ثلاث أغنيات للمسابقة

الأغنية الأولى
------

بتجرحني
--------
بتجرحني
ودابحني
وجي تقول أنا مسامحك
بقى تخوني
وتقتلني
وتشكي بإني أنا ظالمك
دا أنا اللي كنت باتمنى
أعيش وياك ف الجنة
لكنك خنت
وجي دلوقت
بتطلب مني أسامحك
-------
تعبت كتير من هجرك
ودقت مرارة الحرمان
وشوفت الويل على يدك
وخلتني أعيش حيران
وجي دلوقت تشكيلي
مرار البعد عن عيني
وانا عمري ما خنتك يوم
وكنت زماني وسنيني
لكنك خنت
وجي دلوقت
بتطلب مني أسامحك
-------
كرهت الحب من سيرتك
عشقت الجرح من صورتك
ولما الحزن ناداني
لقيت الفرح ناساني
وانا اللي ف قلبي خبيتك
وكنت اتمنى تهواني
لكنك خنت
وجي دلوقت
بتطلب مني أسامحك
-------
يا ظالم ليه بتظلمني
وتشكي وانت ظالمني
وتجرح قلبي في حبك
وبعدك كان على عيني
لكنك خنت
وجي دلوقت
بتطلب مني أسامحك
بتجرحني
ودابحني
وجي تقول أنا مسامحك
بقى تخوني
وتقتلني
وتشكي بإني أنا ظالمك
------------------
الأغنية الثانية
---------

نادم
---
أيوة نادم
مش لأني ف يوم عشقتك
أو لأني هويت جنونك
ندمي كان على الليالي
اللي راحت من غير عيونك
أيوة نادم
لما كان بيعدي يوم
من سنين العمر بيا
كنت باحزن إن قلبك
كان ف يوم مش بين إيديا
خدني حبك من زماني
والحنان دا كتير عليا
بس حبك كان سراب
ضاع معاه كل اللي ليا
وابتديت أرجع وأندم
ع اللي راح قدام عنيا
أيوة نادم
ع الحنان اللي التقيته
بعد ما عدى الزمان
كنت فاكر إن حبك
كان هيديني الأمان
وافتكرت إن الليالي
عوضت عمري اللي كان
بس لما فتحت عيني
كانت الأحلام هوان
وابتديت أندم عليها
وع الليالي والزمان
أيوة نادم
ضحكتك كانت سراب
ضيعت مني الكلام
وانتهت أحلامي مني
والسنين مرت قوام
أيوة باندم ع اللي راح
من زماني ومن حناني
بس مش هانسى الجراح
مهما أخدتني الأماني
-----------------
الأغنية الثالثة
---------

لحظة سكوت
------------
كنت فاكر إن حبك لما هاجي
هيناديني
كنت فاكر إن قلبك لما هازعل
هيداويني
بس ليه لما اتقابلنا
كان في بينا
شيء غريب
لحظة سكوت
********
كنت عايز ألقى صورتك
يوم ما هاجي
زي صورتك يوم ما سيبتك
تبتسم لما تلاقيني
تنجرح لو غبت عنها
بس لما رجعت ليكي
متلقيتش في عنيكي
إلا شيء بيهدني
متلقيتش فيها أي شيء
غير السكوت
كنت خايف منه موت
**********
كنت باحسب بالدقايق
إني أرجع ليكي يوم
بس لما اليوم دا جاني
متلقيتش حنان إيديكي
متلقيتش إلا بينا شيء غريب
لحظة سكوت

» ثلاث أغنيات للمسابقة أسامة العيسوى
» ثلاث قصائد عامية للمسابقة الشاعر / حسن سعد حسن
» رباعيات عصام قمر للمسابقة الكبري
» قصيدة باشتاقلك للمسابقة الكبرى
» أغنية عارف للمسابقة الكبرى