فوق السطوح

إلى كل من ترك الأرض بحثا عن البراح فوجده مثل سم الخياط إلى كل من أراد سعة العيش خارج حضن الأم فوجد ضيقا في الكرامة إلى كل مصري يحيا خارج بلده هذه الكلمات:
------------
فوق السطوح
---------
فى قعدة صفا
مع امي يوم فوق السطوح
والقمر
فارد دراعاته يطبطب ع السما
يغزل مواويله لجل ما يعود الأمل
فى تباريح الصباح
خدنا الكلام:
احكيلي يا امّه عن ولادك
مين لسة قاعد
مين اللي راح
ليه يا بني تنبش ف الجراح
ليه تاني بتعيد النواح
دول ياما ناموا في حضن قلبي
والغطا كان القمر
فوق سطح بيتنا... وكله راح
الأولاني
بكريا ياما ف حضني ضميته
كنت ادعيله دايما ف الأدان
كنت باسهر لما يتعب
أحكي له عن صبر جده
وازرع الحب فى جدوره
واحكي فين ماتت خواته
لجل ما اعلا واكون منارة
احكي له عن أب كافح
لما كان الحب طارح
واما أحبس يوم دموعي
ترجع الأيام تكسر من قلوعي
وف يوم خرج مرجعش تاني
دا قالي يامّه أنا راح ألف ف الحواري
أجيب لك الكحل الكحيل
لجل تبقى عنيكي ليل
لجل ترجعي يامّه شابة
يركع الخطاب ببابك
بس خرج مرجعش تاني
سمعت انه راح يبيع نص السطوح
راح يشتري عشة على رصيف الأمريكين
قلت يوم أزوره يمكن يرتجع
بس لما رحت له
إداني ضهره
وكأني ما ضميته يوم ف حضني
وكأنه من صدري يوم ما اتفطم
والتاني راح مني ومعرفتش سكته
خرج ف يوم وقالي
يامّه لما أغيب ماتبقيش تصرخي
يمكن هييجي اليوم وأرجع
من يومها يا بني
ما حد عنه
ف يوم سمع
والباقى يامّه
مرجعش منهم غير أمل
ضي اكتمل
يبدر بذور الحب تطرح بالعمل
ياخده الحنين لجدور جدوده
يزرع الورد ف خدوده
تطرح سنابل قمح أخضر
يحصد الأحلام ف عوده
هو اللي فاضل ليا
من كل الولاد
يزرع بلاد
يحصد بلاد
ويجيني يوم فوق السطوح
بدر اكتمل