عاوزين مدد

اشعار عبد الحليم الزلوعي
مدد مدد

مدد مدد مدد مدد
خلي المدد من غير عدد
لولا المدد يسقط ولد
عين الحسود تمسح جسد
ما تشوف له لون لو اتوجد
لولا المدد تغرق بلد
يبقى العجوز من غير سند
مدد مدد مدد مدد

واحنا الغلابه مع الديابه
واحنا الكتر واحنا الرياده
وهمه يبقوا حبة ديابه
بس الاكاده فيه ديابه بتتولد
علشان بيسرقوا كل حاجه
والفقر صار هوه الوتد
والجوع بيزحف واحتشد
مدد مدد مدد مدد

مسجون وهارب م الليمان
بفانله داخله في اللباس
هربان وطالع يجري حافي
وخاف يدور ع المداس
عاوزينه يعمل ايه في ناسه
شاف رجل مرشد نام وباس
وعلي القانون بلطج وداس
مدد مدد مدد مدد

يا دقن تاجرت في الكتاب
ومع الحدبث مليت خزن
لونتوا نيلها بالهباب
والكل داق طعم المحن
راضيين يا رب بالعقاب
لو مصر راح ترجع وطن
والدود بينخر في العفن
مدد مدد مدد مدد

يا كل مادنه في البلد
ويا الادان باعته المدد
واحنا اللى شايفين التتار
خايفين وفجر بيتولد
كل الغلابه الشقيانين
شايلين هموم ام الولد
حشود هناك من غير عدد
مدد مدد مدد مدد

والكل واقف مطرحه
وما تيجي حاجه تفرحه
سيف الحرامي شرحه
وفيه سؤال وبنطرحه
لحد امتي يكون دا حالنا
وناس يمينا وناس شمالنا
بشماته شافوا كل اللي جالنا
ومدد مدد مدد مدد