قصه فى كلمتين

قصه فى كلمتين

وهو خارج لمحته

هدومه قديمة ومقطعة

خرج قعد فى الشارع

وخرجوا وراه اخواته البنات الاربعه

وبعد شوية خرج ابوهم وامهم

والاسرة كلها قاعدة فى الشارع متجمعه

ابوهم مريض وعاطل مابيشتغلش

اما الام يوم تخدم وعشرة تقعد ماتروحش

هاتقولوا اومال بيكلوا منين

هاقول على الله

لو فى اكل ماشى

لو مافيش -- ماتفرقشى

ولو راح اكل لهم ولو بعد العشا

يقول ابوهم -- يكرمكم ربنا

انا والولاد نايمين -- من غير غدا ولا عشا

الاب من المرض مات

وفضلت الام والولد والبنات

ولما الولد شب وقال يا عود

لحقت امه ودارت به ع الورش والمحلات

تشوفله شغله --- صحيح مش هياخد كتير

بس اهى نوايه تسند الزير

الولد اشتغل وراح وجه

وصاحب العمل سلمه عجلة للمشاوير

وفى يوم اسود مشئوم وضلمه

وهو ماشى مشواره بالعجلة

عربية نقل كبيرة -- سواقها اعمى

دهسته وراح فى لحظه

مات تحت العجلات

بعدها سالت عن الام والبنات

قالوا خدت البنات ومشيت

مانعرفش لاى جهه قصدت

وياترى سلمت

ولا تاهت فى السكك والمتاهات

بستغرب ع الغنى لما يزيد غناه

وبدل المليون يبقى ملايين ومليار

والفقير لما يزيد برضو فقره

مرض وموت ويأس لما ينهار

وياما فيكى يا بلد ناس مطحونه

من الفقر وقساوته

ياريت يا امامنا الجليل كان الفقر رجل

وكنت خلصتنا منه وقتلته

» هما يادوبك كلمتين ....... شعر محمد الساعي