التعلب فات

التعلب فات فات
في ديله سبع لفات

التعلب مكار وعنيد
مش عاوز يخرج م البيت
بيحرك كل العفاريت
وف إيده عود الكبريت
والولعه عنده بمعاد
لجل يولع ف الازمات

التعلب فات فات
في ديله سبع لفات

التعلب لابد ف الغيط
ومخوف كل الكتاكيت
ف العشه نازل تنطيط
وفاكرني أهبل وعبيط
ورسم لي عفريت ع الحيط
وخيالة بيشطح شطحات

التعلب فات فات
ف ديلة سبع لفات

التعلب راجل مسئول
في شبابه باني الاسطول
وف شيبه إتحول غول
لو نبكي يضرب على طول
لو نشكي يعمل مسطول
وف بيتي زارع شبكات

التعلب فات فات
ف ديله سبع لفات

التعلب عايق ومنشّي
لو أصرخ يضربني ف وشّي
طول لِيله بيهدد عشّي
وبرجلة بينط ف كرشّي
له عاده بيهرّب قرشّي
وبيحكم بقانون وصاجات

التعلب فات فات
ف ديله سبع لفات

التعلب لابس أرنوب
وكلامه معسول حبوب
و ب ديله بيحدّف طوب
وميزانه ديما مقلوب
والضارب عنده مضروب
بيحب يقلد حركات

التعلب فات فات
ف ديله سبع لفات

التعلب ساكن ف جنينة
وبمالنا بيمّن علينا
بيلم الإذاعات حوالينا
وديوكنا هتتحول زينة
وتعالب تلبس أسامينا
وصورها ف كل الأفيشات

التعلب فات فات
ف ديلة سبع لفات

التعلب بيبُـــص لفوق
والفرخة محتاجة تفوق
وولادها بتحب الذوق
و العشة محتاجة تروق
وياتعلب ديله متحنّي
ولأمتي هتقعد مستني
إديني أماره وطمني
عايزين نتبسم بسمات
ونغني التعلب فات

أحلام البشر
أوقات بحس ان الأيدين
متكتفيين.............
وإني كطير مسجون بيحلم
بالحيــــاه ..........
فأهرب على سريري أغفًل
حبيتين............
يمكن ألاقي ف نومي مهرب
أو نجاه .........
بلقاني طاير ف الفضا
فارد جناحي..........
ف الأرض رزقي وف السما
واخد براحي.........
علي غصن شجرة في سكتي
بسهر ونام .
ونسيت حكاوي الكذب
ونسيت الكلام .
وفرحت بالطير اللي عشش
ع الشجر ....
أحلامنا وخدانا .
بنوصل للقمر ....
لكن .. ف قلب العتمه جاني
صوت حزين !!
فتح عينيا المقفولين
تحت الجبين .
قاللي . ده طيري ع الشجر
مش للغُنى ...
بهرب من الغربان
وغدر الصياديين ..
بهرب من النسر اللى طاير
ف السما ....
كان نفسي أعيش ذي البشر
متأمنين !!!!
وصحيت لقتني ف فرشتي
بضحك وأقول .
يمكن الاقي ف دنيتي
ناس طيبين ...

حميدة وأبو الطربوش
حميدة قاللي يا بو الطربوش
يا مثقف الحتــــــــــة بتاعنا
إزاي أعيش من غير ملطوش
والبيت بتاعنـــــــــــــا مسقعنا
قاعد في كشـــــك مسميه بيت
أصل البيوت ملهاش معْــــــنا
أحـــــلم وأحـــــــلم ولا مليت
بؤوضـــــــــــــة واحدة تجمعنا
أنا وأم سيد والولـــــــــــــدين
وإزاي نقــول مين يسمــــــعنا
أنا أصــــــلى راجل على قدي
عايش ويومي أهو بيعــــــدي
ما تشوف لي حل يابو الطربوش
يا مثقف الحتــــــــــــــة بتاعنا
بصيت وقلت الجيب مفيهـــوش
يا حميدة أنا برضــــــــــك زيك
عايش كأني ديك منفــــــــــوش
لابس هدومي ومتشيـــــــــــــك
ما حلتي غير حتة طربــــــوش
والبدلة ده حلـــــــــــــــــوة عليا
ما تشوف لي كشك يابوالحماميد
ويكــــــــــــون جميلك في عينيا
أسكن بدال شغل التنطــــــــــيت
وأحلـــــــــــــم بأوقاتي الجــــاية