قصيدة كرة القدم

قصيدة كرة القدم
=========
منفوخة نفخة بالهوا وتشوطها تطلع فى السما
وغلافها جلد مزوقة تشغل حماس المنطقة
ودى كورة دايرة مدورة واكلة العقول ومحيرة
ويقولوا دورى ويا الكاس وتخش تدفع كل الناس
تدفع فلوسها كده فى الهوا لجلدة منفوخة بالهوا
وتقوم خناقة ومشاجرات فى كل عطفة وكل حارات
فرق بتاخد بالملايين عشانها والناس كده شايفين
والمجد كله للاعيب يسيب دراسته ومش حيخيب
فاتحة بيوت للناس دى كتير فى كل حتة وبالملايين
هواية حلوة وبالتشجيع التراس يقوموا بالترويع
شماريخ ازايز وكمان خراطيش وبطلقة واحدة ايد حتطيش
والماتش يبقى عويل وصريخ والكورة تدخل فى البطيخ
ليه التعصب يااهل الهوا دى جلدة برده ومنفوخة هوا
اخلاق غريبة ومش رياضية تدخل سياسة تضيع غية
ويدفعوا لها رجال اعمال ملايين وتبقى الفرحة بكم
ويقولوا لازم من تمويل والكاس حيبقى للمصريين
لو جزء يبقى من الاموال لو للفقير وشباب تعبان
لتغيرت بينا الاحوال ولا جاع فقير ولا مات انسان
وتبقى الكفالة اجتماعية والكل ياكل ملوخية
والالتراس يزيد فى التصقيف يجعل كلامنا عليهم خفيف
تصقيف وبس بدون تحديف دى رياضة اخلاق مش تكدير
ده البعض منهم بالتمويل يمسك عصاية وكمان سكين
ويبقوا عصابة لرجال اعمال تغيير وقتل وعصا هدام
عمر الرياضة ماتبقى مجال لاغراض خبيثة وكل جبان
دكتور يذاكر سنين وسنين وكوتش ياخد بالملايين
فين العدالة يابنى ادمين فن ورياضة دول كسبانين
والعلم سيبه لعم خميس يلف ويبيعه فى قراطيس
والكون ده مخلوق من عدم زاده وغطى كورة قدم
والنفخ فن ولعب وهندسة تعليم حياة مش مدرسة
والجلدة برده تلف تدور ولا فعل دايم للمغرور
والكون ده كورة ارضية مخلوق بحكمة الاهية
وغلافها قشرة هوائية شمس وهوا وبحور مية
تخسر تذاكر سنين وسنين تلعب وتكسب بالملايين
ده العقل احتار واصطدم بالفن وبكورة قدم

مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون
YSHARAF37@GMAIL.COM- 01005285578

رغم كونى ماللاعبين القدامى الا ان قلمك وصف الحاله الكرويه فى مصر
باسلوب جذاب لايخلو من فكاهة