رسالة إبن متغرب

           رسالة إبن متغرب (تقرأ باللهجه الصعيديه)


أمى يا روحى يا شايلة ف همى
بعد سلامى وشوجى يا أمى
ببعت ليكى ألف سلام
من جلبى المليان بكلام

كيفك يامه وكيف أحوالك؟
إشتاجت والله لأحضانك
بس جريب يامه أنا راجع
أمسح عنك كل أحزانك

ياما أنا جولت لنفسى يا أمى
عمرى ف يوم ما راح أبعد عنك
بس أنا مهما بعدت يا أمى
برضو أنا ببجى جريب منك

والله يا غاليا ما هابعد تانى
وعمرى ما هانسا سهرك ليا
عمرى ما هانسى فى يوم أفضالك
يا أغلى من ضى عنيا

شفت ليالى صعبه يا أمى
شلت حمول ماتشيلها جمال
بس بفضل دعاكى يا أمى
أنا جادر أشيل الأحمال

أنا راجع يامايا جريب
بس أنا مش لسايا صغير
ولدك راجع يرفع راسك
أنا راجع يا مايا كبير

أنا راجع أخدم فى بلادى
بالأفعال مش بس كلام
واللى إتعلم يبنى يا أمى
عمره فى يوم مايكون هدام

أنا عارف يامه إنتى تعبتى
وجاسيتى كتير وإستنيتى
بس أنا جى أحججلك أملك
لجل يجولوا إنك ربيتى

وسلامى لكل أهالينا
اللى نعرفه واللى عارفنا
واللى يسأل عنى جوليله
ولدى راجع يرفع راسنا


بقلم / محمد عطا

هذه هى مشاركتى الأولى فى هذا المنتدى الجميل
أرجو أن تعجبكم.
كما أرجو أن أكون واحد من أسرة هذا المنتدى الراقى.
لكم منى كل التقدير والإحترام.