عبد الحليم الزلوعى . جوه المقام

جــوه المـقــام

واحنـا فــى المقــام واحد
لســـان بيوحـــد الــواحـــد
واشــوف واحــــد
ودقنـــة فى المقـــام حضنــاه
وعلــى صــدرة سبــع سبحات
وقربـــة ميــه على ضهــره
مـا بتنقـــط ولا نــدعـه
تــرقرق فـى العيـون دمعـه
وريحـة المســك ويـا الطيب
بعــود بخور مـع العنبــر
وصوت ع المدنــه بيكبر
واشوف شيخنـا ابو السبحه
طريح ع الارض م الفــرحه
عشـان جنبـوا هناك واقفين
رجـال طاهريـن يقولـــوا الله
وشــيـخ درويـــش
مغطـى راســه بطاقيــه
وكــومـة ريـش محنيــه
على صـدره مـع السبحه
يتمتـم والكـلام مشبــوك
سلاســل والحروف دى سلـوك
ودا مـريـل ودا ممــيــل
وودنـه نايمـه ع الحيطـه
بيصـرخ صرخـه فى الزيطـه
شوفينـى يا طاهـرة انا عاجـز
ونـاب ناجز علـى العضمـه
ويتلفــت شمـال ويميـن
وناس صاحييـن وناس نايميـن
وناس بتقــول وناس سامعيــن
ونـاس طالعيــن وناس نازلين
ونـاس شايلين بدمـع العـين
همـوم واقفــه علـى الصفين
وناس بتـروح ونـاس تيجى
وروحــك هايمـه ياطاهــره
تعشـش فى جميـع الاركــان
تداويهم وترقيهــم تخليهــم
يشيلـوا السبحـه والفرحـه
يـا مادنه بـالادان طرحـه
كتيـر فى الصـف جــوة الدور
نلــف على الضريح ونـدور
واشم بخـور واشــم عطور
يـا اجمل مـن بنات الحور
وشـوفت عجوزة متصابيـه
وراسمـه ع الكفـوف أسديـن
وشـق كبيـر فـــى القــوره
وزيــه ع الخــدود اتنيــن
وتجاعيــدها تبـان اخـدود
ليــوم مـوعود ومـدارى
وسنـه نــحـاس تحـليهـا
وجوز خلاخيـل فـى رجليها
وماسكه فـى الايديـن بنتيـن
وتحت القـبـه بترفـص
وبتفعص فى جوافايـــه
عشـان تقسمها ع الاتنيــن
وشيـخ صالـح يمد الايــد
يقـــومهــا مــن الرقــده
ويسألهـا حكايتـك ايــه
تــرد عليـه بعيـن تايهـه
خلاص مابقـى لى م الخلفـه
غيـر البنتيـن وانـا خايفـه
دا دول عكـازى فــى الدنيا
حـرام يعنى عليــا افــرح
شويــة صبــر يــا وليــه
دا منهـم واحـده مخاويــه
وجنيـه ومسكونه ومسحوره
وهـى الاصـل يــاوليــه
والتانيـه كمـان صـوره
ما توفى النــدر للطاهـره
وفــى الاخـر هاتندهـلك
وتبقـى البنـت مستــوره
ماتـوفى النـدر للطاهـره
يا سعــرانه ومسعـوره
فى جمع المـال وسيسباهـم
يضيـع الاصــل والصــوره
وفـى العصريــه جى واحد
وبيحجل على عكــاز
بيصــرخ وحـد الواحـد
وانا باسخن كمان واتغاظ
من شباك المقام شايفه
كان قاعد على القهــوه
بيلعب كومي والبصره
وم الحسره اللي انـا فيهـا
كـان نفسـي الــزق لــه
واشـوف جنبي راجـل طيـب
جـى يضحــــك علي مهلـه
ويستغـرب وينـدهلـي
لقيته جى لـي وف ودنـي
يقوللـي كـل ده عـادي
ما هـي الطـاهره عـرفاهـم
وجمعاهـم وسقيـاهــم
ولما الـمادنـه بتكبــر
تجمعهــم يصلـوا معـاهـا
وترقيهــم وتشفيهـــم
تروحهم وكـل ده عـادي

» عبد الحليم الزلوعى . هش
» عبد الحليم الزلوعى . مدد مدد
» عبد الحليم الزلوعى . السبوع
» عبد الحليم الزلوعى . حلم ليلة صيف
» عبد الحليم الزلوعى .مش عاوزها