مشاركاتي في مسابقة شعر العامية ( أحمد كامل)

1- نبوءة

أغرب شيء ..
هذا الذي ,
بينك وبينهم إستقام ,
لما جواك انحني
إرجع بضهرك .. كام سما
فاكر ..
فردت كفك بساط
وفتحت قلبك مراية ,
لقلوب البشر .. كرهوك
بعّت دمك ..
بخور الطيبة لعروقهم .. خانوك
كل الصوابع علّمت ,
علي وشك الملحمة
لحظة .. عمي
خطفت عيونك م الطرق .. تاهت
ملّت خطاك من سكتك .. فرّت
فرضت عليك المشي ,
وسط البشر .. رفضوك
رفضوا وجودك ..
فـ المدى الحاضن لشوفهم
جايز لأنك تمتلك ,
بعض أسرار اللي آتي ..
خافوا منك ؟
خافوا إنك تكتشف زيفهم ؟
فاضت عيونهم بالغضب ..
حاربوك
مارست طقسك فـ التنبؤ ,
لكن نجومك لم تبـُح ..
فـ حاربت
طلقت سهمك فـ المدي
لكنه عاد لك مُنكسر
خانك فـ وسط المعركة قلبك ..
خسرت
فاخلع قناعك وارتحل ,
عن ضلك المهزوم
وشك خلاص ..
ما عادش يسري سماحة فـ عيونهم
صوتك خلاص ..
ما عادش يرمي براءة فـ قلوبهم
شكلك غريب بينهم
دبلت ملامحك ,
و فـ عيونك ,
إنكسارة طير جريح
مدبوح نهارك ,
فوق جدار الصمت ليه ؟!
خايف تبوح ؟!
مدبوح .. و خايف !
دمك السايل علي كفوفهم ..
عسل
دمعك الساقط علي خدودك ..
براندي
عشقك لهم تخاريف
شكلك مخيف
متخيلك ..
لما راسك ..
فجأة عنك تنقلع
و اما كل الجيفة تتحول .. ديابة
تشرب فـ دمك
تسكر بدمعك
تبرق عيونك ..
تنطفي
تلمع عيونهم
تبرق عيونك ..
تنطفي
تلمع نيابهم
تبرق عيونك ..
تنطفي
روحك تفارقك ..
ينهشوك
دلوقت لازم تعترف
لا انت المسيح المنتظر ,
ولا كنت يوم بينهم ..
نبي
______________________________
2- مشاهد من حدوتة عجوزة

إضاءة
الوقت ,
بالونة حكاوي بتنفجر ...
جواك
ينزّ جلدك حقايق
تعرق أغاني بطعم حزنك ,
و إحساسك بالدخول
فـ التيه

مدخل
حترد بإيه
إذا أحلامك الموؤدة
سئُلت
ما دافعتش عنها ليه ؟
وليه ..
سلمت نفسك للوجع
و عملت من حزنك قصايد
رغم اقتناعك ..
بإن الشعر ما بيطرحش
بكرة ؟

كلاكيت
راجع بنفس الذاكرة
و بنص حلم
واسع عليك توب البراءة
حلمك بيسقط
رغم ادعاءك ... الوصول
لسر أسرار التواصل
تجاعيد شذوذك
نحتت فـ وشك
مشوار قلق
لعيونك الكافرة
و معافرة ,
خطوة قدمك التايهة
فـ سكة دخلتها بنفسك ,
وروحك
اتشعلقت ع الباب
بقيت منسي
فـ أبعد ركن فـ ضلوعك
بتعّد فـ خطاوي الوقت
و الوقت أبطأ ,
من خطاوي المهزومين
سرسب الخوف جوة قلبك
فاكتشفت :
لحظة وصولك ,
لحظة بداية لموت ..,
بطئ

فلاش باك
قابلته
طفل عنيد
بيحاول يرسم نفسه ويخرج ,
من عبايات اللي محاصرينه
وبيحلم ..
يلقي لنفسه ,
وسط الزحمة مكان
كان ,
- وبكل شقاوة عمره –
بيشخبط علي جدران القهوة ,
ويطفي سيجارته فـ سرفيس الشاي
وبيعشق كاس الخمرة
والبنت اللي بتتكلم ..
فـ الجنس
كان .. مجنون
لكن جواه
طفل بيحبي

ستوب كادر
نهجت عينيك
و النهار لساه بعيد
و الشموع اللي فـ إيديك
حيجيلها لحظة و تنطفي
هل حتقدر تستمر ؟

هامش
لو ضاعت منك لحظة
ما تبكيش
خسارة تضيع لحظة كمان

زووم
بيعافر .. تاني
رغم ان إيديه مش طايلة
وسماه ,
عمّالة بتبعد أكتر
لكن .. بيعافر
يفتح توابيت أحلامه ,
وينفخ فيها ,
روحه الباقية
جايز ..
تتسحّب روحه لقلب الموت .. حياة

فينال
بسبورك .. قديم
محتاج تجدد .. دم ترحالك
أثناء غيابك
حاجات كتيرة اتغيرت
وعشان تواصل
مضطر إنك تنتزع ,
م الوجود .. تأشيرة تانية
__________________________________
3-اللي بتتشعبط _ دايماً _ علي حبل أفكاري

(1)
أوقات كتير
بسرح فـ ملكوت اللاوعي
يرصد خيالي حاجات كتيرة ..,
و يدلق التفاصيل فـ روحي
أتأمل البحر اللي أعلن ملله مني _ من سنين _
و انفعال الصيادين
وموجة بتطرطش ..,
ع الهربانين م المدرسة ..,
يغرق الضحك وهدومهم
و علاقة لسه بتتولد
وعلاقة يمكن تنتهي _ فـ اللحظة دي _
وعلاقة بتحاول تأقلم نفسها
أطفال فـ عز الطل نايمين ع الرصيف
منظر أكيد يصعب عليك
لكن ..
لازم تخاف منهم
إيد الأشارجي اللي فـ جيوبه ..,
و السكة رايحة وجاية
الأتوبيسات _ الترمايات _ الميكروباص _ العربيات العجيبة _
الموديلات الغريبة _ المحلات اللي بأسامي أجنبية _ البيوت الواقفة ع الكورنيش بقالها 200 سنة _ المباني العاكسة للضوء و الحرارة _
الفنادق _ الإضاءة ..,
و الشحاتين ..,
_ اللي اكتر م الزباين ع القهاوي _
و القهوجي ..,
اللي كل دقيقة ييجي ويزاولني
_ علشان اسيب فوق الحساب بقشيش _
و النخل شايف كل ده و رايح و جاي مع الرياح
تفاصيل كتيرة بحاول اخطف منها فكرة
و ابدأ اتفاعل معاها
تنضج و تبدأ تترصد
و يادوبك امسك القلم
تبرق صورتها م بين عيوني و الورق ..,
فلاشات

(2)
لا عايزة تموت ..,
و لا عايزة تسبني أعيش
كل مرة تنط لي ..,
و تكُب روحها ع الورق
كرّهتني فـ كل لحظات اللاوعي
_ اللي بتمناها تحضر _
وكل ما اتحرر واقاوم
ترخي علي عيني السنين
بتعاندني
ضخت وجودها فـ دم لحظات ..,
هي عارفة إنها لحظات وجودي
فـ اقّطع الأوراق .. و ارّوح
(3)
هية .. هية
يبقي الحل أكيد ..,
مش إني أبطل شعر

أحمد كامل


[/b]