قصيدة ( حلم الغلابة )

( حلم الغلابة )
----------------

حلم الغلابة طار لفوق

والشوق بيشلع فى الحلوق

بجناح منبت فى الوهن

----------------

حلم الغلابة بيتعجن

بالوهم مع حبة شجن

وبيتقلى فى زيت الزمن

----------------

حلم الغلابة بيترسم

فوق بحر تلج ويبتسم

تطلع عليه شمس الوطن

-----------------

حلم الغلابة بيتخنق

من قبل حتى ما يتخلق

وبيتفرم من غير مكن

------------------

حلم الغلابة مركبة

متركبة ومكركبة

زى الجمل من غير رسن

-------------------

بلعها بحر فى ليل ضلم

يا ريت ما كانشى فى يوم حلم

والصرخة حلم بتندفن

-------------------

حلم الغلابة سلسلة

متسلسلة ضامة الخلا

شداه لبحر من الحزن

-------------------

شقيان جعان عريان يخاف

طاب حتى يلقى لقمة حاف

علشان يقاوم فى المحن

---------------------

فى الصيف بيحلم بالشتا

فى البرد يحلم بالدفا

طول عمره يحلم بالسكن

-------------------

حلم الغلابة تاه فى بير

والبير غويط جواه اسير

مين اللى يقدر عالفتن

-------------------

لملم جناحك وانكسر

يالا انتشر بين البشر

لحسن تروح من غير تمن

--------------------

حلم الغلابة كان فتات

ولما عمر الحلم فات

اتسرق منه الزمن

-------------------

اندفن حلم الغلابة

لما مات ارنب فى غابة

بس مات ملقاش كفن

----------------

---

» قصيدة ( حلم الغلابة )
» قصيدة : شقى جدار الزمن ( قصيدة فائزة بالمركز الثالث في مسابقة الشاعر على الصافى الكويتية عام 2001
» قصيدة ( سوق العدالة )
» قصيدة ورا الشباك
» قصيدة ( متغربين )