عبد الحليم الزلوعى . شيوخ منصر

شيوخ منصر
خلاص ما بقاش كلام تاني
يا ريتك يا امه نسياني
ما انا وياكي متغرب
يا ريت القى وطن تاني
دي ناس بتدوس بدون رحمه
وفرحوا كتير باحزاني
نشوف دمعك على خدك
ومش قادره تقولي ياني
وعزة نفسي منعاكي
تقولي الاه ومنعاني

ولو قولناها مين يسمع
كفايه يا غاليه سمعاني
وعرفاني وانا الصابر
لكنى خلاص مش قادر
اشوف دمك وبيمصوه
يهل علينا ويفاخر
ها اقولهالك من الاخر
يا امه انتي فى ايد تاجر
وبالمره ده شيخ فاجر
باسم الدين بيتاجر

وترميني على برك
الاقي الدنيا مش هيه
دقون طالت وجلبيه
ودود طالع من الميه
مكشر والايدين بسيوف
وكان واضح ومش مكسوف
وبتاجر كده في ملايين
واخر الليل يسب الدين
ومش شايفين ولا عارفين

وبيخون وبيكفر وبيفرق
ومش عارفين ولا شايفين
بلاوي الناس وبلاويكي
وكانوا بيحلموا بيكي
ويبقوا طبقة الحكام
وشيخ منصر في ايده لجام
حواليه جوقه م الخدام
ويكبر يصلي امام
ومش عارف في اي كلام
ودم شبابنا بقى اختام

يقولوا قوانين وفيها اعدام
دا يا امه كابوس ومش احلام
وكانوا عارفين شروكي بكام
ومش صابرين لكن عاوزين
يبيعوكي باسم الدين
ومش فالحين ولاعارفين
لو كانوا يوم قروا القران
وعاشوا معانا كده با امان
لكن خايبين ومش نافعين
ما انت يامه محفوظه ليوم الدين

» ( شيوخ منصر )
» عبد الحليم الزلوعى . هش
» عبد الحليم الزلوعى . مدد مدد
» عبد الحليم الزلوعى . زفة المولد
» عبد الحليم الزلوعى . ست الحسن