكت الكلام
والبندقية اتكلمت
في إيدين جبان