قصيدة (يعنى انتى مش أمي ) للشاعر : شعبان حمدي
يعنى انتى مش أمي!!
نيلك دا مش نيلي !!
دمك مهوش دمى !!
طينك دا مش طيني !!
أمال أنا تلاتين سنة باكتب غناوى لمين ؟
وأعصر ف قلبي اللي اتوجع
لهفة وحنين على مين ؟
وحدي أنا المسكين
صدقت من عبطي
ولما كنت تقوللى وطي
أقولك طب منا موطى
حطي التراب حطي
جدورى بتتنفض م البرد
بترضعينى الشوك وأنا اللي كنت فاكره ورد
مليون سؤال وسؤال
ومش لاقى لجوابهم رد
ولما جد الجد
بعتيني للخفافيش
اصرخ ونفسي ف لقمة
وكنت تقولي ليّ مفيش
بتلبسينى الخيش وهمه هناك ف مارينا
بعتيني برغيف عيش
وباعوكى يا مسكينة
م أنا طظ مش ولدك
وهمه ولاد أفندينا
بترجعينا ليه
لزمن السخرة والبشوات
جمال باشا ونظيف باشا
وحبيب باشا
وباب عالي وكوم بهوات
ولما صوتي يوم يعلى
تقولي بس هس سكات
وياما ف صدري لسه حاجات
بعتينا للناس الذوات
لاجل م همه يتعلوا
ولما ندعى دعوة خلاص
تقولي انشالله انتوا اللي .. تتعلوا
واهو كلهم ولوا وباعوا الأرض كما عواد
م قلتلك من الأول دول شلة فساد في فساد
حرموكى حتى الذاد وأنا اللي فضلت باقيلك
رافع ايديه لفوق ف صلاتي وبادعيلك
أنا اللي عمري م خنت عيشك ولا ملحك
مع إن أنا اللي زرعت
وغيري حصد قمحك
روحي يا شيخه ربنا يسامحك
روحي يا شيخه ربنا يسامحك
* * *
شعبان حمدي ............ 29/1/2011
.......................................................................................
قصيدة ( صباح الخبز ) للشاعر : شعبان حمدي
يا صباح الخبز اللي مغمس
بهموم الناس
على كل الخلق التعبانة ..الشقيانة
اللي بتشرب من مر الكاس
على عم أمين اللي بيحلم
بعشر ترغف
من غير طوابير ولا ضيق أنفاس
ومراته اللي بتضرب تحسب
تصحى من النوم
على ضيقة اليد وديرة الراس
والبنت الحيله أم ضفاير
دمها فاير .....
من شيل الهم ف قلب الشنطة
مع الكراس
ومحمد أفندي المستوظف
أبو جيب انضف
من كل الصيني اللي ف بلدي
و ف بلاد الناس
على عم مغاورى اللي بيزرعله
ف قيراطين قمح
عمال بيعافر مش لاقى
ولا حفنة ملح
وعلى طلعة صبح
الأرض أهي بارت
وانكسر المنجل والفاس
يا صباح الخبز
اللي مغمس بهموم الناس
على عيشة اللي م خبزت لقمة
وقالت يا عجين
من وقفة عرفة وعشمها
ف قرص ورغيفين
دول بقوا حلمين
والمولى عليم
إن كانت راح تخبز تاني
ولا حتنداس
الناس ف الفقر بقالها سنين
ف أنين عايشين
والحزن معشش ف الحيطة
يجي طول مترين
مرحمش لاخضرة ولا مغاوري
ولا عم أمين
والدور على مين
بعتونا ف سوق ميقدرشى ولا يعرف قيمة البني أدمين
والقصة اهى خلصت
ومش قادرين ,,,,
امشوا يا ولاد البياعين
امشوا يا ولاد البياعين
شعبان حمدي ....... 15/12/2010
...................................................................................
قصيدة (فتافيت سكر ) للشاعر : شعبان حمدي
مش عارف ليه اتغيرتي
واتغيرفيكي
حتى الناس والدفى والفرح
والميه المخلوطة بسكر
صبحت يابلادي بتنقع ملح
حتى صوتك
مبقاش الصوت اللي يحرك
فيّ الأشجان
والضحكة لمونه وبهتانه
معادتش يابلدي بتكوي الجرح
مش عارف ليه اتغيرتي
وأتغير فيكي
حتى الناس والدفى والفرح
طول عمري باشوفك يا بلادي
ضله وعناقيد
وسنابل قمحك مبدورة
فوانيس بتقيد
والليل بيسرحلك شعرك
مستني يا غالية هلال العيد
إيه اللي أتغير جواكي
خلى عيونك تهوى الأحزان
معقولة أكون جايلك باكي
وملقاش عندك دفى ولا أحضان
متعودتش منك ابداً
أبقى معاكي وارجع إنسان
طول عمري باحس انك جنة
واحنا ملايكه ونيلك رضوان
مش قادر اصدق يا بلادي إنك إنتي
و ف ليله ويوم
معقوله تكوني اتغيرتى
فين راحت منك يا بلادي
الطيبه وكل غنا المواويل
والقمر اللي مصاحب خدك
وحالف م يسيبه نهار ولا ليل
وصحيت م النوم
على صوت الندى وغنا العصافير
ولقيتك جنبي يا بلادي
بتقولي اللهم اجعله خير
معقوله يا بلدي أكون بحلم
أيوه دنا لازم أكون بحلم
لساها الأرض أهه خضره
ولسه العصافير ف السما بتطير
والورد أهو فتح يا بلادي
وبعتلك نسمه وأحلى عبير
والشمس شايفها بتتغندر
وترش على الدنيا بحالها
(فتافيت سكر )
والزرع اللي حلمته بيدبل
صابح أخضر
ونهارك أبيض يابلادى
والليل حواديت
يا غناوى الفرح يا قمرايه
ليكى أنا غنيت
دنا عاشق وانتى المعشوقه
والدفى والبيت
يجى إيه يا بلادي جنبينا
روميو وجوليت
يجى إيه يا بلادي جنبينا
روميو وجوليت شعبان حمدي ....... 14/3/2012
........................................................................................
يا حبيبي................. الشاعر: شعبان حمدي
يا حبيبي كل همسه من فؤادي
رايحه ليك
جايه تنده روحي دايبه
خايفه م الأشواق عليك
كل كلمه تخاف تقولها
باينه مرسومه ف عينيك
زى م تكون وردة دبلت
وارتوت ما بين أيديك
يا حبيبي
نور حياتي ينطفى لما تغيب
م أنت عمري وأنت قمري
و أنت شوق أول حبيب
حتى وأنت مش معايا بردو شايفك
م أنت عايش ف الضلوع
حتى وأنت مش معايا
فرحة القلب تناديك
يا حبيبي كل همسة من فؤادي
رايحة ليك
( شعبان حمدي )
موضوع: الشاعر شعبان حمدى . مجموعة نصوص 
الثلاثاء 2 سبتمبر 2014 - 4:45
