الشاعر (مدحت عطية) 1) فعلك هانك - 2) مُش نص ثورة - 3) ناديت عليكى

فعلك هانك (1)

لو فى مكانك
ومظلوم
كنت هصرخ
كنت هقوم
ماكونتش ها قبل
أنام
ماكانش هيكفينى
هدوم

مين غيرك
هيدافع عنك
مين غيرك
خلاك .. كوم
مين دلوقتى
قُريَب منك
مين خلى تاريخك
كله .. يوم

كنا نقول
عايزينو ياريس
وتقول .. لأ
كنا نقول
فلان ده .. كويس
نلقاه .. يتزق

كنت شايف
ناس حواليك
بتزيد فى الشق
عمرك يوم
ما تغير على مصرى
أو على حق

لسه بتحلم
تلقى .. صفوف
نفسك تسمع
ضرب .. كفوف

نومتك
فيها .. خوف
فيها مكر
فيها لف .. وطوف

نومتك
فيها .. إدانة
فيها جبن
فيها .. إهانة

لساك برضه
بتستغبانة
بتستعمانة
عِندك قالك
إن شعبك
كله .. فى حانة

جه من شعبك
إلـ بعمره .. زانك
وجه من صلبك
إلـ بفعله .. شانك

خنت ناسك
عقلك فكر
قام .. خانك
هونا عليك
فعلك قام .. هانك


مُش نص ثورة(2)

لو طفوها
مُش .. هتلمع
لو خانوها
بجد .. توجع

لما تخطى
أوعى ترجع
لما تقوم
أوعى .. تركع
أوعى بعد الصدى
تستنى .. تسمع

آخر الطريق
مُش .. فى نصه
كمله
أصلب طولك
إتحمله

لون علمك
زينه .. جمله
غنى نشيدك
أوعى .. تَهَمَلُه

على صوتك
إدى .. حس
قول للسكات
هُس
الشمس بتطلع
بُص
قاطعين .. ثورة
مُش .. نص


ناديت عليكى (3)

سألت ..في بُعدك
كل الشوارع
ناديت عليكى
في أدان الجوامع

جريت
مسكت شمعة
وناديت
خانتنى دمعة
وبكيت

بقلب .. أم
تاه وليدها
بدمع طفلة
سرقوا .. عيدها

بجناح طير
مكسور
بصوت مظلوم
ورا .. سور

ناديت .. مع إنى
صوتى هرب منى
صرخت .. مع إنى
الصرخه بتهنى
وبرضة .. ناديت عليكى

يمكن
ضعتى منى
ويمكن .. تهتى عنى
بس حنادى
وحدور على منادى
صعب أعيش بعيد
عن أرضى .. وبلادى

الشاعر : مدحت عطية