{ 1 }مشاعر متشقلبة { 2 } اتكلموا { 3 } كراكيب مصرية

مشاعر متشقلبة ـــــــــــ [1]

مانيش قادر على هجرك
وانا ف حضنك وضمانى
ولا قادر على قربك
ونار الغربة كويانى
وأعمل أية ... ؟!
أعمل أية ؟!
وأنا عاشق
وسهمك ف الحشا راشق
وضيك ف العيون أشباح
وحِبك ف البلاد سواح
وفجرك ف الضباب مخنوق
وخصمك ع الولاد مزقوق
وصوتنا يرن ف الملكوت
وشيفانا ف كلام وسكوت
وحراسك ف عز النوم
يوم يصحوا يجيبوا اللوم
على عاشق محياكى
سنين العمر وياكى
ولا الراحة كانت قربك
ولا قادر على هجرك
ولا قادر على بعدك
أتارى الأمر مش أمرك
ولا سهم الحشى سهمك
ولا خلودك ف موتى شهيد
ولا حياتك ف كونا عبيد
يابنت الأية بحبك موت
وقطر العمر لو هايفوت
ولا أحسب لعمرى حساب
مدام الفجر دق الباب
أنا وياة لحين ما يطل
منا عاشق يا ست الكل
أنا
عاشق
يا
ست
الكل

الشاعر * معوض مسعد العباسى
5 يناير 2011


******************
******************
******************


إتــكــلــمــوا ـــــــــــــــــــ [2]


علشان حدود الأدب
قالوا الكلام من فضة
قولتوا سكوتنا دهب
ولحد إمتى دهبكم ؟
خزينه حتى ذِهابكم ؟
يا مغلوبين بسكاتكم
الديب بطبعه غلب
يا ثورة المتكممين
م الودن شيلي العجين
هِِدي سدود الطين
واستشهدي بحطين
عزيمتنا باين عجزت
ولا جتتنا اتلذذت ؟
بلدع كرباج الأنين
يا غلابة بالقدرة
القهر مش فطره
والغولة مش شاطرة
لموا اللي فاضل منكم
واللي بنضاله يؤمكم
يالله احفظوا
ماء وجهكم
وخلوا ريحة
لدمكم
اتذيلتم
ديل الأمم
وانتو اللي كنتم
في القمم
ملعونة دي
شلة رمم
لما ساقتكوا
بجهلها
وخير بلادكوا
في عبها
تتسرحوا
ويتصرمحوا
تتأرجحوا
ويتمرجحوا
واكلين شقاكم
تفرحوا
مفروض عليكم
تمدحوا
أدي الديوك
من زمان
بيأدنوا
والمجاذيب
وسط الشوارع
يلعنوا
الأمريكان
الشرق كله
تلونه
إتألموا
ياللي انتو ناقصين
تتسننوا
إتهمموا
جاي الطوفان
ومعاه بيان
بيقول لكم
بلاش عناد
أحسن لكم
كل العبيد
اللي إلتزموا
حدود الأدب
إستسلَموا
فاتــكــلــمــوا
إتــــكــــلــــمــــوا
إتـــــكـــــلـــــمـــــوا
ـــــــــــــــــــــــــــــــــــــ

الشاعر * معوض مسعد العباسى
كُتبت هذة القصيدة 25 سبتمبر، 2010‏ قبل اندلاع ثورة يناير


******************
******************
******************


كراكيب مصرية ـــــــــــــ [3]



بعد ما قومنا خلاص يا خوانا بثورة عظيمة

جاى المجلس بيرجعنا لأيام ريما

طب مشكاح نام على شيزلونة

مركز طبى حصانة وعرينة

والألضيش م الحبس يدينوا

كل شريف كاشف لجريمة

والأسرار صندوق مقفول

والثوار ف الحلبة تدور

والمجلس وياة المفتاح

والمفتاح محتاج لكفاح

والعنف سكن الشوارع

والشرطة لا حارس ولا مانع

والصامتين طلبوا استقرار

والنخبة بين جنة ونار

والأحرار قابضين ع الجمر

والميادين وبهائها اسمر

والذكرى الأولى للثورة

دايرة يا مصر نفس الدورة

والثورة لسلها موجات

وثكالا ف عويل واهات

ومصابى الثورة المجاريح

كالقشة ف مهب الريح

ياحكومة ارحلى او ثورى

قوم ترحل ويجي الجنزورى

والأحزاب يبنوا القواعد

والإخوان حصدوا المقاعد

والتيار السلفى عنيد

جى بصدمة ف ظرف فريد

وشبابك يا ثورة مكانهم

ف الميادين معروف عنوانهم

هما الضامن هما الحارس

هما جوادك هما الفارس

هما الشمس لبكرة الجاى

هما القمرة ف ليل نساي

هما النسمة ف ربيع آت

هما الكلمة ف عز سكات

كلمة حق تغير مصر

فعل بحق يغير مصر

كلمة حق تجيب النصر

فعل بحق يجيب النصر
ـــــــــــــــــــــــــــــــــــــــ

الشاعر * معوض مسعد العباسى
8/12/2011