الشاعر عبد الحليم الزلوعى

31
طب ليه يا دنيا

شيلتك والله جوه عنيا
قولت يا دنيا كفايه عليا
لكن الدنيا مالهاش حال
استكترت الحب ده فيا
خلت حبى بقى اوهام
نست قلبى احلى كلام
وضاع الحب مع الايام
حرمت عبن من الاحلام

رسمتلى مكان الفرح جراح
حرمتنى اعيش ويا الافراح
الشوك بلقاه وفى اى مكان
وبنتلى قصور ويا الاحزان
خلت حبى بقى اوهام
نست قلبى احلى كلام
وضاع الحب مع الايام
حرمت عينى من الاحلام

طب ايه ذنبىيا دنيا معاكى
هوه الجرح فى قلبى دواكى
ولا دموع الشوق دى هواكى
نفسى اشوف ضحكه وياكى
خلت حبى بقى اوهام
نست قلبى احلى كلام
وضاع الحب مع الايام
حرمت عينى من الاحلام

قولى يا دنيا ايه يرضيكى
قولى يا دنيا الله يخليكى
خدى اللى ليا كله ليكي
بس الضحكه تبقى عليكى
خليتى حبى بقى اوهام
نسيتى قلبى احلى كلام
وضاع الحب مع الايام
حرمتى عينى من الاحلام

33
على فين

على فين ولمين يا هوى
طاير وواخدنى معاك
ايام وسنين يا هوى
محتار ما اعرف مرساك
احلام وحنين يا هوى
اشتاق شوقى للقاك

وحلمت وبحلم لسه
الشط هواك وانا بارسى
والشوق لو يوم يخايلنى
دى عيونك تبقى المرسى
احلام وحنين يا هوى
اشتاق شوقى للقاك

وحنينى اليك ودا نى
لعيونك اه يا زمانى
لعيون انا نفسى اشوفها
مخلوقه فى الدنيا عشانى
احلام وحنين يا هوى
اشتاق شوقى للقاك

الشوق ولا قادر انساه
با حلم واتمنى لقاه
لو قلبى فى لحظه هايتعب
هالقاك طاير فى هواه
احلام وحنين يا هوى
اشتاق شوقى للقاك

34
قربي

قربي من ننى عينى قربى
واسكنى فى الننى ايوه جربى
شوفى كل الكون بعينى
طب حاولى مره تهربى
طب بس حاولى وجربى
من غير عيونى ها تتعبى

ها تعيشى جوه عيونى حاسه
سامعه دقة قلبى ليكى
وانتى واقفه برضه لسه
ايوه خايفة ومن عينيكى
طب بس حاولى وجربى
من غير عيونى ها تتعبى

جوه ننى يا حبى عيشى
احن منه ما هتلاقيشى
وهوه دايما راح يقولك
غير حبيبك ما تشوفيشى
طب بس حاولى وجربى
من غير عيونى ها تتعبى

قربى لى يا حب عمري
قبل صورتك كان خيالك
طيفه كان للعمر قدره
وعشت بيه ايامى بدري
طب بس حاولى وجربى
من غير عيونى ها تتعبى

35
لا تلومونى
مستحيل ا نك تهونى
ياللى مش ممكن تخونى
دى الخيانه طبع غيرك
شيئ طبيعى انك تصونى
طب شوفوها وبعيونى
لا تلوموها ولا تلومونى
وبعيونى ها تلاقوها
احلى ورده ها تشوفوها
والنجوم لو تسالوها
يبقى لازم تعرفوها

بدر بينور سنينى
بعد طول شوقى وحنينى
ضيع الغربه اللى كانت
سامعه دايما صوت انينى
حاسه قلبى بيناديها
وفى سكوتها بتنادينى
وبعيونى ها تلا قوها
احلى ورده ها تشوفوها
والنجوم لو تسالوها
يبقى لازم تعرفوها

ياللى ما عرفتوش حبيبى
بتلومونى فى حبه ليه
لو فرحتوا لحب طاهر
فى الزمن ده هايجرى ايه
دا الهوى والشوق وقلبى
مش كتير يا ناس عليه
وبعيونى ها تلاقوها
احلى ورده ها تشوفوها
والنجوم لو تسالوها
يبقى لازم تعرفوها

يا زارعه قلبى بالورود
وانتى روياها بالحنان
وردك بيطرح ما لو شوك
وياك حسيت الامان
يالا نطير اخدك لفوق
يا حب عمرى من زمان
وبعيونى ها تلاقوها
احلى ورده ها تشوفوها
والنجوم لو تسالوها
يبقى لازم تعرفوها

36
الغربة

يا غربتي في نفسي
والسجن والسجان
وسجني انا جوه
وقضبانه الحرمان
وكل ما يزيدني غربه
انسى انني انسان

باكتب بايدي نهايتي
واشرب بكاس عطشان
ما عدشي في الدنيا حاجه
تروي العطش للامان
غير اني اكتب حكايتي
با الدم فوق الحيطان

يمكن في يوم تنقري
تهدي طريق حيران
وابداْ حكايتي بكلمه
الغربه دي الوان
اصعب ما فبها البدايه
وازاي تنام بردان

واللي ها ينيسي العنايه
يبقي مش انسان
كريم بيغفر ذنوب
للي بيجي يتوب
اياك يا قاري السطور
تنسي ان فيه رحمن

37
لو كنت يوم عاشق

لو كنت جربت الاشواق
ولا اكتويت بنار العشاق
ولا السهاد ضيع نومك
وعرفت ايه ليل المشتاق
يبقى البعاد لو لثوانى
هجر ودموع واهات وفراق

لو كان فى يوم شوقك يناديك
ولا السهر ساكن لياليك
والفكر جاى يوم يحلم بيك
والحلم تا من ننى عنيك
يبقى البعاد لو لثوانى
هجر ودموع واهات وفراق

الغدر مش قادر ينساك
والطبع طابع كده فى هواك
حتى الظنون لو يوم عدت
تحضنها تبقى تملى معاك
يبقى البعاد لو لثوانى
هجر ودموع واهات وفراق

لو كنت يوم تصدق وتصون
والعشق خاطفك كده بجنون
راح تلقى نفسك جوه عيون
والشوق ها يهديك قلب حنون
يبقى البعاد لو لثو انى
هجر ودموع واهات وفراق

41
مش عيالك

ياما قولنا شدى حيلك
وانتى ويلك هوه ويلك
اللى خطفوا نور نهارك
واللى غيروا شكل ليلك
واللى سرقوا الضحكه منك
لسه حسباهم عيالك

اللى دمك سال بايدهم
واللى نهبوا وسرقوا مالك
وانتى صابره بس قادره
تمنعيهم من خيالك
بس صبرك طال عليهم
لسه حسباهم عيالك

ابن ضل وسرقوا عقله
وانتى حاسه باللى جالك
نفسه يحرق كل حاجه
حلمه يسرق نور جمالك
وهوه عايش وسط ناسك
لسه حسباهم عيالك

هوه كاره تبقى نسمه
من يمينك او شمالك
كاره الفرحه اللى طله
يوم ما تتباهى بجمالك
هم ناس ضلت وتاهوا
لسه حسباهم عيالك

الحرام عشش عليهم
هم مش حسين جلالك
كل همه تبقى تايهه
تبقى عايشه وشاغله بالك
كل حلمه تبقى خايفه
لسه حسباهم عيالك

قلب ام بيبقى حاسس
باللى نفسه يدوم وصالك
واللى عايش لاجل يقتل
كل امله يشوف ظلالك
هم شوكه جوه عينك
ولسه حسباهم عيالك

42
مش كتير

مش كتير انك تقولها
لوتقولها ده مش كتير
دا احنا لسه ياما بينا
يا حلم عمرى كلام كتير
اد شوقى اسمع حروفها
اد خوفى لما اعيشها
كلمه بتغير حيا تنا
كلمه بتحدد مصير

كلمة الحب اللى قالها
يا حته منى الناس كتير
بس منك لو تقولها
معنى تانى وبيها اطير
اد شوقى اسمع حروفها
اد خوفى لما اعيشها
كلمه بتغير حيا تنا
كلمه بتحدد مصير

دا الكلام وياك يا غالى
ليه معانى وشكل تانى
اى كلمه ما بين شفايفك
بتهز وجدانى وكيانى
اد شوقى اسمع حروفها
اد خوفى لما اعيشها
كلمه بتغير حيا تنا
كلمه بتحدد مصير

قلبى حاسس بيك وشايف
الف معنى ع الشفايف
بس نفسى اسمعها منك
قلبى دايب وانت عارف
اد شوقى اسمع حروفها
اد خوفى لما اعيشها
دى كلمه بتغير حياتنا
وكلمه بتحدد مصير

43
مصر السوسنه
ياسوسنه , حقي أنا
أغير الثوب اللي لابساه
يا حبيبتي من هنا
التوب قدم , وصار عدم
وضاق عليكي التوب كثير
ماهو عمره من عمر الهرم
عمر النقوش في صخور وجير
ودي اذهلت كل الامم
والآه بتجري في الخيوط
واحنا اللي حاسين بالالم
ونشوف عيونك مكسورين
وبتحضني دمعة ندم

يا سوسنه .... يا مؤمنه
انا عشت في حضنك عصور
كم الف عام وكام سنه
والنيل بيجي كل دور
وكل العيون مطمنه
والدنيا عاتمة وانتي نور
يا حضارة للناس ملهمة
طب شوفوا نقشي ع القبور
شوفوا المعابد والقصور
شوفوا اللي باقي منها
حير عقول الكون
دي مصر سابقه عصرها

والسوسنه والتوب عليها
شايف حلاوته وقتها
وتاجها مصنوع م الحرير
والعين بينطق كحلها
والعقد مصنوع من ياقوت
والتاج مداري شعرها
شفتيني كاهن في المعابد كلها
أاقدم اقرابين وأحيي الآلهه

عشان يصونوا عرشها
ويعيش معاها نهرها
ويفوت عليا عصور كتير
والتوب يضيق على جسمها
والعيال .... الطيبين
عاوزين يشوفوكي في أمان
ويلبسوكي التوب جديد
صنعوه من دم الرجال
حتى البنات قاموا يغسلوه
وبدمهم كان المحال
وفصلوا التوب الجديد
ومزينينه ....بالحنان
ومصممين وفي الميعاد
يشوفوكي واقفه وفي عناد
يلبسوكي التوب جديد
هنا في الميدان
نفس الميعاد

45
من غير سبب

باكتب محمد ع الورق
يا صاحبى يا عشرة سنينى
سلمت راسك ليه لمشرط
لو يعرفك ما كان زرق
قالوا الصداع صعب ولعين
هوه الحرامى اللى سرق
منى اخويا فى وحدته
وما اقدرش اشوف اللى اتحرق
الالف اه طالعه تسود دنيتى
ايوه حاسسها من بعيد شايف العرق
الميه مالحه والوجوه مكلحه
والجته حته هدمه مليانه بعذاب
طب ايه فرق
يعنى الصداع والا الغرق
فى البحر ما باشوفلك قرار
فى البعد شايف لوح حديد
والسمار الحلو ضاعت رقته
خايف يا اخويا من الصدا
وانا عارف انه شيئ اكيد
لو عينى هاتكون الفدا
بس اشوفك من بعيد
البسمه تايهه من شهور
والجته مليانه بعرق
شريان فى ايدى وانقطع
صابه العفونه والعفن
واحنا يا صاحبى بعد مده بنندفن
وانا قلبى ها يكون الكفن

46
نجمه عالية
يا نجمه عاليه في السما
وعينك على عش الهوى
والعش خالي م اللي فيه
كله عليل وما لوش دوا
طب امتى يا نجمه تلاقيه
صعبان عليكي ما بتشوفيه
عطشان ونفسه يرتوي
ما تعرفينا ايه اللي فيه
يظهر مع ضي القمر
ويتوه مع لمحة نظر
طب يجرى ايه لو انتظر
عارفين هواكي بيداويه
ولا عليه ضحك القدر
يا نجمه قولي وصبريه
نسيه وساوسه وطمنيه
ان اللي ضاع بكره يلاقيه
حتما تكون الماه جراحه
سالت دموعه ع اللى راحوا
وما شافشي ليه فجره الجديد

دا عنده حق يتوه كتير
الدنيا وياه ناسيه الضمير
بتلاعبه لعب لكن حقير
عاوزه تواسيه قبل الاسى
علشان يموت الحلم فيه
عارفه انه ها يدور كتير
خايف يكون الحلم تاه
لحظه التقاه وظهر معاه
وبان مع ضي القمر
واللي احنا فيه شافه اختفى
ما هو شاف وجوه الناس تعيسه
والحزن موشوم ع الوجوه
والناس بتساْل بعضها
ممكن نكون احنا اندبحنا
وبقينا للثوره فريسه
بلدي يا ضي العين ونورها
انتي انخدعتي با الدسيسه
والا للدنيا فصولها
يوم نلاقي الركب واقف
بس رب الكون سا ترها
علشان دا وعده في الكتاب
واللي وعد رب العباد

يا نجمه ما انتي عارفه حلمه
اللي اتولد هوه معاه
لسه يحلم يوم يشوفك
وانتي لابسه توب الحياه
وحشاه ووحشه ضى طيفك
ولا عشق في الكون سواه
دا ابن بطنك ما تلوميه
بكفايه يا امه عليه شقاه
وهوه شايفه حته منه
ولسه شايفك طوق نجاه
اجيال كتير حلمت ببكره
وبثوره يا امه الحلم تاه
يا نجمه قومي وشدي حيلك
هوه عارفك منتهاه
وانتي جرحك هوه جارحه
نفسه روحه تكون دواه
نفسه يفرح يوم بفرحك
والشهيد حقق مناه

47
هش
ما عدش داعي الواد يغش
دا الإمتحان ها نجيبه وش
ولو انت عاوز لازم ترش

ودا راديو داير عمال يدش
من النهارده فيه طظ فش
على المبادىْ واللي يهش
عاوز قماشه لازم تكش
ما عدش داعي الواد يغش
دا الإمتحان ها نجيبه وش
ولو انت عاوز لازم ترش

ها اعمل منشه علشان اهش
على حكاوي ما بتسمعش
على قهاوي ما بتتقفلش
على غناوي ما بتتفهمش
ما عدش داعي الواد يغش
دا الإمتحان ها نجيبه وش
ولو انت عاوز لازم ترش

طب فيه برامج ما بتسمعش
جابت المذيعه فستان وكش
ها تلقي شاشه ما بتتقفلش
ولو كان معده سي هش بش
ما عدش داعي الواد يغش
دا الإمتحان ها نجيبه وش
ولو انت عاوز لازم ترش

تلقي المغني ما بينطلبش
لو حتي يعمل مية الف وش
غير لما يطلع حماره جانبه
ولما يجري يقوله هش
ما عدش داعي الواد يغش
دا الإمتحان ها نجيبه وش
ولو انت عاوز لازم ترش

48
ويا النجوم
يــا نجـــــــوم الليـــــل تعـــالــــوا
وإندهـــــــولـــــي وإسهرولــــي
طمنـــــــــــوني إنــــ بكــــــــــــره
فـجره لســـــــــا دوره جــــــــاي
شوفوا نجمـــه منكـــوا طايـــره
راحـــه نحيـــة مادنــــه عاليــــه
توصــــل النجمــه ويهــل الأدان
وإشهــدوا يانجــوم وشوفــــوا
إنــــــ صاحبتــــكم وعــينـــــــي
همــــــا اللــي بيجـروا الهلالـــ
لأجــــلــــ مـــــايهــــــل الأدانــــ
...
ونكمـل المشــــوار فـــ الفضـا
زي القضــــا مــــــــا بينقضــي
علي ذوقة وف أخـر المـــيدان
نلقي نــص السطـح شقشق
واللي باقــي يبقــي شوقــه
إنــــه يحضـــــــن شقشقـــــه
ومعشقـــــــــه .. ومــــرشقـه
يجري بيــــــها فــــ المكـــــــان
لأجـــل نـــور الصـــبح يطــــرح
يخــرج الصبـــح اللـي واقــف
لســا ســـانـــد عــ البيبــــــان
نفســـه يجــري عــالحيطـــان
...
وإحنـا برضـــــــو بنرتجــــــــف
وبنتخطـــف من اللي جــــاي
حتي لــــو كان فـ طول اليوم
ده ثانيـــه .. حــــاجه تانيـــــه
حـــاجه جايــــه تخطفــــــــــك
وتـــروحــــك أو تجـــــرحـــــك
حاجـــه جـــــــايـــه تدبـــــحك
ولا جـــــــايــــه تفــــرحـــــــك
ولا عــــــاوزه مـــره تعــــرفك
غـير لمــا يبقي الــدور عليك
وإنت مكتـــــــوف الأيـــــــادي
بـــرضــــو ومغمــــض عنيــك
...
ضيــف وجــاي عارف طريقـه
أيــــوه عارف جـــــاي لميـــن
عمـــــره ماخبــــط بإيـــــــــده
ولا اللي جـــوا قالوا له مين
ضيـــف ومعرفنــاش ملامحه
بــس هـــــو جــــاي جــــــاي
ضيــف ولو عاوزين نسامحه
ميـن ياصاحبي هيبقي حي
ضيــف وعارف كل خطــــــوه
وإحنـــــا مش قادرين عليــه
جــاي بجرحه..جـــاي بفرحه
ربي عـــالم باعتـــــه ليــــــه
...
ونكمــــل المشــوار ونجري
لأجــــل نسهر كــل ليلنــــــا
يبقي ليلنـــــــا بالنهــــــــــار
والنهاار مافيهـــــوش نجوم
كـــله مشدود فـــ إنبهـــــار
يبقي ميــــن شاهــد علينا
ولا ميـــن فــ نهاره حاسس
يعنـــي كلـــه يبقي صاحي
لأجل مـــــا تغفـــله عيــــــن
يمـــــكن الغفلــــه فـ لهفــه
تخطفـــــه وترخــي الستار
يبقي ماطلعلوش نهـــــــار

49
ويا الهموم

لو سمانا يخلى ليلها من النجوم
ولا شمس الصيف تتوه ويا الغيوم
يبقى فيه قلب اتولد من غير هموم

دى الحقيقه وانتى لازم تعرفيها
كل لحظة تمر يعنى ها تشوفيها
كل قصة حب عاشت حاضنه فيها

والهموم يعنى السهر فارد جناح
ليل يطول فيه السهاد وغاب الصباح
والصباح يعنى النواح على اللى راح

واللى راح ها نرجعه ازاى وفين
والدموع عارفه مكانها فى كل عين
والهموم دايما بتسبق خطوتين

وانتى لسه يا حلم عمرى هاتعشقى
والهموم كده بالسلامه وما ترجعى
يبقى لازم تعرفى وتسمعى وتودعى

وكل عاشق له نجومه اللى يناجيها
يسهر الليل معاها ايوه سره كله ليها
بس لحظه يهون ويبص ليها ما يلاقيها

50
يا جريد النخل

يا جريد النخل يا عالي
ميل وهات البلح
الجوع واكل عقولنا
وبطونا بتنجرح
ودعنا شباب وراحو
ويا ريت حالنا انصلح
يا جريد النخل يا عالي

الجوع مش لاقي حاجه
دخل اكل الجدع
ياجريد النخل قوللي
ولا هاضرب ودع
واللي انحكم علينا
الطا عه والسمع
يا جريد النخل يا عالي

ما خيرنا راح لغيرنا
وجماعه بتقول دي منا
ماسكين في كل حاجه
غلابه يا ناس غلابه
والدنيا بتبقي غابه
وبحكمنا الديابه
ياجريد النخل يا عالي

ابو دقن لحد بطنه
وفتاوي مصربعه
يفرقش عنده حاجه
دي عماره ومزرعه
تسال عليه تلاقي
متجوز الاربعه
يا حريد النخل يا عالي

دي بلدنا الحلوه غاليه
والخير ايوه ماليها
دا شهد النيل وسكر
حلواني اللي بانيها
بس اللي يحز فينا
حاميها حراميها
يا جريد النخل يا عالي

51
يا مغيث
بكره يا قلبي الصغير
بكره تكبر لما تقدر
تحقق الحلم الكبير
ما هى برضه الدنيا زايطه
الرئيس في السجن نايم
والمشايخ يركبوا كده با لاونطه
جا لنا منهم ال رئيس
حكمه فايت ع الهاويس
والبوليس جاي النهارده
صمم يعود تاني رخيص
والخسيس دايما وابدا
اخوه نتن وكمان خسيس
يعني تحكمنا الاونطه
والدقون المستبده
واحنا واقفين ع المحطه
لاجل مرشد نط نطه
جاب لنا استبن الرئيس
يا مغيث يا مغيث

52
ياللى ناسى

ياللى ناسى انك حبيبي
تبقى فاكر تانى ايه
هوه ده الحب اللى ياما
اتعاهدنا فى يوم عليه
مهما يجى الشوق ينادى
مش هالاقى حب فيه

عقل ناسى وقلب قاسى
يبقى ايه وهاحبه ليه
حب ضايع وقلب بايع
يبقى ليه اسال عليه
مهما يجى الشوق ينادى
مش هالاقى حب فيه

حبى عمره ما يبقى زكرى
للى خان كل العهود
عمر قلبى ما يبقى مرسى
للى باع كل الوعود
مهما يجى الشوق ينادى
مش هالاقى حب فيه

14
باندهلك

و بانــــــدهلك ويجـــــــــى الرد متاخــر
علــــــــــــــى مهــــــــــــــلك و انـــــا اهـــــــلك
و انـــــــــــــا الـــــــــدنيا مستنيه فرحتهـــا
عروســــــــــــــه ولابســـــــــه طــــــــــرحتهـــــا
وماده ايديها وبتصرخ تقول خدني

انيــــــن و طنيـــــــــــن هنـــــــــا في ودني
واحس التوهه بتاخدني تتوه التوهــه
ويتـــــــــــــــوه معـــــــــــاكـــــــــي عـــــــــــــــــــمري
و انــــــــــــا فـــــــــي التوهـــــــــــه مستنـــــــــي
اشــــــــــــــــوف عصفــــور و متحنـــــــــــي
يقــــــــــــــــــرب ريشـــــــــــــــــــه مــــــــن ننــــــي
و يصـــــــــــــــــــــرخ مـــــــــــد لــــــــي ايــــدك

امـــــــــــــــد الايــــــــــــــــد و مـــــــــــرعــــــــوشه
الاقـــــــــــي الجنـــــــــــــه مفــــــــــــروشـــــــــــــه
بســــــــــــاط اخضــــــــــــــر ومنقــــــــــوشـــه
بضحكـــــــــــــه غـــــريبــــــه مغشـــــــوشــه
و الاقـــــــــي التـــــوهـــــــــــه واخــــــدانـــي
و تبعـــــــــــــد فــــــــــرحتـــــــــــي تـــــــــانـــــي

اعود للصوره والمشهد وانا باشهـد
بانـــــــــــك لحظـــــــــــه محســــوســــــــــــــــه
بتجـــــــري فـــــــــــــي دمـــي مهووســـــــه
بتبـــعــــــد كــــــــــــــل مــــــــــا بـــقـــــــــــــــــرب
و انــــــا فـــــي الـــــدنيــــــا متغـــــــــــــــرب
و ضــــــــــــــي عنيكــــــــــي يتهــــــــــــــرب
مـــــن اللــحظــــــه اللـــــــي بالقـــــــــانــــي
بـــــاضـــــــم الحلــــــــــــم مـــــــــــن تــــانـــــي

و بانـــــدهـــــــــــــلك.....
ويجي الرد متاخر علــــــى مهـــــــلك
وانـــــــــا اهـــــــــــــــلـــك وانـــــــــــا الدنيـــــــــــا
اللــــــــــــــي مستنيــــــــــــــه فـــــــــرحتهــــــــــــا
عــــــــــروس ولابـــســـــــــــــه طرحتهـــــــــا
و مـــــاده ايــــــــديهــــــــــــا و بتصـــــــرخ
تــــقـــــــــــــــــــــــــــــــول خــــــــــــــدنــــــــــــــــــــــــــــــي

16
جواب نهائى
جواب نهائى مفيش تلاقى
ولانظره من عينى تلاقى
غير لما تيجى تدق بابى
جايبلى شبكه وتكتب كتابى
واسمعها منى دا جواب نهائى

تبعت رسايل كلامها هايل
لا ليها معني ولا انت طايل
غير لما تيجي تدق بابى
جايبلى شبكه وتكتب كتابى
واسمعها منى دا جواب نهائى

تبعتلى ورده رمز الموده
لا ليها معنى ولا ليها فايده
غير لما تيجى تدق بابى
جايبلى شبكه وتكتب كتابى
واسمعها منى دا جواب نهائى

تبعت رسايل وكلام جميل
قلبي اليك عمره ما هيميل
غير لما تيجى تدق بابى
جايبلى شبكه وتكتب كتابى
واسمعها منى دا جواب نهائى

28
صالحت بيكي عمري

عنوانـي تـاه واسمـي
بنظـره مـن عنيكـي
وقلبــي راح وفاتني
كـان بيـدور عليكـي
صالحت بيكي عمري
صالحت الدنيا بيكي
مـاعرفـــش إنــه واخدنـي
وشـاددنــي بقــوه ليكــــي
يمكـن رقـــه مشــاعــرك
يمكـن رعشـة ايديكـــــي
صالحت بيكي عمري
صالحت الدنيا بيكي
ضاعــــــت الغربـــــــــه منــــي
ولقيـــــت نفسي فــــ عنيكـي
وعرفـــت ياروحــــــــي إنــــي
مخلــــوق فــ الدنيـــــا ليكــــي
صالحت بيكي عمري .. صالحت الدنيا بيكي

44
مع ضى القمر

شايف عيونك من بعيد
بتتولف مع ضى القمر
والمح بحور الشوق هنا
شوفت القمر تايه حزين
ما يعرفلك ولا حتى المكان
بس انتى خليكى مطرحك
خايف عليكى ليجرحك
ها يفرحك قربك يدوب
الحزن فى بحار الوجع
ولا السنين الجمر دابت
بين الضلوع العشقانين
مش هوه ده المو ضوع
وانت لسه فى الفضا
يبقى الوجع موشوم
وقلبى انا المو جوع
اصرخ واخش الشرنقه
تحلم عيونى با للقا
يعنى النزول للارض
اشبع فى يوم الجوع
الارض ناشفه مشققه
حتى السواقى مشرقه
ها اروى الوجع بالدمع
حتى يكتفى ويقول خلاص
ايبقى الامل وم يختفى
يعنى الامل هيجيله يوم
وتفتحى لى الشرنقه
واتوه انا من فرحتى
وانتى اللى عارفه سكتك
قلبى اللى شقق م الجفا
ها يكون لكى هوه الدفا
وانا لسه راشق نظرتى
فوق فى السما اه يا انا
طب اي حاجه ترجعك
وانا ايوه عارف سكتى
لاجمل بنات الكون بحاله
سبحانه ربى اللى خلق
جايب اساورك والغوايش
والبلوزه الضيقه مع الحلق
لعيون بتصرخ فى القمر
يدارى من خوفة اللى جاى
يبعد وبتبان لعينى سكتى
حتى القمر خايف عيونه تتوجع
لو مرة يسمع همستك
لما تنادينى انا

31
طب ليه يا دنيا

شيلتك والله جوه عنيا
قولت يا دنيا كفايه عليا
لكن الدنيا مالهاش حال
استكترت الحب ده فيا
خلت حبى بقى اوهام
نست قلبى احلى كلام
وضاع الحب مع الايام
حرمت عبن من الاحلام

رسمتلى مكان الفرح جراح
حرمتنى اعيش ويا الافراح
الشوك بلقاه وفى اى مكان
وبنتلى قصور ويا الاحزان
خلت حبى بقى اوهام
نست قلبى احلى كلام
وضاع الحب مع الايام
حرمت عينى من الاحلام

طب ايه ذنبى يا دنيا معاكى
هوه الجرح فى قلبى دواكى
ولا دموع الشوق دى هواكى
نفسى اشوف ضحكه وياكى
خلت حبى بقى اوهام
نست قلبى احلى كلام
وضاع الحب مع الايام
حرمت عينى من الاحلام

قولى يا دنيا ايه يرضيكى
قولى يا دنيا الله يخليكى
خدى اللى ليا كله ليكي
بس الضحكه تبقى عليكى
خليتى حبى بقى اوهام
نسيتى قلبى احلى كلام
وضاع الحب مع الايام
حرمتى عينى من الاحلام

» الشاعر عبد الحليم الزلوعى . اتكلمى
» الشاعر عبد الحليم الزلوعى .الإستقتاء
» الشاعر عبد الحليم الزلوعى . الجحود
» الشاعر عبد الحليم الزلوعى . يا سوسنه
» الشاعر عبد الحليم الزلوعى . اتعلمت الكتابة