بيت العيله

بيت العيله
بيت العيله وااسع خالص
ساكنين فيه من 30 عام
مزروع شجر وخيرات ياما
تكفى لمليون سنه قدام
لكن عيبنا فـ رب الاسره
استبدادي وإحنا ارضينا
يجنى الخير ويحطه فـ جيبه
يلبس هو ويعرينا
نشكى يقول أنا حاسس بيكم
آه.. على فكره !! دا حرر سينا
بس حبسنا وداس على راسنا
واستحمَلنا يبهدل فينا
باع البيت من غير ما يشاور
وكمان باعه بالتقسيط
مره فـ مره غير طبعه
وحبه فـ حبه باع الغيط
جينا نخش البيت طردونا
وقالو صاحبكم فكره عبيط
ساب الأرض لناس من غفره
يعنى صاحبكم هيبورها
قلنا نكوٍٍِِِّن مجلس منا
ونرجع للأرض خضارها
قام بسلامته لف علينا
وعمل شله تبعياته
وبدال ما يخضر أراضينا
عبا صاحبنا كل بلاته
يومها صحينا وبانت لينا
انه ما كانشى على نياته
كان بيخطط يهدم بيتنا
واستغبانا وكنا أداته
قلنا دا لازم يلزم حده
هندافع ع البيت ونثور
أفضل حاجه نقوله ياخاين
الدايره دايما بتدور
احنا البيت كان ملك ايدينا
اتبنجنا ولا نسينا
بس خلاص الكيل فاض بينا
بنقولك ارحل أو غور